A Ieova ko te ‵Tou Tausi Mamoe

“Te Aliki [Ieova] ko toku tausi mamoe; e seai se mea e mativa ei au.”​—⁠SALAMO 23:⁠1.

1-3. Kaia e se poi ei tatou me ne fakatusa ne Tavita a Ieova ki se tausi mamoe?

KAFAI e manakogina ke fakamatala mai ne koe te auala ne tausi atu ei a Ieova ki ana tino, ne a au pati ka fai? Se a te fakatusa ka fai ne koe ke fakaasi atu ei a te tausiga atafai a Ieova telā ne fai ki ana tavini fakamaoni? I te 3,000 tausaga ko ‵teka, ne tusi ki lalo ne te faisalamo ko Tavita se fakamatalaga gali ‵ki e uiga ki a Ieova, mai te fakaaogāga o se fakatusa mai tena galuega telā ne fai ne Tavita a koi tai foliki ei a ia.

² E pelā me se talavou, ne fai a Tavita mo fai se tausi mamoe, telā la, ne iloa ‵lei ne ia te auala e tausi atu ei ki mamoe. Ne iloa foki ne ia me kafai e se tausi faka‵lei atu ki mamoe, e faigofie ke ‵galo io me ‵po ne tino kaisoa mo manu fe‵kai. (1 Samuelu 17:​34-36) E aunoa mo se tausi mamoe alofa ka se mafai o maua ne mamoe a mouku lauusiusi ke ‵kai i ei. I tausaga fakamuli ifo, e mautinoa eiloa me ne fakaataata sāle ne Tavita i tena mafaufau a mea ‵gali ne ‵tupu i te fia itula ne fakamāumau ne ia ke takitaki, puipui kae fagai ana mamoe.

³ E se se mea fakapoi ke masaua ne Tavita a te galuega a te tausi mamoe i te taimi ne fakamalosi atu ei ki a ia ke fakamatala mai a te alofa atafai o Ieova ki ana tino. E kamata a te mataupu e 23 o te Salamo telā ne tusi ne Tavita ki pati konei: “Te Aliki [Ieova] ko toku tausi mamoe; e seai se mea e mativa ei au.” Ke mafaufau tatou ki te pogai e fetaui ‵lei ei a pati konei. Kae mai te fesoasoani o te Salamo e 23, ka lavea ei ne tatou a auala e ‵pau ei a te atafai o Ieova ki ana tino tapuaki mo te atafai o te tausi mamoe ki ana mamoe.​—⁠1 Petelu 2:⁠25.

Se Fakatusaga ‵Lei

4, 5. E fakamatala mai pefea i te Tusi Tapu a uiga o mamoe?

⁴ E uke ‵ki a tofi o Ieova e fakaasi mai i te Tusi Tapu, kae ko tena tofi e pelā me se “Tausi Mamoe” e fakaasi mai i ei tena toe tulaga atafai. (Salamo 80:⁠1) Ke malamalama faka‵lei tatou i te pogai e fetaui ‵lei ei ke fakaigoa a Ieova ki se Tausi Mamoe, e tāua ‵ki ke iloa ne tatou a mea e lua konei: muamua, ko uiga masani o mamoe kae ko te lua, ko tiute mo uiga o se tausi mamoe ‵lei.

⁵ E fakasino sāle atu te Tusi Tapu ki uiga o mamoe kae fakamatala mai i ei me e ‵saga atu latou ki faifaiga a‵lofa e fakaasi mai ne te tausi mamoe (2 Samuelu 12:⁠3), e se kaitāua (Isaia 53:⁠7), kae vāi‵vāi foki. (Mika 5:⁠8) Ne fai mai se tino tusitala telā ne fai pelā me se tausi mamoe i te fia o tausaga: “E se mafai ne mamoe o ‘tausi ne latou a latou eiloa’ e pelā mo te mea e tali‵tonu ki ei a nisi tino. E ma‵nako latou ke tausi atu faeloa mo te atafai ki a latou i lō nisi itukaigā manu.” Ke mafai o ola latou, e manakogina ne manu vāi‵vāi konei se tausi mamoe alofa atafai.​—⁠Esekielu 34:⁠5.

6. E fakamatala mai pefea ne se tikisionale faka-Tusi Tapu a mea e fai ne se tausi mamoe i te aso kātoa i aso mua?

⁶ Ne a mea masani e fai ne se tausi mamoe i te aso kātoa i aso mua? E fakamatala mai se tikisionale o te Tusi Tapu e tasi: “I te tafataeao ‵malu e takitaki ne ia te lafu mai te lotou lulu, kae sasale atu i olotou mua ke oko ki te malae telā ka kai‵kai ei latou. I konā e onoono atu a ia ki a latou i te aso kātoa, kae onoono ke mo a eiloa e galo se mamoe, kae kafai e lavea ne ia se mamoe ko galo mai te lafu i se taimi, e ‵sala atu eiloa a ia ki ei ke oko ki te taimi e maua atu ei ko fakafoki mai ei. . . . I te po, e faka‵foki atu ne ia a mamoe ki te lulu mamoe, kae lau ne ia i te taimi e ulu ei latou ki loto i te mataloa ke fakamaoni aka me e seai se mamoe e galo. . . . E masani foki o tausi ne ia a te lafu kātoa i te po mai manu fe‵kai io me ko tino kaisoa.”a

7. Kaia e manakogina ei i nisi taimi ke fakaasi atu ne te tausi mamoe te loto kufaki mo te atafai?

⁷ E isi ne taimi e manakogina ei ke ‵saga malosi kae atafai atu ki mamoe, maise ko mamoe fa‵fine kolā e faitama mo tamā mamoe. (Kenese 33:13) E fai mai se tusi faka-te-Tusi Tapu penei: “E masani sāle o fanau se mamoe i se koga ‵mao ‵ki i luga i se feitu mauga. E puipui ne te tausi mamoe mo te atafai a te mātua i te taimi faigatā tenā kae sapai aka ne ia te tamā mamoe o avatu ki te lulu mamoe. I nāi aso mai tua ifo i ei, e sapasapai eiloa ne ia i ana fatafata io me i se kapa o tena gatu, ke oko ki te taimi ko mafai ei ne ia o sasale.” (Isaia 40:​10, 11) E manino ‵lei me i te tausi mamoe ‵lei e manakogina ke maua ne ia ne uiga ma‵losi kae atafai.

8. Ne a pogai ne talitonu ei a Tavita ki a Ieova?

⁸ “Te Aliki [Ieova] ko toku Tausi Mamoe”​—⁠e mata, e se tenā loa te fakatusa ‵lei e uiga ki te ‵tou Tamana faka-te-lagi? I te taimi e sukesuke ei tatou ki te Salamo 23, ka lavea ei ne tatou te auala e tausi ei ne te Atua a tatou e auala i tena malosi mo tena atafai e pelā me se tausi mamoe. I te fuaiupu 1, e fakaasi mai ne Tavita a tena loto talitonu me ka fakatoka ne te Atua a mea katoa mō Ana mamoe ko te mea ke “seai se mea e ma‵tiva” ei latou. I fuaiupu mai tua ifo i ei, e fai mai ne Tavita a pogai e tolu o tena loto talitonu: E takitaki, puipui kae fagai ne Ieova a Ana mamoe. Ka sau‵tala nei tatou ki mea takitasi konā.

“E Takitaki . . . ne ia Au”

9. Ne a koga filemu ne fakaata mai ne Tavita, kae e mafai pefea o ‵nofo atu a mamoe i se koga penā?

⁹ Muamua la, e takitaki ne Ieova ana tino. E tusi mai a Tavita: “E tuku mai ne ia au ke takato i vao mouku lauusiusi, kae takitaki ne ia au i tafatafa o vai e tafetafe malie. E aumai ne ia ki a au te malosi fou. E takitaki foki ne ia au i te ala tonu, e pelā mo tena tautoga.” (Salamo 23:​2, 3) Se lafu mamoe telā e takato‵kato mo te filemu i koga e uke ei a meakai​—⁠e fakaasi mai ne Tavita i konei se ata o te lotomalie, te malosi fou mo te tokagamalie. A te pati Epelu telā ne ‵fuli ki “vao mouku lauusiusi” e mafai o fakauiga ki se “koga gali.” Kāti, e aunoa mo te tausi mamoe, e se mafai ne mamoe o maua se koga gali ke takato‵kato i ei mo te filemu. E ‵tau o takitaki latou ne te lotou tausi mamoe ki se “koga gali.”

10. E fakaasi mai pefea ne te Atua tena loto talitonu ki a tatou?

¹⁰ E takitaki pefea ne Ieova tatou i aso nei? A te auala e tasi e fai ei ne ia penā, ko ana fakaakoakoga. E fakamalosi mai tena Muna me “e ‵tau ke pelā [tatou] mo ia.” (Efeso 5:⁠1) E fakauiga a pati konā ki te atafai, te loto fakamagalo mo te alofa. (Efeso 4:32; 5:⁠2) E tonu, e tuku mai ne Ieova a te ‵toe fakaakoakoga sili mai te fakaasimaiga o uiga ‵gali konā. E mata, e masei tena fai mai ke fakaakoako atu tatou ki a ia? Ikai. A te fautuaga tenā se fakaasiga fakaofoofogia eiloa o tena talitonu ki a tatou. I te auala fea? Ne faite tatou ki foliga o te Atua, ko tena uiga ne fa‵nau mai eiloa tatou mo uiga lei kae ke mafai foki o ati aka i a tatou a mea faka-te-agaga. (Kenese 1:26) Telā la, e iloa ‵lei ne Ieova me e mafai eiloa o ati aka i a tatou ana uiga, faitalia te ‵tou tulaga se ‵lei katoatoa. Ke mafaufau la​—⁠e talitonu katoatoa a te ‵tou Atua alofa me e mafai eiloa o fai tatou e pelā mo ia. Kafai e tau‵tali atu tatou i ana fakaakoakoga, ko takitaki ei ne ia tatou i se auala fakatusa, ki se ‘koga gali.’ Ka ola eiloa tatou “mo te filemu” i loto i te lalolagi e ‵fonu i fakasauāga tenei, ona ko te iloa me ko maua ne tatou te taliaga a te Atua.​—⁠Salamo 4:8; 29:11.

11. I te takitakiga o ana mamoe, se a te mea e iloa ne Ieova, kae fakaasi mai pefea a te mea tenā i mea kolā e manako a ia ki ei mai i a tatou?

¹¹ E atafai kae loto kufaki a Ieova i taimi e takitaki ei ne ia tatou. E saga atu se tausi mamoe ki vāivāiga o ana mamoe, telā la e takitaki atu ne ia latou e ‵tusa mo “te vave e mafai” ei ne ana manu o sasale i ei. (Kenese 33:14) E takitaki foki ne Ieova ana mamoe e ‵tusa mo “te vave e mafai” ne latou o olo i ei. E iloa ne ia a mea e mafai ne tatou o fai mo ‵tou fakanofonofoga. Telā la, e fulifuli ne ia tena makini, kae se manako ke fai ne tatou a mea kolā e se mafai ne tatou o fai. A te mea telā e manako a ia ki ei ko te mea ke fai ‵tou galuega mo te loto kātoa. (Kolose 3:23) Kae pefea la māfai ko tai matua koe kae ko se mafai o fai ne koe a mea e pelā mo aso mua? Io me māfai e masaki malosi koe? Konā la vaegā fakanofonofoga e gali ei te manakoga ke fai ‵tou galuega mo te loto kātoa. E se mafai o ‵pau a tino e tokolua. A te tavini atu mo te loto kātoa e fakauiga eiloa ki te fakaaogāga o tou malosi ki te toe mea e mafai ne koe i te tavini atu ki te Atua. Faitalia a vāivāiga kolā e mafai o pokotia i ei a ‵tou galuega, e fakatāua eiloa ne Ieova a ‵tou tapuaki atu mo te loto kātoa.​—⁠Maleko 12:​29, 30.

12. Se a te fakaakoakoga mai te Tulafono ne tuku ki a Mose e fakaasi mai i ei me takitaki ne Ieova ana mamoe e ‵tusa mo “te vave e mafai” o olo latou i ei?

¹² Ke fakaataata aka ne tatou a te auala e takitaki ei ne Ieova ana mamoe e ‵tusa mo “te vave e mafai” ne latou o olo i ei, ke mafaufau ki pati e uiga ki te ofoatuga o nisi taulaga mō agasala kolā e fakaasi mai i Tulafono ne tuku ki a Mose. Ne manako a Ieova ki taulaga ‵lei kolā e fai atu ona ko te loto fakafetai. I te taimi foki eiloa tenā, e fakavasega aka a taulaga e ‵tusa mo mea e mafai o fai ne te tino i a ia te taulaga. E fai mai te Tulafono: “Kafai e se maua se mamoe . . . a te tino, e ‵tau o aumai ne ia ki te Aliki se avā lupe.” Kae pefea la māfai e se mafai foki o maua se avā lupe? E mafai o avatu ne ia ne “falaoa” ‵lei. (Levitiko 5:​7, 11) E fakaasi mai i konei me ne seki manako te Atua ki mea kolā e se mafai o avatu ne se tino. Ona ko te mea e se mafulifuli te Atua, se fakamafanafanaga gali eiloa ki a tatou ke iloa atu me se manako a ia ki mea kolā e se mafai o tuku atu ne tatou; kae e talia ne ia mo te fiafia so se mea telā e mafai o tuku atu ne tatou. (Malaki 3:⁠6) Ma‵faga o mea fakafiafia ke takitakigina tatou ne se Tausi Mamoe loto malamalama penā!

“Ka se Mataku Au i a Koe e Fakatasi Mai Faeloa ki a Au”

13. I te Salamo 23:​4, ne fakaasi mai pefea ne Tavita a tena pili ki a Ieova, kae kaia e se fou ei a te mea tenei?

¹³ E fakaasi mai ne Tavita a te lua o pogai e maua ei ne ia te loto talitonu: E puipui ne Ieova ana mamoe. E fai‵tau tatou penei: “E ui eiloa e sasale au i loto i se koga pouli tagataga, kae ka se mataku au i a koe e fakatasi mai faeloa ki a au. Ko tou tokotoko mo tau lakau e puipui ei au.” (Salamo 23:⁠4) Ko fakaasi mai i konei a te ‵pili o Tavita mo Ieova i te fakaaogāga ne ia o te pati “koe” e uiga ki a Ieova. E se se mea fou te mea tenei, me faipati loa a Tavita ki te auala ne fesoasoani atu ei te Atua ke kufaki a ia i fakalavelave. Ne sasale atu a Tavita i koga pouli tagataga e uke​—⁠ko taimi kolā ne oko atu ei tena ola ki se tulaga fakamataku. Kae ne seki talia ne ia ke manumalo te mataku i a ia, me e iloa ne ia me e toka faeloa a te Atua​—⁠mo Tena “tokotoko” mo Tena “lakau”​—⁠o fakatasi atu ki a ia. A tena iloa e uiga ki te puipuiga a Ieova ne fakamalosi atu eiloa ki a Tavita kae e mautinoa me ne fai ei ke sinā fakapilipili atu ei a ia ki a Ieova.b

14. Se a te fakamaoniga e fakaasi mai i te Tusi Tapu e uiga ki te puipuiga a Ieova ki a tatou, kae se a te mea e se fakauiga ki ei a te mea tenei?

¹⁴ E puipui pefea ne Ieova ana mamoe i aso nei? E fakamaoni mai te Tusi Tapu me e seai se tino ‵teke​—⁠temoni io me ko tāgata​—⁠ka manumalo i olotou taumafaiga ke fakaseai ne latou ana mamoe mai te lalolagi. Ka se talia lele eiloa ne Ieova ke tupu te mea tenā. (Isaia 54:17; 2 Petelu 2:⁠9) Kae e se fakauiga i ei me ka puipui ne te ‵tou Tausi Mamoe a tatou mai fakalavelave katoa. E fe‵paki tatou mo tofotofoga kolā e masani o fe‵paki mo tino katoa, kae e fe‵paki foki tatou mo ‵tekemaiga kolā e oko ki Kelisiano ‵tonu katoa. (2 Timoteo 3:12; Iakopo 1:⁠2) E isi ne taimi e ‘sa‵sale ei tatou i koga pouli tagataga’ i se auala fakatusa. E pelā mo te ‵tai ‵mate o tatou ona ko fakasauāga io me ko masaki. Io me toeitiiti ko mate io me e mate eiloa se ‵tou kāiga pele. I taimi pouli tagataga konā, e ‵kau fakatasi mai faeloa a ‵tou Tausi Mamoe ki a tatou, kae puipui ne ia tatou. E pefea la?

15, 16. (a) I auala fea e fesoasoani mai ei a Ieova ke fakafesagai atu ki fakalavelave e fe‵paki mo tatou? (e) Fakamatala mai se tala e uiga ki te auala e fesoasoani mai ei a Ieova ki tatou i taimi o tofotofoga.

¹⁵ E seki tauto mai a Ieova me ka oso fakavavega mai a ia.c Kae e mafai o fakamautinoa aka ne tatou me ka fesoasoani mai a Ieova ke fakafesagai atu ki so se fakalavelave e fepaki mo tatou. E tuku mai ne ia ki a tatou a te poto ke fakafesagai atu ki “tofotofoga kese‵kese.” (Iakopo 1:​2-5) E se fakaaogā fua ne te tausi mamoe a tena tokotoko ke ‵tuli keatea ei a manu fe‵kai kae ke takitaki foki ne ia ki ei a mamoe i te auala tonu. E mafai ne Ieova o “takitaki” tatou, kāti e auala i se taina talitonu, ke fakagalue ne tatou a fakatakitakiga mai te Tusi Tapu ke fai ei ne tatou se ‵fuliga lasi. E se gata i ei, e mafai foki o tuku mai ne Ieova te malosi ke kufaki tatou i ei. (Filipi 4:13) E auala i tena agaga tapu, e mafai o tuku mai ne ia ki a tatou te “malosi e sili atu i te malosi masani.” (2 Kolinito 4:​7, NW) E mafai o fesoasoani mai a te agaga o te Atua ke kufaki tatou i so se tofotofoga telā e mafai o tuku mai ne Satani. (1 Kolinito 10:13) E mata, e se se mea fakamafanafana ke iloa atu me toka faeloa a Ieova o fesoasoani mai ki a tatou?

¹⁶ E tonu, faitalia so se koga pouli tagataga e mafai o oko atu tatou ki ei, e se sa‵sale atu tatou i a tatou eiloa i te koga tenā. E ‵kau fakatasi mai eiloa a ‵tou Tausi Mamoe ki a tatou, o fesoasoani mai i auala kolā e se lavea muamua ne tatou. Ke mafaufau ki te tala o se toeaina Kelisiano telā ne maua ne te kenisa i te faiai. “E fakaasi ‵tonu atu ne au me ne mafaufau au i te taimi muamua me e mata, a Ieova e kaitaua mai ki a au io me e alofa mai. Kae ne fakaiku aka ne au ke se tiakina lele eiloa ne au a Ieova. I lō te fai penā, ne fakaasi atu katoa ne au ki a ia a mea e manavase au ki ei. Kae ne fesoasoani mai eiloa a Ieova ki a au, mai fakamafanafanaga e maua sāle ne au mai taina mo tuagane. Ne fakaasi mai ne tino e tokouke a manatu fesoasoani e fakavae ki auala ne fakafesagai atu ei latou ki masaki ‵lasi penā. E fakaasi mai i te paleni o olotou manatu me e se se mea fou te tulaga ko oko au ki ei. A nisi faifaiga alofa, e pelā mo te ofo mai o latou ke fesoasoani mai, e fakamautinoa mai ei me e se kaitaua a Ieova ki a au. E tonu, e ‵tau o taua malosi atu au ki toku masaki, kae e se iloa ne au me se a te ikuga ka oko au ki ei. Kae talitonu katoatoa au me e fakatasi mai faeloa a Ieova ki a au kae ka tumau a ia i te fesoasoani mai i te tofotofoga kātoa tenei.”

“E Fakatoka ne Koe se ‵Kaiga ki a Au”

17. E fakamatala mai pefea ne Tavita a Ieova i te Salamo 23:​5, kae kaia e fetaui ‵lei ei a te mea tenei mo te fakatusa e uiga ki te tausi mamoe?

¹⁷ Ko fakaasi mai ne Tavita i konei a te tolu o pogai ne talitonu katoatoa ei a ia ki tena Tausi Mamoe: E fagai ne Ieova ana mamoe ki meakai e uke. Ne tusi mai a Tavita: “E fakatoka ne koe se ‵kaiga ki a au, i te koga e matea mai ei au ne oku fili katoa; ne talia ‵lei ne koe au e pelā me se mālō tāua, kae ‵ligi foki ne koe taku ipu ke ‵fonu.” (Salamo 23:⁠5) I te fuaiupu tenei, e fakamatala mai ne Tavita a tena Tausi Mamoe e pelā me se tino talimālō kaimalie telā e fakatoka ne ia a meakai mo mea inu e uke ‵ki. A fakatusa e lua konei​—⁠ko te tausi mamoe ‵lei mo te tino talimālō kaimalie​—⁠e fetaui ‵lei eiloa. Me e ‵tau o iloa ne te tausi mamoe ‵lei a te koga e maua i ei a mouku lauusiusi mo vai e uke ko te mea ke “seai se mea e mativa ei” a te lafu.​—⁠Salamo 23:​1, 2. 

18. Se a te mea e fakaasi mai i a Ieova ko te tino talimālō kaimalie?

¹⁸ E mata, a te ‵tou Tausi Mamoe se tino talimālō kaimalie foki? E seai eiloa se fakalotolotolua e uiga ki te mea tenā! Ke mafaufau ki te ‵lei, te gali, te uke mo te kese‵kese o meakai faka-te-agaga ko maua nei ne tatou. E auala i te tavini fakamaoni kae poto, ko oti ne fakatoka ne Ieova mō tatou a tusi fesoasoani mo polokalame aogā i fakatasiga, tamā fono mo fono ‵lasi​—⁠kolā e fagai mai i ei tatou i te feitu faka-te-agaga. (Mataio 24:​45-47) E se ma‵tiva eiloa tatou i meakai faka-te-agaga. Ko oti ne fakatoka ne te “tavini fakamaoni kae poto” a te fia miliona o Tusi Tapu mo tusi faka-te-Tusi Tapu, kae e mafai o maua a tusi konā i ‵gana e silia atu i te 413. Ko oti ne fakatoka ne Ieova a meakai konei i vaega kese‵kese e uke​—⁠mai te “susu,” kolā ko akoakoga fakavae mai te Tusi Tapu, ke oko ki “meakai makeke,” ko fakamatalaga ‵loto mai i loto i ei. (Epelu 5:​11-14) Ona ko te mea tenā, kafai ko fe‵paki tatou mo fakalavelave io me ‵tau o fai ne fakaikuga, e masani o maua ne tatou a mea eiloa kolā e ma‵nako tatou ki ei. Ka pefea te ‵tou tulaga moi fai e seai ne meakai faka-te-agaga penā? A te ‵tou Tausi Mamoe ko te ‵toe tino kaimalie telā e tuku mai ne ia a mea e uke!​—⁠Isaia 25:6; 65:13.

“Ka ko Tou Fale ka Fai mo Oku Koga Nofo”

19, 20. (a) I te Salamo 23:​6, se a te loto talitonu ne fakaasi mai ne Tavita, kae mafai pefea o maua ne tatou te loto talitonu tenā? (e) Ne a mea ka sau‵tala tatou ki ei i te suā mataupu?

¹⁹ I tena otiga ne mafaufau ‵loto ki faifaiga a tena Tausi Mamoe kaimalie, ne fakaoti ei ne Tavita ana pati penei e uiga ki a Ieova: “E iloa ne au i tou atafai mo tou alofa e fakatasi faeloa mo au i aso katoa o toku olaga; ka ko tou fale ka fai mo oku koga nofo i aso katoa e ola ei au.” (Salamo 23:⁠6) Ne faipati mai a Tavita mo tena loto e ‵fonu i te fakafetai mo te talitonu katoatoa​—⁠ko te loto fakafetai mō mea kolā ko oti ne fai ki a ia mo tena talitonu katoatoa ki mea ka ‵tupu i aso mai mua. E maua ne te tausi mamoe muamua tenei a te tokagamalie, me e iloa ne ia me ko tena tumau i te fakapilipili atu ki tena Tausi Mamoe faka-te-lagi, e pelā eiloa me e nofo atu a ia i loto i Tena fale, ka tausi faeloa a ia ne Ieova mo te atafai.

²⁰ E lasi eiloa te ‵tou fakafetai e uiga ki pati ‵gali kolā ne tusi ki lalo i te mataupu e 23 o te Salamo! Ne fakaasi mai ne Tavita a te ‵toe auala ‵lei ke fakamatala mai ne ia a te auala e takitaki, puipui kae fagai ei ne Ieova ana mamoe. Ne tausi faka‵lei a fakamatalaga fakaalofa‵lofa a Tavita konā ke tuku mai i ei ki a tatou a te loto talitonu me mafai foki o ‵kilo atu tatou ki a Ieova e pelā me ko te ‵tou Tausi Mamoe. E tonu, kafai e fakapili‵pili atu faeloa tatou ki a Ieova, ka tausi mai eiloa ne ia tatou e pelā se Tausi Mamoe alofa i “aso katoa” ke oko foki eiloa ki te se-gata-mai. Telā la, e pelā me ne ana mamoe, e maua ne tatou te tiute ke sa‵sale fakatasi tatou mo ‵tou Tausi Mamoe sili, ko Ieova. Ka sautala tatou i te suā mataupu ki mea kolā e aofia i ei.

[Fakamatalaga mai lalo]

[Ata i te itulau e 26]

E takitaki ne Ieova Ana mamoe e pelā me se tausi mamoe i Isalaelu

E Masaua ne Koe?

• Kaia e fetaui ‵lei ei ke fakatusa ne Tavita a Ieova ki se tausi mamoe?

• E takitaki pefea ne Ieova tatou mo te loto malamalama?

• I auala fea e fesoasoani mai ei a Ieova ke kufaki tatou i tofotofoga?

• Se a te mea e fakaasi mai i a Ieova se tino talimālō kaimalie?