E Mata, e Fia Iloa ne Koe a Mea e Uke Atu e Uiga ki te Tusi Tapu?
Kaia e ‵Tau ei o Faitau ki te Tusi Tapu?
E SE ‵pau te Tusi Tapu mo nisi tusi aka—e maua i ei a akoakoga a‵lofa mai te Atua. (1 Tesalonia 2:13) Kafai e fakagalue aka ne koe a mea kolā e akoako mai ne te Tusi Tapu, ka maua ne koe a mea aogā e uke ‵ki. Ka momea aka tou alofa ki te Atua kae ka fakapilipili atu koe ki a ia, te Tino telā e tuku mai ne ia “a mea ‵lei katoa kola e maua fua mo meaalofa katoatoa takitasi.” (Iakopo 1:17) Ka iloa ei ne koe te auala ke fakapilipili atu ki a ia i te ‵talo. I taimi o fakalavelave, ka mafai o lagona ne koe te fesoasoani o te Atua. Kafai e fakafetaui aka tou olaga ki tulaga kolā e tuku mai i te Tusi Tapu, ka tuku atu ne te Atua ki a koe a te ola se-gata-mai.—Loma 6:23.
E maua i te Tusi Tapu a muna‵tonu kolā e tuku mai i ei te saolotoga. E fakasaolotogina a tino kolā e maua ne latou te iloaga i te Tusi Tapu mai manatu ‵se kolā e pule atu ki olaga o te fia miliona o tino. E pelā mo te iloaga o te munatonu e uiga ki mea e ‵tupu māfai ko ‵mate tatou, e fakasaoloto ei tatou mai te ma‵taku me e mafai ne tino ‵mate o fakalogo‵mae tatou io me e logo‵mae ‵tou kāiga mo taugasoa kolā ko oti ne ‵mate. (Failauga 9:5, 10) E tuku mai ne te akoakoga a te Tusi Tapu e uiga ki te toe‵tuga a te fakamafanafanaga ki tino kolā ko ‵galo atu olotou tino pele i te mate. (Ioane 11:25) A te iloaga o te munatonu e uiga ki agelu ma‵sei e fai ei tatou ke matapula‵pula ki te fakama‵taku o faifaiga faivailakau kae e fesoasoani mai ki a tatou ke malamalama i te pogai ko uke katoa ei penei a fakalavelave i te lalolagi.
E fakaasi mai ne akoakoga mai te Atua i te Tusi Tapu a te auala ke ola ei tatou ko te mea ke maua a mea aogā i te feitu faka-te-foitino. E pelā mo te “fakautauta” e fesoasoani mai ki te mauaga o se malosi ‵lei. (1 Timoteo 3:2) Mai te ‘faka‵māga o tatou mai feitu kolā e fakamasei ne latou te foitino mo te agaga,’ e ‵kalo keatea ei tatou mai te fakamaseiga o ‵tou malosi faka-te-foitino. (2 Kolinito 7:1) A te fakagaluegāga o pati fakatonutonu a te Atua i te Tusi Tapu e fakamalosi aka ei a te fiafia i te fakaipoipoga mo te āva atu o tino ki a koe.—1 Kolinito 6:18.
Kafai e fakagalue aka ne koe a te Muna a te Atua, ka fai ei koe mo fai se tino fiafia. E fesoasoani mai te iloaga i te Tusi Tapu ke maua ne tatou a te filemu mo te lotomalie tonu kae e tuku mai foki i ei a te fakamoemoega ki a tatou. E fesoasoani mai ke ati aka ne tatou a vaegā uiga fakafia‵fia pelā mo te alofa atafai, te alofa, te fiafia, te filemu, te mataalofa, mo te fakatuanaki. (Kalatia 5:22, 23; Efeso 4:24, 32) E fesoasoani mai a vaegā uiga penā ke momea aka te ‵lei o tatou e pelā me ne a‵vaga tāgata io me ne a‵vaga fāfine, ne tamana io me ne mātua, ne tama‵liki tāgata io me ne tama‵liki fāfine.
Kai mafaufau aka eiloa koe ki mea kolā ka ‵tupu i aso mai mua? E fakaasi mai ne valoaga i te Tusi Tapu me e ‵nofo atu tatou i se vaitaimi fakapitoa. E se gata fua i te fakamatalamaiga ne valoaga konei a te tulaga o te lalolagi i aso nei kae e fakaasi mai foki i ei me ko pili o ‵fuli ne te Atua a te lalolagi ki se palataiso.—Fakaasiga 21:3, 4.
Fesoasoani ke Malamalama i te Tusi Tapu
Kāti ko oti ne taumafai koe o faitau ki te Tusi Tapu kae ko tō faigata ki a koe ke malamalama i ei. Kāti e se iloa ne koe o ‵sala aka a tali i te Tusi Tapu ki au fesili. Kafai e penā loa, e se ko koe fua tokotasi e fai penā. E ma‵nako tatou katoa ki te fesoasoani ke malamalama i te Muna a te Atua. E tuku mai ne Molimau a Ieova i atufenua e 235 a akoakoga faka-te-Tusi Tapu sē ‵togi ki te toko fia miliona o tino. E fia‵fia foki latou o fesoasoani atu ki a koe.
E sili atu i te ‵lei ke sukesuke ki te Tusi Tapu i se fakasologa ‵lei, telā e kamata mai i akoakoga fakavae. (Epelu 6:1) I te taimi e fai ei tau akoga, ka momea aka ei te mauaga ne koe o “mea‵kai ma‵keke”—ko muna‵tonu ‵loto. (Epelu 5:14) E maua a tali mautinoa i te Tusi Tapu. A tusi faka-te-Tusi Tapu, e pelā mo te tusi ko te Ne a Mea e Akoako ‵Tonu Mai i te Tusi Tapu?, ka fesoasoani atu ki a koe ke malamalama i fakamatalaga mai te Tusi Tapu e uiga ki mataupu kese‵kese.
E Mata, e Fia Fakaavanoa ne Koe a Taimi i Vaiaso Takitasi ke Malamalama i te Tusi Tapu?
E mafai o fakatoka se akoga faka-te-Tusi Tapu i se taimi mo se koga telā e ‵lei ki a koe. E suke‵suke a tino e tokouke i olotou fale eiloa. Ke oko foki eiloa ki nisi tino, e suke‵suke latou e auala i te telefoni. A te polokalame o te sukesukega tenei, e se se vasega mo tino e tokouke, kae se fakatokaga totino ke fetaui mo ou fakanofonofoga, e aofia i ei te lasi o tou iloaga mo akoakoga. E seai se sukega i ei, kae ka se fai foki ke mā koe. Ka taligina au fesili faka-te-Tusi Tapu, kae ka tauloto koe ki te auala ke fakapilipili atu ki te Atua.
E seai se ‵togi mō se vaegā akoga faka-te-Tusi Tapu penā. (Mataio 10:8) E tuku mai te mea tenei e aunoa mo se ‵togi ki tino o lotu kese‵kese katoa mo tino kolā e seai ne olotou lotu kae e fia‵fia tonu ke momea aka te lotou iloaga i te Muna a te Atua.
Ko oi e mafai o aofia i te sukesukega? Ko tou kāiga kātoa. So se taugasoa telā e filifili aka ne koe ke ‵kami mai e mafai foki o kau atu ki ei. Io me kafai e ‵lei ki a koe, e mafai o fai te sukesukega mo koe fua tokotasi.
E fakaavanoa ne tino e tokouke se itula e tasi i vaiaso takitasi ke sukesuke ki te Tusi Tapu. Kafai e mafai o fakaavanoa ne koe a taimi e uke atu io me e mu‵tana ifo i vaiaso takitasi, e toka faeloa a te kau Molimau o fesoasoani atu ki a koe.
Se ‵Kamiga ke Tauloto Koe
E ‵kami ne matou a koe ke fesokotaki atu ki Molimau a Ieova. E tasi te auala e mafai ei o fai penā ko te tusi atu ki se fakatuātusi mai lalo nei. Ka fakatoka i ei ke fai ne se tino se akoga faka-te-Tusi Tapu telā e se ‵togi i te fale fakatasi mo koe.
□ Lafo mai ki a au se kopi o te tusi ko te Ne a Mea e Akoako ‵Tonu Mai i te Tusi Tapu?
□ Fakamolemole, fesokotaki mai ki a au e uiga ki se akoga faka-te-Tusi Tapu telā e se ‵togi.
A tusi siki katoa ne siki mai i te Tusi Tapu i te ‵Fuliga o te Lalolagi Fou seiloga ke fakailoa atu me e se penā.