Mataupu e 8

Ne Sao Mai i se Pule Fakasauā

NE ‵FAGU ne Iosefa a Malia ke fai atu se tala tāua ki a ia. Ne fakasae aka te agelu a Ieova ki a ia, ana muna: “‵Tu ki luga, puke te tamaliki mo tena mātua kae olo nei eiloa ki Aikupito; ‵nofo i konā ke oko eiloa ki te taimi e toe fai atu ei au ke olo koutou keatea. A Helota, ka salasala ki te tamaliki o tamate.”

Ne ‵sola fakavave keatea a latou tokotolu. Toeitiiti kae se manuia latou me ko iloa ne Helota me ne fakaloiloi a ia ne te kau makoi kae ne toe ‵foki atu latou ki te lotou fenua. Masaua la, me ne ‵tau o toe lipoti atu ne latou ki a ia te koga ne maua ei ne latou a Iesu. Ko kaitaua malosi a Helota. Tela la, i te taumafaiga ke tamate a Iesu, ne fakatonu atu ei a ia ke tamate a tama‵liki tāgata katoa i Peteleema mo fa‵kai i tafa i ei e kamata mai i te lua tausaga o fanaifo ki lalo. Ne fakatautau aka ne ia te matua tenā ki luga i fakamatalaga kolā ne maua muamua ne ia mai i te kau makoi kolā ne o‵mai mai te Saegāla.

A te tamatega o tama‵liki tāgata katoa se mea matagā ke ‵kilo ki ei! Ne ‵tau o ulu mālō atu a sotia a Helota ki loto i fale takitasi. Kafai e maua atu ne latou se tamaliki tagata, e ‵fao ne latou a ia mai lima o tena mātua. E se iloa atu ne tatou me e tokofia a pepe ne tamate ne latou, kae ko te ‵tagi malosi mo te fanoa‵noa o mātua konā ne fakataunu mai i ei te valoaga i te Tusi Tapu telā ne fai ne te pelofeta a te Atua ko Ielemia.

Kae koi fai te mea tenā, ne oko atu mo te manuia a Iosefa mo tena kāiga ki Aikupito kae ne ‵nofo atu latou i konā. E tasi te po ne toe faipati atu foki te agelu a Ieova ki a Iosefa i se moemiti. Muna a te agelu: “Tu ki luga, puke te tamaliki mo tena mātua kae toe ‵foki ki Isalaelu me ko ‵mate a latou katoa kolā ne taumafai o tamate te tamaliki.” Tela la, i te fakataunuga o te suā valoaga i te Tusi Tapu telā e fai mai me e ‵tau o kalagagina te Tama a te Atua mai Aikupito, ne toe ‵foki atu te kāiga ki te lotou fenua tonu.

E foliga mai me ne fakamoemoe a Iosefa ke ‵nofo atu latou i Iutaia, ko te koga telā ne ‵nofo latou i ei i te fa‵kai ko Peteleema kae koi tuai o ‵sola keatea latou ki Aikupito. Kae ne iloa ne ia me i te tamaliki matagā a Helota ko Alekilao ne fai mo fai te tupu o Iutaia, kae i te suā moemiti ne fakailoa atu ei ne Ieova ki a ia e uiga ki te fakamataku o te mea tenā. Tela la, ne faima‵laga atu a Iosefa mo tena kāiga ki te feitu ki mātū kae ne ‵nofo latou i te fa‵kai ko Nasaleta i Kalilaia. Ne tupu aka a Iesu i te fa‵kai tenā, i se koga tai ‵mao mai te laumua o te lotu Iutaia. Mataio 2:13-23; Ielemia 31:15; Hosea 11:1.

▪ I te taimi ne seki toe ‵foki atu ei te kau makoi, se a te mea matagā telā ne fai ne te tupu ko Helota, kae ne puipuigina pefea a Iesu i ei?

▪ I te ‵fokiatuga mai Aikupito, kaia ne seki nofo atu ei a Iosefa i Peteleema?

▪ Ne a valoaga i te Tusi Tapu ne fakataunu mai i te vaitaimi tenā?