Mataupu e 34
Ko te Filifiliga o Ana Apositolo
KĀTI e tasi mo te āfa tausaga talu mai te taimi ne taku atu ei ne Ioane te Papatiso me i a Iesu ko te Tamā Mamoe a te Atua, kae ne kamata foki ne Iesu a tena taviniga ki nisi tino. I te taimi eiloa tenā, ne fai ei Anitelea, Simona Petelu, Ioane kae kāti ko Iakopo foki (te taina o Ioane), penā foki mo Filipo mo Natanielu (ne fakaigoa foki ki a Patolomaio) mo fai ne ana soko muamua. Fakamuli ifo, e tokouke a nisi tino ne ‵kau atu ki a latou i te tau‵tali atu ki a Keliso.
Ne toka a Iesu o filifili ana apositolo, kolā ne fai mo fai ana taugasoa pele kae ne maua foki ne latou a akoakoga fakapito. Kae koi tuai o filifili ne ia latou, ne fanatu Iesu ki se mauga kae ne fakamaumau ne ia te po kātoa i te faiga o ‵talo, kāti ne fakamolemole atu a ia mō te poto mo te fakamanuiaga foki a te Atua. Ne aoina a ia, kae ne kalaga atu ki ana soko ke o‵mai, kae ne filifili ne ia se toko 12 mai i a latou. Kae ne taku faeloa latou pelā me ne soko, me ne tumau eiloa latou pelā me ne tino e a‵koga i a Iesu.
A tino e tokoono kolā ne filifili ne Iesu, ko latou kolā ne lau atu mai luga nei, ko latou foki eiloa kolā ne fai mo fai ana soko muamua. Ne filifiligina foki a Mataio, telā ne kalagagina ne Iesu mai tena ofisa ao lafoga. A te suā tokolima kolā ne filifiligina ko Iuta (e fakaigoa foki ko Tataio), Iuta te Isikaliota, Simona te Kanana, Toma, mo Iakopo te tama a Alefaio. Ko Iakopo foki tenei ne fakaigoa ki a Iakopo Foliki, kāti ke fai ei se ‵kesega i a laua mo te suā apositolo ko Iakopo.
I te taimi tenā a tino e toko 12 konā ne tai mata leva eiloa te masaniga mo Iesu, kae ne masani ‵lei foki a ia mo latou. A te tonuga loa, e tokouke a latou ne kāiga ‵tonu mo ia. E foliga mai me i a Iakopo mo tena taina ko Ioane ko fakataina o Iesu. Kae kāti Alefaio ko te taina o Iosefa, te tamana fai o Iesu. Tela la, a te tama a Alefaio, ko te apositolo ko Iakopo, se fakataina foki o Iesu.
E tonu la, e se faigata ki a Iesu ke masaua ne ia a igoa o ana apositolo. Kae e mata, e mafai o masaua ne koe me e tokolua ne fakaigoa ki a Simona, e tokolua ki a Iakopo, e tokolua ki a Iuta, ako te taina o Simona ko Anitelea, ako te taina o Iakopo ko Ioane. Ko te auala tenā e mafai ei o masaua a apositolo e tokovalu. A te suā tokofa e aofia i ei se tino ao lafoga (ko Mataio), se tino ne fakalotolotolua (ko Toma), se tino ne kalagagina mai lalo i te lakau (ko Natanielu), mo tena taugasoa ko Filipo.
E tokosefulu-tasi apositolo ne tino Kalilaia, ko te fenua foki tenā o Iesu. Natanielu, se tino Kana. Filipo, Petelu, mo Anitelea ne tino mai Petesaita. Kae fakamuli ifo ne olo atu Petelu mo Anitelea ki Kapanaumi, kae e foliga mai me ne nofo foki a Mataio i konā. Iakopo mo Ioane ne fai te lā pisinisi faiika kae kāti ne ‵nofo foki laua i Kapanaumi io me e tai pili atu ki ei. Kae kāti ko Iuta te Isikaliota fua, telā ne fakalata fakamuli ne ia a Iesu, se apositolo mai Iutaia. Maleko 3:13-19; Luka 6:12-16.
▪ Ko oi a apositolo kolā kāti ne kāiga o Iesu?
▪ Ko oi a igoa o apositolo a Iesu, kae se a te auala e mafai ei o masaua olotou igoa?
▪ Ko oi a fenua o apositolo taki tokotasi?