E Mata, e ‵Pau ‵Tou Kilokiloga ko Ieova ki Nisi Tino?

“Tela la, e seai se mavaevaega o te foitino, kae e fakatau fesoasoani katoa a vaega kese‵kese o te foitino, ko te suā vaega ki te suā vaega.”—1 KOLINITO 12:25.

1. E pefea ou lagonaga i te taimi muamua ne ulu atu ei koe ki loto i te palataiso faka-te-agaga?

I TE taimi muamua ne ‵vae keatea ei tatou mai te lalolagi masei, kae kamata o ‵kau fakatasi mo tino o Ieova, kāti ne fia‵fia eiloa tatou ke lavea atu te a‵lofa mo te atafai i a latou. Ko tafaga la te ‵kese mai i tino ma‵sei, tino loto ma‵sei, mo tino faitaua kolā e ‵nofo mai lalo i te takitakiga a Satani! Ne ulu atu tatou ki loto i te palataiso faka-te-agaga telā e ‵fonu i te filemu mo te fealofani.—Isaia 48:17, 18; 60:18; 65:25.

2. (a) Se a te mea e mafai o pokotia i ei ‵tou kilokiloga ki nisi tino? (e) Ne a mea e ‵tau o fai ne tatou?

² Kae i te gasologa o taimi, kāti ka kamata o maua ne tatou se kilokiloga se ‵lei ki ‵tou taina tali‵tonu ona ko te tulaga se ‵lei katoatoa. Ona ko te tulaga se ‵lei katoatoa, ka mafai o ‵kilo atu fua tatou ki vāivāiga o ‵tou taina tali‵tonu i lō olotou uiga ‵lei faka-te-agaga. Ko tena uiga, ko se ‵pau ‵tou kilokiloga mo Ieova e uiga ki a latou. Kafai e tupu te mea tenei ki a tatou, tenei eiloa te taimi ke na iloilo ne tatou a ‵tou kilokiloga ki nisi tino kae fakafetaui ne tatou mo te kilokiloga ‵lei a Ieova.—Esoto 33:13.

Te Kilokiloga a Ieova ki ‵Tou Taina

3. Se a te mea e faka‵pau ne te Tusi Tapu ki ei a te fakapotopotoga Kelisiano?

³ E pelā mo te mea e fakaasi mai i te 1 Kolinito 12:2-26, ne faka‵pau ne te apositolo ko Paulo a te fakapotopotoga o Kelisiano fakaekegina ki se foitino telā e “uke ona vaega kese‵kese.” E pelā mo te kese‵kese o vaega o te foitino, e penā foki loa te kese‵kese o uiga mo mea e mafai o fai ne tino o te fakapotopotoga. Kae e talia eiloa ne Ieova a tino kese‵kese konei. E alofa kae fakatāua ne ia a tino takitokotasi. Tela la, ne polopoloki mai a Paulo me i tino o te fakapotopotoga e ‵tau o “fakatau fesoasoani katoa . . . te suā vaega ki te suā vaega.” Kāti e faigata te mea tenei me e mafai o ‵kese a uiga o nisi tino mo tatou.

4. Kaia e manakogina ei ke fakamafulifuli ‵tou kilokiloga ki ‵tou taina tali‵tonu?

⁴ E mafai o fakamalosi mai ki a tatou ke ‵kilo atu fua ki vāivāiga o ‵tou taina tali‵tonu. A te faiga tenā, e fai eiloa pelā me e ‵kilo atu tatou ki se mea fakaata telā e se uke a mea e mafai o lavea i ei. Kae, e kilo atu a Ieova ki loto i se mea fakaata telā e lavea i ei te mea telā e manako koe ki ei fakatasi mo mea katoa i ona tafa. Kāti e faigofie ke ‵kilo ‵loto atu tatou ki se mea telā e se ma‵nako tatou ki ei, kae e lavea eiloa ne Ieova a te tino kātoa, e aofia ei ana uiga ‵lei katoa. Ko te lasi o te ‵tou taumafai ke fai pelā mo Ieova, ko te mafai foki ne tatou o fakamalosi aka te agaga o te alofa mo te fealofani i te fakapotopotoga.—Efeso 4:1-3; 5:1, 2.

5. Kaia e se ‵tau ei o fakamasino atu a nisi tino?

⁵ Ne iloa ‵lei ne Iesu me i tino se ‵lei katoatoa ko latou loa ko fia fakamasino tino. Ne polopoloki mai a ia: “Sa fakamasino atu ki nisi tino, ko te mea ke mo a e fakamasino koutou ne te Atua.” (Mataio 7:1) Mafaufau la me ne fakaasi manino atu ne Iesu, penei: “Sa fakamasino.” Ne iloa ‵lei ne ia me ko masani ana tino fakalogo‵logo e tokouke o fakamasinosino ne latou a nisi tino. E mata, ko oti ne ati aka ne tatou se vaegā amioga masani penā? Kafai e isi se vāivāiga penā i a tatou, e ‵tau o ga‵lue malosi tatou ke ‵fuli, ko te mea ke se fakamasino tatou i se feitu masei. E tonu, ko oi la tatou ke fakamasino ne tatou se tino telā e fakaaogā ne Ieova i se tulaga tofia io me fai atu me e se ‵tau o fai a ia mo vaega o te fakapotopotoga? E mafai o isi ne vāivāiga o se taina, kae kāfai e tumau i te talia ne Ieova a ia, e mata, se mea ‵lei ke ‵teke ne tatou a ia? (Ioane 6:44) E mata, e tali‵tonu eiloa tatou me e takitaki ne Ieova tena fakapotopotoga kae kafai e ‵tau o fai ne fakama‵fuliga, ka gasuesue eiloa a ia i tena taimi tonu?—Faitau te Loma 14:1-4.

6. E kilo atu pefea a Ieova ki ana tavini?

⁶ A te mea e fakaofoofogia ei a Ieova me e mafai o lavea ne ia a mea e mafai ne Kelisiano takitokotasi o fai ko te mea ke oko atu latou ki te tulaga ‵lei katoatoa i te lalolagi fou. E iloa foki ne ia a taumafaiga ko oti ne fai ne latou i te feitu faka-te-agaga. Tela la, e seai se pogai ke saga atu a ia ki vāivāiga faka-te-foitino o tino takitokotasi. E fai‵tau tatou ki te Salamo 103:12, penei: “E pelā mo te ‵mao o te saegalā mai te togālā, e penā foki te faka‵mao ne ia o‵tou agasala mai i a tatou.” Ko oko eiloa te ‵tou loto fakafetai mō te mea tenā!—Salamo 130:3.

7. Se a te mea e tauloto ne tatou mai te kilokiloga a Ieova ki a Tavita?

⁷ E lavea ne tatou a fakamaoniga mai i te Tusi Tapu me e maua ne Ieova te atamai tu ‵kese ke kilo atu ki uiga ‵lei o se tino. Ne fakamatala ne te Atua a Tavita e pelā me ko “taku tavini ko Tavita telā e fakamaoni mai ki a au kae tausi ki aku fakatonuga, kae fai fua ne ia a mea kolā e tonu mo toku loto.” (1 Tupu 14:8) E tonu, e iloa ne tatou me ne fai ne Tavita a mea ‵se. Kae ne filifili ne Ieova ke saga atu a ia ki uiga ‵lei, me e iloa ne ia me e tonu a te loto o Tavita.—1 Nofoaiga Tupu 29:17.

Kilo Atu ki ou Taina Tali‵tonu e Pelā mo Ieova

8, 9. (a) I te auala fea e mafai ei o fai tatou e pelā mo Ieova? (e) E mafai pefea ne tatou o fakatusa a te mea tenei, kae se a te akoakoga mō tatou?

⁸ E lavea ne Ieova a loto o tino, kae e se penā loa tatou. A te mea nei se tasi o pogai ‵lei ke mo a e fakamasino tino tatou. E se iloa ne tatou a lagonaga katoa o te suā tino. E ‵tau o fakaakoako tatou ki a Ieova mai te se ‵saga atu ki vāivāiga o tino, kolā ko pili fua o fakaseai atu. E mata, e se se mea ‵lei ke fai pelā mo ia i te feitu tenei? A te faiga tenei e fakamalosi aka ei ne tatou a te fesokotakiga filemu mo ‵tou taina mo tuagane tali‵tonu.—Efeso 4:23, 24.

⁹ Ke fai se fakatusa, mafaufau ki se fale telā ko ‵tulu valevale—ko ‵to ki lalo a alāvai, ko fati a famalama, kae ko ‵tulu valevale foki a te fakaalo. Kāti ka ‵kilo atu a te tokoukega o tino ki te fale tenā e pelā me ko ‵tau o ofa ki lalo; me ko oko eiloa i te fakafoufou. Kae kāti ka vau se tino telā e ‵kese ‵ki tena kilokiloga. E se fia saga atu a ia ki feitu ma‵sei o te fale kae manako fua ke lavea ne ia me e malosi te fakavae kae e mafai eiloa o fakafou a te fale tenā. E ‵togi ne ia te fale kae toe fakafou a mea ma‵sei. Mai tua ifo, ka ofo a tino e solo mai tua i te gali o te fale. E mata, e mafai o fai tatou pelā mo te tino tenei, telā e galue o fakafou aka te fale? I lō te ‵saga atu ki vāivāiga o ‵tou taina tali‵tonu, e mata, e mafai o ‵kilo atu tatou ki olotou uiga ‵lei mo te mafai ne latou o ati aka te lotou feitu faka-te-agaga? Kafai e fai tatou penā, ka fia‵fia malosi tatou ki ‵tou taina mō olotou uiga ‵gali faka-te-agaga, e pelā eiloa mo Ieova.—Faitau te Epelu 6:10.

10. E mafai pefea o fesoasoani mai ki a tatou a te fakatakitakiga i te Filipi 2:3, 4?

¹⁰ Ne tuku mai ne te apositolo ko Paulo a nisi fakatakitakiga kolā e mafai o fesoasoani mai ki a tatou i ‵tou fesokotakiga mo tino katoa i loto i te fakapotopotoga. Ne fakamalosi atu a ia ki Kelisiano: “Sa fai ne koutou ne mea e fakavae i luga i te manatu fakapito mō te ‵lei o te tino, io me i luga i te fakamatamata; kae ke fakatau loto malalo koutou, ke mo a foki e manatu ake koutou me ‵lei atu koutou i nisi tino. Kilo‵kilo ki mea e ‵lei ei nisi tino, kae se ko mea fua e ‵lei ei koutou.” (Filipi 2:3, 4) Ka fesoasoani mai te loto maulalo ke maua ne tatou te kilokiloga ‵lei ki nisi tino. A te fakaasiatuga o te amanaia tonu ki nisi tino mo te kilokilo atu ki olotou uiga ‵lei ka fesoasoani mai ei ke ‵pau ‵tou kilokiloga ki a latou e pelā mo Ieova.

11. Ne a ‵fuliga ne pokotia ei a nisi fakapotopotoga?

¹¹ I taimi fakamuli nei, e uke a gasuesuega ‵lasi ko fai ne tino ona ko ‵fuliga lasi i te lalolagi kātoa. Ko ‵fonu nei a fa‵kai e uke i tino mai fenua kese‵kese. A nisi tino kolā e fou ki ‵tou fenua ko kamata o fia‵fia ki te munatonu i te Tusi Tapu, kae ko ‵kau fakatasi mo tatou i te tapuakiga ki a Ieova. A latou konei “ne o‵mai katoa mai fenua katoa, matakāiga, tino valevale, ‵gana.” (Fakaasiga 7:9) Ona ko te mea tenā, ko ‵fonu nei a ‵tou fakapotopotoga i tino mai fenua kese‵kese i te lalolagi.

12. Se a te kilokiloga e ‵tau o fakatumau ne tatou ki tino takitokotasi, kae kaia e mafai ei o faigata te mea tenei i nisi taimi?

¹² I ‵tou fakapotopotoga, kāti e manakogina ke ‵saga malosi atu tatou ki te fakatumauga o se kilokiloga ‵lei ki nisi tino. E fakamasaua mai te mea tenā ke mafau‵fau tatou ki polopolokiga a te apositolo ko Petelu “ke a‵lofa fakamaoni foki koutou ki otou taina Kelisiano” kae ke “fakatau a‵lofa fakamaoni koutou mo otou loto kātoa.” (1 Petelu 1:22) A te atiakaga o te alofa tumau mo te atafai se mea faigata i se fakapotopotoga telā e ‵fonu i tino o fenua kese‵kese. E mafai o ‵kese ‵ki a tuu mo aganuu a ‵tou taina tali‵tonu mo tatou, kae e mafai o aofia foki i ei olotou akoakoga, tulaga i mea tau tupe, mo telega. E mata, e faigata ki a koe ke malamalama i mafaufauga mo faifaiga a nisi taina tali‵tonu? Kāti e penā foki olotou lagonaga e uiga ki a koe. Faitalia te mea tenā, e fakatonu mai ki a tatou, penei: “A‵lofa ki otou taina tali‵tonu.”—1 Petelu 2:17.

13. Ne a fakamafuli‵fuliga e ‵tau o fai ne tatou ki te auala e mafau‵fau ei tatou?

¹³ Kāti se mea ‵lei ke fai ne fakamafulifuliga ki te auala e mafau‵fau ei tatou, ko te mea ke fakalauefa atu ei te ‵tou a‵lofa ki ‵tou taina tali‵tonu katoa. (Faitau te 2 Kolinito 6:12, 13.) E mata, kai fai atu aka eiloa tatou penei, “Au e se fakailoga tino, kae . . . ” oti aka ko laulau ei ne koe a pona o nisi tino mai telega kese‵kese? E fakaasi mai i vaegā lagonaga penā a te manakoga ke ‵kalo keatea tatou mai te fakailoga tino telā e nofo i loto i a tatou. Kāti ka fesili ifo tatou penei, ‘E mata e taumafai malosi ke iloa ‵lei ne au a tino mai se fenua telā e ‵kese mai toku fenua?’ E mafai o fesoasoani mai a vaegā iloiloga penā ke fai ne tatou a faka‵leiga ki te talia mo te fakaasi atu o te amanaia ki ‵tou taina tali‵tonu i te lalolagi kātoa.

14, 15. (a) Taku mai ne tala o tino kolā ne fakama‵fuli olotou kilokiloga ki nisi tino. (e) E fakaakoako atu pefea tatou ki a latou?

¹⁴ E tuku mai i te Tusi Tapu a fakaakoakoga a tino kolā ne ‵fuli olotou kilokiloga, e tokotasi mai ei ko te apositolo ko Petelu. E pelā me se tino Iutaia, e ‵tau o se ulu atu a Petelu ki se fale o se tino o fenua fakaa‵tea. Kae mafaufau la ki ana lagonaga i te taimi ne fai atu ei ke āsi atu a ia ki te fale o te tagata mai fenua fakaa‵tea telā ne seki pilitome, ko Konelio! Ne fai ne Petelu a fakamafuli‵fuliga, ona ko tena iloaga me ko te loto eiloa o te Atua ke fai a tino o fenua katoa mo fai ne vaega o te fakapotopotoga Kelisiano. (Galuega 10:9-35) Ne fai foki ne Saulo, telā ne fai fakamuli pelā me ko te apositolo ko Paulo, a fakamafulifuliga kae ne ‵kalo keatea a ia mai te fakailoga tino. Ne fakaasi ‵tonu atu ne ia tena takalialia ki Kelisiano me ne “fakasauā masei ki te ekalesia a te Atua, kae ne taumafai foki [a ia] o ofa.” Kae i te taimi ne faka‵tonu ei ne te Aliki ko Iesu te mea a Paulo, ne fai ne ia a ‵fuliga lasi ‵ki kae ne kamata o talia ne ia a takitakiga mai i tino kolā ne fakasauā muamua ne ia.—Kalatia 1:13-20.

¹⁵ E seai se fakalotolotolua me e mafai o fai ne tatou a fakamafulifuliga ki ‵tou amioga fakatasi mo te fesoasoani o te agaga o Ieova. Kafai e iloa ne tatou me koi fakailoga tino eiloa tatou, ke na ga‵lue tatou o fakaseai a mea konā kae ke “fia‵fia koutou o fai te loto tasi telā ne tuku atu ne te Agaga, i te filemu telā e fusi tasi ne ia koutou.” (Efeso 4:3-6) E fakamalosi mai te Tusi Tapu ki a tatou ke “taofi ‵mau koutou ki te alofa, telā e fusi fakatasi ei ne ia a mea katoa ke ‵lei.”—Kolose 3:14.

Te Fakaakoako Atu ki a Ieova i te ‵Tou Galuega Talai

16. Se a te loto o te Atua mō tino?

¹⁶ Ne tusi mai te apositolo ko Paulo penei, “Me i te Atua e se fakailoga tino.” (Loma 2:11) Ko te fuafuaga eiloa a Ieova ke aofia a tino mai fenua katoa i tena fakatokaga mō te tapuakiga. (Faitau te 1 Timoteo 2:3, 4.) Ko te mea ke fakataunu te fuafuaga tenā, ne fakatoka ne ia ke folafola atu a te “Tala ‵Lei ki tino o te lalolagi, ki fenua katoa mo matakāiga, ki ‵gana katoa mo tino.” (Fakaasiga 14:6) Ne fai mai a Iesu: “A te laukele ko te lalolagi.” (Mataio 13:38) E aogā pefea te mea tenā ki tou kāiga?

17. E mafai pefea o fesoasoani atu tatou ki so se tino?

¹⁷ E se ko tino katoa e mafai o olo atu ki koga ‵mao o te lalolagi o avatu te fekau o te Malo ki nisi tino. E tiga te feitu tenā, kāti e mafai o avatu ne tatou te fekau tenei ki tino mai vaega katoa o te lalolagi kolā e ‵nofo i ‵tou koga talai. E mata, e matapula‵pula tatou o ‵sala ki avanoaga ke talai ki so se tino kae e se ki tino fua kolā ne talai tatou ki ei i te fia tausaga? Kaia e se fakaiku aka ei ne koe ke talai atu ki nisi tino kolā ne seki lagona eiloa ne latou se molimau maea?—Loma 15:20, 21.

18. Se a te mea telā ne fakaasi mai ne Iesu me ne manavase a ia ki ei e uiga ki tino?

¹⁸ Ne lagona ne Iesu a te manakoga ke fesoasoani atu ki tino katoa. Ne seki talai atu fua a ia i se koga e tasi. Ne fai mai se tala e tasi i te Tusi Tapu me ne “tamilo atu a Iesu i te fa‵kai ‵lasi mo fa‵kai fo‵liki o asiasi ki ei.” Kae, “i te laveatuga ne ia i te tokouke o tino, ne tupu ake ei tona loto alofa mō latou” kae ne fesoasoani atu a ia ki a latou.—Mataio 9:35-37.

19, 20. Ne a nisi auala kolā e mafai o fakaasi atu ei ne tatou te amanaia o Ieova mo Iesu ki luga i vaegā tino valevale?

¹⁹ Ne a nisi auala e mafai ei o fakaasi atu ne koe se uiga tai ‵pau? Ko oti ne taumafai a nisi tino ke talai atu i nisi vaega o olotou koga talai kolā ne seki talai i ei. E mafai o aofia i ei a koga fai pisinisi, malae tafao, koga e tu ei a mea fakateletele, io me i mua o fale kolā e faigata o oko atu ki ei. Ko oti ne taumafai a nisi tino o tauloto ki se ‵gana fou ko te mea ke mafai o talai atu latou ki tino mai telega kese‵kese kolā ko ‵nofo atu i olotou koga io me ko potukau kolā ne seki talai sāle ki ei i taimi mua. A te tauloto ki te auala ke fakatalofa atu ki tino i olotou ‵gana totino, se fakaasiga me e amanaia tonu koe ki olotou tulaga. Kafai e se mafai o tauloto ne tatou se ‵gana fakaa‵tea, e mata, e mafai ne tatou o fakamalosi atu a tino kolā e fai penā? E tonu, e se fia fakavāivāi io me fakafesili ne tatou me kaia e taumafai ei a nisi tino o talai atu ki tino mai nisi fenua. E tāua ‵ki a ola o tino i te kilokiloga a te Atua, kae e ma‵nako tatou ke ‵pau ‵tou kilokiloga ki mea konā.—Kolose 3:10, 11.

²⁰ A te mauaga ne tatou te kilokiloga a te Atua e uiga ki tino e fakauiga foki ki te talai atu ki tino katoa, faitalia olotou fakanofonofoga. Kāti e seai ne fale o nisi tino, e lai‵lai, io me e lavea atu me e ola i se olaga finalalolagi. Kafai e se fia‵fia mai a nisi tino ki a tatou, e se ‵tau o fai i ei ke maua ne tatou se kilokiloga se ‵lei e uiga ki olotou fenua io me ko te lotou telega kātoa. Ne fai ne nisi tino a faifaiga sē ‵lei ki a Paulo, kae ne seki talia ne ia te mea tenā ke fakagata ei tena talai atu ki tino penā. (Galuega 14:5-7, 19-22) Ne talitonu a ia me ka ‵saga mai a nisi tino mo te loto fakafetai.

21. E aogā pefea ki a koe a te mauaga o te kilokiloga a Ieova ki nisi tino?

²¹ Ko manino ‵lei mai nei me e manakogina a te kilokiloga ‵lei—ko te kilokiloga a Ieova—i ‵tou faifaiga ki ‵tou taina tali‵tonu i te fakapotopotoga, ‵tou taina tali‵tonu i te lalolagi kātoa, mo tino i te galuega talai. Ko te lasi o te fakaasi atu ne tatou a te kilokiloga a Ieova, ko te lasi foki o ‵tou fakamalosiga ke maua te filemu mo te fealofani. Kae ka ‵tu atu foki eiloa tatou i se tulaga ‵lei ke fesoasoani atu ki nisi tino ke a‵lofa ki a Ieova, te Atua telā ‘e se fakailoga tino’ kae alofa ki tino katoa, “me ne faite ne ia a tino katoa.”—Iopu 34:19.

E Mafai o Tali Mai ne Koe?

• Se a te kilokiloga e uiga ki ‵tou taina e taumafai ke ‵kalo keatea tatou mai ei?

• E mafai pefea o fakaakoako tatou ki a Ieova i te auala e ‵kilo atu ei tatou ki ‵tou taina?

• Ne a akoakoga e tauloto ne koe e uiga ki ‵tou kilokiloga ki ‵tou taina i te lalolagi kātoa?

• E mafai pefea o fakaakoako tatou ki te kilokiloga a Ieova ki nisi tino māfai e olo atu i te galuega talai?