Ko Āsi Atu a Tino Iloilo Fetū ki a Iesu

Ne o‵mai a nisi tāgata mai te Saegala. A latou ne tino iloilo fetū—ko tāgata kolā e sukesuke ne latou a te ‵tuga o fetū, kae e fai mai me e mafai ei ne latou o fakamatala a te uiga o mea ‵tupu i olaga o tino. (Isaia 47:13) A koi ‵nofo atu i te lotou fenua i te Saegala, ne matea atu ne latou se “fetū,” kae ne tau‵tali atu latou i ei i te fia selau maila ki Ielusalema, kae e se ki Peteleema.

I te okoatuga a tino iloilo fetū ki konā, ne fesili atu latou penei: “Tefea te tupu o Iutaia telā ko oti ne fanau mai? Me ne lavea ne matou tena fetū a koi ‵nofo atu matou i te feitu ki te Saegala, kae ko ‵mai nei matou o ifo ki a ia.”—Mataio 2:1, 2.

Ne logo te tupu ko Helota i Ielusalema i te tala tenei kae ko oko eiloa i te kaitaua. Tela la, ne kalaga atu a ia ki faitaulaga pule mo nisi takitaki lotu Iutaia ke o‵mai kae ne fesili atu ki a latou, me tefea te koga e ‵tau o fanau mai i ei te Keliso. Ne fakavae ne latou te lotou tali ki te Tusi Tapu, olotou muna: “I Peteleema.” (Mataio 2:5; Mika 5:2) I konā loa, ne fai lēmū atu a Helota ke olo atu a tino iloilo fetū ki a ia kae ne fai atu penei ki a latou: “Olo o salasala faka‵lei te tamaliki, kae kafai ko maua ne koutou fakailoa mai ki a au ko te mea ke fano foki au o ifo ki a ia.” (Mataio 2:8) Kae ko te ‵tonuga loa, e fia ‵sala fua a Helota ki te tamaliki ke tamate!

I te ologa o tino iloilo fetū, ne tupu se mea fakaofoofogia. A te “fetū” telā ne matea ne latou a koi ‵nofo atu i te Saegala ne faimalaga atu i mua o latou. E manino ‵lei me i te mea tenā e sē se fetū masani, kae ne tuku mai eiloa te fetū tenā ke takitaki ei latou. Ne tau‵tali atu eiloa a tino iloilo fetū ke oko ki te taimi ne tu tonu ei te mea tenā i luga i te fale ne ‵nofo atu ei a Iosefa mo Malia mo te lā tamaliki tagata.

I te taimi ne ulu atu ei a tino iloilo fetū ki te fale, ne maua atu ne latou a Malia mo tena tamaliki tagata—ko Iesu. I konā loa ne to‵tuli ifo ei a tino iloilo fetū i ana mua. Kae ne tuku atu olotou meaalofa ko aulo, pululipano mo te pulumulo. Fakamuli ifo, i te taimi ko pili ei o ‵foki atu latou ki a Helota, ne fakailoa atu ne te Atua ki a latou i se moemiti ke se fai penā. Tela la, ne toe ‵foki atu latou ki te lotou fenua i te suā auala.

Se a tau faka‵tau me ko oi la ne tuku mai ne ia te “fetū” telā ne takitaki ei a tino iloilo fetū? Masaua la, ne seki takitaki ‵tonu atu latou ki a Iesu i Peteleema. I lō te fai penā, ne takitaki latou ki Ielusalema, kae ne fetaui ei latou mo te tupu ko Helota, telā ne fia tamate ki a Iesu. Moi ne seki gasue te Atua o fai se mea kae fakailoa atu ki tino iloilo fetū ke mo a ma taku atu ki a Helota te koga ne nofo ei a Iesu, penei ko tamate ne ia a Iesu. E manino ‵lei, me ko te fili o te Atua ko Satani, telā ne fia tamate ki a Iesu, kae ne taumafai ke fakaaoga ne ia te auala tenei ke fakataunu tena loto.