E Fakaasi ne Ieova Tena ‵Malu ki Tino Loto Mau‵lalo

“Fakalogo ki te Aliki, kae loto maulalo, kae ka maua ne koe te maumea, te fakaaloalogina mo te ola leva.”​—FAATAOTO 22:4.

1, 2. (a) E fakaasi mai pefea i te tusi o Galuega i a Setefano “se tino e ‵fonu i te fakatuanaki mo te agaga tapu”? (e) Se a te fakamaoniga telā e fakaasi mai me ne loto maulalo a Setefano?

A SETEFANO se “tino e ‵fonu i te fakatuanaki mo te Agaga Tapu.” Ne ‘‵fonu foki a ia i te aga‵lei mo te ‵mana.’ E pelā me se soko mua e tokotasi o Iesu, ne fai ne ia a fakailoga ‵lasi mo mea fakaofoofogia i mua o tino. I te taimi e tasi, ne olo atu ei a nisi tino ke kinau mo ia, kae “e se mafai eiloa ne latou o ‵teke atu ana pati” kolā ne “tuku atu ne te agaga.” (Galuega 6:​5, 8-​10) E manino ‵lei i ei, me ne fai eiloa a Setefano mo fai se tino sukesuke ‵loto ki te Muna a te Atua, kae ne ‵pulu ne ia mo te poto i mua o takitaki lotu Iutaia i ana aso. Ana fakamatalaga likiliki e uiga ki ei i te Galuega mataupu e 7, e fakamaoni mai i ei a te lasi o tena loto finafinau o fakaasi manino mai a te fuafuaga a te Atua.

² E se pelā mo takitaki lotu, kolā ne fai olotou tulaga mo te lotou poto ke ma‵luga atu latou i tino o te fenua, ne loto maulalo a Setefano. (Mataio 23:​2-7; Ioane 7:​49) E tiga eiloa ne ‵loto tena iloa i te Tusi Tapu, ne loto fiafia eiloa tou tagata ki te galuega ke “tufatufa atu a tupe mo koloa” ko te mea ke avanoa a te kau apositolo o “fai talosaga mo te folafola atu o te tala ‵lei.” Ne lauiloa a uiga ‵lei o Setefano i te kau taina tenā, ne filifili aka ei ke aofia i tāgata ‵lei e tokofitu kolā ne fakasoa atu ne latou a mea‵kai i aso katoa. Ne talia eiloa ne ia mo te loto maulalo a te galuega tenā.​​—Galuega 6:​1-6.

3. Se a te fakaasiga fakaofoofogia o te alofa tauanoa o te Atua telā ne maua ne Setefano?

³ A te uiga loto maulalo o Setefano fakatasi mo tena malosi i te feitu faka-te-agaga mo tena fakamaoni, ne lavea eiloa ne Ieova. I te taimi ne talai atu ei a Setefano ki se potukau o takitaki lotu kaitaūa i te Sanetulini, “ne matea atu . . . ne latou i foliga o Setefano, ko pelā mo foliga o se agelu.” (Galuega 6:​15) Ne foliga eiloa a ia pelā me se avefekau a te Atua, kae ne lavea atu tena mata filemu telā ne maua mai i te Atua ‵malu, ko Ieova. Mai tua o te tukuatuga o se molimau loto toa ki sui o te Sanetulini, ne maua ei ne Setefano se fakaasiga fakaofoofogia o te alofa tauanoa o te Atua. “Ka ko Setefano i mo taimi konā, ko ‵fonu eiloa i te agaga tapu. Ne kilo ake ona mata ki te lagi, matea atu ei ne ia te ‵malu o te Atua mo Iesu e tu i te feitu tāua, ko te fakaatamai o te Atua.” (Galuega 7:​55) Ne toe fakamautinoa atu ne te fakaasiga fakaofoofogia tenei ki a Setefano a te tulaga o Iesu e pelā me ko te Tama a te Atua mo te Mesia. Ne fakamalosi atu ei ki a Setefano telā ne loto maulalo, kae fakatalitonu atu foki me ko maua ne ia te taliaga a Ieova.

4. Ko oi e fakaasi atu ne Ieova ki ei tena ‵malu?

⁴ E pelā mo te fakaasiga ki a Setefano, e fakaasi mai ei ne Ieova tena ‵malu mo tena fuafuaga ki tino kolā e ma‵taku kae fakatāua ne latou te lotou fesokotakiga mo Ia. E fai mai te Tusi Tapu: “Fakalogo ki te Aliki, kae loto maulalo, kae ka maua ne koe te maumea, te fakaaloalogina mo te ola leva.” (Faataoto 22:4) Tela la, se mea tāua ke malamalama ‵lei tatou i te uiga tonu o te loto maulalo, e ‵toki pefea ne tatou te uiga tāua tenei, kae e aogā pefea ki a tatou mai tena fakaasiatuga i feitu katoa o te olaga.

Te Loto Maulalo​​—Se Uiga o te Atua

5, 6. (a) Se a te loto maulalo? (e) Ne fakaasi mai pefea ne Ieova te loto maulalo? (i) E pokotia pefea tatou ona ko te loto maulalo o Ieova?

⁵ E mafai o ofo a nisi tino me i a Ieova te Atua, te ‵toe tino maluga kae ‵malu i te lagi mo te lalolagi, ko te ‵toe fakaakoakoga sili o te loto maulalo. Ne fai atu te Tupu ko Tavita ki a Ieova: “Ne puipui kae fakasao ne koe au; ko tau tausiga [“tou loto maulalo,” NW] ko fai ei au mo se tino maluga.” (Salamo 18:35) I tena fakamatalaga e uiga ki te loto maulalo o Ieova, ne fakaaogā ne Tavita se pati fakavae i te ‵gana Epelu telā e fakauiga ki te “totuli ki lalo.” I tafa o te pati ko te “loto maulalo,” e fakaasi mai foki i ei a nisi pati kolā e fakauiga ki tena loto ‵lei o “fakamalalo ifo ke ‵pau mo tino kolā e ma‵lalo ifo i a ia.” Tela la, ne fakaasi mai ne Ieova te loto maulalo i te taimi ne fakamalalo ifo ei a ia ke fesokotaki atu ki te tagata sē ‵lei katoatoa ko Tavita kae fakaaogā ne Ia tou tagata mo fai Tena sui tupu. E pelā mo pati fakatomua ki te Salamo 18 i te New World Translation, ne puipui kae fesoasoani atu a Ieova ki a Tavita kae fakasao a ia mai “i lima o ana fili katoa mo lima o Saulo.” E penā foki loa a Tavita, ne iloa ne ia me i tena takutakua mo tena ‵malu ne fakalagolago ki faifaiga loto maulalo a Ieova ki a ia. Ne fesoasoani atu a te iloaga tenei ke tumau a Tavita i te loto maulalo.

⁶ Kae e a tatou? Ko oti ne filifili aka ne Ieova ke akoako mai ki a tatou te munatonu, kae kāti ko oti foki ne tuku mai ne ia ki a tatou a tauliaga fakapito i te taviniga e auala i tena fakapotopotoga, io me kāti e fakaaogā ne ia tatou i nisi auala ke fakataunu ei tena loto. E pefea ‵tou lagonaga e uiga ki mea katoa konei? E mata, e se ‵tau o loto maulalo tatou? E mata, e se ‵tau o loto fakafetai tatou ki te loto maulalo o Ieova kae ‵kalo keatea mai te fia sili, telā e mafai eiloa o iku atu ki fakalavelave ‵lasi?​​—Faataoto 16:18; 29:23.

7, 8. (a) Ne fakaasi mai pefea te loto maulalo o Ieova i ana faifaiga ki a Manase? (e) I te auala fea e tuku mai ei ne Ieova, e penā foki mo Manase, se fakaakoakoga mō tatou ke tau‵tali ki ei i te fakaasiatuga o te loto maulalo?

⁷ E se gata fua i te fakaasi mai ne Ieova a te loto maulalo sili i ana fesokotakiga mo tāgata sē ‵lei katoatoa kae ne loto fiafia foki a ia ke fakaasi atu te loto fakamagalo ki tino ma‵lalo, ke oko eiloa ki te faka‵tuakaga, io me ko te fakamalugāga o tino kolā e loto mau‵lalo. (Salamo 113:​4-7) Mafaufau ki te Tupu o Iuta ko Manase. Ne fakaaogā ‵se ne ia tena tauliaga e pelā me ko te tupu ke fakamalosi aka ei a te tapuakiga ‵se kae “ne agasala malosi eiloa a ia ki a Ieova, tena ne kaitaua ei a Ieova.” (2 Nofoaiga Tupu 33:6) Fakamuli ifo, ne fakasala ne Ieova a Manase mai te taliaga ke ave keatea ne te tupu o Asulia a ia mai tena tulaga fakatupu. I te taimi ne nofo ei a Manase i te falepuipui, “ne mafuli atu a ia ki a Ieova tena Atua mo te fakamaulalo,” kae ne toe fakafoki atu ei ne Ieova tena Atua a ia ki tena tulaga fakatupu i Ielusalema, telā ne “iloa tonu ei ne Manase i a Ieova ko te Atua eiloa.” (2 Nofoaiga Tupu 33:​11-​13) E tonu, ne fakafiafia atu fakamuli te loto maulalo o Manase ki a Ieova, telā ne toe fakaasi atu ei ne Ia te loto maulalo mai tena fakamagaloga kae toe fakafoki atu ki tena tulaga fakatupu.

⁸ A te loto fiafia o Ieova ke fakamagalo mō te loto salamō o Manase e tuku mai i ei ki a tatou a akoakoga tāua e uiga ki te loto maulalo. E ‵tau o masaua faeloa ne tatou me i ‵tou faifaiga ki tino kolā ne fakalogo‵mae mai mo ‵tou kilokiloga māfai ko agasala tatou, e mafai eiloa o pokotia i ei a faifaiga a Ieova ki a tatou. Kafai e loto fia‵fia tatou o fakamagalo a mea ‵se a nisi tino kae taku ‵tonu atu mo te loto maulalo ‵tou mea ‵se, e mafai eiloa o ‵kilo atu tatou ki te alofa fakamagalo o Ieova.​​—Mataio 5:​23, 24; 6:​12.

E Fakaasi Atu te ‵Malu o te Atua ki Tino Loto Mau‵lalo

9. E mata, e fakauiga a te loto maulalo ki te ‵seva? Fakamatala mai.

⁹ E se ‵tau o fakauiga ‵se a te loto maulalo mo nisi uiga aka penā, ki te ‵seva io me se auala ke talia ei te faiga o mea ‵se. E pelā mo te mea e fakamaoni mai i te Tusi Tapu, e loto maulalo a Ieova, kae e fakaasi mai eiloa ne ia tena kaitaua amiotonu mo tena malosi sē fuafuagina māfai ko ‵tau o fai penā. Ona ko tena loto maulalo, e saga atu eiloa a Ieova, io me e saga fakapito atu eiloa a ia ki tino loto mau‵lalo, kae e faka‵mao a ia mai tino fakamata‵mata. (Salamo 138:6) Ne fakaasi mai pefea ne Ieova tena saga fakapito atu ki ana tavini loto mau‵lalo?

10. Se a te mea e fakaasi atu ne Ieova ki tino loto mau‵lalo, e pelā mo te mea e fakaasi mai i te 1 Kolinito 2:​6-10?

¹⁰ I tena taimi tonu kae e auala i te potukau ne filifili ne ia ke fesokotaki mai, ko oti ne fakaasi atu ne Ieova ki tino loto mau‵lalo a mea likiliki e uiga ki te fakataunuga o tena fuafuaga. A mea ‵malu konei e ‵funa faeloa mai tino kolā e fakalagolago atu mo te fakamata‵mata, io me e tau‵tali atu mo te loto ‵fika ki poto io me ko mafaufauga o tino. (1 Kolinito 2:​6-​10) Kae ko tino loto mau‵lalo, i te mauaga ne latou o te iloaga tonu e uiga ki te fuafuaga a Ieova, e fakamalosi aka ei latou ke tavae atu ki a Ieova ona ko te lasi o te lotou amanaia ki tena ‵malu se fuafuagina.

11. I te senitenali muamua, ne fakaasi atu pefea ne nisi tino a te sē lava o te loto maulalo, kae ne logo‵mae pefea latou ona ko te mea tenā?

¹¹ I te senitenali muamua, ne fakata‵mala o fakaasi atu ne tino e tokouke, e aofia i ei a nisi tino kolā e fai mai i a latou ne Kelisiano, a te loto maulalo kae ne ‵siga ei latou i te taimi ne fakaasi atu ei ne te apositolo ko Paulo a mea e uiga ki te fuafuaga a te Atua. Ne fai a Paulo mo “apositolo mō tino o fenua fakaa‵tea,” kae ne seki fai penā ona ko tena fenua, tena akoakoga, tena matua, io me ko tena leva i te faiga o galuega ‵lei. (Loma 11:13) E masani sāle a tino o te lalolagi o ‵kilo atu ki mea konei e pelā me ne mea e fakavae ki ei a filifiliga a Ieova e uiga ki tino kolā e ‵tau o fakaaogā ne ia. (1 Kolinito 1:​26-​29; 3:1; Kolose 2:​18) Kae ne filifili eiloa ne Ieova a Paulo, e ‵tusa eiloa mo Tena alofa kaimalie mo ana fuafuaga amio‵tonu. (1 Kolinito 15:​8-10) A tino kolā ne taku ne Paulo ki “apositolo ‵loi,” penā foki loa mo nisi tino ‵teke, ne ita fitifiti ma talia ne latou a Paulo mo ana fakamatalaga mai te Tusi Tapu. Ona ko te sē lava o te lotou loto maulalo, ne seki maua ei ne latou te iloaga mo te malamalama e uiga ki te auala ‵malu e fakataunu ei ne Ieova tena fuafuaga. Ke mo a eiloa ma manatu mā‵mā io me e fakamasino aka ne tatou a tino kolā e filifili ne Ieova ke fakaaogā ne ia i te fakataunuga o tena loto.​​—2 Kolinito 11:​4-6.

12. E fakaasi mai pefea i te fakaakoakoga a Mose me e talia ne Ieova a tino loto mau‵lalo?

¹² I te suā feitu, e uke ‵ki a fakaakoakoga i te Tusi Tapu kolā e fakaasi mai i ei te auala ne lavea ei ne tino loto mau‵lalo se fakaasiga o te ‵malu o te Atua. Ne lavea ne Mose, te ‵toe “tagata loto malalo” eiloa i tāgata katoa, a te ‵malu o te Atua kae ne maua foki ne ia se fesokotakiga pili ‵ki mo te Atua. (Numela 12:3) A te tagata loto maulalo tenei, telā ne fakamāumāu ne ia se 40 tausaga e pelā me se tausi mamoe fatauva, kae kāti ne nofo atu a ia i te lasiga o taimi i te kogā fenua ko Alapi, ne taulia malosi a ia i te Atua i auala e uke. (Esoto 6:​12, 30) Mai te fesoasoani o Ieova, ne fai ei a Mose mo fai te tukumuna mo te takitaki o te fenua ko Isalaelu. Ne fesokotaki ‵tonu eiloa a laua mo te Atua. E auala i se fakaasiga, ne ‘matea ei ne ia a Ieova.’ (Numela 12:​7, 8; Esoto 24:​10, 11) A tino kolā e talia ne latou a te tavini loto maulalo mo te sui tenei o te Atua ne fakamanuiagina foki. E penā foki loa, ka fakamanuiagina tatou māfai e talia kae faka‵logo tatou ki te pelofeta telā e sili atu i a Mose, ko Iesu, e pelā foki mo “te tavini fakamaoni kae poto” telā ne ‵tofi aka ne ia.​​—Mataio 24:​45, 46; Galuega 3:​22.

13. Ne fakaasi atu pefea te ‵malu o Ieova ki tausi mamoe loto mau‵lalo i te senitenali muamua?

¹³ Ne ‘fakaasi’ atu ki a ai ‘te ‵malu o Ieova’ i te taimi ne faka‵pula atu ei ne te agelu a te tala ‵lei o te fanaumaiga o te “Fakaola ko Keliso te Aliki”? Ne seki fakaasi atu ki takitaki lotu fia ma‵luga io me ki tino i tulaga ma‵luga kae ki tausi mamoe loto mau‵lalo kolā “ne ‵nofo i te kogā vao tenā i te po, e tausi olotou mamoe.” (Luka 2:​8-​11) Ne seki ‵kilo atu ki tino konei e pelā me ne tino fai pepa ma‵luga kae tāua olotou galuega. Kae ne lavea ne Ieova a latou konei kae ne filifili foki ne ia ke fakaasi atu muamua ki a latou te fanaumaiga o te Mesia. E tonu, e fakaasi atu ne Ieova tena ‵malu ki tino loto mau‵lalo kae ma‵taku ki te Atua.

14. Ne a fakamanuiaga mai te Atua e maua ne tino loto mau‵lalo?

¹⁴ Ne a mea e akoako mai ne fakaakoakoga konei ki a tatou? E fakaasi mai ki a tatou me e talia ne Ieova kae fakaasi atu foki ne ia te iloaga mo te malamalama e uiga ki ana fuafuaga ki tino loto mau‵lalo. E filifili aka ne ia a tino kolā kāti e se fetaui mo te kilokiloga faka-te-tagata kae fakaaogā eiloa ne ia ke auala atu i a latou a tena fuafuaga ‵malu ki nisi tino. E ‵tau o fakamalosi mai te mea tenei ki a tatou ke tumau eiloa i te ‵kilo atu ki a Ieova, tena Muna fakavaloaga, mo tena fakapotopotoga mō se takitakiga. E tali‵tonu tatou me ka tumau eiloa a Ieova i te fakaasimaiga ki ana tavini loto mau‵lalo ana fuafuaga ‵malu. Ne folafola mai te pelofeta ko Amosa: “E se mafai lele o fai ne te Aliki Sili se mea kae seki fakaasi mai tena fuafuaga ki ana tavini ko pelofeta.”​​—Amosa 3:7.

Ke ‵Toki te Loto Maulalo Kae ka Maua ei te Taliaga a te Atua

15. Kaia e ‵tau ei o ga‵lue tatou ke fakatumau te loto maulalo, kae e fakaasi mai pefea te mea tenei i te Tupu o Isalaelu ko Saulo?

¹⁵ Ke talia faeloa ne te Atua, e ‵tau o tumau tatou i te loto maulalo. E se fakauiga i ei me kafai ko loto maulalo se tino, ka loto maulalo faeloa a ia. E mafai o tiaki ne se tino te loto maulalo kae kamata o fakamatamata kae fakamaualuga, kae e iku atu i ei ki fakalavelave ‵lasi. Ne fai eiloa penā a Saulo, te tupu fakaekegina muamua o Isalaelu. I te taimi ne filifili muamua aka ei a ia, ‘ne manatu fatauva a ia ki a ia eiloa.’ (1 Samuelu 15:17) Kae mai tua fua o te lua tausaga ne pule ei a ia, ne kamata o fakamaualuga tou tagata. Ne fakasēaogā ne ia a te fakatokaga a Ieova mō te ofoatuga o taulaga e auala i te pelofeta ko Samuelu, kae ne taumafai foki o fai ana fakamasakoga e uiga ki ei. (1 Samuelu 13:​1, 8-​14) Tenei eiloa te kamataga o mea ne ‵tupu kolā ne fakaasi mai i ei te sē lava o tena loto maulalo. Ne iku atu i ei ki te galo mai i a ia a te agaga mo te taliaga a te Atua, kae ne iku atu i ei ki tena mate fakalumalumagina. (1 Samuelu 15:​3-​19, 26; 28:6; 31:4) E manino ‵lei eiloa te akoakoga: E ‵tau eiloa o ga‵lue tatou ke fakatumau te loto maulalo mo te fakalogo kae ‵teke atu ki lagonaga fia takutakua, ko ‵kalo ei keatea mai faifaiga fia ‵sili kolā e iku atu ki te sē fiafia mai o Ieova.

16. E mafai pefea o fesoasoani mai a te mafaufau ‵mafa ki ‵tou fesokotakiga mo Ieova fakatasi mo ‵tou taina ke ‵toki ne tatou te loto maulalo?

¹⁶ E tiga eiloa e se aofia te loto maulalo i fuataga o te agaga o te Atua, a te mea tenā se uiga o te Atua telā e ‵tau eiloa o maua ne tatou. (Kalatia 5:​22, 23; Kolose 3:​10, 12) Ona ko te mea e aofia i ei te tulaga o te mafaufau​​—ko te auala eiloa tenā e ‵kilo ifo ei tatou ki a tatou eiloa fakatasi mo nisi tino​​—e manakogina eiloa a taumafaiga e uke ke ati aka ei te loto maulalo. A te mafaufau ‵mafa mo te mafaufau ‵loto ki ‵tou fesokotakiga mo Ieova mo ‵tou taina e mafai eiloa o fesoasoani mai ki a tatou ke tumau i te loto maulalo. I te kilokiloga a te Atua, a tino sē ‵lei katoatoa katoa e fai pelā mo mouku lauusiusi i se vaitaimi, ko mage‵mage atu ei. A tino e fai fua pelā me ne lō fo‵liki i se malae. (Isaia 40:​6, 7, 22) E mata, e isi se pogai mō se lau e tasi o se mouku ke fakamatamata me e tai leva malie atu a ia i nisi lau o te mouku? E mata, e isi se pogai ke fakamatamata ei se lō e tasi ona ko te mea e gasuesue malosi atu a ia i nisi lō? Se mea valea ke fai penā. Tela la, ne fakamasaua atu te apositolo ko Paulo ki ana taina Kelisiano: “Ko oi ne fai ne ia koe ke sili i nisi tino? Ne seki tuku atu ne te Atua a mea katoa konā e i a koe? Kafai la ko maua ne koe, ai a la ne fakamatamata ei koe?” (1 Kolinito 4:7) A te mafaufau ‵loto ki tusi siki penei i te Tusi Tapu e fesoasoani mai ki a tatou ke ‵toki kae fakaasi atu te loto maulalo.

17. Se a te mea ne fesoasoani atu ki te pelofeta ko Tanielu ke ‵toki ne ia te loto maulalo, kae se a te mea e fesoasoani mai ki a tatou ke fai foki penā?

¹⁷ Ne taku atu ki te pelofeta Epelu ko Tanielu me i “te Atua e alofa” atu ki a ia ona ko tena loto maulalo. (Tanielu 10:​11, 12) Se a te mea ne fesoasoani atu ki a Tanielu ke maua ne ia te loto maulalo? Muamua la, ne fakaasi atu ne ia tena fakalagolago katoatoa ki a Ieova, mai te tumau faeloa i te ‵talo atu ki a ia. (Tanielu 6:​10, 11) E se gata i ei, ne fai a Tanielu mo fai se tino sukesuke ‵loto ki te Muna a te Atua, kae ne fesoasoani atu ei ki a ia ke tumau i te saga tonu atu ki te fuafuaga ‵malu a te Atua. Ne talia foki ne ia ke taku ‵tonu atu ana vāivāiga, kae e se ko vāivāiga fua o ana tino. Kae ne fiafia tonu foki a ia o fakasalalau atu a te amiotonu o te Atua, kae e se ko tena amiotonu. (Tanielu 9:​2, 5, 7) E mata, e mafai o tauloto ne tatou se mea mai te fakaakoakoga tafasili i te gali a Tanielu kae taumafai ke ‵toki kae fakaasi atu te loto maulalo i vaega katoa o ‵tou olaga?

18. Se a te tulaga ‵malu e faka‵tali mai mō tino loto mau‵lalo i aso nei?

¹⁸ E fai mai te Faataoto 22:​4, penei: “Fakalogo ki te Aliki, ko Ieova, kae loto maulalo, kae ka maua ne koe te maumea, te fakaaloalogina mo te ola leva.” E tonu, e talia ne Ieova a tino loto mau‵lalo, kae ka maua ne latou te tulaga ‵malu mo te ola. Mai tua o te taimi toeitiiti kae taofi aka ei tena taviniga ki te Atua mo te ‵toe ‵fuliga o ana mafaufauga ne Ieova, ne taku ‵tonu mai mo te loto maulalo a te faisalamo ko Asafo: “Ne takitaki atu au ne koe ki tau fakatonuga, kae fakamuli ko talia ei au ne koe mo te fakaaloalo.” (Salamo 73:24) Kae e aogā pefea te mea tenei i aso nei? Se a te tulaga ‵malu telā e faka‵tali mai mō tino kolā e fakaasi atu ne latou te loto maulalo? I tafa o te mauaga o se fesokotakiga gali kae fakafiafia mo Ieova, e fakamoe‵moe eiloa latou ke lavea atu te fakataunuga o pati kolā ne fakaosofia ke tusi ki lalo ne te Tupu ko Tavita: “Ka ko latou kolā e loto malalo, ka fai mo latou te fenua, kae ka maua ne latou te manuia mo te filemu katoatoa.” Se tulaga ‵malu eiloa mō aso mai mua!​​—Salamo 37:11.

E Masaua ne Koe

• Ne fai pefea a Setefano mo fai se fakaakoakoga o se tino loto maulalo telā ne fakaasi atu ne Ieova ki ei Tena tulaga ‵malu?

• Ne a auala ne fakaasi atu ei ne Ieova te Atua te loto maulalo?

• Ne a fakaakoakoga e fakaasi mai i ei me e fakaasi atu ne Ieova tena tulaga ‵malu ki tino loto mau‵lalo?

• E fesoasoani mai pefea te fakaakoakoga a Tanielu ke fakaasi atu ne tatou te loto maulalo?

[Pokisi i te itulau e 27]

E Loto Malosi Kae Loto Maulalo

I te 1919 i Cedar Point, Ohio, i U.S.A., i te fono lasi a Tino A‵koga i te Tusi Tapu (kolā ko lauiloa nei e pelā me ko Molimau a Ieova), ne fesoasoani atu mo te fiafia a J. F. Latafoti telā ko 50 ana tausaga i te taimi tenā kae ne tausi foki ne ia te galuega, ki te sauga o kope mo te takitakiatuga o tino kolā ne ‵kau atu ki te fono ki olotou potu ‵moe. I te ‵toe aso o te fono, ne fakafiafia ne ia te kau fakalogo‵logo e toko 7,000 ki pati konei: “A koutou sui o te Tupu o tupu mo te Aliki o aliki, ke fakasalalau atu ki tino katoa . . . te malo ‵malu o te ‵tou Aliki.” E tiga eiloa ne ma‵losi a talitonuga o te Taina ko Latafoti, ne lauiloa pelā me se tino telā e ma‵losi ana pati e aunoa mo te gutugutulua ki muna‵tonu kolā ne talitonu a ia ki ei, ne loto maulalo tonu eiloa a ia i mua o te Atua, kae ne lavea atu faeloa te mea tenā i ana ‵talo i lotu taeao i te Peteli.

[Fakamatalaga o te Ata i te itulau e 23]

A Setefano, telā ne iloa ‵lei ne ia a te Tusi Tapu, ne loto maulalo ke tufatufa atu ne ia a meakai

[Fakamatalaga o te Ata i te itulau e 24]

Ne fakafiafia atu a te loto maulalo o Manase ki a Ieova

[Fakamatalaga o te Ata i te itulau e 26]

Se a te mea ne fai ei a Tanielu ke ‘alofa atu te Atua ki a ia’?