Fakatomuaga

A TE tusi tenei se tusi o tala ‵tonu. Ne puke mai a tala konei i te ‵toe tusi lauiloa i te lalolagi, ko te Tusi Tapu. E tuku atu ne tala konei ki a koe se tala fakasolopito o te lalolagi mai te taimi ne kamata ei te faitega-o-mea ne te Atua ke oko eiloa ki ‵tou aso nei. E fai mai foki i ei e uiga ki mea kolā ne folafola mai ne te Atua me ka fai ne ia i aso mai mua nei.

E fesoasoani mai a te tusi tenei ke maina koe i te uiga fakavae o te Tusi Tapu. E fai mai i ei e uiga ki tino i te Tusi Tapu mo mea ne fai ne latou. E fakaasi mai foki i ei a te fakamoemoega fakaofoofogia o te ola se-gata-mai i se lalolagi palataiso telā ne tuku mai ne te Atua ki tino.

E 116 a tala i te tusi. Ne ‵vae aka a tala konā ki vaega e valu. E fakaasi fakatoetoe mai i te itulau muamua o vaega takitasi a mea kolā e maua i te vaega tenā. E fakasolo mai a tala e ‵tusa mo te taimi ne ‵tupu ei a mea konā i tala fakasolopito. E fesoasoani atu a te mea tenei ki a koe ke tauloto ki te taimi ne ‵tupu ei a mea i tala fakasolopito, e ‵tusa mo olotou sokoga ki nisi mea ne ‵tupu.

E fakamatala mai a tala i pati faigo‵fie. E tokouke koutou, tama‵liki fo‵liki, ka mafai o fai‵tau ki ei i a koutou eiloa. Ka iloa aka ne koutou, e mātua, me ka fia‵fia otou tama‵liki kolā e fo‵liki ifo ke fakalogo‵logo ki tala konei e faitau fakafia atu ki a latou. Ka iloa aka ne koutou me e uke a mea aogā i te tusi tenei mō tama‵liki fo‵liki e pelā foki mo tino ma‵tua.

A tusi siki kolā e maua i te Tusi Tapu e tuku mai i fakaotiga o tala takitasi. E fakamalosi atu ki a koe ke faitau ki vaega konei o te Tusi Tapu kolā e fakavae ki ei a tala.