Iopu
42 Tenā ne tali atu ei a Iopu ki a Ieova:
2 “Nei la, ko iloa ne au me mafai ne koe o fai a mea katoa
Kae seai se mea ne mafaufau koe o fai e se mafai o fai ne koe.+
3 Ne fai mai koe, ‘Ko oi te tino tenei e faka‵numi ne ia aku pati fakatonutonu e aunoa mo te iloa?’+
Tela la, au ne faipati e aunoa mo se malamalama
E uiga ki mea kolā ko tō fakaofoofogia ki a au, kolā e se iloa ne au.+
4 Ne fai mai koe, ‘Fakamolemole fakalogo mai, kae ka faipati atu au.
Ka fesili atu au ki a koe, kae fakamatala mai ne koe ki a au.’+
5 Ne ‵logo oku taliga e uiga ki a koe,
Kae nei ko lavea ne au koe ki oku mata.
7 I te otiga ne faipati atu ne Ieova a pati konei ki a Iopu, ne fai atu a Ieova ki a Elifasa te tino Timanu:
“A toku kaitaua ko ‵ka eiloa ki a koe mo ou taugasoa e tokolua,+ me ne seki faipati ne koutou te mea tonu e uiga ki a au+ e pelā mo taku tavini ko Iopu. 8 Nei la, puke e fitu pulumakau tāgata mo mamoe e fitu kae olo atu ki taku tavini ko Iopu ke ofo atu i ei se taulaga ‵sunu mō koutou. Kae ko taku tavini ko Iopu ka ‵talo mō koutou.+ Ka talia eiloa ne au tena fakatagi* ke mo a ma fai se mea ona ko te otou fakavale‵vale, me ne seki faipati ne koutou te mea tonu e uiga ki a au e pelā mo taku tavini ko Iopu.”
9 Tenā ne olo ei a Elifasa te tino Timanu, Pilitati te tino Suaa, mo Sofala te tino Naama kae fai ne latou a mea ne fai atu ne Ieova ke fai. Kae ne talia ne Ieova te ‵talo a Iopu.
10 I te otiga o te ‵talo a Iopu mō ana taugasoa,+ ne tapale kea‵tea ne Ieova a fakalavelave o Iopu+ kae toe fakafoki atu ki ei tena manuia. Ne tapolo atu ne Ieova a te uke o ana mea ne maua i lō ana mea muamua.+ 11 Ana taina katoa mo ana tuagane mo ana taugasoa mua+ katoa ne o‵mai ki a ia kae ‵kai fakatasi mo ia i tena fale. Ne fakaasi atu ne latou te lotou a‵lofa ki a ia kae ne fakamafanafana atu ki a ia e uiga ki puapuaga katoa kolā ne talia ne Ieova ke oko atu ki a ia. Ne tuku atu ne latou taki tokotasi katoa se tupe mo se mama aulo ki a ia.
12 Ne fakamanuia ne Ieova a te vaega fakaoti o te olaga o Iopu e sili fakafia atu i te kamataga,+ kae ne maua ne Iopu e 14,000 mamoe, 6,000 kamela, 1,000 ‵pea pulumakau kae 1,000 asini fāfine.+ 13 Ne maua foki ne ia e tokofitu tama tāgata kae tokotolu tama fāfine.+ 14 Ne fakaigoa ne ia te tama fafine muamua ko Iemaima, te tokolua ko Kesia kae ko te tokotolu ko Kelena-hapuka. 15 E seai ne fāfine i te fenua kātoa e tino‵gali e pelā mo tama fāfine a Iopu, kae ne tuku atu ne te lotou tamana olotou tofi fakatasi mo olotou tuagane.
16 Mai tua ifo i ei, ne ola a Iopu i tausaga e 140, kae ne lavea ne ia ana tama mo ana mokopuna—i te fa o kautama. 17 Fakamuli loa, ne mate a Iopu, mai tua o se olaga loa kae fakamalie loto.