Fesili Mai te Kau Fai‵tau
E faipati loa te Tusi Tapu e uiga ki “Te Tusi a Iasela” mo “te Tusi o Taua a te Aliki.” (Iosua 10:13; Numela 21:14) E se ‵sae mai a tusi e lua konā i te kanona o te Tusi Tapu. E mata, a tusi konei ne tusi mai te Atua kolā ne ‵galo?
E seai se pogai e ‵tau ei o fakaiku aka me i tusi e lua konā ne tusi kolā ne fakaosofia ne te agaga tapu kae ne ‵galo fakamuli. Ne fakasino atu foki a tino kolā ne tusi ne latou te Tusi Tapu ki nisi tusi. Kāti e aofia a tusi konā i nisi vaega o te Tusi Tapu i tugapati kolā e se masani ki ei a tino fai‵tau i aso nei. E pelā mo te 1 Nofoaiga Tupu 29:29 e faipati mai i ei e uiga ki “tusi tala o te tokotolu pelofeta, ko Samuelu, Natano, mo Kato.” Kāti ne aofia a tino e tokotolu konā i tusi kolā ko iloa nei ne tatou me ko te 1 mo te 2 Samuelu, kae kāti ko te tusi foki ko Famasino.
I te suā feitu, kāti e fakasino atu ki nisi tusi kolā e tai ‵pau olotou igoa mo tusi i te Tusi Tapu kae e se ne vaega ‵tonu i ei. E mafai o matea ne tatou te mea tenei i tusi mua e fa konei: “Te Tala Tukufakasolo o Tupu o Iuta,” “Te Tala Tukufakasolo o Tupu o Iuta mo Isalaelu,” “Te Tala Tukufakasolo o Tupu o Isalaelu,” mo “Te Tala Tukufakasolo o Tupu o Isalaelu mo Iuta.” E tiga eiloa e tai ‵pau a igoa o tusi konā mo igoa o tusi i te Tusi Tapu ko te 1 mo te 2 Tupu, ne seki fakaosofia a tusi e fa konā ne te agaga tapu, kae e se aofia foki i te kanona o te Tusi Tapu. (1 Tupu 14:29; 2 Nofoaiga Tupu 16:11; 20:34; 27:7) Kāti a tusi konā ne tusi fua o tala fakasolopito kolā ne avanoa i vaitaimi ne tusi ei ne te pelofeta ko Ielemia mo Esela a tala kolā e maua nei ne tatou i loto i te Tusi Tapu.
E tonu, ne ‵saga atu eiloa a nisi tino kolā ne tusi ne latou te Tusi Tapu ki tala fakasolopito io me ko nisi fakamatalaga kolā ne maua atu i taimi konā kae ne seki fakaosofia. Ne fakasino atu te Eseta 10:2 ki “tusi tala o te malo e uiga ki tupu o Pelesia mo Metai.” E penā foki te tino tusitala ko Luka, “ne sukesuke ne au faka‵lei a mea katoa mo olotou mafuaga.” Kāti ne fakauiga i ei me ne iloilo ne ia a nisi tusi kolā ne avanoa ki a ia i te taimi ne fakatoka ei te gafa o Iesu telā e maua ne tatou i tena Evagelia. (Luka 1:3; 3:23-38) E tiga eiloa e seki fakaosofia a tusi kolā ne iloilo ne Luka, ne fakaosofia eiloa te Evagelia telā ne tusi ne ia. Kae koi aoga eiloa te Evagelia tenā mō tatou.
E pelā mo tusi e lua kolā ne ‵sae mai i te fesili—“Te Tusi a Iasela” mo “te Tusi o Taua a te Aliki.”—e foliga mai me ne tusi kolā ne avanoa i aso konā kae seki fakaosofia. Ona ko te mea tenā ne seki tausi ei ne Ieova a tusi konā. A te fakasino atu o te Tusi Tapu ki tusi e lua konā, ne fai ei ke tali‵tonu a tino suke‵suke ki te Tusi Tapu me i tusi konā ne tusi o fakalagi io me ko pese kolā e fakasino atu ki kinauga i va o te kau Isalaelu mo olotou fili. (2 Samuelu 1:17-27) Ne fakaasi mai i se encyclopedia i mea tau te Tusi Tapu me kāti ne aofia i tusi konā “a fakalagi mo pese masani kolā ne tausi ne tino usu pese apo i Isalaelu i aso mua.” Ke oko foki loa ki nisi tagata kolā ne fakaaoga ne te Atua i nisi taimi e pelā me ne pelofeta ne tusi foki olotou tusi kolā ne seki fakaosofia ne Ieova kae ne seki filifili ne ia ke aofia i te Tusi Tapu telā e “aoga ki te akoakoga o te mea tonu, ki te polopoloki, ki te fakatonu o te mea ‵se” i ‵tou aso nei.—2 Timoteo 3:16; 2 Nofoaiga Tupu 9:29; 12:15; 13:22.
E se ko tena uiga me i tusi konei ne fakaasi mai i te Tusi Tapu ne aoga foki ke tali‵tonu tatou ki ei me ne fakaosofia ne te Atua. Kae ne tausi eiloa ne Ieova te Atua a tusi katoa kolā e aofia i te “muna a te Atua,” telā ka “tumau ki te se gata mai.” (Isaia 40:8) Ao, a tusi e 66 kolā ne filifili ne Ieova ke aofia i te Tusi Tapu telā e maua nei ne tatou ko mea eiloa kolā e manakogina ne tatou ko te mea ‘ke lava ‵tou uta e fai ei ne tatou so se galuega ‵lei.’—2 Timoteo 3:16, 17.