Fakatasitasiga ke Fakamalosi ei te Alofa mo Galuega ‵Lei
Ne maopoopo sāle a Kelisiano mua, i fale o tino, ke maua i ei ne latou a akoakoga kae ke maua foki ne latou a fakama‵losiga mai i olotou taina. I aso nei, e maopoopo sāle fakatolu a fakapotopotoga o Molimau a Ieova i vaiaso katoa. Ko ‵kami mai koe ke kau atu ki so se fakatasiga penā. Olotou fakatasiga e se ne sauniga pelā mo te masani, kae e fakatāua i ei a akoakoga faka-te-Atua. E kamata kae fakaoti foki a fakatasiga a te fakapotopotoga ki te pese mo te ‵talo. E seai se ‵togi ke kau atu ki ei, kae e se ‵tae mai foki i ei a sene.—Galuega 4:23-31; 14:22; 15:32, 35; Loma 16:5; Kolose 4:15.
Kāti te fakatasiga muamua telā ka kau atu koe ki ei ko te lauga mō tino katoa, telā e 45 minute tena leva, kae e fai foki ki luga i akoakoga a te Tusi Tapu, valoaga, io me ko pati fesoasoani e uiga ki te olaga faka-Kelisiano. E ‵soko atu ki te lauga tenā, ko te sukesukega ki te Tusi Tapu, telā e fakaaogā i ei se mataupu mai i Te Faleleoleo Maluga telā e fakatoka ke suke‵suke te fakapotopotoga ki ei. E penei loa te faiga o te sukesukega tenā: E faitau ki se palakalafa mai i Te Faleleoleo Maluga, kae e fai mai ne te takitaki a fesili i te mataupu tenā, kolā e mafai o tali ne tino kolā e ‵loto ki ei i te kau fakalogo‵logo, māfai ko sisi aka olotou lima. E isi ne nai manatu e fai sāle ki palakalafa takitasi. E tasi te itula te leva o te fakatasiga tenā.
Fakamuli ifo i te vaiaso tenā, e fai foki a nisi fakatasiga e lua kolā e taki 45 minute te leva. E tasi te mea tenā ko te Akoga Seokalatika mō te Taviniga ‵Malu. E tuku mai i ei a akoakoga me e mafai pefea o maua a fakamatalaga o mataupu faka-te-Tusi Tapu kae ke akoako faka‵lei atu a mea konā. Kafai ko oti atu a akoakoga fakapito i te 21 minute, e faitofigina ei a tino a‵koga mai mua atu i ei ke fai ne tamā fai‵patiga. Kafai ko oti atu a fai‵patiga takitasi konā, ka avatu ei ne te faiakoga o te akoga tenā a pati fakatonu‵tonu ke fakaasi atu me e mafai pefea o tai momea aka te atamai o te tino akoga. E isi ne tusi kolā ne fakatoka ke fakaaogā i te akoga tenā. A latou kolā e ‵kau sāle atu ki fakatasitasiga e mafai o fai olotou tofiga i ei, māfai ko ola latou e ‵tusa mo fakatakitakiga faka-Kelisiano.
A te fakatasiga telā e ‵soko atu ki ei ko te Fakatasiga mō te Taviniga. E aofia i ei a vaega e tolu io me e fa kolā e fakaasi mai i ei te takuatuga o te tala ‵lei mai fale ki fale penā foki loa mo nisi vaega aka foki o te galuega fakafaifeau. E fai a vaega konā pelā me ne lauga, ne sautalaga, io me ne tamā fakaasiga, kae e isi foki se avanoaga ke tali a fesili i ei. A te lasiga o te polokalame e fakavae eiloa ki te ‵Tou Taviniga ‵Malu mō te Malo, se tamā pepa, e fa ana itulau, telā e ‵lomi ne te Sosaiete o te Faleleoleo Maluga i masina katoa.
A te suā fakatasiga ko te sukesukega faka-te-vaiaso telā e fai ne tamā potukau, i fale o tino i nisi kogā koga kolā e ‵nofo i ei a tino o te fakapotopotoga. E fakavae te sukesukega tenā ki luga i te Tusi Tapu mo se tusi telā ne fatoā ‵lomi ne te Sosaiete. Me e fo‵liki a potukau konā, e ‵lei atu te avanoaga ke ‵kau atu ki te sautalaga, kae e isi foki se avanoaga ‵lei i ei ke fakamasani ei te suā tino ki te suā tino.
E fai ne te lasiga o fakapotopotoga a olotou fakatasitasiga i Kingdom Halls kolā ne faka‵tu aka ne Molimau a Ieova. E maua te ‵togi o mea konā mai i meaalofa kolā e lafo mai mo te loto malie ne Molimau a Ieova, kae i te lasiga o taimi e fai ne tino kolā e ga‵lue fakagāmua te galuega tenā e aunoa mo se ‵togi. E isi ne pokisi mō meaalofa i fakatasitasiga katoa kolā e mafai o fakaaogā ne tino kolā e fia lafo atu ne latou olotou meaalofa.
E fesoasoani mai a fakatasitasiga a te fakapotopotoga ki Molimau a Ieova ke faka‵logo ki te fakatonuga i te Epelu 10:24, 25 penei: “Ke mafau‵fau tatou te suā tino ki te suā tino, ke fakamalosi ei te alofa mo galuega ‵lei, ke mo a ma fakata‵mala tatou ki te maopoopo sāle o tatou, e pelā mo te masani a nisi tino, kae e sili atu eiloa māfai ko matea atu [ne tatou] me ko fakapilipili mai te aso tenā.”
• Ne a vaegā fakatasiga a Kelisiano mua e matea atu foki i fakatasitasiga a Molimau a Ieova i aso nei?
• Fakamatala mai a mea kolā e fai i fakatasiga e lima kolā e fai sāle ne te kau Molimau.
• Ne maua pefea ne latou olotou fale maopoopo?
[Ata i te itulau e 14]
E fai ne se toeaina te Sukesukega ki te Faleleoleo Maluga i te Iunaite Sitete
Se vaega o te Akoga Seokalatika mō te Taviniga ‵Malu, i te Atumotu ko Faeroe
Se potukau sukesuke i se fale o se tino, i Yap
Te Kingdom Hall, i New Braunfels, Texas, Amelika, telā ne fakatu ne Molimau a Ieova i aso e lua
[Ata i te itulau e 15]
Kingdom Halls i fenua kese‵kese
Tiapani
Ausetalia
Osetelia
Sepania