Te Muamua Tupu
3 Ne fai ne Solomona se feagaiga fakataugasoa mo te Falao te tupu o Aikuptio. Ne avaga a ia mo te tamaliki fafine+ a te Falao kae olo mo ia ki te Fakai o Tavita+ ke oko ki te taimi ko palele ei ne faite tena fale,+ mo te fale o Ieova,+ mo ‵pui e fakatamilo i Ielusalema.+ 2 Kae ko tino koi ofo atu eiloa olotou taulaga i koga ma‵luga,+ me i te taimi tenā e seki ai se fale ne faite mō te igoa o Ieova.+ 3 Ne tumau eiloa a te alofa o Solomona ki a Ieova mai te sasale i tulafono fakavae kolā ne tuku atu ne tena tamana ko Tavita, kae ko te mea fua koi ofo atu eiloa ne ia a taulaga kae fai ne ia ke fanaka te au i luga i koga ma‵luga.+
4 Ne fano te tupu ki Kipeona o ofo atu a taulaga i konā, me tenā te ‵toe koga maluga takutakua.+ Ne ofo atu ne Solomona e 1,000 a taulaga ‵sunu i luga i te fatafaitaulaga tenā.+ 5 Ne fakasae atu a Ieova ki a Solomona i Kipeona i se moemiti i te po, kae ne fai atu te Atua: “Fai mai a te mea telā e manako koe ke tuku atu ne au.”+ 6 Tenā ne fai atu ei a Solomona: “Ko oti ne fakaasi mai ne koe te lasi o tou alofa fakamaoni ki tau tavini ko Tavita toku tamana i te taimi ne sasale ei a ia i ou mua i te fakamaoni mo te amiotonu mo te fai mea tonu i tena loto. Ne tumau eiloa koe i te fakaasi atu ki ei a te lasi o tou alofa fakamaoni ke oko mai ki te aso nei mai te tukuatuga ki a ia se tama tagata ke sagasaga i tena nofogaaliki.+ 7 Kae nei la, e Ieova toku Atua, ko oti ne fai ne koe tau tavini mo fai te tupu ke sui ei a Tavita toku tamana, faitalia me koi talavou* fua au kae e se lasi toku iloa.*+ 8 A tau tavini e aofia i ou tino kolā ne filifili ne koe,+ ko tino e tokouke kolā e se mafai o iloa io me lau aka te aofaki o latou. 9 Tela la, ke na tuku mai aka ki tau tavini te loto fakalogo ke fakamasino ou tino,+ ke iloa ne au te mea ‵lei mo te mea masei,+ me ko oi te tino e mafai o fakamasino ne ia ou tino e tokouke* konei?”
10 Ne fiafia a Ieova ki te fakamolemole tenei a Solomona.+ 11 Tenā ne fai atu ei te Atua ki a ia: “Ona ko koe ne fakamolemole mai ki te mea tenei kae seki fakamolemole mai koe ke maua se olaga loa* io me ko koloa io me ko te ‵mate o ou fili, kae ne fakamolemole mai koe ke maua te malamalama ke mafai o fai a fakamasinoga,+ 12 ka fai eiloa ne au te mea ne manako mai koe ki ei.+ Ka tuku atu ne au ki a koe te poto mo te loto malamalama,+ me e pelā mo aso mua e seai eiloa se tino ne ‵pau mo koe, ka seai foki eiloa se tino e ‵pau mo koe.+ 13 E se gata i ei, a mea kolā e seki fakamolemole mai koe ki ei ka tuku atu ne au ki a koe,+ ko koloa mo te ‵malu,+ ko te mea ke seai se isi tupu e ‵pau mo koe i tou olaga kātoa.+ 14 Kae kafai e sasale koe i oku auala mai te fakalogo ki aku tulafono mo aku fakatonuga, e pelā eiloa mo te auala ne sasale i ei a tou tamana ko Tavita,+ ka fai foki ne au koe ke ola leva.”+
15 I te alaakaga a Solomona, ne iloa ne ia i te mea tenā se moemiti. Tenā ne fano ei a ia ki Ielusalema o tu i mua o te pusa o te feagaiga a Ieova kae ofo atu a taulaga ‵sunu mo taulaga ‵kai fakatasi+ kae fai se ‵kaiga ki ana tavini katoa.
16 I te taimi tenā ne o‵mai a fāfine talitāgata e tokolua ki te tupu kae ‵tu atu i ana mua. 17 Ne fai mai te fafine muamua: “Fakamolemole e toku aliki, a māua mo te fafine tenei e ‵nofo i te fale e tasi, ne fanau au kae e nofo tou fafine i loto i te fale. 18 I te tolu o aso i taku otiga ne fanau, ne fanau foki te fafine tenei. A māua ne ‵nofo tasi, ko māua eiloa tokolua; e seai aka foki se tino ne ‵nofo mo māua i te fale. 19 I te po tenā ne mate te tamaliki tagata a te fafine tenei, me ne ‵tao ne ia tena tama. 20 Ne tu aka tou fafine i te valuapo kae puke ne ia taku tamaliki tagata mai oku tafa i te taimi ne tō ‵ki ei te moe o tau tavini fafine, kae fakamoe ne ia i ana lima, kae fakamoe ne ia tena tamaliki tagata ko mate i oku lima. 21 I taku alaakaga i te tafataeao o faū taku tama, ne lavea ne au me ko mate. Ne onoono faka‵lei atu au ki ei i te tafataeao kae lavea ne au me e se ko taku tamaliki tagata telā ne fanau ne au.” 22 Kae ne fai atu te suā fafine: “Ikai, a taku tama tenei eiloa e ola, kae ko tau tama tenā ko mate!” Kae ne fai atu te fafine muamua: “Ikai, a tau tama tenā ko mate, kae ko taku tama tenei e ola.” Ne kinau eiloa lāua penā i mua o te tupu.
23 Oti aka ne fai atu te tupu: “E fai mai te tino tenei, ‘A taku tama tenei e ola, kae ko tau tama tenā ko mate!’ kae fai mai te suā tino, ‘Ikai, a tau tama tenā ko mate, kae ko taku tama tenei e ola!’” 24 Muna a te tupu: “Aumai se pelu ki a au.” Tenā ne aumai ei ne latou te pelu ki te tupu. 25 Ne fai atu te tupu: “‵Kati te tamaliki tenā e ola ki vaega e lua, tuku atu te āfa ki te fafine e tokotasi kae āfa ki te suā fafine.” 26 I konā eiloa ne fakamolemole atu ki te tupu a te fafine i a ia te tamaliki telā e ola, me ko oko eiloa tou fafine i te alofa i tena tamaliki tagata. Ana muna: “Toku aliki, fakamolemole! E ‵tau o tuku atu ne koe a te tamaliki tenā e ola ki tou fafine! Sa tamate a ia!” Kae ne fai aka te suā fafine: “Ka se fai te tamaliki tenā ma aku io me ma koe! Tuku atu ei ke ‵kati lua ne latou!” 27 Tenā ne tali atu ei te tupu: “Tuku a te tamaliki tenā e ola ki te fafine muamua! Sa tamate a ia, me tenā eiloa tena mātua.”
28 Ne ‵logo a Isalaelu kātoa i te fakamasinoga ne fai ne te tupu, kae ne ofo* latou i te tupu,+ me ne lavea ne latou me ko maua ne ia te poto o te Atua ke fai ei a fakamasinoga ‵tonu.+