Ko Oko Mai Nei a Taimi Faiga‵ta

NE ‵VALO mai i te Tusi Tapu me ka fe‵paki a tino mo “taimi faiga‵ta.” E fakamatala mai te vaitaimi tenei e pelā me ko “aso fakaoti.” (2 Timoteo 3:​1-5; 2 Petelu 3:​3-7) Ne faipati a Iesu Keliso ki te taimi foki tenei i te taimi ne tali atu ei a ia ki se fesili telā ne fakasae aka ne ana soko e uiga ki “te gataga o te lalolagi.” (Mataio 24:3) E mata, e ola nei tatou i aso fakaoti? Ke fakatusa a mea kolā ne ‵valo mai i te Tusi Tapu mo lipoti ‵fou kolā e taku atu mai lalo, ko fai ei sau fakaikuga totino.

Mea kolā ne ‵valo mai i te Tusi Tapu: taua i te lalolagi kātoa​​—Luka 21:10; Fakaasiga 6:4.

Mea kolā e taku mai i lipoti ‵fou: “Ko silia atu fakatolu te uke o tino ‵mate i taua i te 100 tausaga ko ‵teka i lō te 1900 tausaga mai mua atu i ei ke oko ki te taimi ne fanau mai a Keliso.”​​—Worldwatch Institute.

Mea kolā ne ‵valo mai i te Tusi Tapu: ogegā mea‵kai mo masaki​​—Luka 21:11; Fakaasiga 6:​5-8.

Mea kolā e taku mai i lipoti ‵fou: I te 2004, e nofo pelā ki te 863 miliona o tino i te lalolagi e fia‵kai, e silia atu i te 7 miliona i lō te 2003.​​—United Nations Food and Agriculture Organization.

E nofo pelā ki te tasi piliona o tino e ‵nofo fakaa‵lofa; e 2.6 piliona e seai ne olotou fale fo‵liki mo koga ‵pei kaiga ‵lei; e 1.1 piliona o tino e se ‵ma olotou vai inu.​​—Worldwatch Institute.

E pokotia a tino e 500 miliona i te malalia; e 40 miliona a tino e maua ne te manu o te SELAMETE; ne tamate ne te ‵tipī a te 1.6 miliona o tino i te 2005.​​—World Health Organization [Te Fakapotopotoga o te Ola ‵Lei i te Lalolagi].

Mea kolā ne ‵valo mai i te Tusi Tapu: te fakamaseiga o te lalolagi​​—Fakaasiga 11:18.

Mea kolā e taku mai i lipoti ‵fou: “Ko pili eiloa o fakaseai atu ne faifaiga a tino a vaegā manu mo lakau kese‵kese i te lalolagi nei.” “Toeitiiti kae kātoa te lua-vae-tolu o mea aogā e maua ne tino mai te fakatokaga o te paneta ko gasolo eiloa o ‵galo atu i te lalolagi kātoa.”​​—Millennium Ecosystem Assessment.

“A te fakalailaiga o te ea ona ko faifaiga masani a tino ko fai ei ke fakama‵taku a tau-o-aso i te Lalolagi, telā ka ma‵sei ‵ki eiloa a mea e mafai o ‵tupu ki te paneta.”​​—NASA, Goddard Institute for Space Studies.

Mea kolā ne ‵valo mai i te Tusi Tapu: e talai atu te tala ‵lei e uiga ki te Malo o te Atua i te lalolagi kātoa​​—Mataio 24:14; Fakaasiga 14:​6, 7.

Mea kolā e taku mai i lipoti ‵fou: I te 2007, ne oko atu ki se aofaki fou e toko 6,957,854 o Molimau a Ieova ne fakamāumāu ne latou a itula e silia atu i te 1.4 piliona i te talaiatuga o te tala ‵lei e uiga ki te Malo o te Atua i atufenua e 236.​​—2008 Yearbook of Jehovah’s Witnesses.

E pelā mo mea ne taku atu mai i luga nei, ne ‵valo mai te Tusi Tapu me faitalia te ma‵sei o tala katoa konei, e isi eiloa se pogai ‵lei e ‵tau ei o maua se kilokiloga aogā. Ne faipati a Iesu e uiga ki te “tala ‵lei” o te Malo o te Atua. Se a te Malo o te Atua? E fetaui pefea te mea tenā mo te fakamoemoega ‵lei o tino i aso mai mua? Kae ka pokotia pefea koe i te Malo o te Atua?

[Fakamatalaga o te Ata i te itulau e 5]

Ne ‵valo mai i te Tusi Tapu a fakanofonofoga i te lalolagi kolā e lavea atu ne tatou i aso nei