Te Muamua Tupu

11 Kae ko te Tupu ko Solomona ne fiafai ki fāfine e tokouke mai fenua fakaa‵tea+ i tafa o te tama fafine a te Falao:+ ko fāfine Moapi,+ Amoni,+ Etoma, Saitonu+ mo Heti.+ 2 A latou ne tino mai fenua kolā ne fai atu a Ieova ki tino Isalaelu penei: “E se ‵tau mo koutou o fai mea fakatasitasi mo latou,* kae e se ‵tau foki mo latou o fai mea fakatasitasi mo koutou, me e mautinoa eiloa me ka ‵fuli ne latou otou loto ke tau‵tali i olotou atua.”+ Kae ko Solomona ne ‵piki ‵mau eiloa ki a latou kae alofa foki ki a latou. 3 E ‵tusa mo te toko 700 ana avaga kolā ne pulinisese kae 300 ana avaga fakasalasala, kae ne ‵fuli malielie ne ana avaga a tena loto.* 4 I te taimi ko matua ei a Solomona,+ ne ‵fuli* eiloa ne ana avaga a tena loto ke tautali i nisi atua,+ kae ne seki katoatoa tena loto ki* a Ieova tena Atua e pelā mo te loto o Tavita tena tamana. 5 Ne tautali a Solomona i a Asitate,+ te atua fafine o Saitonu, mo Milikoma,+ te atua fakatakalialia o tino Amoni. 6 Kae ne fai ne Solomona a mea ma‵sei i te kilokiloga a Ieova, kae ne seki tautali katoatoa atu a ia i a Ieova e pelā mo te mea ne fai ne tena tamana ko Tavita.+

7 Ko te taimi eiloa tenā ne faite ei ne Solomona se koga maluga+ mō Kemoso, te atua fakatakalialia o Moapi, i luga i te mauga i mua o Ielusalema penā foki loa mo Moleka,+ te atua fakatakalialia o tino Amoni.+ 8 Tenā te mea ne fai sāle ne ia mō ana avaga mai fenua fakaa‵tea kolā e ofo atu ne latou a mea ma‵nogi kae fai olotou taulaga ki olotou atua.

9 A Ieova ne kaitaua malosi ki a Solomona, me ko ‵fuli kea‵tea tena loto mai i a Ieova te Atua o Isalaelu,+ telā ne fakasae fakalua atu ki a ia+ 10 kae ne fakatonu atu ki a ia e uiga ki te mea eiloa tenei, ke mo a ma tautali atu a ia i nisi atua.+ Kae ne seki fakalogo eiloa a ia ki te fakatonuga a Ieova. 11 Ne fai atu a Ieova ki a Solomona: “Ona ko te mea tenei ne fai ne koe kae ne seki tausi koe ki taku feagaiga mo aku tulafono fakavae e pelā mo taku fakatonuga ki a koe, ka ‵sae kea‵tea ne au a te malo mai i a koe, kae ka tuku atu ne au ki se tino e tokotasi mai i au tavini.+ 12 Kae ona ko tou tamana ko Tavita ka se fai ne au te mea tenā i te taimi e ola ei koe. Ka ‵sae kea‵tea ne au mai i lima o tau tama tagata,+ 13 kae ka se ‵sae kea‵tea ne au a te malo kātoa.+ Ka ave ne au te matakāiga e tasi ki tau tama tagata,+ ona ko taku tavini ko Tavita e pelā foki mo Ielusalema, telā ne filifili ne au.”+

14 Tenā ne fakatu aka ei ne Ieova se tino ke ‵teke ki a Solomona,+ ko Hatata te tino Etoma, mai te kaigā tupu o Etoma.+ 15 I te taimi ne fakatakavale ei ne Tavita a Etoma,+ ne fanatu a Ioapo te takitaki o te kautau o tanu a tino kolā ne tamate i ei, kae ne taumafai a ia o tamate a tāgata katoa i Etoma. 16 (A Ioapo mo Isalaelu kātoa ne ‵nofo i konā i masina e ono ke oko ki te taimi ko oti ei ne tamate ne ia a tāgata katoa i Etoma.) 17 Kae ko Hatata ne ‵tele kea‵tea mo nisi tavini Etoma a tena tamana, kae ne olo atu latou ki Aikupito; a Hatata i te taimi tenā koi tamaliki. 18 Ne tiaki ne latou a Mitiana kae olo atu ki Palana. Ne puke ne latou ne tāgata mai Palana+ kae olo atu ki Aikupito, ki te Falao te tupu o Aikupito, telā ne tuku atu ne ia ki ei se fale, avatu ne ia ne meakai, kae tuku atu se laukele mō ia. 19 Ne fiafia eiloa a te Falao ki a Hatata, tenā ne talia ei ne ia tou tagata ke avaga mo te taina o tena avaga, ko Tapenesi te tupu fafine.* 20 Fakamuli ifo, ne fanau ne te taina o Tapenesi se tama tagata ma tou tagata, ko Kenupata, kae ne tausi ne Tapenesi a te tamaliki tenā i loto i te fale o te Falao, kae ne nofo eiloa a Kenupata i loto i te fale o te Falao fakatasi mo tama tāgata a te Falao.

21 Ne logo a Hatata i Aikupito me ko oti ne tanu a Tavita fakatasi mo ana tupuga+ kae ko Ioapo te takitaki kautau ko oti foki ne mate.+ Tenā ne fai atu ei a Hatata ki te Falao: “Tuku mai au ke fano, ko te mea ke fano au ki toku fenua.” 22 Kae ne fai atu a te Falao ki a ia: “Se a te mea ne seki maua ne koe mai i a au tenā ko fai ei koe ke fano ki tou fenua?” Ne fai atu a ia: “E seai, fakamolemole tuku mai au ke fano.”

23 Ne fakatu aka foki ne te Atua te suā tino ke ‵teke atu ki a Solomona,+ ko Lesona te tama tagata a Eliata, telā ne tele kea‵tea mai tena aliki ko Hatatesa+ te tupu o Sopa. 24 Ne fakamaopoopo ne ia a tāgata ki a ia kae ne fai a ia mo takitaki o se potukau o tino ‵fao mea i te taimi ne fakatakavale* ei latou ne Tavita.+ Ne olo atu latou ki Tamaseko+ kae ‵nofo i ei kae kamata o pule atu ki Tamaseko. 25 Kae ne ‵teke atu faeloa a ia ki Isalaelu i aso katoa o Solomona, e fakaopoopo atu ei ki fakamaseiga ne fai ne Hatata, kae ne takalialia a ia ki Isalaelu i te taimi ne pule ei a ia ki Sulia.

26 E isi foki se tino e igoa ki a Ielopoamo+ te tama tagata a Nepata, se tino Efalaima mai Sieleta, se tavini a Solomona+ kae ko te igoa o tena mātua ko Selua, se fafine ko mate tena avaga. Ne kamata foki a ia o ‵teke atu ki te tupu.+ 27 Tenei te pogai ne ‵teke atu ei a ia ki te tupu: Ko oti ne faite ne Solomona a te Koga Maluga*+ kae ‵pono ne ia te pūga ki te Fakai o Tavita tena tamana.+ 28 A Ielopoamo se tagata malosi. I te laveaga ne Solomona me i te tamataene tenā se tagata e galue malosi, ne fai ne ia tou tagata mo fai te ovasia+ i galuega katoa i loto i te matakāiga o Iosefa. 29 I te taimi tenā, a Ielopoamo ne fano ki tua mo Ielusalema, kae ne maua a ia ne te pelofeta ko Aita+ te tino Sailo i te auala. A Aita e pei ki se gatu fou, kae ko lāua tokolua fua i te malae. 30 Ne puke ne Aita a te gatu fou telā ne pei a ia ki ei kae saesae ki vaega e 12. 31 Tenā ne fai atu ei a ia ki a Ielopoamo:

“Puke e sefulu a vaega ma koe, me konei a pati a Ieova te Atua o Isalaelu ne fai: ‘Ka ‵sae ne au a te malo mai i lima o Solomona, kae ka tuku atu ne au ki a koe a matakāiga e sefulu.+ 32 Kae e tasi te matakāiga ka nofo eiloa mo ia+ ona ko taku tavini ko Tavita+ e pelā foki mo Ielusalema, te fakai ne filifili ne au mai matakāiga katoa o Isalaelu.+ 33 Ka fai ne au a te mea tenei me ko oti ne tiaki ne latou au+ kae ko ifo ki a Asitate te atua fafine o tino Saitonu, ki a Kemoso te atua o Moapi mo Milikoma te atua o tino Amoni, kae ne seki sa‵sale latou i oku auala mai te faiga o te mea telā e tonu i taku kilokiloga kae faka‵logo ki aku tulafono fakavae mo aku fakamasinoga e pelā mo mea ne fai ne tena tamana ko Tavita. 34 Kae ka se puke kea‵tea ne au a te malo kātoa mai i ana lima, kae ka fai ne au a ia e pelā me se takitaki i aso katoa o tena olaga ona ko Tavita taku tavini telā ne filifili ne au,+ me ne fakalogo a ia ki aku fakatonuga mo aku tulafono fakavae. 35 Kae ka puke kea‵tea ne au a te pulega fakatupu mai i lima o tena tama tagata kae tuku atu ki a koe, ko tena uiga, ko matakāiga e sefulu.+ 36 Ka tuku ne au ki tena tama tagata a te matakāiga e tasi, ko te mea ke isi faeloa se tino e pule mai te gafa* o Tavita taku tavini i Ielusalema,+ te fakai ne filifili ne au mo fai te koga ke tuku i ei toku igoa. 37 Ka filifili ne au a koe, kae ka pule atu koe ki koga katoa e manako koe ki ei, kae ka fai koe mo tupu i luga i Isalaelu. 38 Kae kafai e fakalogo koe ki aku fakatonuga katoa, kae sasale i oku auala kae fai te mea telā e tonu i taku kilokiloga mai te fakalogo ki aku tulafono fakavae mo aku fakatonuga, e pelā eiloa mo taku tavini ko Tavita,+ ka fakatasi atu foki au ki a koe. Ka fakatumau ne au tau pulega fakatupu, e pelā eiloa mo te mea ne fai ne au ki a Tavita,+ kae ka tuku atu ne au a Isalaelu ki a koe. 39 Kae ka fakamasiasi ne au a tama a Tavita ona ko te mea tenei,+ kae ka se fai faeloa penā.’”+

40 Tenā ne taumafai ei a Solomona o tamate a Ielopoamo, kae ko Ielopoamo ne tele ki Aikupito, ki a Sesaka+ te tupu o Aikupito,+ kae nofo a ia i Aikupito ke oko ki te taimi ne mate atu ei a Solomona.

41 Kae ko te tala fakasolopito kātoa o Solomona, ana mea katoa ne fai mo tena poto, e a, e se tusi katoa i te tusi o tala fakasolopito o Solomona?+ 42 A te leva o te pulega a Solomona i Ielusalema ki luga i Isalaelu kātoa e 40  tausaga. 43 Tenā ne takato ifo ei a Solomona o malō‵lo fakatasi mo ana tupuga kae ne tanu i te Fakai o Tavita tena tamana; kae ko tena tama tagata ko Leopoamo+ ne fai mo tupu e sui ei a ia.