Te Fakataunuga o Ata Fakavaloaga e Uiga ki te Malo o te Atua

“Ka manuia otou galuega manafai e faka‵logo ki [pati fakapelofeta], me e pelā eiloa mo se moli e maina atu ki te koga pouli.”​—⁠2 PETELU 1:⁠19.

1. Ne a mea ‵kese e lua e lavea atu ne tatou i te lalolagi i aso nei?

MAI te suā fakalavelave ki te suā fakalavelave​—⁠tenā eiloa te tulaga o te lalolagi i aso nei. Mai fakalavelave ‵tupu ki te natula ke oko ki amioga takafia‵toa i te lalolagi kātoa, e foliga mai me ko sē ‵kafi ne tino o faka‵lei aka a fakalavelave konā. Ke oko foki eiloa ki lotu o te lalolagi ko sē mafai o fesoasoani atu. A te tonuga loa, e fai fua ne latou ke sinā ma‵sei atu a fakalavelave mai te fakamalosiakaga o manatu fakailoga tino, te takalialia, mo te loto fenua kolā e mavae‵vae i ei a tino. E tonu, e pelā eiloa mo te mea ko leva ne ‵valo mai, ko ufi nei ne “te pouliga” a “malo” io me ko atufenua katoa. (Isaia 60:⁠2) Kae ko te vaitaimi foki eiloa tenā e ‵kilo atu ei te fia miliona o tino mo te loto tali‵tonu ki aso mai mua. Kaia? Me e ‵saga tonu atu eiloa latou ki muna fakapelofeta a te Atua e pelā me ‘se moli e maina atu i te koga pouli.’ E talia ne latou te “talaiga” io me ko te fekau a te Atua telā e maua i te Tusi Tapu, ke takitaki ei latou.​—⁠2 Petelu 1:19.

2. E ‵tusa mo te valoaga a Tanielu e uiga ki te “taimi o te gataga,” ko oi a tino kolā ka tuku atu fua ki a latou a te malamalama faka-te-agaga?

² E uiga ki “te taimi o te gataga,” ne tusi mai te pelofeta ko Tanielu: “Ka salalau valevale atu ei a tino e tokouke, kae ka lasi te malamalama tonu. Ka tokouke a tino ka faka‵ma i feitu fakatapuakiga. A tino amio ma‵sei ka sē malamalama, kae tumau faeloa olotou amioga ma‵sei; ko tino ‵poto fua e malamalama i ei.” (Tanielu 12:​4, 10, NW) E tuku atu fua a te malamalama faka-te-agaga ki tino kolā e “salalau valevale atu” kae suke‵suke fakamaoni ki te Muna a te Atua, tau‵tali ki ana tulaga amio‵tonu kae taumafai malosi o fai tena loto.​—⁠Mataio 13:​11-15; 1 Ioane 5:20.

3. I tausaga kolā ne kamata i te 1870, se a te munatonu tāua ne malamalama i ei a tino suke‵suke ki te Tusi Tapu?

³ I tausaga e kamata i te 1870, mai mua o “aso fakaoti,” ne kamata o fakamaina mai ne Ieova te Atua “a mea ‵funa o te Malo o te lagi.” (2 Timoteo 3:​1-5; Mataio 13:11) I te vaitaimi tenā, ne iloa aka ne se potukau telā ne sukesuke ki te Tusi Tapu me i te foki mai o Keliso ka sē matea tonu atu, se manatu telā ne ‵kese mo te talitonuga masani o tino. Mai tua o tena fakasopoga i te lagi, ne foki mai eiloa a Iesu mai te fakasagaifoga o tena pulega fakatupu ki te lalolagi. E auala i vaega kese‵kese o te fakailoga kolā e lavea ki mata, ka iloa ei ne ana soko a te kamataga o tena fakatasi mai telā e se matea.​—⁠Mataio 24:​3-14.

Te Fakataunuga o se Ata Fakavaloaga

4. Ne fakamalosi aka pefea ne Ieova a te fakatuanaki o ana tavini i aso nei?

⁴ A te ‵fuliga o foliga o Iesu se ata fakaofoofogia o te ‵malu o Iesu i tena pulega faka-te-Malo. (Mataio 17:​1-9) Ne fakamalosi atu eiloa a te fakaasiga tenā ki te fakatuanaki o Petelu, Iakopo mo Ioane i te taimi ne seki toe tau‵tali atu ei a tino e tokouke ki a Iesu me ne seki fakataunu ne ia a olotou fakamoemoega sē ‵tonu. E penā foki eiloa i te taimi tenei o te gataga, ko oti ne fakamalosi aka ne Ieova a te fakatuanaki o ana tavini fakamaoni i aso nei mai te fakamalamalama atu ki a latou a mea e uke atu e uiga ki te fakataunuga o te fakaasiga fakaofoofogia tenā mo nisi valoaga foki kolā e tai ‵pau. Ke na sau‵tala nei tatou ki nisi mea faka-te-agaga fakamalosi loto konā.

5. Ko oi te Fetu Ao, kae ne ‘sae’ aka a ia i te taimi fea kae pefea foki?

⁵ E uiga ki te ‵fuliga o foliga o Iesu, ne tusi mai te apositolo ko Petelu: “Tela la, e sili atu te tali‵tonu omotou loto ki te talaiga telā ne folafola ne pelofeta. Ka manuia otou galuega manafai e faka‵logo ki ei, me e pelā eiloa mo se moli e maina atu ki te koga pouli, ke oko ki te mafāga o te ata, mo te mainaga o te fetu ao e maina i otou loto.” (2 Petelu 1:19) A te “fetu ao” tenā, ko Iesu Keliso i tena ‵malu fakatupu. (Fakaasiga 22:16) Ne ‘sae aka te mainaga’ tenā i te 1914 i te taimi ne fakatu aka ei te Malo o te Atua i te lagi, ko te kamataga tenā o se vaitaimi fou. (Fakaasiga 11:15) I te ‵fuliga o foliga o Iesu, ne ‵tu atu i ana tafa a Mose mo Elia kae ne sau‵tala fakatasi mo ia. Ko oi a tino ne fakaata mai ne laua?

6, 7. Ko oi a tino ne fakaata mai ne Mose mo Elia, i te ‵fuliga o foliga o Iesu, kae ne a fakamatalaga tāua e fakaasi mai i te Tusi Tapu e uiga ki tino kolā ne fakaata mai ne laua?

⁶ Ona ko te mea ne ‵kau fakatasi a Mose mo Elia i te ‵malu o Keliso, ne sui ne molimau fakamaoni e tokolua konei a tino kolā ka pule fakatasi mo Iesu i tena Malo. E fetaui ‵lei a te malamalama me e isi ne tino ka pule fakatasi mo Iesu mo te fakaasiga telā ne lavea ne te pelofeta ko Tanielu e uiga ki te Mesia telā ko oti ne faū mo fai te tupu. Ne lavea ne Tanielu “se mea pelā me se tino ola io me se tama a te tagata” kae ne maua ne ia “te malosi faka-tupu . . . se toe gata mai” mai i a “ia telā e ola ki te se-gata-mai,” ko Ieova te Atua. Kae ke onoono la ki te mea ne fakaasi atu ki a Tanielu mai tua malie ifo i ei. Ana pati: “A te malosi mo te takutakua o malo katoa i te lalolagi ka tuku atu ki tino io me ko tino tapu o te Atua maluga.” (Tanielu 7:​13, 14, 27) E tonu, e silia atu i te lima senitenali mai mua o te ‵fuliga o foliga o Iesu, ne fakaasi mai ne te Atua me e isi ne “tino tapu” ka ‵kau fakatasi mo Iesu i tena ‵malu fakatupu.

⁷ Ko oi la a tino tapu i te valoaga a Tanielu? E uiga ki tino taki tokotasi konā, ne tusi mai te apositolo ko Paulo: “Ko te Agaga eiloa telā e molimau mai ki agaga o tatou, me i a tatou ko fanau a te Atua. Ona ko tatou ko ana fanau, ka maua ne tatou a fakamanuiaga ne tausi ne ia mō ana tino, kae ka maua foki fakatasi ne tatou mo Keliso a mea kolā ne tausi ne te Atua mō Keliso, i te mea, kafai e ‵kau fakatasi tatou mo fi‵taga o Keliso, ka ‵kau fakatasi foki tatou mo ia i tona ‵malu.” (Loma 8:​16, 17) Tela la, a tino tapu konei ko soko fakaekegina eiloa o Iesu. I te Fakaasiga, ne fai mai Iesu: “Ko latou kolā e manumalo, e avatu ne au ki a latou te saolotoga ke ‵nofo i oku tafa i toku nofogaaliki, e pelā eiloa mo au ne manumalo, kae nofo nei au i tafa o toku Tamana i tona nofogaaliki.” A ‘tino manumalo’ konei, kolā e toko 144,000, fakatasi mo Iesu, ka pule ifo ki te lalolagi kātoa.​—⁠Fakaasiga 3:​21, 5:​9, 10; 14:​1, 3, 4; 1 Kolinito 15:53.

8. E ‵pau pefea te galuega a soko fakaekegina o Iesu mo Mose mo Elia, kae ne a mea ne iku mai i ei?

⁸ Kaia e fakaata mai ei a Kelisiano fakaekegina ne Mose mo Elia? A te pogai, me e fai ne Kelisiano konā a te galuega telā ne fai foki ne Mose mo Elia i te taimi koi ‵nofo ei latou i te lalolagi. E pelā mo te lotou tavini atu e pelā me ne molimau a Ieova faitalia a fakasauāga. (Isaia 43:10; Galuega 8:​1-8; Fakaasiga 11:​2-12) E pelā mo Mose mo Elia, ne fakaasi faka‵sau atu ne latou mo te loto toa a lotu ‵se kae fakamalosi atu ki tino loto ‵lei ke tavini katoatoa atu ki te Atua. (Esoto 32:​19, 20; Teutelonome 4:​22-​24; 1 Tupu 18:​18-​40) E mata, ne fua mai te lotou galuega? Ao! I tafa o te fakamaopoopomaiga o te aofaki kātoa o tino fakaekegina, ne fesoasoani atu latou ki te fia miliona o ‘nisi mamoe’ ke faka‵logo ki a Iesu Keliso.​—⁠Ioane 10:16; Fakaasiga 7:⁠4.

Ko Fakaoti ne Iesu Tena Galuega Faka-Tupu

9. E fakaasi mai pefea i te Fakaasiga 6:2 a mea e fai ne Iesu i aso nei?

⁹ Ko sē toe fai nei a Iesu e pelā me se tino telā e sopo i luga i se tama a te asini, kae ko fai nei a ia e pelā me se Tupu malosi ‵ki. E fakaasi mai me e tele atu a ia i luga i se solofanua​—⁠se fakailoga faka-te-Tusi Tapu o te taua. (Faataoto 21:31) “Te solofanua ‵kena,” ko pati i te Fakaasiga 6:​2, “e isi se kausana mo te matasana a te tino telā e sopo i luga, ne tuku atu foki ki a ia a te foualiki. Ne fanatu a ia o tau e pelā mo se tino e manumalo sāle i taua.” E se gata i ei, e uiga ki a Iesu, ne tusi mai a Tavita: “A te Aliki ka fakalauefa ne ia tau pulega fakatupu mai Siona. Ana muna, ‘Pule koe i ou fili.’ ”​—⁠Salamo 110:⁠2.

10. (a) Ne iku atu pefea te ‵tele manumalo o Iesu ki se kamataga ‵malu? (e) Ne pokotia pefea a te lalolagi kātoa i te manumaloga muamua o Iesu?

¹⁰ Ne manumalo muamua a Iesu i tena toe fili sili​—⁠ko Satani mo ana temoni. Ne ‵tuli latou keatea mai te lagi kae ‵pei ifo ki te lalolagi. Me e iloa ne latou me ko toetoe te lotou taimi, ko fakaoko atu nei ne agaga ma‵sei konei te lotou kaitaua ki luga i tino katoa, e auala i te avatuga o fakalavelave faiga‵ta. E fakaata mai a fakalavelave konei e auala i tāgata e tokotolu i luga i solofanua i te Fakaasiga. (Fakaasiga 6:​3-8; 12:​7-12) E ‵tusa mo te valoaga a Iesu e uiga ki te “fakailoga e iloa ei [tena] foki mai mo te gataga o te lalolagi,” ne iku atu eiloa te lotou ‵telega tenā ki taua, oge mo famai fakama‵taku. (Mataio 24:​3, 7; Luka 21:​7-​11) E pelā mo te ‵mae o se fafine fanau, e mautinoa eiloa me i taimi o “puapuagā” konei ka gasolo aka eiloa o sinā ma‵sei atu ke oko ki te taimi e fakaoti ei ‘te manumalo o Keliso’ mai te fakaseaiga o vaega katoa i loto i te fakapotopotoga matea a Satani.a​​—⁠Mataio 24:⁠8.

11. E fakamaoni atu pefea a tala o te fakapotopotoga Kelisiano ki te pulega fakatupu a Keliso?

¹¹ E lavea atu foki a te malosi fakatupu o Iesu me e puipui ne ia te fakapotopotoga Kelisiano ko te mea ke fakataunu ei te galuega ko te talaiatuga o te fekau o te Malo ki te lalolagi kātoa. Faitalia a ‵tekemaiga fakama‵taku mai Papelonia te Sili​—⁠te emupaea o lotu ‵se i te lalolagi kātoa​—⁠mo malo ‵teke, ne seki tumau fua te faiga o te galuega talai kae ko oti foki ne oko atu ki se tulaga telā ne seki maua aka eiloa i te lalolagi kātoa. (Fakaasiga 17:​5, 6) Ma‵faga o fakamaoniga lasi ki te pulega fakatupu a Keliso!​—⁠Salamo 110:⁠3.

12. Kaia e se lavea ei ne te tokoukega o tino a te fakatasi mai sē matea o Keliso?

¹² Kae e fakafanoanoa me i te tokoukega o tino, e aofia i ei te fia miliona o tino kolā e fai mai i a latou ne Kelisiano, e se lavea ne latou a mea sē matea mai tua o mea kolā e ‵tupu tonu nei i te lalolagi. E fakatauemu atu foki latou ki tino kolā e folafola atu ne latou a te Malo o te Atua. (2 Petelu 3:​3, 4) Kaia? Me ko oti ne fakapouli olotou mafaufau ne Satani. (2 Kolinito 4:​3, 4) A te tonuga loa, ko leva ne fakapulou atu ne ia se veli o te pouliga faka-te-agaga ki luga i Kelisiano ‵loi i te fia senitenali ko ‵teka, ko te mea ke tiakina ne latou te fakamoemoega tāua e uiga ki te Malo.

Ko Tiakina te Fakamoemoega e Uiga ki te Malo

13. Se a te mea ne iku atu ki ei a te fakapulouatuga o te veli o te pouliga faka-te-agaga?

¹³ Ne ‵valo mai a Iesu me ka ulu lemū atu a aposetate ki te fakapotopotoga Kelisiano, e pelā mo mouku kolā ne ‵toki i tafa o saito, kae takitaki ‵se ne latou a tino e tokouke. (Mataio 13:​24-​30, 36-​43; Galu. 20:​29-​31; Iuta 4) Fakamuli ifo, ne fakamanatu ne Kelisiano konei a aso fakamanatu, faifaiga mo akoakoga fapau‵pau kae fai ne latou mo fai ne faifaiga “faka-Kelisiano.” E pelā mo faifaiga masani o te Kilisimasi e aofia i ei te tapuaki atu ki atua fapau‵pau ko Mithra mo Saturn. Kae se a te mea ne fakalata ne ia a Kelisiano konei ke fakamanatu ne latou a aso fakamanatu fapau‵pau? E fai mai The New Encyclopædia Britannica (1974): “A te Kilisimasi, te fakamanatuga o te aso fanau o Iesu Keliso, ne kamata ona ko te gasoloifoga o vāivāi a te fakamoemoega tonu e uiga ki te ‵toe foki mai o Keliso.”

14. Ne ‵fuli ‵se pefea ne akoakoga a Origen mo Augustine a te munatonu e uiga ki te Malo?

¹⁴ Ke mafaufau foki ki te faka‵numiga o te uiga o te pati “malo.” E fai mai te tusi ko The Kingdom of God in 20th-Century Interpretation penei: “Ne ‵fuli ne Origen [se faifeau i te tolu senitenali] a te fakaaogāga faka-Kelisiano o te pati ‘malo’ e pelā me ko te pulega a te Atua i te loto o te tino.” Ne fakavae mai fea a te akoakoga a Origen tenā? E se mai te Tusi Tapu kae mai “i mataupu silisili e uiga ki te tulaga o te lalolagi telā e ‵kese mai i te kilokiloga a Iesu mo te lotu i te kamataga.” I tena tusi ko De Civitate Dei (Te Fa‵kai o te Atua), ne fai mai a Augustine mai Hippo (354-430 T.A.) me i te lotu ko te Malo eiloa o te Atua. Ona ko vaegā mafaufauga sē ‵tonu konā, ne maua i ei ne Lotu Kelisiano ‵se se pogai fakalotu ke aofia latou i pulega fakapolitiki. Kae ne maua eiloa ne latou a pulega penā i te fia senitenali, kae ne fakama‵taku ‵ki olotou pulega.​—⁠Fakaasiga 17:​5, 18.

15. Ne fakataunu pefea te Kalatia 6:7 e uiga ki Lotu Kelisiano ‵se e uke?

¹⁵ I aso nei, ko tau eiloa ne lotu a fua o olotou mea ne ‵toki. (Kalatia 6:⁠7) Ko oti ne gasolo ifo o vāi‵vāi a pulega a lotu e uke e pelā foki mo olotou kaulotu. E laveagofie a te tulaga tenā i Eulopa. E ‵tusa mo te tusi ko te Christianity Today, “ko sē toe fai nei a falesa ‵lasi i Eulopa mo fai ne fale tapuaki kae ko fai pelā me ne fale e tausi ei a mea mua kolā ko seai ne tino i loto i ei kae na ko tualisi fua.” E lavea atu foki te tulaga tenā i nisi kogā koga o te lalolagi. Se a te mea e fakaasi mai i ei e uiga ki lotu ‵se? E mata, ka fakaseai latou ona ko te seai ne tino e ‵lago atu ki ei? Kae ka pokotia pefea te lotu tonu i ei?

Ke Toka mō te Aso Lasi o te Atua

16. Kaia e tāua ‵ki ei te takalialia telā e fakaasi mai ki Papelonia Takutakua?

¹⁶ E pelā eiloa mo te mea e fakaasi mai i te au mo te ‵pefu mai i se mauga ‵ka me ko pili o ‵pa te mauga tenā, e penā foki te takalialia ki lotu telā e fakaasi mai i koga e uke o te lalolagi me ko pili o fakaseai atu a lotu ‵se. Ko pili o fai ne Ieova ke ‵kau fakatasi a malo fakapolitiki i te lalolagi o fakamasiasi kae fakaseai atu a te fafine talitagata faka-te-agaga tenā ko Papelonia Takutakua. (Fakaasiga 17:​15-​17; 18:21) E mata, e ‵tau o ma‵taku a Kelisiano ‵tonu ki te mea tenā mo nisi mea kolā ka ‵tupu i te “fakalavelave” lasi? (Mataio 24:21) Ikai! Ka fia‵fia eiloa latou māfai ko gasuesue a te Atua o fakaseai a tino amio ma‵sei. (Fakaasiga 18:20; 19:​1, 2) Ke mafau‵fau ki te fakaakoakoga a Kelisiano kolā ne ola i te senitenali mua i Ielusalema.

17. Kaia e mafai ei o fakafesagai atu a tavini fakamaoni a Ieova mo te loto tali‵tonu ki te gataga o te olaga nei?

¹⁷ I te taimi ne nikoi ei ne kautau a Loma a Ielusalema i te 66 T.A., ne seki ‵poi io me ma‵taku a Kelisiano kolā ne tumau i te matapula‵pula i te feitu faka-te-agaga. Ona ko te lotou āpo i te Muna a te Atua, ne iloa ne latou me “ko pili tena fakamaofaga.” (Luka 21:20) Ne iloa foki ne latou me ka ‵tala mai ne te Atua se auala ke ‵sao ei latou. I te okoatuga ki te taimi tenā, ne ‵tele ei keatea a Kelisiano. (Tanielu 9:​26; Mataio 24:​15-​19; Luka 21:21) E penā foki eiloa i aso nei, a tino kolā e iloa ne latou te Atua kae faka‵logo ki tena Tama ka fakafesagai atu eiloa mo te loto tali‵tonu ki te gataga o te olaga tenei. (2 Tesalonia 1:​6-9) E tonu, kafai ko oko mai te fakalavelave lasi, ka ‘‵tu aka ei latou mo te fia‵fia kae ‵kilo ki luga, me ko pili mai te lotou fakaolaga.’​—⁠Luka 21:28.

18. Se a te ikuga o te taua telā ka fai ne Koka ki luga i tavini a Ieova?

¹⁸ Kafai ko oti ne fakaseai atu a Papelonia Takutakua, ka saga atu ei a Satani, ko Koka mai Makoka, o taua ‵tonu atu ki Molimau filemu a Ieova. E pelā me se “afā telā e agi i luga i te fenua,” e mafaufau te kautau a Koka me ka faigofie tena manumalo. Ma‵faga o mea fakapoi ka oko ki a latou! (Esekielu 38:​14-16, 18-23) Ne tusi mai te apositolo ko Ioane: “Ne matea ne au te lagi e matala, mo te solofanua ‵kena i ei. A te tino e fakatele ne ia e igoa ki a Fakamaoni me ko Tonu . . . Ne to mai i tona gutu a te pelu mata‵kai telā ko te muna a te Atua, ka fakatakavale ei ne ia a fenua.” A te “Tupu o tupu” telā e seai sena nafa ka faka‵sao ne ia a tino tapuaki fakamaoni a Ieova kae fakaseai atu olotou fili katoa. (Fakaasiga 19:​11-21) Tenā eiloa te taimi ka lavea atu ei te fakaotiga gali o te ‵fuliga o foliga o Iesu!

19. Ka pokotia pefea a soko fakamaoni o Keliso i tena manumalo katoatoa, kae se a te mea e ‵tau o kausaki latou ki ei nei?

¹⁹ Ka maua ne Iesu “i te Aso tenā, . . . te fakaaloalogina mai tino tali‵tonu.” (2 Tesalonia 1:10) E mata, e fia aofia koe i tino kolā ka ‵tu atu mo te ofo i mua o te Tama a te Atua telā ko manumalo? Ke na tumau la i te fakamalosi atu ki tou fakatuanaki kae ‘e ‵tau mo koe o toka me i te Tama a te Tagata e vau i te itula telā ne seki fakatalitali koe ki ei.’​—⁠Mataio 24:​43, 44.

Ke Matapulapula Faeloa

20. (a) E fakaasi atu pefea ne tatou a ‵tou loto fakafetai ki te fakatokaga a Ieova ko “te tavini fakamaoni kae poto”? (e) Ne a fesili e ‵tau o ‵sili ifo ne tatou ki a tatou eiloa?

²⁰ E fakamasaua mai faeloa ne “te tavini fakamaoni kae poto” ki tino o te Atua ke tumau i te matapula‵pula faka-te-agaga. (Mataio 24:​45, 46; 1 Tesalonia 5:⁠6) E mata, e talia katoatoa ne koe a fakamasauaga konei i te taimi tonu? E mata, e fakaaogā ne koe ke iloa aka ei a mea kolā e ‵tau o fakamuamua i te olaga? Kaia e se fesili ifo ei ki a koe penei: ‘E mata, e manino ‵lei taku kilo faka-te-agaga ke lavea ei ne au me ko pule tonu mai a te Tama a te Atua mai te lagi? E mata, e lavea ne au a ia ko toka ‵lei o fakaoko atu te fakasalaga a te Atua ki a Papelonia Takutakua mo te ‵toega o te fakanofonofoga kātoa a Satani?’

21. Kaia ne talia ei ne nisi tino ke maina malielie atu fua te lotou ‵kilo faka-te-agaga, kae se a te mea e ‵tau o fai fakavave ne latou?

²¹ Ko oti ne talia ne nisi tino kolā e ‵kau fakatasi mo tino o Ieova ke maina malielie atu fua te lotou ‵kilo faka-te-agaga. E mata, e fai penā ona ko te sē lava o te kufaki e pelā mo nisi soko o Iesu i aso mua? E mata, ko oti ne pokotia latou i manavasega o te olaga, te fia maumea io me ko logo‵maega? (Mataio 13:​3-8, 18-23; Luka 21:​34-36) Kāti e faigata ki nisi tino ke malamalama i nisi fakamatalaga kolā ne fakasalalau atu ne “te tavini fakamaoni kae poto.” Kafai ko oti ne tupu se mea penei ki a koe, e fakamalosi atu matou ke sukesuke malosi ki te Muna a te Atua mo te loto finafinau kae ke ‵talo ki a Ieova ke mafai o toe maua se va fealofani kae malosi ‵lei mo ia.​—⁠2 Petelu 3:​11-15.

22. E pokotia pefea koe i te ‵fuliga o foliga o Iesu mo nisi valoaga kolā e isi ne olotou sokoga ki ei?

²² Ne tuku atu ke lavea ne soko o Iesu a te ‵fuliga o ana foliga i te taimi telā ne ma‵nako malosi ei latou ki fakamalosiga. I aso nei, ko oti ne maua ne tatou se mea telā e sili atu mō te ‵tou fakamalosiga​—⁠ko te fakataunuga o te fakaasiga fakaofoofogia tenā mo nisi valoaga kolā e isi ne olotou sokoga ki ei. I te taimi e mafau‵fau ei tatou ki mea ‵gali katoa konā mo te lotou tāua i aso mai mua, ke na fai atu foki ne tatou mo te loto kātoa a pati a te apositolo ko Ioane penei: “Ka fai eiloa penā. Te Aliki Iesu, na vau!”​—⁠Fakaasiga 22:⁠20.

[Fakamatalaga mai lalo]

E Masaua ne Koe?

• Se a te mea ne malamalama i ei se tamā potukau o tino kolā ne suke‵suke ki te Tusi Tapu i tausaga o te 1870 e uiga ki te foki mai o Keliso?

• Ne fakataunu mai pefea te ‵fuliga o foliga o Iesu?

• Ne pokotia pefea te lalolagi mo te fakapotopotoga Kelisiano i te ‵tele manumalo mai o Keliso?

• Ne a ‵tou mea e ‵tau o fai ke aofia ei tatou i tino kolā ka ‵sao i te manumalo katoatoa o Iesu?