Te Faitega-o-Mea ke Oko ki te Lolo

Ne māfua mai i fea a te lagi mo te lalolagi? Ne māfua mai pefea a te la, te masina, mo fetu, pelā foki mo mea e uke i te lalolagi? E tuku mai ne te Tusi Tapu a te tali tonu i tena faimaiga me ne faite ne te Atua a mea konā. Tela la, e kamata te ‵tou tusi ki tala mai te Tusi Tapu e uiga ki te faitega-o-mea.

E tau‵loto tatou me i mea muamua ne faite ne te Atua, ko tino faka-te-agaga pelā mo ia. A latou ko agelu. Kae ne faite a te lalolagi mō tino penei mo tatou. Tela la, ne faite ne te Atua a te tagata mo te fafine e fakaigoa ki a Atamu mo Eva kae ne tuku atu laua ki loto i se fatoaga gali. Kae ne seki faka‵logo laua ki te Atua kae ne galo i a laua a te taliaga ke tumau i te ola.

A te vaitaimi kātoa tenei, mai te faitega o Atamu ke oko ki te Lolo lasi, e ‵tusa mo te 1,656 tausaga i ei. I te vaitaimi tenā e tokouke a tino ma‵sei ne ola eiloa. I te lagi, e isi ne tino faka-te-agaga sē matea, ko Satani mo ana agelu ma‵sei. I te lalolagi, ne ‵nofo Kaino mo nisi tino ma‵sei e tokouke i ei, e aofia i ei a nisi tāgata kolā ne ‵mafi fakaatea. Kae ne isi foki ne tino ‵lei i te lalolagi—ko Apelu, Enoka mo Noa. I te Vaega MUAMUA ka fai‵tau tatou e uiga ki tino katoa konei mo mea kolā ne ‵tupu.