Ne Faite ne Tāgata se Olo Lasi

KO ‵TEKA atu a tausaga e uke. Ne maua ne tama tāgata a Noa a tama‵liki e tokouke. Kae ne ‵tupu aka olotou tama‵liki kae maua foki ne latou a tama‵liki e tokouke. E seki leva kae tokouke a tino i te lalolagi.

E tokotasi mai tino konā se mokopuna o Noa e igoa ki a Nimalota. A ia se tagata masei telā ne atuli kae tamate ne ia a manu mo tino. Ne fai foki ne Nimalota a ia eiloa mo fai se tupu ke pule atu ki nisi tino. Ne seki fiafia te Atua ki a Nimalota.

Ne fai‵pati a tino katoa i aso konā ki te ‵gana e tasi. Ne manako a Nimalota ke maopoopo tasi katoa latou ko te mea ke mafai ne ia o pule atu ki a latou. Tela la, e iloa ne koe me se a te mea ne fai ne ia? Ne fai atu a ia ki tino ke faite se fa‵kai mo se olo lasi i ei. Onoono atu ki a latou i te ata e faite ne latou a puliki.

Ne seki fiafia a Ieova te Atua ki te fale tenei. Ne manako te Atua ke olo atu ki tua a tino kae ke ‵nofo i koga katoa o te lalolagi. Kae ne fai atu a tino penei: ‘O‵mai! Ke na faite aka ne tatou se fa‵kai mo se olo ke maluga ko te mea ke oko atu tena tāulu ki te lagi. I konā ka takutakua ei tatou!’ Ne ma‵nako a tino ke maua a te fakaaloaloga mō latou, kae e se mō te Atua.

Telā ne fai ei ne te Atua ke fakagata a te faitega ne tino o te olo. E iloa ne koe me ne fai pefea ne ia a te mea tenā? Mai te faiga fakapoi ne ia o tino ke fai‵pati ki ‵gana kese‵kese, i lō te ‵gana fua e tasi. Ne seki toe maina a tino ga‵lue i pati a nisi tino ga‵lue. Tenei eiloa a te pogai ne taku fakamuli ei te lotou fa‵kai ko Papelu, io me ko Papelonia, telā e fakauiga ki te “‵Numi.”

Ko kamata i te taimi tenā o olo atu kea‵tea a tino mai Papelu. Ne olo atu a potukau o tino kolā e fai‵pati ki te ‵gana e tasi o ‵nofo fakatasi i nisi vaega o te lalolagi.