Te Tausiga o te Lafu Mamoe a te Atua ke Loto Tasi
E fesili mai penei nisi tino: ‘E fai pefea te pulega ki te fakapotopotoga o Molimau a Ieova i te lalolagi kātoa?’ E tali atu matou penei: E tautali atu eiloa te fakatokaga mō pulega ki te ata o te fakapotopotoga Kelisiano i te senetenali muamua.
Mai tua ifo malie i te 1870 ne kamata ei o fakasalalau atu ne Siale T. Lasalo mo ana taugasoa a ikuga o olotou sukesukega ki te Tusi Tapu i lauga mo tusi. I te fenua kātoa, ne amanaia a latou kolā ne ‵kau atu ki te galuega tenā ki a Lasalo mo ana taugasoa pelā me se potukau o tāgata ata‵mai i te faiga o te galuega a te Aliki kae ne fia maua foki ne latou se fesoasoani mai i a latou e uiga ki te lotou galuega.
I te 1884 ne fakatu aka ei te Zion’s Watch Tower Tract Society mai lalo i tulafono a te Commonwealth of Pennsylvania. Ne ga‵lue malosi a Lasalo mo ana taugasoa ‵lei i te faiga o takitakiga o te Sosaiete e penā foki loa mo faifaiga a te Kau A‵koga i te Tusi Tapu. I te 1909 ne fakamasiki aka ei ne latou te laumua o te lotou ofisa ki Brooklyn, Niu Ioki. I te fia o tausaga ne fai ei a takitaki o te Sosaiete o te Faleleoleo Maluga mo nisi toeaina ata‵mai aka foki kolā ne fakaekegina kae ne ‵kau atu ki a latou, mo fai se potukau pule o Molimau a Ieova.
E aofia i te Potukau Pule se potukau o toeaina Kelisiano kolā ne fakaekegina (e toko 12 i te 1988), kae e aofia i a latou konā ko tāgata e toko 7 kolā e ga‵lue pelā me ne takitaki o te Sosaiete o te Faleleoleo Maluga. E tausi ne tāgata konā a te galuega a Molimau a Ieova i te lalolagi kātoa. E se ulufia latou ne te agaga o te Atua kae e mafai foki o ‵se latou, kae e fakalago‵lago atu latou ki te Muna a te Atua telā e se mafai o ‵se pelā me ko te ‵toe tulafono sili i te lalolagi, kae e masani o fakama‵lalo latou ki te loto o te Atua i olotou olaga. Ko oti ne fakamaumau ne latou katoa se taki 40 tausaga i te galuega tumau pelā me ne faifeau fakatasi mo Molimau a Ieova.
E onoono faeloa te Potukau Pule ki so se mea e ‵lomi ne te Sosaiete. E fakavae eiloa a mea kolā e tusi ki luga i manakoga faka-te-agaga o te lafu mamoe kae ne iku mai i sukesukega maea kolā ne fai fakatasi mo ‵talo i te iloiloga ki te Muna a te Atua. E pelā mo te suke‵suke faeloa o tāgata konā ki fakataunuga ‵fou o te fuafuaga a te Atua mo te fakataunuga o valoaga i mea kolā e ‵tupu i te lalolagi, e penā foki loa mo te tulaga o tino o te Atua i te lalolagi nei, kāti i nisi taimi e ‵tau ei o fai ne latou a ‵fuliga ‵lei ki te mainaga e uiga ki nisi akoakoga. E penā loa o gasolo o lasi te iloaga e uiga ki te munatonu.—Salamo 97:11; Faataoto 4:18; Tanielu 12:4.
Ko oti ne tofi ne te Potukau Pule a Komiti o Ofisa Lagolago mo olotou tāgata ata‵mai i te feitu faka-te-agaga e tokotolu io me e sili atu i ofisa takitasi o ofisa lagolago e 90 tupu i te lalolagi kātoa kolā e tausi ne latou a te galuega i atufenua mo fenua e 200 tupu. E fesokotaki faeloa a ofisa lagolago mo fakapotopotoga mai lalo i olotou tausiga. E isi foki ne fesokotakiga kolā e fai ‵soko i va o te Potukau Pule mo Komiti o Ofisa Lagolago, kae e āsi atu a nisi toeaina mai te Potukau Pule ki te ukega o ofisa lagolago i tausaga katoa ko te mea ke iloa ne latou a mea kolā e ‵tupu i ei.
E se fai a tāgata konā mo fai ne matai ki luga i te fakatuanaki o nisi tino kae ko latou ko faifeau kolā e ga‵lue malosi ko te mea ke mafai o tau‵loto a nisi tino e tokouke e uiga ki te Muna a te Atua. E se ga‵lue latou mo se ‵togi, kae e avatu fua ki a latou a mea kolā e ‵tau o maua ne latou pelā mo nisi tino katoa o te kāiga Peteli. A fakamaoniga o te lotou ga‵lue fakamaoni ko te loto toaga, te loto tasi, amioga ‵mā, mo te fakamaoni ki akoakoga a te Tusi Tapu kolā e fakaasi atu ne Molimau a Ieova i te lalolagi kātoa.—1 Kolinito 3:5-9; 4:1, 2; 2 Kolinito 1:24; 3:1-3; 1 Petelu 5:2, 3.
• Se a te fakatokaga mō pulega telā ne kamata o faigina?
• Ko oi e ga‵lue i te Potukau Pule i aso nei, kae ne a tiute e tausi ne latou?
• E tausi pefea te galuega i nisi fenua?
[Mape i te itulau e 6]
(For fully formatted text, see publication)
Koga kolā e fai ei ne Molimau a Ieova te loto o te Atua
[Ata i te itulau 26]
Pelesitene o te Sosaiete o te Faleleoleo Maluga
S. T. Lasalo, 1884-1916
I. F. Latafoti, 1916-1942
N. H. Noa, 1942-1977
F. U. Falanisi, 1977-1992
[Ata i te itulau 27]
Ne nai ofisa mai i ofisa e 90 tupu kolā e tausi ei a galuega a Molimau a Ieova i te lalolagi kātoa
Kanata
Semupia
Siamani
Tiapani
Ausetalia
Pasili