E Maua a Tupe Mai i Meaalofa Kolā e Tuku Mai mo te Loto Malie

A galuega katoa kolā ko oti ne fakamatala atu e fai ne tino kolā e ga‵lue fakagāmua, telā ko tai feoloolo ei te ‵togi o mea. E fai ne Molimau a Ieova a te galuega fakafaifeau mai fale ki fale mo te tufatufaga o tusi e aunoa mo se ‵togi totino. E ‵togi sāle ne latou olotou mea ki olotou tupe totino. E se maua ne toeaina kolā e tausi ne latou a fakapotopotoga se ‵togi mō olotou galuega penā foki loa mo tavini fakafaifeau kolā e fesoasoani atu ki ei. E ‵togi eiloa ne latou olotou mea ki olotou tupe totino.

Ke oko eiloa ki tāgata i te Potukau Pule mo nisi tino katoa kolā e ga‵lue tumau i te fakatokaga mo te ‵lomiga o Tusi Tapu mo tusi faka-te-Tusi Tapu, e maua fua ne latou se potu mo olotou meakai mo se tamā fesoasoani ke ‵togi ei olotou mea. E penā foki loa a ovasia faima‵laga kolā e ga‵lue tumau.

A tamā ‵togi kolā e maua mō tusi e fesoasoani atu fua ki te ‵togi o pepa, te ‵lomiga mo te lafomaiga. A te ‵togi o nisi mea aka foki e maua mai i meaalofa kolā e lafo mai ne Molimau a Ieova mo te loto ma‵lie, mai i te faiga o meaalofa, io me ko te avatuga o mea katoa māfai ko mate te tino.

I fakatasitasiga katoa a Molimau a Ieova, faitalia me e fai i tou fakai io me i fono, e isi ne pokisi mō meaalofa i ei kolā e avanoa mō latou kolā e fia lafo atu olotou meaalofa. E se fai a ‵taegā tupe. E seai ne tautino io me ne tasi-vae-sefulu kolā e ‵tau o ‵togi atu. E pelā mo mea i te Tusi Tapu, e mafai o lafo atu ne tino taki tokotasi a mea kolā ne fakaiku aka ne latou i olotou loto.—2 Kolinito 8:12; 9:7.

• E maua pefea a tupe mō te galuega kātoa a Molimau a Ieova?