Ko Tokouke a Tino i te Kāiga o Iakopo

KILO atu la ki te kāiga tokouke tenei. A latou konei ko tama tāgata e toko 12 a Iakopo. Kae ne isi foki ne ana tama fāfine. E iloa ne koe a igoa o nisi tama‵liki? Ke tau‵loto aka tatou e uiga ki nisi tino i a latou.

Ne fanau ne Lea a Leupena, Simeona, Levi mo Iuta. I te taimi ne iloa aka ei ne Lasela me ko seai sena tamaliki, ne fanoanoa tou fafine. Telā ne tuku atu ei ne ia tena tavini fafine ko Pila ki a Iakopo, kae ne maua ne Pila a tamaliki tāgata e tokolua e igoa ki a Tanu mo Nafatali. Kae ne avatu foki ne Lea tena tavini fafine ko Selepa ki a Iakopo, kae ne fanau ne Selepa a Kato mo Asela. Ne toe maua fakamuli ne Lea a tama tāgata e tokolua, ko Isakala mo Sepulona.

Fakamuli loa, ne mafai o maua ne Lasela se tamaliki. Ne fakaigoa ne ia ki a Iosefa. Ka tauloto fakamuli tatou ki mea tai uke atu e uiga ki a Iosefa, me ne fai a ia mo fai se tino tāua ‵ki. Konei a tama tāgata e toko 11 a Iakopo kolā ne fa‵nau mai i te taimi ne ‵nofo tasi ei a ia mo te tamana o Lasela ko Lapana.

Ne isi foki ne tama fāfine a Iakopo, kae e tuku mai ne te Tusi Tapu te igoa o se tamaliki fafine e tokotasi i a latou. A tena igoa ko Tina.

Ne oko mai a te taimi ke fakaiku aka ne Iakopo ke tiakina ne ia a Lapana kae toe foki atu ki Kanana. Tela la, ne fakamaopoopo ne ia tena kāiga tokouke mo tena lafu mamoe lasi mo pulumakau e uke, kae ne kamata tena malaga loa.

Ko oti ne oko atu a Iakopo mo tena kāiga ki Kanana i se taimi tai mata leva, kae ne fanau ne Lasela a te suā tama tagata. Ne tupu te mea tenā i te taimi koi faima‵laga ei latou. Ne fi‵ta malosi a Lasela, kae ne mate a ia i te taimi ne fanau ei. Kae ne ‵lei eiloa a te tamaliki tagata. Ne fakaigoa ne Iakopo a ia ko Peniamina.

E ma‵nako tatou ke masaua a igoa o tama tāgata e toko 12 a Iakopo me ne māfua mai i a latou a te fenua kātoa o Isalaelu. A te tonuga loa, ne fakaigoa a matakāiga e 12 o Isalaelu ki igoa o tama tāgata e toko 10 a Iakopo mo tama e tokolua a Iosefa. Ne ola a Isaako mō tausaga e uke mai tua ifo o te fa‵naumaiga o tama tāgata katoa konei, kae kāti ne fiafia a ia ke maua a mokopuna tāgata e tokouke. Kae ke onoono aka tatou me se a te mea ne tupu ki tena mokopuna fafine ko Tina.