Te Muamua Tupu

2 I te taimi ko pili ei o mate a Tavita, ne tuku atu ne ia a fakatonuga konei ki tena tama ko Solomona: 2 “Au ko pili o mate.* Tela la, a koe ke malosi+ kae fai pelā me se tagata.+ 3 E ‵tau mo koe o tumau i te fakalogo ki a Ieova tou Atua mai te sasale i ana auala kae tausi ki ana tulafono fakavae, ana fakatonuga, ana fakamasinoga mo ana fakamasauaga kolā e tusi i te Tulafono a Mose;+ ko manuia* ei koe i so se mea e fai ne koe mo so se koga e ‵fuli koe ki ei. 4 Kae ka fakataunu ne Ieova tena tautoga ne fai e uiga ki a au: ‘Kafai e ‵saga tonu au tama tāgata ki olotou auala mai te sa‵sale atu i te fakamaoni i oku mua mo olotou loto kātoa mo olotou foitino kātoa,+ ka isi faeloa se tagata i tou gafa* e sagasaga i luga i te nofogaaliki o Isalaelu.’+

5 “E iloa ‵lei foki ne koe a te mea ne fai ne Ioapo te tama tagata a Seluia ki a au, te mea ne fai ne ia ki takitaki kautau e tokolua o Isalaelu​—ko Apinelu+ te tama tagata a Nelu mo Amasa+ te tama tagata a Ietela. Ne tamate ne ia lāua, kae fakamaligi ne ia a toto+ i te taimi e seai ei se taua, kae tuku ne ia a toto o te taua ki luga i te fusi i tena taugasulu mo taka i ana vae. 6 E ‵tau mo koe o gasuesue mo te poto kae ke mo a eiloa ma talia ne koe ke fanaifo a tena ulu sinā mo te filemu ki te Tanuga.*+

7 “Kae ki tama tāgata a Pasilai+ te tino Kileata, e ‵tau o fakaasi atu ne koe te alofa fakamaoni, kae e ‵tau o aofia latou i tino kolā e ‵kai i tau taipola, me tenā te auala ne ‵lago mai ei latou ki a au+ i te taimi ne tele kea‵tea ei au mai tou taina ko Apisaloma.+

8 “E isi foki se tino e igoa ki a Simei e nofo atu i konā, ko te tama tagata a Kela te tino Peniamina mai Paulima. Ko ia ne fakamalaia ne ia au ki pati fakamalaia+ sē ‵tau i te aso ne fano ei au ki Manaima;+ kae i te taimi ne vau ei a ia o fakafetaui ki a au i te Iolitana, ne tauto atu au ki a ia i te igoa o Ieova: ‘Ka se tamate ne au koe ki te pelu.’+ 9 Ke mo a eiloa e tiaki ne koe a ia kae e se fakasala,+ me i a koe se tagata poto kae e iloa ne koe a te mea e ‵tau o fai ki ei; e ‵tau mo koe o tuku ifo tena ulu sinā ki lalo i te Tanuga* fakatasi mo toto.”+

10 Tenā ne takato ifo ei a Tavita o malō‵lo fakatasi mo ana tupuga kae ne tanu i te Fakai o Tavita.+ 11 A te leva o te pulega a Tavita i Isalaelu e ‵tusa mo te 40 tausaga. Ne pule atu a ia i tausaga e 7 i Hepelona,+ kae e 33 tausaga ne pule ei a ia i Ielusalema.+

12 Ne sagasaga a Solomona i te nofogaaliki o tena tamana ko Tavita, kae ne gasolo aka faeloa o ‵mautakitaki a tena pulega fakatupu.+

13 Fakamuli ifo, ne vau a Atonia te tama tagata a Hakita ki a Patisepa, te mātua o Solomona. Ne fesili atu tou fafine: “A koe e vau mo te filemu?” Ne tali mai a ia: “Ao, au e vau mo te filemu.” 14 Tenā ne fai atu ei tou tagata: “E isi se mea e manako au o fai atu ki a koe.” Kae ne fai atu tou fafine: “Faipati mai.” 15 Ne fai atu a ia: “E iloa ‵lei ne koe i te pulega fakatupu ne ‵tau o puke ne au, kae ne fakamoe‵moe* a Isalaelu kātoa ke fai au mo tupu;+ kae ne mafuli a te pulega fakatupu kae puke ne toku taina, me ko te loto eiloa o Ieova ke puke ne ia te pulega fakatupu.+ 16 Kae e tasi fua taku fakamolemole ki a koe. Sa afuli la ne koe au kea‵tea.” Tenā ne fai atu ei tou fafine: “Faipati mai.” 17 Ne fai atu tou tagata: “Fakamolemole, faipati aka ki a Solomona te tupu​—me ka se afuli ne ia koe kea‵tea​—ke tuku mai a Apiseka+ te tino Sunema mo fai taku avaga.” 18 Ne fai atu a Patisepa: “Ko ‵lei la! Ka faipati eiloa au ki te tupu mō koe.”

19 Tenā ne fanatu ei a Patisepa ki te Tupu ko Solomona o faipati ki ei mō Atonia. I konā eiloa ne tu aka te tupu o fakafetaui ki tou fafine kae ifo atu ki ei. Oti aka, sagasaga ei ki tena nofogaaliki kae fakatoka foki se nofogaaliki mō te mātua o te tupu, ko te mea ke sagasaga i tena feitu fakaatamai. 20 Tenā ne fai atu ei tou fafine: “E isi se tamā fakamolemole e fia fai atu ne au ki a koe. Sa afuli la ne koe au kea‵tea.” Ne fai atu te tupu ki ei: “Fai mai, e toku mātua; ka se afuli ne au koe kea‵tea.” 21 Ne fai atu tou fafine: “Tuku atu a Apiseka te tino Sunema mo fai te avaga a tou taina ko Atonia.” 22 Ne tali atu a te Tupu ko Solomona ki tena mātua: “Kaia e fakamolemole mai ei koe ke tuku atu Apiseka te tino Sunema ki a Atonia? Kāti e ‵lei foki ke fakamolemole mai koe ke tuku atu ki ei a te pulega fakatupu,+ me i a ia ko toku taina matua,+ kae ko Aviata te faitaulaga mo Ioapo+ te tama tagata a Seluia+ e ‵lago atu ki a ia.”

23 I konā ne tauto atu ei te Tupu ko Solomona i te igoa o Ieova: “Ke fakasala eiloa au ne te Atua kae fakaopoopo atu foki ki ei māfai e se mate a Atonia, ona ko tena fakamolemole tenei. 24 I te taimi nei, e pelā eiloa mo Ieova e ola, telā ne faka‵mautakitaki ne ia au+ kae fai ne ia au ke sagasaga i te nofogaaliki o toku tamana ko Tavita kae ne faite foki ne ia se fale* mō oku,+ e pelā eiloa mo tena tautoga, ka tamate eiloa a Atonia+ i te aso nei.” 25 Ne uga fakavave atu ne te Tupu ko Solomona a Penaia+ te tama tagata a Ieoiata, telā ne fano kae ta ne ia a Atonia, mate ei a ia.

26 Ne fai atu a te tupu ki a Aviata+ te faitaulaga: “Fano ki ou laukele i Anatota!+ A koe e ‵tau o mate, kae ka se tamate ne au koe i te aso nei me ne ave ne koe a te Pusa a te Aliki Sili ko Ieova i mua o Tavita toku tamana+ kae ne aofia foki koe i fakalavelave katoa kolā ne logo‵mae ei toku tamana.”+ 27 Tenā ne afuli ei kea‵tea ne Solomona a Aviata mai te tavini atu e pelā me se faitaulaga a Ieova, ke fakataunu a pati a Ieova ne fai e uiga ki te fale o Eli+ i Sailo.+

28 I te logoga a Ioapo i te tala tenā—i a Ioapo ne ‵lago ki a Atonia+ kae e seki ‵lago ki a Apisaloma+—ne tele a Ioapo ki te faleie o Ieova+ kae puke ‵mau ki suki o te fatafaitaulaga. 29 Tenā ne fakailoa atu ei ki te Tupu ko Solomona: “A Ioapo ko oti ne tele ki te faleie o Ieova, kae tenā e nofo i tafa o te fatafaitaulaga.” Ne uga atu ne Solomona a Penaia te tama tagata a Ieoiata, ana muna: “Fano o tamate a ia!” 30 Ne fanatu a Penaia ki te faleie o Ieova kae fai atu ki ei: “Konei a pati a te tupu, ‘Vau ki tua!’” Kae ne fai mai tou tagata: “Ikai! Au e mate i konei.” Ne fakaoko atu ne Penaia a pati konā ki te tupu: “Konei a pati ne fai mai ne Ioapo, kae tenei tena tali ki a au.” 31 Kae ne fai atu te tupu ki a ia: “Fai a te mea ne fai mai a ia ke fai, tamate a ia kae tanu kae ave kea‵tea mai i a au mo te fale o toku tamana a toto kolā ne fakamaligi ne Ioapo i auala sē ‵tonu.+ 32 Ka toe fakafoki atu ne Ieova ana toto ki luga i tena ulu, me e aunoa mo te iloa ne toku tamana ko Tavita, ne ‵ta kae tamate ne ia ki te pelu a tāgata e tokolua kolā e amio‵tonu kae ‵lei atu i a ia: ko Apinelu+ te tama tagata a Nelu, te takitaki o te kautau o Isalaelu,+ mo Amasa+ te tama tagata a Ietela, te takitaki o te kautau o Iuta.+ 33 Ka fakafoki atu a toto o lāua ki te ulu o Ioapo mo ulu o ana tama* ke oko ki te se-gata-mai;+ kae pelā mo Tavita, tena tama, tena fale, mo tena nofogaaliki, ke maua eiloa ne latou te filemu mai i a Ieova ke oko ki te se-gata-mai.” 34 Tenā ne fano ei a Penaia te tama tagata a Ieoiata o ta a Ioapo kae tamate ne ia, kae ne tanu a ia i tena fale i te koga lavaki. 35 Tenā ne fakasopo aka ei ne te tupu a Penaia+ te tama tagata a Ieoiata ke pule atu ki te kautau ke sui ei a ia, kae ne fakasopo aka foki ne te tupu a Satoka+ te faitaulaga ke sui ei a Aviata.

36 Kae ne ‵kami mai ne te tupu a Simei+ kae fai atu ki ei: “Faite se fale mō koe i Ielusalema, kae nofo i ei; sa tiaki ne koe te koga tenā o fano ki se isi koga. 37 I te aso eiloa e fano ei koe kea‵tea kae fanatu ki te suā feitu o te Vanu o Ketalono,+ e iloa eiloa ne koe i a koe ka mate. Ka i luga i tou ulu ou toto. 38 Ne tali atu a Simei ki te tupu: “A pati ne fai mai ne koe e ‵lei. Ka fai eiloa ne tau tavini a mea ne fai mai ne toku aliki te tupu.” Tenā ne nofo ei a Simei i Ielusalema i aso e uke.

39 I te fakaotiga o tausaga e tolu, ne ‵tele kea‵tea a pologa e tokolua a Simei ki a Akisa+ te tama tagata a Maaka te tupu o Kata. I te faiatuga ki a Simei, penei: “Kiloke! Au pologa kolā e ‵nofo i Kata,” 40 ne fakatoka fakavave ne Simei ana asini kae fano ki a Akisa i Kata o ‵sala ana pologa. I te ‵fokimaiga a Simei mo ana pologa mai Kata, 41 ne fakailoa atu ki a Solomona, penei: “A Simei ne fano mai Ielusalema ki Kata kae ko oti ne toe foki mai.” 42 I konā eiloa ne ‵kami mai ne te tupu a Simei kae fai atu ki ei: “E a, ne seki fai atu au ke tauto mai koe i te igoa o Ieova kae fakailoa atu foki ki a koe: ‘I te aso eiloa e fano ei koe kea‵tea mai te koga tenei ki so se koga, e iloa eiloa ne koe i a koe ka mate’? Kae e a, e seki fai mai koe ki a au, ‘A te mea e fai mai ne koe e ‵lei; ka fakalogo eiloa au ki ei’?+ 43 Kaia la e seki tausi ei koe ki te tautoga ne fai i mua o Ieova mo te fakatonuga ne fai atu ne au ki a koe?” 44 Tenā ne fai atu ei te tupu ki a Simei: “E iloa eiloa ne koe i tou loto a mea fakalogo‵mae ne fai ne koe ki a Tavita toku tamana,+ kae ka toe fakafoki mai ne Ieova a te logo‵mae tenā ki luga i tou ulu.+ 45 Kae ko te Tupu ko Solomona ka fakamanuiagina,+ kae ko te nofogaaliki o Tavita ka faka‵mautakitaki eiloa i mua o Ieova ke oko ki te se-gata-mai.” 46 I konā, ne fakatonu atu te tupu ki a Penaia te tama tagata a Ieoiata, tenā ne fano ei a ia o ta tou tagata, mate ei a ia.+

Tela la, ne faka‵mautakitaki eiloa a te malo i lima o Solomona.+