Ko Fano a Iakopo ki Halana

E ILOA ne koe me ko oi a tāgata konei e faipati a Iakopo ki ei? Ko oti ne malaga atu a ia i te fia o aso, kae ne fetaui a Iakopo mo latou i se vaikeli. Ne tausi ne latou olotou mamoe. Ne fesili atu penei a Iakopo: ‘Ne o‵mai koutou mai fea?’

‘Mai Halana,’ muna a latou.

‘E iloa ne koutou a Lapana?’ ne fesili atu a Iakopo.

‘Ao,’ ne tali mai latou. ‘Kiloke, tenā ko vau tena tama fafine ko Lasela mo tena lafu mamoe.’ E matea ne koe a Lasela tenā e vau i se koga tai ‵mao?

I te taimi ne lavea ei ne Iakopo a Lasela mo mamoe a tena tuātina, ne fanatu tou tagata o fakatakafili a te fatu kea‵tea mai te vaikeli ko te mea ke mafai o inu a mamoe. Ne uma atu a Iakopo ki a Lasela kae ne fai atu ki tou fafine me ko oi a ia. Ne fiafia malosi tou fafine, kae ne fanatu a ia ki te fale kae ne fai atu te tala ki tena tamana ko Lapana.

Ko oko eiloa i te fiafia o Lapana ke ‵nofo fakatasi laua mo Iakopo. I te taimi foki ne fakamolemole atu ei a Iakopo ke avaga laua mo Lasela, ne fiafia a Lapana. Kae ne fakamolemole atu tou tagata ki a Iakopo ke galue i tena fatoaga i se fitu tausaga mō Lasela. Ona ko te mea ne alofa malosi a ia ki a Lasela ne fai ei ne Iakopo a te mea tenā. Kae i te okoga ki te taimi ke fai ei a te avaga, e iloa ne koe me se a te mea ne tupu?

Ne tuku atu ne Lapana a tena tama fafine matua ko Lea kae e se ko Lasela. I te taimi ne lotomalie ei a Iakopo ke galue mō Lapana mō te suā fitu tausaga, ne tuku atu foki ne Lapana a Lasela mo fai tena avaga. I aso konā ne talia ne te Atua a tāgata ke silia atu olotou avaga i te tokotasi. Kae nei la, e pelā mo te mea e fakaasi mai ne te Tusi Tapu, e ‵tau o tokotasi fua a te avaga a te tagata.