E Pefea te ‵Mautakitaki o Tou Talitonu ki te Atua?
“Ke mua io me tumau koutou o ‵sala tena Malo.”—MATAIO 6:33.
1, 2. Ne a mea ne fai ne se tamataene e uiga ki tena galuega ‵togi, kae kaia?
NE MANAKO se tamataene ke aogā malosi atu a ia ki tena fakapotopotoga. Kae ne fakalavelave atu a tena galuega ‵togi ki tena kau atu faeloa ki fakatasiga. Ne faka‵lei aka pefea ne ia te fakalavelave tenā? Ne fakafaigofie ne ia tena olaga, ne lisaina mai tena galuega, kae fakamuli ifo ne maua ne ia se galuega telā ne seki fakalavelave atu ki a ia i fakatokaga a tena fakapotopotoga. Nei la, ko se uke ana sene e maua e pelā mo aso mua, kae koi tausi eiloa a ia ki tena kāiga, kae ko mafai foki o ‵lago malosi atu a ia ki te fakapotopotoga.
2 E malamalama koe me kaia ne fai ei ne te tamataene tenā se vaegā mea penā? E mata, ka fai foki koe penā moi ne nofo atu koe i se tulaga penā? E fakamālō atu eiloa ki Kelisiano e tokouke kolā ko oti ne fai penā, kae e fakaasi mai i olotou faiga konā a te lotou tali‵tonu katoatoa ki te folafolaga a Iesu: “Ke mua io me tumau koutou o ‵sala tena Malo mo tena amiotonu; kae ka fakaopoopogina atu a mea katoa konā ki a koutou.” (Mataio 6:33) Ne fakalago‵lago eiloa latou ki a Ieova ke maua se puipuiga i te feitu tenei i lō te lalolagi o tāgata.—Faataoto 3:23, 26.
3. Kaia e fakalotolotolua ei a nisi tino e uiga ki te fakamuamua ne latou a te Malo o te Atua?
3 Ona ko taimi faiga‵ta ko ola nei tatou i ei, kāti ka fakalotolotolua a nisi tino e uiga ki te filifiliga a te tagata tenā. I aso nei, e ola a nisi tino i te ‵toe tulaga mativa o te olaga kae ko te suā vaega e ola latou i te ‵toe tulaga maumea o te olaga. E fia maua fakavave ne te tokoukega o tino i fenua ma‵tiva so se avanoaga ke tai fakafaigofie aka ei te olaga. I te suā feitu, e ma‵nako eiloa a tino e tokouke i fenua mau‵mea ke fakatumau te tulaga o te lotou olaga maumea faitalia te gasolo ifo o ma‵tiva a atufenua, te mafuli‵fuliga o galuega i te maketi, mo te uke o manakoga o tino kolā e fakaga‵lue ne latou a tino. Ona ko te faigatā o te olaga, kāti ka fai mai a nisi tino, ‘E mata, koi aogā te manatu ke fakamuamua te Malo?’ Ke maua te tali ki te fesili tenā, ke mafaufau ki tino kolā ne faipati ki ei a Iesu.
“Ke se Manava‵se Koutou”
4, 5. Ne fakaasi mai pefea ne Iesu me se mea se ‵tau ke tō manava‵se a tino o te Atua ki mea o te olaga i aso takitasi?
4 Ne faipati atu a Iesu ki se vaitino mai koga kese‵kese, i Kalilaia. (Mataio 4:25) Ne mu‵tana fua io me e seai eiloa se tino i a latou konā ne maumea. Kāti te tokoukega o latou ne tino ma‵tiva. Kae ne fakamalosi atu a Iesu ki a latou ke se fakamuamua ne latou a te mauaga o te maumea faka-te-foitino, kae ke fakaputu ne latou se mea telā e tāua fakafia atu—ko te maumea faka-te-agaga. (Mataio 6:19-21, 24) Ana muna: “Ke se manava‵se koutou ki otou ola, ki mea e ‵kai ei koutou, mo mea e inu ei koutou, io me ko otou foitino, ki mea e pei ei koutou. E a, e se sili la te ola i meakai io me ko te foitino i gatu?”—Mataio 6:25.
5 Ki tino fakalogo‵logo e tokouke i konā, kāti ne foliga mai me se aogā a pati a Iesu. Ne iloa ne latou, me kafai e se ga‵lue malosi latou, ka seai ne mea e tausi ei olotou kāiga. Kae ne fakamasaua atu a Iesu ki a latou e uiga ki manu eva. E ‵tau o ‵sala atu a manu eva ki meakai mo olotou koga ‵nofo i aso takitasi, kae e tausi atu eiloa a Ieova ki a latou. Ne fakasino atu foki a Iesu ki te auala e tausi ei ne Ieova a pulalakau o te vao kolā e ‵gali fakafia atu i teuga ‵malu o Solomona. Kafai e tausi ne Ieova a manu eva mo pulalakau, ka pefea la te lasi atu o tena tausiga ki a tatou? (Mataio 6:26-30) E pelā mo pati a Iesu, e sili fakafia atu te tāua o ‵tou ola (souls) mo ‵tou foitino i lō meakai kolā e ‵togi ne tatou ke tausi ei ‵tou ola mo gatu e maua ne tatou ke ‵pei ei tatou. Kafai e fakapalele ‵tou malosi ki te ‵salaga o meakai mo gatu, e aunoa mo se mea aogā e ‵toe mai ke tavini atu ei ki a Ieova, ko galo eiloa i a tatou a te ‵toe pogai tāua o te olaga.—Failauga 12:13.
Se Kilokiloga Paleni
6. (a) Se a te tiute e maua ne Kelisiano? (e) Tefea te koga e ‵tau o tali‵tonu katoatoa ki ei a Kelisiano?
6 E tonu, ne seki fakamalosi atu a Iesu ki ana tino fakalogo‵logo ke se ga‵lue kae ke faka‵tali fua ki mea kolā ka tuku atu ne te Atua mō olotou kāiga. Ke oko foki loa ki manu eva, e ‵tau o ‵sala atu ke maua a meakai ma latou mo olotou punua. Telā la, ne ‵tau foki mo Kelisiano o ga‵lue māfai e fia maua ne olotou meakai. Ne ‵tau foki o tausi atu latou ki olotou tiute faka-te-kāiga. Ne ‵tau o ga‵lue malosi a tavini mo pologa Kelisiano mō olotou pule. (2 Tesalonia 3:10-12; 1 Timoteo 5:8; 1 Petelu 2:18) Ne galue sāle a te apositolo ko Paulo i te faitega o faleie ke tausi atu ei ki a ia. (Galuega 18:1-4; 1 Tesalonia 2:9) Kae, ne seki fakalagolago lele eiloa a Kelisiano konā ki galuega ‵togi ke maua mai i ei se puipuiga tumau. Ne fakalago‵lago katoatoa latou ki a Ieova. Ona ko te mea tenā, ne maua ei ne latou te filemu tonu telā ne seki maua atu i nisi tino. Ne fai mai te faisalamo: “A latou kolā e tali‵tonu ki te Aliki, e ‵pau mo te Mauga o Siona, telā ka se mafai o fakagasue io me ave keatea.”—Salamo 125:1.
7. Se a te kilokiloga e mafai o maua ne se tino telā e se talitonu katoatoa ki a Ieova?
7 So se tino telā e se talitonu katoatoa ki a Ieova, e mafai o ‵kese ana mafaufauga. E ‵kilo atu te tokoukega o tino ki kope faka-te-foitino e pelā me se kī tāua ke maua ei se puipuiga tumau. Telā la, ko oti ne fakamalosi atu mātua ki olotou tama‵liki ke kausaki atu ki akoakoga ma‵luga i taimi koi ‵tupu aka ei latou, mo te fakamoemoega ke maua ne latou ne galuega ‵togi ma‵luga. Se mea fakafanoanoa, me ko oti ne iloa aka ne nisi kāiga Kelisiano a te lasi o te se aogā o akoakoga ma‵luga, ona ko te se ‵saga atu o olotou tama‵liki ki mea faka-te-agaga kae ko ‵saga atu faeloa ki mea faka-te-foitino.
8. Se a te kilokiloga paleni e fakatumau ne Kelisiano?
8 Telā la, ko lavea aka ne Kelisiano ‵poto me koi aogā eiloa a pati fakatonutonu a Iesu ki a tatou i aso nei e pelā eiloa mo te lotou aogā i te senitenali muamua, kae taumafai latou ke maua se kilokiloga paleni e uiga ki ei. Kafai foki loa e ‵tau o fakamāumau ne latou a taimi e uke i galuega ‵togi i te fakataunuga o olotou tiute faka-Kelisiano, e se talia lele ne latou te manakoga ke maua a tupe ke faka‵kivi ei olotou mata ki mea faka-te-agaga kolā e tāua atu.—Failauga 7:12.
“Sa Manava‵se Koutou”
9. E fakamalosi mai pefea a Iesu ki tino kolā e tali‵tonu katoatoa ki a Ieova?
9 I tena Lauga i te Mauga ne fakamalosi atu a Iesu ki ana tino fakalogo‵logo: “Sa manava‵se koutou o fai ake pelā: ‘Ne a mea ka ‵kai ei tatou? Ne a foki mea ka inu ei tatou? Ne a foki mea ka pei ei tatou?’ Me i mea katoa konā, e salasala ne tino o fenua fakaa‵tea. Ko iloa ne te otou Tamana i te lagi me aogā katoa a mea konā ki a koutou.” (Mataio 6:31, 32) Ko oko eiloa i te fakamalosi loto o pati konā! Kafai e tali‵tonu katoatoa tatou ki a Ieova, e toka faeloa a ia o fesoasoani mai ki a tatou. Kae e fakagalue foki ne pati a Iesu a te mafaufau. E fakamasaua mai i ei me kafai e “salasala” ne tatou a mea faka-te-foitino, ka ‵pau ei a ‵tou mafaufauga mo tino o “fenua fakaa‵tea” ko tino kolā e se ne Kelisiano ‵tonu.
10. I te taimi ne fanatu ei se tamataene ki a Iesu ke maua mai i ei ne pati fakatonutonu, ne fakaasi mai pefea ne Iesu a mea kolā ne fiafia malosi atu ki ei a te tamataene tenā?
10 I se taimi e tasi, ne fesili atu se tamataene maukoloa ki a Iesu e uiga ki mea e ‵tau o fai ne ia ke maua ei te ola se-gata-mai. Ne fakamasaua atu ne Iesu ki a ia a mea e manakogina i te Tulafono, kolā koi fakaga‵lue i te taimi tenā. Ne fakatalitonu atu te tamataene tenā ki a Iesu: “Ko oti ne tausi ne au a fakatonuga katoa konei. Koi isi ake foki se mea e seki fai ne au?” Kāti ne foliga atu te tali a Iesu ki tino e tokouke me se aogā. Ne fai atu a ia: “Kafai e manako koe ke katoatoa te ‵lei o tau amio, fano nei eiloa o fakatau atu au koloa katoa, kae avatu a tupe ki tino ma‵tiva, ko maua ei ne koe a koloa e uke i te lagi; ko vau ei koe o tautali mai i a au.” (Mataio 19:16-21) Ne fano te tamataene tenā mo te fanoanoa, me ne seki mafai o talia ne ia te manatu ke tufa atu ana koloa. Faitalia me pefea te lasi o tena alofa ki a Ieova, e sili atu eiloa tena alofa ki ana kope.
11, 12. (a) Ne a pati ne fai mai ne Iesu e uiga ki koloa ke mafaufau ‵mafa ki ei? (e) E mafai pefea o fai a kope mo fai se mea telā e faka‵lave ne ia te taviniga ki a Ieova?
11 Ne iku atu a te mea tenā ki pati faka‵poi konei a Iesu: “Se mea faigatā i te tino maumea o ulu atu ki te Malo o te lagi. . . . E faigatā o ulu te kamela i te pu o te nila, kae e sili atu i te faigatā o ulu atu ki te Malo o te Atua se tino maukoloa.” (Mataio 19:23, 24) E mata, e fakauiga a Iesu i konei, me ka seai eiloa se tino maukoloa e mafai o ulu atu ki te Malo? Ikai, me ne toe fai mai a ia: “E mafai ne te Atua o fai a mea katoa.” (Mataio 19:25, 26) E tonu, mai te fesoasoani o Ieova ne fai ei a nisi tino mau‵mea i aso konā mo fai ne Kelisiano fakaekegina. (1 Timoteo 6:17) E tiga te feitu tenā, e isi se pogai ‵lei ne fai ei ne Iesu a pati faka‵poi konā. Ne tuku mai ne ia se fakailoaga ke fakaeteete i ei.
12 Kafai ko tō lasi te fakatāua ne se tino ana kope e pelā mo te tamataene maukoloa tenā, e mafai o fai pelā me se mea e faka‵lave atu ei ki tena taviniga ki a Ieova mo te loto kātoa. E mafai o tonu te mea tenā ki se tino ko leva ne maumea mo se tino telā e “manako ke maumea” a ia. (1 Timoteo 6:9, 10) A te tō fakalagolago ki mea faka-te-foitino e mafai o takitaki atu ei se tino ke manatu māmā ki ana manakoga “faka te Agaga.” (Mataio 5:3) Ona ko te mea tenā, kāti ka se matea malosi ne ia te manakoga mō te fesoasoani o Ieova. (Teutelonome 6:10-12) Kāti e mafai o mafaufau tou tagata me e ‵tau o maua ne ia se tulaga fakapito i te fakapotopotoga. (Iakopo 2:1-4) Kae e mafai o fakamāumau ne ia te ukega o ana taimi ki fakafiafiaga mai i ana koloa i lō te tavini atu ki a Ieova.
Ke Maua se Kilokiloga Tonu
13. Se a te kilokiloga se tonu ne maua ne tino Laotikaia?
13 Ne maua ne se potukau e tasi se kilokiloga se tonu e uiga ki koloa i te senitenali muamua i te fakapotopotoga i Laotikaia. Ne fai atu a Iesu ki a latou: “Fai mai koe, ‘Au e maumea kae maukoloa. Ko maua katoa ne au a mea kolā e manako au ki ei. Kae e se iloa ne koe a tou masei mo tou fakaalofa.’ A koe e mativa, e nofo fuafua kae kivi.” E se ko te lotou maumea ne fai i ei te kau Laotikaia ke oko ki se tulaga fakaalofa i te feitu faka-te-agaga. Kae ona ko te lotou fakatuaga katoatoa ki koloa i lō Ieova. Ne iku atu i ei ki te lotou tulaga mafanafana i te feitu faka-te-agaga, kae toeitiiti ko ‘luaki keatea’ ne Iesu a latou mai tena gutu.—Fakaasiga 3:14-17.
14. Kaia ne maua ei ne Kelisiano Epelu a pati fakamālō a Paulo?
14 I te suā feitu, ne fakamālō atu a Paulo ki Kelisiano Epelu ona ko olotou faifaiga i te taimi mua ne fakasauā atu ei ki a latou. Ana muna: “Ne ‵kau fakatasi foki koutou ki puapuagā o pagota, kae i te otiga ne puke mālō otou koloa, ne kufaki mo te fia‵fia ne koutou a te mea tenā, i te mea e iloa ne koutou me isi se mea e sili atu e fakamoe‵moe koutou ki ei, telā e tumau ki te se gata mai.” (Epelu 10:34) Ne seki fanoa‵noa a Kelisiano konā ona ko te ‵galoatuga o olotou kope. Ne tumau eiloa te lotou fia‵fia ona ko te lotou puke ‵mautakitaki ki te lotou kope telā e tāua ‵ki, “se mea e sili atu e fakamoemoe . . . ki ei telā e tumau ki te se gata mai.” E pelā mo te tino fai pisinisi i te tala fakatusa a Iesu telā ne fakatau atu ana mea katoa ke maua ne ia te penina tāua ‵ki e tasi, ko oti ne fakaiku aka ne latou ke se tiaki lele eiloa ne latou te lotou fakamoemoega e uiga ki te Malo, faitalia so se fakalavelave e fe‵paki mo latou. (Mataio 13:45, 46) Ma‵faga o kilokiloga aogā!
15. Ne fakamuamua pefea ne se fafine Kelisiano i Liberia a manakoga o te Malo?
15 Ko oti ne maua ne nisi tino e tokouke i aso nei te kilokiloga aogā tenā. E pelā mo se tamafine Kelisiano i Liberia, ne ofo atu ki a ia se avanoaga ke akoga i te iunivesiti e tasi. E ‵kilo atu a tino i te fenua tenā ki te avanoaga tenā e pelā me se auala ke maua ei se puipuiga ‵lei mō aso mai mua. Kae ko oti ne fai a ia mo fai se paenia, se tino galue tumau i te galuega talai, kae ne fatoā maua ne ia se avanoaga ke fai pelā me se paenia fakapito se tumau. Ne filifili aka ne ia ke ‵sala muamua atu ki mea o te Malo kae ke tumau i te taviniga tumau. Ne fanatu a ia ki te koga telā ne tuku atu ke galue i ei kae ne kamata i ei ana akoga faka-te-Tusi Tapu e 21 i loto i se tolu masina. E ‵sala muamua ne te tuagane tenei fakatasi mo te fia afe o nisi tino e pelā mo ia ki te Malo, faitalia a mea ‵lei faka-te-foitino kolā ka ‵galo mai i a latou. E fakatumau pefea ne latou te kilokiloga tenā i loto i te lalolagi fia maumea tenei? Ko oti ne maua ne latou a nisi uiga ‵gali. Ke na sau‵tala nei tatou ki nisi mea konā.
16, 17. (a) Kaia e tāua ei te agamalū i te ‵tou tali‵tonu katoatoa ki a Ieova? (e) Kaia e ‵tau ei o maua ne tatou te tali‵tonu katoatoa ki folafolaga a te Atua?
16 Te agamalū: E fai mai te Tusi Tapu: “Talitonu ki te Aliki mo tou loto kātoa. Sa fakalagolago lele eiloa ki tou iloa. Ke masaua faeloa ne koe te Aliki i au mea katoa e fai, kae ka fakaasi atu ne ia ki a koe te auala tonu. Ke mo a eiloa e talia ne koe ne ou mafaufauga e fai pelā i a koe ko gasolo aka o poto.” (Faataoto 3:5-7) I nisi taimi, kāti e mafai o foliga mai me e ‵lei atu te auala e tasi mai te kilokiloga faka-te-foitino. (Ielemia 17:9) Kae e kilo atu eiloa se Kelisiano tonu ki a Ieova mō se fakatakitakiga. (Salamo 48:14) ‘I ana mea katoa e fai’—i te fakapotopotoga, akoakoga io me ko galuega ‵togi, taimi malo‵lo, io me ko so se mea aka—e ‵sala atu loa a ia mo te agamalū ki a Ieova mō se fakatakitakiga.—Salamo 73:24.
17 Te talitonu katoatoa ki folafolaga a Ieova: Ne fai mai a Paulo: “So se tino e vau ki te Atua e ‵tau mo ia o fakatuanaki me iai te Atua, kae tuku atu foki ne ia te taui ‵lei ki tino kolā e salasala ki a ia.” (Epelu 11:6) Kafai e fakalotolotolua tatou e uiga ki te fakataunuga o folafolaga a Ieova, ko mafai ei o foliga mai me kāti e sili atu te tuku katoatoa atu o ‘‵tou malosi mo ‵tou mafaufau ki te lalolagi.’ (1 Kolinito 7:31) I te suā feitu, kafai e malosi te ‵tou fakatuanaki, ka fakaiku aka eiloa ne tatou ke ‵sala muamua atu ki te Malo. E mafai pefea o ati aka ke malosi te ‵tou fakatuanaki? Mai te fakapilipili atu faeloa ki a Ieova e auala i ‵talo mo sukesukega totino. (Salamo 1:1-3; Filipi 4:6, 7; Iakopo 4:8) E pelā mo te tupu ko Tavita, e mafai o ‵talo atu tatou, penei: “Ka ko toku fakatuanaki e i a koe e te Aliki, a koe ko toku Atua. Ko oko eiloa te fakaofoofogia o mea ‵lei e tausi ne koe.”—Salamo 31:14, 19.
18, 19. (a) E fakamalosi aka pefea ne te loto finafinau o ga‵lue malosi a te ‵tou tali‵tonu ki a Ieova? (e) Kaia e ‵tau ei o talia ne se Kelisiano a mea faiga‵ta?
18 Ga‵lue malosi i te taviniga ki a Ieova: Ne soko tasi ne Paulo a te loto talitonu ki folafolaga a Ieova mo te loto finafinau o ga‵lue malosi i ana pati ne tusi mai: “A te motou fakamoemoega maluga ke tumau te loto naunau o koutou ke oko eiloa ki te gataga, ko te mea ke taunu a mea kolā e fakamoe‵moe koutou ki ei.” (Epelu 6:11) Kafai e fakalave‵lave faeloa tatou i te galuega ki a Ieova, ka ‵lago mai eiloa a ia ki a tatou. I taimi takitasi e ‵lago mai ei a ia ki a tatou, e gasolo aka faeloa o malosi atu te ‵tou tali‵tonu ki a ia, ka ‘‵mautakitaki tatou kae se mafai o fakagasuesuegina.’ (1 Kolinito 15:58) E fakafou aka faeloa i ei te ‵tou fakatuanaki, kae fakamautinoa aka i ei te ‵tou fakamoemoega.—Efeso 3:16-19.
19 Te lotomalie o talia a mea faiga‵ta: Ne tiakina ne Paulo se avanoaga mō se galuega ‵lei ko te mea ke tautali atu a ia i a Iesu. Ne fai eiloa ne ia te filifiliga tonu, faitalia te faigatā o tena olaga i nisi taimi i te kilokiloga faka-te-foitino. (1 Kolinito 4:11-13) E seki folafola mai ne Ieova e uiga ki se olaga maumea, kae e fe‵paki eiloa ana tavini i nisi taimi mo tulaga faiga‵ta. A te ‵tou lotoma‵lie ke fakafaigofie aka a ‵tou olaga kae talia a mea faiga‵ta e fakatalitonu mai i ei te malosi o te ‵tou fakaikuga ke tavini atu ki a Ieova.—1 Timoteo 6:6-8.
20. Kaia e tāua ei te loto kufaki i se tino telā e fakamuamua ne ia a manakoga o te Malo?
20 Loto kufaki: Ne fakamalosi atu a te soko ko Iakopo ki taina Kelisiano: “Ke kufaki koutou e oku taina, ke oko ki te toe foki mai o te Aliki.” (Iakopo 5:7) Se mea faigatā ke maua te loto kufaki i te lalolagi faka‵numi tenei. E ma‵nako tatou ke ‵tupu fakavave a mea. Kae e fakamalosi mai a Paulo ke fai tatou e “pelā mo tino fakatuanaki e loto kufaki, ke maua ei a te mea ne folafolagina ne te Atua.” (Epelu 6:12) Ke loto fia‵fia tatou o fakatali‵tali ki a Ieova. E sili atu te aogā o te ‵tou fakatali‵tali ki te ola se-gata-mai i te lalolagi palataiso!
21. (a) Se a te mea e fakaasi atu ne tatou māfai e fakamuamua ne tatou a manakoga o te Malo? (e) Se a te mea ka sau‵tala ki ei i te suā mataupu?
21 E tonu, e aogā ‵ki eiloa a pati fakatonutonu a Iesu ke ‵sala muamua ki te Malo. Kafai e fai tatou penā, e fakaasi atu ei te ‵tou tali‵tonu katoatoa ki a Ieova, kae filifili aka te auala ‵lei fua e tasi tenā mō se Kelisiano ke ola i ei. Kae ne polopoloki mai Iesu ke tumau tatou i te ‘‵sala muamua atu ki te amiotonu o te Atua.’ Ka lavea ne tatou i te suā mataupu a te pogai e manakogina malosi ei te fakamalosiga tenā i aso nei.
E Mafai o Fakamatala Mai ne Koe?
• E uiga ki kope faka-te-foitino, se a te kilokiloga paleni ne fakamalosi mai a Iesu ke maua ne tatou?
• Se a te mea e tauloto ne tatou mai te tala fakatusa a Iesu e uiga ki te kamela mo te mata o te nila?
• Ne a uiga faka-Kelisiano e fesoasoani mai ki a tatou ke ‵sala muamua atu ki te Malo o te Atua?
[Ata i te itulau e 23]
Ne alofa malosi atu a te tamataene maukoloa ki ana koloa i lō te Atua
[Ata i te itulau e 23]
Ne fakatau atu ne te tino fai pisinisi i te tala fakatusa a Iesu ana mea katoa ke maua ei te penina tāua
[Ata i te itulau e 24]
Kafai e fakalave‵lave faeloa tatou i te galuega a Ieova ka ‵lago mai eiloa a ia ki a tatou