Pati Fakatomua

Ki Tino Kolā e Fia Tumau i te Alofa o Ieova:

“Ka iloa ne koutou te munatonu, ko te munatonu foki ka fakasaoloto ne ia koutou,” ko muna a Iesu. (Ioane 8:32) Ko oko eiloa i te fakamalosi loto a pati konā! E tonu, e mafai eiloa o iloa te munatonu, ke oko foki loa ki taimi faiga‵ta konei o “aso fakaoti” kolā ko salalau valevale i ei a akoakoga sē ‵tonu. (2 Timoteo 3:1) E mata, e masaua ne koe te taimi muamua ne matea ‵lei ei ne koe te munatonu i te Muna a te Atua? Ko tafaga la te gali o te mea tenā!

Kae e pelā eiloa mo te tāua ke iloa ‵lei te munatonu kae ke kau atu foki ki te fakaasiatuga o te mea tenā ki nisi tino, e ‵tau foki o amio tatou e ‵tusa mo te munatonu. Ke fai penā, e ‵tau o tumau tatou i te alofa o te Atua. Ne a mea e aofia i te mea tenei? E tali mai eiloa te fesili tenei i pati a Iesu i te po mai mua o tena mate. Ne fai atu a ia ki ana apositolo fakamaoni: “Kafai e tausi ne koutou aku poloakiga, ka tumau koutou i toku alofa, e pelā mo au ko oti ne tausi a poloakiga a toku Tamana, kae tumau i tena alofa.”—Ioane 15:10.

Mafaufau la me ne tumau a Iesu i te alofa o te Atua ona ko tena fakalogo ki fakatonuga a tena Tamana. E aoga foki te mea tenei ki a tatou i aso nei. Ke tumau i te alofa o te Atua, e ‵tau o ola tatou e ‵tusa mo te munatonu i aso katoa. I te afiafi-po foki eiloa tenā, ne fai atu a Iesu: “Ko iloa ne koutou a te mea tonu; amutia koutou manafai e fai ne koutou!”—Ioane 13:17.

E fakamoe‵moe eiloa matou me ka fesoasoani atu te tusi tenei ke tumau koe i te fakagalue aka faeloa o te munatonu i tou olaga kae tumau foki “i te alofa o te Atua, ka koi fakatalitali [koe] ki te . . . ola se gata mai.”—Iuta 21.