Lagonaga Logo‵mae​—Māfai e Isi “se Pogai e Fameo ei” Tatou

E MATA, e malamalama koe i lagonaga o Linda, telā ne logo‵mae malosi i faifaiga a se tino talitonu? Se mea fakafanoanoa me ne fakalavelave malosi a amioga a nisi tino ki nisi tino, telā ne pokotia foki olotou faifaiga masani i te feitu faka-te-agaga. E mata, ne penā foki koe?

E Mata, e Isi se Tino e Mafai o “‵Vae Keatea ne Ia Tatou Mai te Alofa o te Atua”?

A te ‵tonuga loa, e mafai o faigata ke fakamagalo ne tatou se taina talitonu telā ne fakalogo‵mae ne ia tatou. E ‵tau o fakatau a‵lofa a Kelisiano katoa. (Ioane 13:34, 35) Kafai ne fai ne se taina talitonu se mea ‵se ki a tatou, e mafai eiloa o iku ki tulaga fakama‵taku a te sē fiafia mo te logo‵mae.—Salamo 55:12.

E tonu, e iloa ne te Tusi Tapu me e isi ne taimi ka maua ei ne Kelisiano a ‘pogai ke fameo’ ei latou ki te suā tino. (Kolose 3:13) Kafai foki loa e tupu se mea penā ki a tatou, e mafai o faigata ‵ki te fakafesagai atu ki ei. E mata, e isi se mea e mafai o fesoasoani mai ki a tatou? Mafaufau ki akoakoga fakavae e tolu i Tusi Tapu:

E lavea ne te ‵tou Tamana i te lagi a mea katoa: E onoono mai a Ieova ki mea katoa e ‵tupu, e aofia i ei a faifaiga sē fakamaoni mo logo‵maega kolā e māfua mai i ei. (Epelu 4:13) E sili atu i ei, e alofa mai eiloa a Ieova māfai e logo‵mae tatou. (Isaia 63:9) E se talia ne ia a “puapuaga io me ko te loto mafatia” io me ko so se mea—ke oko ki tena suā tavini—“‵vae ne ia tatou keatea mai te alofa o te Atua.” (Loma 8:35, 38, 39) E a, e se otia ‵tou loto ke fai foki penā, mai te sē talia o so se mea io me ko so se tino ke ‵vae ne ia tatou mo Ieova?

Ke fakamagalo e se ko te manatu māmā. Kafai e fakamagalo ne tatou a nisi tino kolā ne ‵se mai, e se fakafoliki, ‵pulu, fai fakamasakoga, io me manatu mā‵ma tatou ki olotou faifaiga. Masaua, e se talia ne Ieova a te agasala, kae e fakamagalo ne ia māfai e isi se pogai ‵tau ke fai penā. (Salamo 103:12, 13; Sapakuka 1:13) Kafai e fakamalosi mai a ia ke fakamagalo ne tatou a nisi tino, e fakamolemole mai a ia ke fakaakoako atu tatou ki a ia. E se fai mai a ia ke ‘tumau i te ita ki te se gata mai.’—Salamo 103:9; Mataio 6:14.

Kafai e ‵kalo keatea tatou mai te ita fakamoemoe, e maua ne tatou a mea aoga. I se auala fea? Mafaufau ki te tulaga tenei. E sau aka ne koe se fatu, kāti e nofo tena ‵mafa ki nai pauna, kae sau aka ne koe ki tou lima e ‵fola. Kāti e seai se fakalavelave a te taofi aka ne koe te fatu tenā mō se taimi toetoe. Kae e a māfai ko fi‵ta koe i te taofiga penā mō se taimi tai leva? Ka pefea te leva e mafai ne koe o taofi—nai minute, se itula? Io me tai leva atu? E seai se fakalotolotolua me ka ‵mae valevale eiloa tou lima! E tonu, e se mafai o ‵fuli a te ‵mafa o te fatu. Kae ko te leva e taofi ei ne koe, ko te momea aka o te ‵mafa ki a koe. E penā foki te ita fakamoemoe. Ko te leva e ‵nofo tatou mo te ita fakamoemoe—ke oko foki eiloa ki se tamā mea—ko te momea aka o te ‵tou logo‵mae. E se tioa eiloa o fakamalosi mai a Ieova ke ‵kalo keatea tatou mai i te ita fakamoemoe. E tonu, a te fulitua atu ki ei ka aoga eiloa ki a tatou.—Faataoto 11:17.

“Ne Maua ne Au se Lagonaga e Pelā me Faipati Mai a Ieova ki a Au”

Se a te mea ne fesoasoani atu ki a Linda ke se nofo mo te ita fakamoemoe ki faifaiga a se tino talitonu ki a ia? E aofia i mea e uke, ne mafaufau ‵loto tou fafine ki pogai faka-te-Tusi Tapu ke fakaasi atu te loto fakamagalo. (Salamo 130:3, 4) Ne otia malosi eiloa a Linda i te iloa atu me kafai e fakamagalo atu tatou, ka fakamagalo foki tatou ne Ieova. (Efeso 4:32–5:2) Ne fai mai tou fafine ki te auala ne pokotia ei a ia i kilokiloga konā: “Ne maua ne au se lagonaga e pelā me faipati mai a Ieova ki a au.”

E seki leva, kae ne mafai ne ia o ‵teke atu ki te ita fakamoemoe. Ne fakamagalo faka‵lei eiloa ne ia te tuagane, kae nei ko fai te tuagane tenā mo fai tena taugasoa pele. Ne tumau eiloa a Linda i te gasolo atu ki mua i tena taviniga ki a Ieova. Ke na talitonu me e fia fesoasoani atu a Ieova ke fai foki koe penā.