E Mata, E Fai Tou Tusaga I Te Faiga O Fakatasiga Faka-kelisiano Ke Fai Mo Mea Fakamalosi Loto?

“Kafai e ‵luku fakatasi koutou, . . . a mea katoa konei ke fai mo mea e ati ake ei te kau Kelisiano.”​—1 KOLINITO 14:26.

1. E ‵tusa mo te 1 Kolinito mataupu e 14, se a te fakamoemoega tāua e tasi i fakatasiga faka-Kelisiano?

‘KO TAFAGA la te fakamalosi loto o te fakatasiga tenei!’ Kai fakaasi atu eiloa ne koe ne manatu penā i te otiga o se fakatasiga i te Kingdom Hall? Kāti ko oti eiloa! E tonu, e fai eiloa a fakatasiga a te fakapotopotoga e pelā me ko te pogai o fakamalosiga, kae e se ofo tatou i ei. E pelā eiloa mo aso o Kelisiano mua, e tasi te pogai tāua o ‵tou fakatasiga i aso nei ko te fakamalosiakaga o tino katoa kolā e ‵kau atu ki ei i te feitu faka-te-agaga. Onoono ki te auala ne faka‵mafa mai ei ne te apositolo ko Paulo a te fakamoemoega fakapito tenā i fakatasiga faka-Kelisiano i tena tusi muamua ki te kau Kolinito. Ne fakafokifoki mai faeloa ne ia i te mataupu kātoa e 14 a te manatu me i lauga katoa kolā e fai i fakatasiga a te fakapotopotoga e ‵tau o fai katoa penā​—e ‵tau o “ati ake ei te kau Kelisiano.”​—Faitau te 1 Kolinito 14:3, 12, 26.a

2. (a) Se a te mea e iku mai i fakatasiga fakamalosi loto? (e) Se a te fesili ka mafau‵fau tatou ki ei?

² E iloa ne tatou me i fakatasiga fakamalosi loto ko ikuga katoa o fakamalosiga a te agaga o te Atua. Tela la, e kamata ne tatou a fakatasiga takitasi ki se ‵talo mai te loto ki a Ieova o akai atu ki te ‵tou Tamana i te lagi ke fakamanuia mai te ‵tou fakatasiga e auala i tena agaga tapu. E ui i ei, e iloa ne tatou me e mafai o fai a tusaga o tino katoa i te fakapotopotoga i te faiga o te polokalame i fakatasiga ke aoga malosi. Tela la, ne a la nisi mea e mafai o fai ne tatou taki tokotasi ke fakamautinoa aka i ei me e maua faeloa ne tatou a fakamalosiga faka-te-agaga i fakatasiga kolā e fai i te ‵tou Kingdom Hall i vaiaso katoa?

3. E pefea te tāua o ‵tou fakatasiga faka-Kelisiano?

³ Ke tali aka te fesili tenā, ka iloilo aka ne tatou a nisi vaega o ‵tou fakatasiga kolā e ‵tau o masaua faeloa ne tino kolā e takitaki ne latou. Ka mafau‵fau foki tatou ki te auala e mafai ei ne te fakapotopotoga kātoa o fai tena tusaga i te faiga o fakatasiga ke fai mo taimi fakamalosi loto ki tino katoa kolā e ‵kau atu ki ei. Ko oko eiloa i te tāua o te mataupu tenei ki a tatou me i ‵tou fakatasiga ne maopoopoga ‵malu. E tonu, a te ‵kau atu mo te faiga o ‵tou tusaga i fakatasiga ne vaega tāua o ‵tou tapuakiga ki a Ieova.​—Salamo 26:12; 111:1; Isaia 66:22, 23.

Se Fakatasiga ne Fakatoka mō te Sukesukega ki te Tusi Tapu

4, 5. Se a te fakamoemoega o te Sukesukega ki te Faleleoleo Maluga?

⁴ E ma‵nako tatou katoa ke aoga katoatoa ki a tatou a te Sukesukega ki Te Faleleoleo Maluga i vaiaso takitasi. Tela la, ko te mea ke malamalama faka‵lei tatou i te fakamoemoega tāua o te fakatasiga tenā, ke na iloilo aka ne tatou a nisi fakamafuli‵fuliga ko oti ne fai ki te mekesini ko Te Faleleoleo Maluga mo mataupu mō sukesukega.

⁵ Talu mai te ‵lomiga muamua o Te Faleleoleo Maluga mō sukesukega i a Ianuali 15, 2008, ne sae mai ei se mea tāua i tena fakavaka ki mua. Ne matea ne koe te mea tenā? Onoono faka‵lei ki te fakavaka o te mekesini tenā i tou lima. I te tafito o te taoa, e mafola mai i ei se Tusi Tapu. E faka‵mafa mai i te mea tenā a te pogai e fai ei ne tatou te sukesukega ki te Faleleoleo Maluga. Ke sukesuke ki te Tusi Tapu mai te fesoasoani o te mekesini tenei. E tonu, e fai a ‵tou Sukesukega ki te Faleleoleo Maluga i vaiaso katoa ke “malamalama” tatou i te Muna a te Atua kae e pelā eiloa mo taimi o Neemia i aso mua, ne “fakamalamalama” mai i ei a uiga o pati.​—Neemia 8:8; Isaia 54:13.

6. (a) Se a te fakamafuliga ne fai ki te Sukesukega ki te Faleleoleo Maluga? (e) Se a te mea e ‵tau o masaua e uiga ki tusi kolā e ‵tau o “faitau”?

⁶ Ona ko ‵tou akoakoga e fakavae ki te Tusi Tapu, ne fai ei se fakamafuliga ki te Sukesukega ki te Faleleoleo Maluga. E isi ne tusi fai‵tau i mataupu mō sukesukega e fakamailoga penei “faitau.” E fakamalosi atu ki a tatou katoa ke tau‵tali ki te faitauga o fuaiupu konei i ‵tou Tusi Tapu eiloa. (Galuega 17:11) Kaia? Kafai e matea ne tatou a pati fakatonutonu a te Atua i ‵tou Tusi Tapu eiloa, ka pokotia malosi tatou i ei. (Epelu 4:12) Tela la, a koi tuai o faitau mai a fuaiupu konā, e ‵tau o fakaavanoa ne te tino telā e takitaki ne ia te fakatasiga se taimi e lava ke ‵suke a tino katoa ki tusi fai‵tau konā kae tau‵tali i ei i te taimi e faitau mai ei.

E Uke Atu a Taimi e Avanoa ke Fakaasi Atu ei ‵Tou Fakatuanaki

7. Se a te avanoaga e maua ne tatou i te taimi o te Sukesukega ki te Faleleoleo Maluga?

⁷ A te suā fakamafuliga ki mataupu o sukesukega ki te Faleleoleo Maluga ko te ‵loa o mataupu i ei. Ko oti ne fai ke tai toe‵toe ifo i tausaga fakamuli nei. Tela la, i te taimi e fai ei te Sukesukega ki te Faleleoleo Maluga, ko mu‵tana a taimi e fakaaoga mō te faitauga o palakalafa ko te mea ke uke atu a taimi e avanoa mō te faiga o manatu. Ko maua ne tino e tokouke atu i te fakapotopotoga a te avanoaga ke fakaasi atu te lotou fakatuanaki i mua o tino katoa mai te faiga o tali ki fesili kolā e ‵lomi mai, i te fakamatala mai o te aoga o se tusi faitau, mai te faiga o se tamā tala telā e fakaasi mai i ei a te aoga o te tautali ki fakatakitakiga fakavae i te Tusi Tapu, io me ko nisi auala aka. E ‵tau foki o fakaaoga a nisi taimi ke mafau‵fau ki ata.​—Faitau te Salamo 22:22; 35:18; 40:9.

8, 9. Se a te galuega a te tino telā e takitaki ne ia a te faiga o te Sukesukega ki te Faleleoleo Maluga?

⁸ E tiga eiloa te feitu tenā, e mafai fua o avanoa te faiga o manatu kese‵kese i te taimi fakaopoopo tenā māfai e toe‵toe a manatu o tino fai manatu kae ke mo a foki ma tō uke a manatu o te tino telā e takitaki ne ia a te fakatasiga i te taimi e fai ei te sukesukega ki te Faleleoleo Maluga. Tela la, se a te mea ka mafai o fesoasoani atu ki te tino telā e takitaki ne ia ke paleni ana manatu mo manatu o te fakapotopotoga ko te mea ke aoga te fakatasiga ki tino katoa?

⁹ Ke maua se tali ki ei, mafaufau ki te tala fakatusa tenei. A te Sukesukega ki te Faleleoleo Maluga telā e nofogamalie tena takitakiga e mafai o fakatusa ki se teu pulalakau telā e gali i te kilo. E pelā eiloa mo te aofia o pulalakau kese‵kese i te teu e tasi, e penā foki te aofia o manatu kese‵kese i te Sukesukega ki te Faleleoleo Maluga. Kae e pelā eiloa mo te kese‵kese o te ‵lasi mo ‵lanu o pulalakau i te teu, e penā foki te kese‵kese o te ‵loa mo te auala e fai ei a manatu kolā e fai i te fakatasiga. Kae se a la te galuega a te tino telā e takitaki ne ia? E fai eiloa ne ia a nai manatu e pelā mo nāi laulakau lauusiusi kolā e fakaopoopo atu ki te teu. E se uke a laulakau konei; kae e fai ne latou ke tasi te teu kātoa. E penā foki te takitaki, e ‵tau o masaua ne ia i tena galuega, e se ko te faiga o ana manatu ke tō uke, kae ko te fesoasoani atu fua ki tavaega kolā e ofo atu ne te fakapotopotoga. E tonu, kafai e tuku fakatasi a manatu kese‵kese kolā e tuku mai ne tino i te fakapotopotoga mo nai pati a te ovasia i se auala aoga, ka fai ei e pelā me se teu o pati ‵gali kolā ka fia‵fia ki ei a tino katoa kolā e ‵kau atu ki ei.

“Ke Avatu Eiloa ne Tatou a Tavaega ki te Atua ke Fai mo O‵tou Taulaga”

10. Se a te kilokiloga a Kelisiano mua ki fakatasiga a te fakapotopotoga?

¹⁰ A te fakamatalaga a Paulo e uiga ki te faiga o fakatasiga faka-Kelisiano i te 1 Kolinito 14:26-33 e tuku mai i ei ki a tatou se mainaga e uiga ki te takitakiga o fakatasiga konā i te senitenali muamua. I ana manatu e uiga ki fuaiupu konei, ne tusi mai penei se tino sukesuke ki te Tusi Tapu: “A te ‵toe mea tāua e uiga ki te faiga o te Lotu i aso mua toeitiiti ko tino katoa kolā e ‵kau atu ki ei ne maua ne latou se lagonaga me ne taulia latou kae maua foki te tiute ke fai olotou tusaga i ei. E seai se tino ne fano ki ei mo te fakamoemoega ke fano fua a ia o fakalogologo; ne ‵tau o fai sena tusaga.” E tonu, ne ‵kilo atu a Kelisiano mua ki fakatasiga a te fakapotopotoga e pelā me ne avanoaga ke fakaasi atu ei te lotou fakatuanaki.​—Loma. 10:10.

11. (a) Se a te mea e lasi tena tusaga i te faiga o fakatasiga mo mea fakamalosi loto, kae kaia? (e) Ne a manatu fesoasoani e mafai o fakaaoga ke momea aka ei te ‵lei o ‵tou tali i fakatasiga? (Ke onoono ki te fakamatalaga i lalo.)

¹¹ A te fakaasiatuga o te ‵tou fakatuanaki i fakatasiga e lasi ‵ki tena aoga ke “ati ake ei te kau Kelisiano” i te fakapotopotoga. Ka lotomalie eiloa koe me faitalia te uke o tausaga ne ‵kau atu ei tatou ki fakatasiga, e tumau eiloa te ‵tou fia‵fia o fakalogo‵logo ki manatu o ‵tou taina mo tuagane. E otia eiloa tatou i se tali e fakaasi mai ne se tino matua, se taina talitonu fakamaoni, mai i tena ‵kano loto; e fakamalosi mai ki a tatou se tala e fai ne se toeaina loto alofa; kae e se mafai o se fia‵fia tatou māfai e tuku mai ne se tamaliki se manatu telā e fakaasi mai i ei tena alofa tonu mō Ieova i ana pati eiloa. E manino ‵lei, me i te faiga o ‵tou manatu, e fai katoa ei ‵tou tusaga i te faiga o fakatasiga faka-Kelisiano mo mea fakamalosi loto.b

12. (a) Ne a mea e mafai o tauloto ne tatou mai te fakaakoakoga a Mose mo Ielemia? (e) Se a te aoga o te ‵talo i te faiga o tali?

¹² Kae ko te faiga o manatu e mafai eiloa o faigata ki a latou kolā e mata ‵mā. Kafai tenā eiloa te mea e tupu ki a koe, kāti e mafai o fesoasoani atu ke masaua me e se ko koe fua e fai penā. A te ‵tonuga loa, ne fakaasi atu foki ne tavini fakamaoni a te Atua e pelā mo Mose mo Ielemia a te sē lava o te loto tali‵tonu me e mafai ne lāua o fai‵pati atu i mua o tino e tokouke. (Esoto 4:10; Ielemia 1:6) Kae e pelā eiloa mo te fesoasoani o Ieova ki ana tavini i aso mua ke tavae atu ki a ia i mua o tino e tokouke, ka fesoasoani atu foki te Atua ke ofo atu ne koe a taulaga o tavaega. (Faitau te Epelu 13:15.) E mafai pefea o maua te fesoasoani o Ieova ke manumalo koe i te mataku o fai au tali? A te mea muamua, fakatoka faka‵lei mō te fakatasiga. A koi tuai o fano koe ki te Kingdom Hall, ‵talo ki a Ieova kae fakamolemole ke tuku atu ki a koe a te loto malosi ke fai sau tali. (Filipi 4:6) Ko fakamolemole atu eiloa koe ki se mea telā e fetaui ‵lei mo “tena loto,” tela la, e mafai o talitonu koe me ka tali atu eiloa a Ieova ki tau ‵talo.​—1 Ioane 5:14; Faataoto 15:29.

Fakatasiga Kolā e ‘Ati Aka, e Fakamalosi Loto, kae Fakamafanafana Loto’

13. (a) E ‵tau o pokotia pefea a tino kolā e ‵kau atu ki ‵tou fakatasiga? (e) Se a te fesili telā e tāua malosi ki toeaina i se auala fakapito?

¹³ E fai mai a Paulo me i te pogai tāua e tasi o fakatasiga a te fakapotopotoga ko te ‘ati aka, e fakamalosi loto, kae fakamafanafana atu’ ki tino kolā e ‵kau atu ki ei.c (Fakatusa ki te 1 Kolinito 14:3.) E mafai pefea ne toeaina Kelisiano i aso nei o fakamautinoa aka me i tofiga kolā e fai i fakatasiga e fakamalosi aka ei a loto o olotou taina mo tuagane kae fakamafanafana atu ki a latou? Ke tali aka te fesili tenā, ke mafau‵fau tatou ki te fakatasiga telā ne takitaki ne Iesu mai tua malie eiloa o tena toetuga.

14. (a) Ne a mea ne ‵tupu mai mua o te fakatasiga telā ne fakatoka ne Iesu? (e) Kaia ne ‵tau ei o ‵lei a lagonaga o apositolo i te taimi ne “fakapilipili atu a Iesu” kae faipati atu ki a latou?

¹⁴ Muamua la, ke onoono ki mea kolā ne ‵tupu mai mua o te fakatasiga tenā. Mai mua malie faeloa o te mate o Iesu, ne “tiaki . . . a ia ne ana soko katoa kae ‵tele keatea,” e pelā eiloa mo te valoaga, “ka mafuta valevale ei koutou, ka taki fano eiloa te tino ki tona kāiga.” (Maleko 14:50; Ioane 16:32) Kae mai tua o tena toetuga, ne ‵kami atu ei ne Iesu ana apositolo loto vāi‵vai ke ‵kau atu ki se fakatasiga fakapito.d “Ne olo atu a te tinoagafulu mo te tokotasi soko ki te mauga i Kalilaia, telā ne fai atu ei a Iesu ke olo ki ei.” I te lotou okoatuga, “ne fakapilipili atu a Iesu” kae faipati atu ki a latou. (Mata. 28:10, 16, 18) Mafaufau la ki te ‵lei o lagonaga o apositolo i te faiga ne Iesu a te mea tenā! Se a la te mataupu ne faipati ki ei a Iesu?

15. (a) Ne a mataupu ne faipati ki ei a Iesu, kae se a te mea ne seki faipati a ia ki ei? (e) Ne pokotia pefea a apositolo i te fakatasiga tenā?

¹⁵ Ne kamata o faipati a Iesu mai te faiatuga o se faka‵pulaga: “Ko oti ne tuku mai ki a au a te pule kātoa i te lagi mo te lalolagi.” Oti aka tuku atu ei ne ia te galuega ke fai ne latou: “Tela la, olo atu koutou ki fenua katoa ke fai a tino i ei mo oku soko.” Ne fakaoti ana pati ki te fakatalitonuga alofa tenei: “Au e fakatasi faeloa mo koutou.” (Mataio 28:18-20) Kae e mata, ne matea ne koe a te mea telā ne seki fai ne Iesu? Ne seki kote ne ia ana apositolo; ne seki fakaaoga foki ne ia te fakatasiga tenā ke fai ei ke ma‵sei atu olotou lagonaga io me e se ‵lei olotou loto lagona mai te fakasino atu ki te taimi ne vāi‵vai ei olotou fakatuanaki. I lō te fai penā, ne fakatalitonu atu ne Iesu ki a latou e uiga ki tena alofa mo te alofa o tena Tamana mai te tukuatuga ki a latou se galuega tafasili i te tāua. Ne pokotia pefea a apositolo i te auala ne faipati atu ei a Iesu? Ne maua ne latou a fakamalosiga mo fakamafanafanaga e uke, telā ne kamata ei o “akoako atu kae lauga atu” e uiga ki te tala ‵lei i se taimi mai tua o te fakatasiga tenā.​—Galuega 5:42.

16. E fakaakoako atu pefea a toeaina Kelisiano i aso nei ki a Iesu i te takitakiga o fakatasiga kolā e fakamalosi loto?

¹⁶ I te fakaakoako atu ki a Iesu, e ‵kilo atu foki a toeaina i aso nei ki fakatasiga e pelā me ne avanoaga ke fakamaoni atu ki taina tali‵tonu e uiga ki te tumau o te alofa o Ieova mō ana tino. (Loma 8:38, 39) Tela la, i olotou tofiga e fai i fakatasiga, e ‵saga atu eiloa a toeaina ki uiga ‵lei o olotou taina, e se ko olotou vāivāiga. E se fakafesili ne latou a lagonaga o olotou taina. I lō te fai penā, e fakaasi atu i olotou pati me e ‵kilo atu latou ki olotou taina tali‵tonu e pelā me ne tino taki tokotasi kolā e a‵lofa ki a Ieova kae e ma‵nako o fai te mea tonu. (1 Tesalonia 4:1, 9-12) E tonu, e manakogina i nisi taimi ke tuku atu ne toeaina a manatu fakatonutonu ki te fakapotopotoga kātoa, kae kafai ne nāi tino fua e manakogina ke fakatonutonu aka, e ‵lei atu loa ke fai te fakatonutonuga tenā mo latou eiloa kolā e aofia i ei. (Kalatia 6:1; 2 Timoteo 2:24-26) E fakamoe‵moe eiloa a toeaina ke tuku atu a pati fakamālō i te taimi ‵tau māfai e fai‵pati atu latou ki te fakapotopotoga kātoa. (Isaia 32:2) E taumafai malosi latou ke fai‵pati atu i se auala telā ka fakamalosi aka ei a tino katoa i te fakaotiga o te fakatasiga.​—Mataio 11:28; Galuega 15:32.

Te Māfuaga o Fakamafanafanaga

17. (a) Kaia ko sili atu ei i te tāua ke na fai nei ‵tou fakatasiga mo fai se māfuaga o fakamafanafanaga? (e) Se a te mea e mafai o fai ne koe i te faiga o fakatasiga mo mea fakamalosi loto? (Onoono ki te pokisi “Auala e Sefulu e Mafai ei o Fai a Fakatasiga mo Mea Fakamalosi Loto ki a Koe mo Nisi Tino.”)

¹⁷ I te taimi e gasolo aka faeloa o matagā atu a te lalolagi a Satani, e manakogina ke fakamautinoa aka ne tatou me i ‵tou fakatasiga faka-Kelisiano se koga e ‵malu ei tatou​—ko te māfuaga o fakamafanafanaga mō tino katoa. (1 Tesalonia 5:11) E fai mai ne se tuagane telā ne manumalo fakatasi mo tena avaga i se tofotofoga faigata i nai tausaga ko ‵teka ana mea e masaua: “A te nofo atu i te Kingdom Hall e pelā eiloa me ko puke mai a lima a‵lofa o Ieova ki a koe. I taimi kolā ne ‵nofo atu ei māua i konā, kae sikomia ne ‵tou taina mo tuagane Kelisiano, ne lagona ne māua e pelā me ko tuku atu eiloa a mā amoga ‵mafa ki luga i a Ieova, kae ne maua ei se lagonaga filemu.” (Salamo 55:22) Ke na fakamalosi kae fakamafanafana atu foki ki tino katoa kolā e ‵kau mai ki ‵tou fakatasiga. Ke fakamautinoa aka me ka fai eiloa penā, ke na tumau tatou i te faiga o ‵tou tusaga i te faiga o fakatasiga faka-Kelisiano mo mea fakamalosi loto.

[Fakamatalaga fakaopoopo]

Ka Tali Mai Pefea Koe?

• E pefea te tāua o fakatasiga faka-Kelisiano?

• Kaia e fesoasoani atu ei a te faiga o tali i fakatasiga “ke ati ake ei te kau Kelisiano”?

• Ne a mea e mafai o tauloto ne tatou mai te fakatasiga telā ne takitaki ne Iesu fakatasi mo ana soko?

[Ata i te itulau e 28]

AUALA E SEFULU E MAFAI EI O FAI A FAKATASIGA MO MEA FAKAMALOSI LOTO KI A KOE MO NISI TINO

Fakatoka mai mua o te taimi. Kafai e sukesuke koe ki te mataupu mai mua o te taimi e sau‵tala ki ei i te Kingdom Hall, ka fiafia malosi eiloa koe ki fakatasiga kae ka pokotia malosi ou lagonaga i ei.

Kau faeloa ki ei. Ona ko te mea e fakamalosi loto tou kau atu ki tino katoa i konā, e tāua ‵ki eiloa te mea tenā.

Ke oko atu i te taimi tonu. Kafai ko sagasaga koe a koi tuai o kamata te polokalame, ko kau atu eiloa koe ki te usuga o te pese mo te faiga o te ‵talo muamua, kolā ne vaega o te ‵tou tapuakiga ki a Ieova.

Ke toka a tusi katoa. Ave tau Tusi Tapu mo tusi kolā e fakaaoga i te fakatasiga ko te mea ke mafai o tautali kae maina foki koe i mataupu kolā e sau‵tala ki ei.

Ke mo a e saga valevale ki nisi mea. E pelā me se fakaakoakoga, ke faitau a fekau i tau selefoni ma oti te fakatasiga, kae e se ko te taimi e fai ei te fakatasiga. I te faiga tenā, ko fai ei ne koe au mea totino i te taimi ‵tau.

Fai tou tusaga. Kafai e tokouke e fai olotou tali, e tokouke foki a tino ka fakamalosi aka ne fakaasiga kese‵kese o te fakatuanaki.

Fakatoe‵toe au tali. E fai ne te mea tenei ke tokouke e maua ne latou te avanoaga ke fai olotou manatu.

Fakataunu ou tofiga. E pelā me ne tino e ‵kau ki te Akoga mō Tino Talai io me e aofia koe i Te Fakatasiga mō te Galuega Talai, ke fakatoka faka‵lei, fakaakoako mai mua o te taimi, kae taumafai malosi ke mo a ma se fai ou tofiga.

Fakamālō atu ki tino fai tofiga. Fakaasi atu ki tino fai tofiga i te fakatasiga io me kolā e fai olotou manatu i ei a te aoga o olotou taumafaiga.

Sau‵tala mo taina mo tuagane. A te fakatalofa mo te faiga o sau‵talaga fakamalosi loto mai mua kae mai tua foki o fakatasiga e fakaopoopo atu eiloa ki te fiafia kae e maua mai i ei a mea aoga kolā e maua mai te kau atu ki fakatasiga.