Te Muamua Nofoaiga Tupu

22 Tenā ne fai atu ei a Tavita: “Tenei te fale o Ieova te Atua tonu, kae tenei te fatafaitaulaga mo fai a taulaga ‵sunu a Isalaelu.”+

2 Ne tuku atu ne Tavita a fakatonuga ke fakamaopoopo fakatasi mai a tino fakaa‵tea+ kolā e ‵nofo i Isalaelu, kae ne ‵tofi aka ne ia latou ke fai pelā me ne tino ‵kati fatu ke ‵kati kae fakagaligali a fatu mo faite te fale o te Atua tonu.+ 3 Ne fakatoka foki ne Tavita a fiti e uke mo fai a fao mo faite a mataloa o ‵pui kae mo fai foki a kalamu, mo kopa e uke ‵ki kolā ko se mafai o fua aka te ‵mafa,+ 4 e pelā foki mo laupapa alasi+ e se mafai o lau, me ne aumai ne tino Saitonu+ mo tino Tulo+ a laupapa alasi e uke ‵ki ki a Tavita. 5 Kae ne fai aka a Tavita: “A taku tama tagata ko Solomona koi foliki kae e se lasi tena mea e iloa,+ kae ko te fale o Ieova telā e ‵tau o faite e ‵tau o fai pelā me se fale tafasili i te gali,+ ko te mea ke iloa ne tino i fenua katoa+ a tena fakaofoofogia mo tena gali.+ Tela la, ka fai ne au a fakatokaga mō ia.” Tenā ne fakatoka ei ne Tavita a mea e uke kae koi tuai o mate a ia.

6 E se gata i ei, ne ‵kami mai ne ia tena tama tagata ko Solomona kae fakatonu atu ki a ia ke faite se fale mō Ieova te Atua o Isalaelu. 7 Ne fai atu a Tavita ki tena tama tagata ko Solomona: “E penei mo au, ne manako malosi toku loto ke faite se fale mō te igoa o Ieova toku Atua.+ 8 Kae ne faipati mai a Ieova ki a au, ‘Ne fakamaligi ne koe a toto e uke, kae uke a taua ‵lasi ne taua koe i ei. E se ‵tau o faite ne koe se fale mō toku igoa,+ me ko oti ne fakamaligi ne koe ki te laukele a toto e uke i oku mua. 9 Kiloke! Ka isi sau tama tagata+ telā ka fai pelā me se tagata o te filemu, kae ka fai ne au ke maua ne ia se malōlōga mai ana fili kolā e fakatamilo i a ia,+ ka fakaigoa a ia ki a Solomona*+ kae ka tuku atu ne au te filemu mo te tokagamalie ki Isalaelu i ana aso.+ 10 Ko ia te tino telā ka faite ne ia se fale mō toku igoa.+ Ka fai a ia mo fai taku tama tagata, kae ka fai au mo fai tena tamana.+ Ka faka‵mautakitaki ne au a te nofogaaliki o tena pulega fakatupu i luga i Isalaelu ki te se-gata-mai.’+

11 “Nei la, e taku tama tagata, ke fakatasi atu faeloa a Ieova ki a koe, kae ke manuia eiloa koe kae faite te fale o Ieova tou Atua, e ‵tusa eiloa mo ana pati ne fai e uiga ki a koe.+ 12 Ko Ieova fua ke tuku atu ne ia te poto mo te malamalama+ māfai ko tuku atu ne ia ki a koe te pulega ki luga i Isalaelu, ko te mea ke mafai o tausi ne koe te tulafono a Ieova tou Atua.+ 13 Kae ka manuia eiloa koe māfai e tausi faka‵lei koe ki tulafono fo‵liki+ mo fakamasinoga kolā ne fakatonu atu ne Ieova ki a Mose ke tuku ki tino Isalaelu.+ Ke loto toa kae loto malosi. Sa mataku io me polepole.+ 14 Ko oti ne logo‵mae malosi au i te fakatokaga o mea mō te fale o Ieova, e 100,000 taleni* aulo kae 1,000,000 taleni siliva mo kopa mo fiti+ e uke ‵ki kolā e se mafai o fua aka te ‵mafa, kae ko oti ne fakatoka ne au a laupapa mo fatu,+ kae ka toe fakaopoopo ne koe a mea konā. 15 E tokouke a tino ga‵lue e ‵nofo mo koe—tino ‵kati fatu, tino faite mea ki fatu,+ tino faite mea ki laupapa mo tino ata‵mai i galuega valevale.+ 16 A aulo, siliva, kopa mo fiti e se mafai o lau.+ Tu ki luga, kae na kamata te galuega, kae ke fakatasi atu eiloa a Ieova ki a koe.”+

17 Tenā ne fakatonu atu ei ne Tavita a pelenise katoa o Isalaelu ke fesoasoani ki tena tama tagata ko Solomona: 18 “E a, e se fakatasi atu a Ieova te otou Atua ki a koutou, kae e a, e seki tuku atu ne ia te malōlōga ki a koutou i feitu katoa? Ne tuku mai ne ia ki a au a tino o te fenua, kae ko oti ne fakatakavale a te fenua i mua o Ieova kae i mua foki o ana tino. 19 Nei la, ke na fakaiku aka mo otou loto kātoa mo otou foitino kātoa ke ‵sala ki a Ieova te otou Atua,+ kae kamata o faite te koga tapuaki o Ieova te Atua tonu,+ ko te mea ke mafai o aumai a te pusa o te feagaiga a Ieova mo meāfale tapu a te Atua tonu+ ki te fale ne faite mō te igoa o Ieova.”+