Tenei Eiloa te Taimi ke Fai ei Sau Filifiliga

“Telā ne faite ei ne te Atua a te tino ke foliga ki a ia. Ne faite ne ia te tagata mo te fafine.”—Kenese 1:27.

APATI masani konā i te kamataga o te Tusi Tapu e fakaasi mai i ei se mea tafasili i te gali e tasi telā ne ‘tupu i te taimi tonu’—ko te faitega o te tauavaga ‵lei katoatoa, ko Atamu mo Eva. (Failauga 3:11) E pelā me ko te lā Mafuaga, ne fai atu a Ieova te Atua ki a lāua: “Fakatokouke otou tamaliki, ko te mea ko otou fanau ke ‵nofo i te lalolagi kae pule i ei. Ko tuku atu ne au ki a koutou te pule i luga i ika, manu eva, mo manu vaefa katoa.”—Kenese 1:28.

I ana pati konā ki te tauavaga muamua, ne fakaasi atu ei ne te Atua tena fuafuaga ki a lāua. Ne ‵tau o fakatokouke lā tamaliki kae ke tausi atu ki te lalolagi, i te faiga o te lalolagi kātoa mo fai se palataiso mō lāua mo lā tama‵liki. Ne seki fakatoka eiloa ne te Atua te taimi e ‵tau o ‵mate lāua i ei. I lō te fai penā, ne folafola atu ne te Atua ki a lāua se mea gali ‵ki. Mai te faiga o te filifiliga tonu mo te tumau i te ola e ‵tusa mo te loto o te Atua, ne mafai o ola lāua i te filemu ‵lei katoatoa mo te fiafia ki te se-gata-mai.

Ne sē ‵lei te lā filifiliga ne fai, kae ne iku atu i ei ki te olaga matua mo te ‵mate o tino katoa. A te ‵tonuga loa, ne iloa ‵lei ne te toeaina mua ko Iopu a te mea tenei: “E ola katoa tatou i te olaga toetoe tenei, kae ‵fonu i fakalavelave.” (Iopu 14:1) Se a te mea ne tupu?

“Ne oko mai te agasala ki te lalolagi i te tagata e tokotasi, ne aumai foki ne tena agasala te mate. Tela la, ko oko ki tino katoa te mate, i te mea ko agasala a tino katoa,” ko te fakamatalaga i te Tusi Tapu. (Loma 5:12) E tonu, a “te tagata e tokotasi” tenā, ko Atamu, ne filifili eiloa mo te iloa tonu ke ‵teke atu ki te fakatonuga faigofie kae manino a te Atua. (Kenese 2:17) Ona ko tena filifiliga, ne galo atu ei i a Atamu a te avanoaga ke ola ki te se-gata-mai i te lalolagi palataiso. Ne fai foki ne ia ke galo atu i ana tamaliki se mea tāua kae ne togi atu ne ia ki a latou te agasala mo te mate. Ne foliga mai me ne ‵galo atu a mea katoa. E a, ne mafai o toe maua mai a mea konā?

Se Taimi ke Faka‵fou ei a Mea

I te fia afe o tausaga mai tua ifo, ne fakaosofia ei te faisalamo ke tusi mai penei: “A tino amio‵tonu ka fai mo latou te fenua, kae ka ‵nofo faeloa i ei ki te se gata mai.” (Salamo 37:29) Ke fakatalitonu mai me ka fakataunu eiloa tena fuafuaga ne fai i te fatoaga o Etena, e fakamatala fakagaligali mai ne te Muna a te Atua a mea kolā ko pili o fai ne ia: “Ka se toe iai ne loimata i olotou mata. Ka se toe iai se mate, se fanoanoa, se tagi io me se ‵mae. Ko palele atu a mea mua.” E toe fai mai foki eiloa te Atua: “Nei, ko faka‵fou ne au a mea katoa!”—Fakaasiga 21:4, 5.

Ona ko te mea e isi se taimi ne filifili mō mea katoa, a te fesili telā e sae aka i ei, Ka oko mai mafea te taimi tenā o te fakafouga o mea, ko te mea ke fakataunu ei a folafolaga ‵gali a te Atua? A tino kolā e ‵lomi ne latou te mekesini tenei, ko Molimau a Ieova, ko oti ne taumafai malosi ke fakailoa atu ki tino me ko ola nei tatou i aso kolā e taku ne te Tusi Tapu ki “aso fakaoti” kae ko pili mai te taimi ka gasuesue ei te Atua o ‘faka‵fou a mea katoa.’ (2 Timoteo 3:1) E fakamalosi atu matou ki a koe ke sukesuke ki te Tusi Tapu kae ke iloa ne koe a mea e uiga ki fakamoemoega ‵gali kolā e mafai o maua ne koe. E fakamalosi atu foki matou ke talia ne koe te ‵kamiga tenei: “‵Fuli atu ki te Aliki [ko Ieova] kae ‵talo atu ki a ia, me ko pili mai a ia i te taimi nei.” (Isaia 55:6) I lō te talia ne koe ke pule tou olaga ne te manatu me ko oti eiloa ne fakaiku aka a mea e ‵tau o ‵tupu mai te kamataga, e fakalagolago eiloa ki a koe a tou olaga mo tou ola ki te se-gata-mai i aso mai mua!

[Ko manatu tāua i te itulau e 8]

“Nei, ko faka‵fou ne au a mea katoa”