E Fakasauāgina Ona ko te Amiotonu

Kāti ka logo koe i nisi taugasoa mo kāiga me e fakasala sāle a Molimau a Ieova ne te tulafono, kae ko fakatapu latou ne nisi malo, io me ko ma‵sei latou i nisi feitu aka foki. Kaia e taku fakamasei ei latou?

E se fai pelā me e se amanaia te kau Molimau ki te tulafono, kae e fai penā ona ko te mea e tau‵tali atu latou ki kalafaga o Iesu. Ne fai atu a Iesu ki ana soko me ka fakatauemu atu a tāgata ki a latou, ka fakasauāgina latou, kae ka fatu‵fatugina latou ki vaegā pati ‵loi kae matagā katoa. E fai penā, me i te fili sili o te Atua, ko Satani, ko te atua o te lalolagi nei, kae e manako a ia ke ‵fuli keatea a tino mai i te taviniga ki te Atua.​—⁠­Mataio 5:10-12; 10:16-22, 34-39; 24:9, 10; Ioane 15:17–16:3; 2 Timoteo 3:12; 1 Petelu 5:8; Fakaasiga 12:17.

I te taimi ne puke fakapagota ei te kau apositolo kae ne ave ki te fono, ne seki fai pelā me ne amio ma‵sei latou, ne amio fakasauā io me ne ‵teke atu latou ki te malo. Ne fai penā me ne talai atu ne latou te tala ‵lei. I te taimi ne fakatagi atu ei te apositolo ko Paulo ke fakamasino a ia ne se fono maluga, ne fai ne ia te mea tenā ke fakamautinoa aka me e ‵tau o saoloto a Kelisiano i te tulafono ke talai atu ne latou te tala ‵lei.—Galuega 4:18-20; 5:28-32; Filipi 1:7.

I aso nei, e tausi a Molimau a Ieova ki te tulafono kae e ‵togi ne latou olotou lafoga kae e āva foki latou ki tino pule. E toe ‵togi atu ne latou a mea a Kaisala ki a Kaisala, ako mea a te Atua ki te Atua. Kafai ko fe‵paki latou mo te pulega a te malo, e fai penā ona ko te sē amanaia o te malo tenā ki te lotou galuega talai, io me ona ko te mea e se ‵kau atu latou ki se feitu i faifaiga a fenua. Kae i vaegā taimi penā e ‵tau ei o ‵pau te tulaga o Molimau a Ieova mo te kau apositolo, kolā ne fai atu penei: “E ‵tau o faka‵logo matou ki te Atua pelā me ko te motou pule i lō tāgata.”​—⁠Galuega 5:29; Maleko 12:17; Ioane 18:36; Tito 3:1, 2.

E se taumafai a Molimau a Ieova ke fakasauāgina latou me e fia ola latou i se olaga filemu kae tokagamalie. Kae kafai ko fakasauāgina latou ona ko te mea e tau‵tali atu latou ki te tulafono a te Atua mo te fakaakoakoga a Iesu Keliso, e fia‵fia eiloa latou ke fa‵ki i ei.—Mataio 5:10-12; Galuega 5:40, 41; 1 Kolinito 4:12; 1 Timoteo 2:2; 1 Petelu 3:14, 15; 4:12-16.

• Kaia e fakatauemugina kae fakasauāgina foki ei a tavini a Ieova?

• Kaia e fe‵paki ei a Molimau a Ieova mo pulega a malo i nisi taimi, pelā mo te kau apositolo Kelisiano?

• E pefea te kilokiloga a tavini a Ieova ki fakasauāga?

[Ata i te itulau e 29]

Ne tu atu a Iesu i mua o Pilato kae ne ‵pei te apositolo ko Paulo ki te falepuipui ona ko te talaiga o te Malo o te Atua