Te Fakatumauga o Taugasoa i se Lalolagi sē Alofa

“Tenei la taku poloakiga ki a koutou: ke fakatau a‵lofa koutou.”​—⁠IOANE 15:⁠17.

1. Kaia ne ‵tau ei o tumau te va fakataugasoa ‵pili o Kelisiano i te senitenali muamua?

I TENA toe po i te lalolagi nei, ne fakamalosi atu a Iesu ki ana soko fakamaoni ke fakatumau te lotou va fakataugasoa. Mai mua atu o te afiafi-po tenā, ne fai atu a ia me e fakamailoga latou ne te lotou fakatau a‵lofa e pelā me ko ana soko. (Ioane 13:35) Ne ‵tau o tumau te kau apositolo i te lotou va fakataugasoa ‵pili māfai e fia manumalo latou i tofotofoga kolā ka fe‵paki mo latou i aso mai mua mo te faiga o te galuega telā ko pili o fakatonu atu ne Iesu ke fai ne latou. A te ‵tonuga loa, ne lauiloa a Kelisiano i te senitenali muamua ona ko te ‵mautakitaki o te lotou a‵lofa ki te Atua mo te lotou va ‵pili.

2. (a) Ne a mea e ma‵nako tatou o fai, kae kaia? (e) Ne a fesili ka mafau‵fau tatou ki ei?

² I aso nei, se mea fakafiafia ke ‵kau atu ki se fakapotopotoga i te lalolagi kātoa telā e tau‵tali faka‵lei atu a tino i ei ki te fakaakoakoga telā ne tuku mai ne Kelisiano konā i te senitenali muamua! E ma‵nako tatou ke faka‵logo ki te fakatonuga a Iesu ke fakatau fakaasi atu te alofa tonu i va o tatou. Kae i aso fakaoti konei, a te tokoukega o tino e se fakamaoni kae e fakata‵mala o fakaasi atu te alofa masani. (2 Timoteo 3:​1-3) E se ‵tonu sāle a va fakataugasoa e ati aka ne latou kae e fakavae fua ki olotou uiga kaima‵nako. Ke fakatumau te ‵tou iloga e pelā me ne Kelisiano ‵tonu, e se ‵tau lele eiloa o tau‵tali atu tatou ki vaegā kilokiloga penā. Ke na onoono nei tatou ki fesili kolā e ‵soko mai: Se a te fakavae o te taugasoa ‵lei? E mafai pefea o fai ne tatou a taugasoa ‵lei? Se a te taimi e ‵tau ei o fakagata ne tatou se va fakataugasoa? Kae e mafai pefea o fakatumau ne tatou a taugasoa fakamalosi loto?

Se a te Fakavae o te Taugasoa ‵Lei?

3, 4. Se a te fakavae o taugasoa ma‵losi, kae kaia?

³ A te malosi o te va fakataugasoa e fakavae ki te alofa ki a Ieova. Ne tusi mai a te tupu ko Solomona: “E mafai ne te tokolua o ‵teke atu a tino kolā e se mafai ne te tino e tokotasi o ‵teke. A te lopu telā e ‵fili ki uka e tolu e faigata o ‵motu.” (Failauga 4:​12) Kafai e fai a Ieova mo fai te tolu o uka i se va fakataugasoa, ka tumau eiloa te va fakataugasoa tenā.

⁴ E tonu, a latou kolā e se a‵lofa ki a Ieova e mafai foki o ati aka ne latou a taugasoa ‵gali. Kae kafai e ‵pili a va o tino ona ko te alofa ki te Atua, ka ‵mautakitaki eiloa olotou va fakataugasoa. Kafai e ‵sae aka a tamā fakalavelave, ka gasue‵sue eiloa a taugasoa ‵tonu i olotou faifaiga ki te suā tino, i te auala telā e fakafiafia atu ki a Ieova. Kafai e taumafai a fili o te Atua ke faka‵tupu a mavae‵vaega, ka iloa ei ne fili konei me e se mafai o fakamaseigina a te va fakataugasoa o Kelisiano ‵tonu. I tala mua, ne fakamaoni atu ne tavini a Ieova te lotou loto fia‵fia ke ‵mate i lō te fakatogafiti ne latou olotou taina.​—⁠Faitau te 1 Ioane 3:​16.

5. Kaia ne tumau ei te va fakataugasoa o Luta mo Naomi?

⁵ E aunoa mo te fakalotolotolua, a te ‵toe va fakataugasoa gali e mafai o maua ne tatou ko te fai taugasoa mo tino kolā e a‵lofa ki a Ieova. Mafaufau ki te fakaakoakoga a Luta mo Naomi. Ne ati aka ne fafine konei se va fakataugasoa telā ne aofia i toe tala ‵gali kolā ne fakamau i te Tusi Tapu. Kaia ne malosi kae tumau ei te lā va fakataugasoa? Ne fakaasi mai ne Luta a te pogai i te taimi ne fai atu ei a ia ki a Naomi: “A tou fenua ka fai mo oku fenua, a tou Atua ka fai foki mo oku Atua. Ke i luga i au te fakasalaga a te Aliki [ko Ieova] manafai e tuku tiakina ne au a koe, na ko te mate fua e mavae ei taua!” (Luta 1:​16, 17) A te ‵tonuga loa, ne maua ne Luta mo Naomi se alofa ‵poko ki te Atua, kae ne talia ne lāua te alofa tenei ke fakamalosi aka ei a lā faifaiga, te suā ki te suā tino. Ne iku atu i ei ki te fakamanuiaga ne Ieova a fafine e tokolua konei.

Te Auala ke Fai ei a Taugasoa ‵Lei

6-8. (a) Se a te mea e māfua mai i ei a taugasoa tumau? (e) E mafai pefea o gasuesue muamua koe i te faiga o taugasoa?

⁶ A te fakaakoakoga a Luta mo Naomi e fakaasi mai i ei me i te va fakataugasoa ‵lei ne seki tupu fakafuasei. A te alofa tonu ki a Ieova ko te fakavae o te mea tenā. Kae ko taugasoa tumau se ikuga o te taumafai malosi ki ei mo te alofa sē fakapito. Ke oko foki eiloa ki tama‵liki kolā e tapuaki atu ki a Ieova i se kāiga Kelisiano e ‵tau o ga‵lue malosi ke ati aka a va fakataugasoa ‵pili. E mafai la pefea ne koe o fai a taugasoa ‵lei?

⁷ Ke gasuesue muamua koe. Ne fakamalosi atu a te apositolo ko Paulo ki ana taugasoa i te fakapotopotoga i Loma ke fakaasi atu “te alofa kaimalie,” io me ko te uiga talimalo. (Loma 12:13) A te tautali atu ki te auala tenei e aofia i ei a te faiga o mea e uke, telā e fakasolosolo fakalei mai i te mea e tasi ki te suā mea. E penā foki loa te uiga talimalo e aofia i ei a tamā mea, mo faifaiga masani. E seai aka foki se tino e mafai o fakaasi atu te uiga talimalo mō koe. (Faitau te Faataoto 3:​27.) E tasi te auala e mafai ei o fakaasi atu a te uiga talimalo ko te ‵kami atu o tino kese‵kese i te fakapotopotoga ke ‵kai fakatasi koutou. E mata, e mafai ne koe o fai a te mea tenā e pelā me se vaega masani o au mea e fai ke fakaasi atu te uiga talimalo ki tino i tau fakapotopotoga?

⁸ A te suā auala e mafai ei o fai ne koe ko te gasuesue muamua o fai taugasoa mai i te ‵kami atu o tino kese‵kese ke ga‵lue mo koe i te galuega talai. I te taimi e tu atu ei koe i mua o te fale o se tino fou kae lagona ne koe tou taugasoa e faipati atu mai tena loto eiloa e uiga ki tena alofa ki a Ieova, e mafai o fakamalosi aka ei te ‵pili o te lū va fakataugasoa mo te tino tenā.

9, 10. Se a te fakaakoakoga ne tuku mai ne Paulo, kae e fakaakoako atu pefea tatou ki a ia?

⁹ Ke fakalauefa atu tou alofa ki tino kese‵kese. (Faitau te 2 Kolinito 6:​12, 13.) E mata, e mafaufau koe me e seai eiloa se tino i tau fakapotopotoga e mafai o fai taugasoa koe ki ei? Kafai e penā loa, e mata, ko fakatapula ne koe ki nai tino fua kolā e mafai o fai mo ou taugasoa? Ne tuku mai ne te apositolo ko Paulo se fakaakoakoga ‵lei i te fakalauefa atu o tena alofa ki nisi tino. I te taimi e tasi, ne seki mafaufau eiloa a ia ki te atiakaga o se va fakataugasoa mo tino kolā e se ne tino Iutaia. Kae ne fai a ia mo fai se “apositolo mō tino o fenua fakaatea.”​—⁠Loma 11:⁠13.

¹⁰ E se gata i ei, ne seki fakatapula ne Paulo tena va fakataugasoa ki tino kolā e se kautama mo ia. E pelā mo lāua mo Timoteo, ne fai mo taugasoa ‵pili faitalia te lasi o te ‵kese o lā tausaga mo lā ‵tupuakaga. I aso nei, e fakatāua ne talavou e tokouke a te fai taugasoa mo tino ma‵tua i te fakapotopotoga. “E isi soku taugasoa pele telā ko 50 ana tausaga,” ko muna a Vanessa, telā ko 20 tupu fua ana tausaga. “E mafai ne au o fai atu ki tou fafine a mea kolā e mafai o fai atu ne au ki taugasoa kolā e kautama matou. Kae ne atafai malosi mai eiloa tou fafine ki a au.” Ne ati aka pefea a vaegā taugasoa penā? E fai mai a Vanessa: “Ne taumafai au o ‵sala atu ki se vaegā taugasoa penei kae ne seki faka‵tali au ki se tino.” E mata, e loto fiafia koe o ati aka a taugasoa mo tino kolā e se kautama koulua? Ka taui atu eiloa ne Ieova a koe mō au taumafaiga.

11. Se a te mea e mafai o tauloto ne tatou mai i te fakaakoakoga a Ionatana mo Tavita?

¹¹ Ke alofa fakamaoni. Ne tusi mai a Solomona: “A takaga e masani o fiafia fakatasi kae fakatau a‵lofa. A taina e ‵tau o fakatau fesoasoani i taimi o fakalavelave.” (Faataoto 17:17) I te taimi ne tusi mai ei a pati konei, kāti ne mafaufau a Solomona ki te va fakataugasoa ne maua ne tena tamana ko Tavita mo Ionatana. (1 Samuelu 18:⁠1) Ne manako a te tupu ko Saulo ke maua ne tena tama ko Ionatana a te tulaga fakatupu i Isalaelu. Kae ne talia ne Ionatana a te manatu me ne filifili ne Ieova a Tavita mō te tauliaga tenei. E se pelā mo Saulo, ne seki loto masei a Ionatana ki a Tavita. Ne seki maua ne ia te loto ita ki tavaega ne maua ne Tavita, kae ne seki talitonu foki a ia ki pati fakamasei ne fakasalalau atu ne Saulo e uiga ki a Tavita. (1Samuelu 20:​24-​34) E mata, e fai tatou e pelā mo Ionatana? Kafai e maua ne ‵tou taugasoa a tauliaga, e mata, e fia‵fia tatou mō latou? Kafai e logo‵mae latou i tulaga faiga‵ta, e mata, e fakamafanafana kae fesoasoani atu tatou ki a latou? Kafai e lagona ne tatou a pati fatufatu fakalogo‵mae e uiga ki se taugasoa, e mata, e tali‵tonu vave tatou ki ei? Io me e ‵pulu ne tatou mo te a‵lofa fakamaoni ‵tou taugasoa, e pelā mo Ionatana?

Te Taimi e ‵Tau ei o Fakagata a Taugasoa

12-14. Se a te mea faigata e fepaki mo nisi akoga faka-te-Tusi Tapu, kae e mafai pefea o fesoasoani atu tatou ki a latou?

¹² Kafai ko kamata o fai ne se tino akoga faka-te- Tusi Tapu a ‵fuliga ki tena olaga, e mafai o fe‵paki a ia mo se tulaga faigata e uiga ki taugasoa. Kāti koi isi ne ana taugasoa kolā e se ola e ‵tusa mo tulaga i te Tusi Tapu. I aso ko ‵teka, e mafai o fakamaumau ne ia a taimi e uke mo latou. Nei la, e lavea ne ia me ne mafai o fakamalosi atu i se feitu sē ‵lei olotou faifaiga, kae ko iloa foki ne ia me e ‵tau o isi se tapulā o tena fesokotaki atu ki vaegā taugasoa penā. (1 Kolinito 15:33) Kafai foki e fai a ia penā, e mafai o mafaufau a ia me e se fakaasi atu ne ia te alofa fakamaoni māfai ko se fesokotaki atu a ia ki a latou.

¹³ Kafai koe se tino akoga faka-te- Tusi Tapu telā ko fepaki mo te mea faigata tenei, masaua me i te taugasoa tonu ka fiafia ki taumafaiga e fai ne koe o faka‵lei aka tou olaga. Kāti ka manako a ia ke kau atu ki a koe i te taulotoga e uiga ki a Ieova. I te suā feitu, a taugasoa ma‵sei ka “faifai muna atu latou ki a koutou” ona ko te mea ko se toe kau atu koe ki te lotou “olaga masei mo te fai valevale.” (1 Petelu 4:​3, 4) A te ‵tonuga loa, ko taugasoa konei ko se a‵lofa fakamaoni ki a koe, kae e se ko koe.

¹⁴ Kafai ko tiakina ne akoga faka-te-Tusi Tapu olotou taugasoa mua kolā e se a‵lofa ki te Atua, e mafai eiloa o fai a tino i te fakapotopotoga mo fai olotou taugasoa. (Kalatia 6:​10) E mata, e iloa ne koe a latou kolā ko ‵kau atu ki te otou fakatasiga kae suke‵suke nei ki te Tusi Tapu? E mata, e mafai ne koe i nisi taimi o fai mo fai se taugasoa fakamalosi loto ki a latou?

15, 16. (a) E ‵tau o ‵saga atu pefea tatou māfai ko fakagata ne se taugasoa tena tavini atu ki a Ieova? (e) E mafai pefea o fakamaoni atu ‵tou a‵lofa ki te Atua?

¹⁵ E a la māfai ko fakaiku aka ne se taugasoa i te fakapotopotoga ke fulitua atu a ia ki a Ieova, kāti mai i te fakatea atu? E mafai eiloa o fakafanoanoa atu a vaegā tulaga penā. I te fakamatalamaiga o ana lagonaga i te taimi ne taofi aka ei ne se taugasoa pili tena taviniga ki a Ieova, ne fai mai se tuagane: “Ne mafaufau au e pelā me e isi se mea i loto i a au ko mate. Ne mafaufau au me e malosi ‵ki toku taugasoa i te munatonu, kae e se penā loa. Ne mafaufau au me e mata, ne tavini atu fua a ia ki a Ieova ke fakafiafia atu ki tena kāiga. Ne kamata o toe iloilo aka ne au oku lagonaga. E mata, e tavini atu au ki a Ieova mō pogai ‵tonu?” Ne fa‵ki pefea te tuagane tenei i te mea ne tupu? “Ne tuku atu ne au taku amoga ‵mafa ki a Ieova,” ko ana muna. “Au e manako ke fakaasi atu ki a Ieova me e se alofa fua au ki a ia ona ko te mea e tuku mai ne ia a taugasoa i loto i tena fakapotopotoga.”

¹⁶ E se fakamoe‵moe tatou ke fai tatou mo taugasoa tumau o te Atua māfai e fai taugasoa tatou mo tino kolā e filifili aka ke fai latou mo taugasoa o te lalolagi. Ne tusi mai a te soko ko Iakopo: “E se iloa ne koutou i te tino e fai mo taugasoa o te lalolagi, ko te fili tenā o te Atua? Tela la, so se tino e manako a ia ke fai mo taugasoa o te lalolagi, ko fai foki ne ia a ia eiloa ke fai mo fili o te Atua.” (Iakopo 4:⁠4) E mafai o fakamaoni aka te ‵tou a‵lofa ki te Atua mai i te tali‵tonu me ka fesoasoani mai a Ia ke fa‵ki tatou i te galo atu o se taugasoa māfai e a‵lofa fakamaoni tatou ki a Ia. (Faitau te Salamo 18:25.) Ne toe fai mai ne te tuagane telā ne taku atu muamua ana lagonaga e uiga ki te mea ne tupu: “Ne iloa aka ne au me e se mafai ne tatou o fai se tino ke alofa ki a Ieova io me ke alofa mai ki a tatou. I te fakaotiga loa, a te mea tenā se filifiliga totino eiloa.” Kae ne a mea e mafai o fai ne tatou ke fakatumau aka ei a te va fakataugasoa ‵pili mo tino kolā e tumau i loto i te fakapotopotoga?

Te Fakatumauga o Taugasoa ‵Lei

17. E fai‵pati atu pefea a taugasoa ‵lei, te suā tino ki te suā tino?

¹⁷ A fesokotakiga ‵lei e fakatumau aka ei a te va fakataugasoa pili. I te taimi e faitau ei koe ki te tala i te Tusi Tapu e uiga ki a Luta mo Naomi, Tavita mo Ionatana, mo Paulo mo Timoteo, ka iloa aka ei ne koe me i taugasoa ‵tonu e mafai o fai‵pati ki so se mea i a lāua eiloa i se auala āva. Ne tusi mai a Paulo e uiga ki te auala e ‵tau ei o fesokotaki atu tatou ki nisi tino: “Ke isi se alofa i otou pati e fai sāle, ke faka‵kona foki ki te masima ke tumau tena aoga.” Ne fakasino tonu atu eiloa Paulo ki te auala e ‵tau ei o fai‵pati atu tatou “ki tino sē tali‵tonu,” kolā e se ko ‵tou taina Kelisiano. (Kolose 4:​5, 6) E mautinoa eiloa me e ‵tau o fakaasi atu te āva ki tino sē tali‵tonu māfai ko fai‵pati atu tatou ki a latou, tela la, e sili atu te manakogina ke fakaasi atu ne tatou a te āva ki ‵tou taugasoa i loto i te fakapotopotoga!

18, 19. E ‵tau o pefea ‵tou kilokiloga ki so se pati fakatonutonu e maua ne tatou mai i se taugasoa Kelisiano, kae se a te fakaakoakoga ne tuku mai ne toeaina i Efeso mō tatou?

¹⁸ E fakatāua ne taugasoa ‵lei a te kilokiloga a te suā tino, tela la, e ‵tau eiloa o fakafiafia kae ‵tonu a fesokotakiga i te va o lāua. Ne tusi mai a te tupu poto ko Solomona: “A sausau mo sinu manogi e fai ne ia koe ke fiafia, [“kae penā foki te gali o te va fakataugasoa ona ko pati fakatonutonu e maua mai i a ia,” Tusi Paia, Samoa].” (Faataoto 27:⁠9) E mata, e penā eiloa ou lagonaga ki so se pati fakatonutonu e maua ne koe mai i se taugasoa? (Faitau te Salamo 141:⁠5.) Kafai e fakaasi mai ne se taugasoa tena manavase e uiga ki se mea ko fai ne koe, ka pefea ou lagonaga e uiga ki ei? E mata, e kilo atu koe ki pati konā e pelā me se fakaasiga o te alofa atafai, io me ka kaitaua koe i ei?

¹⁹ Ne maua ne te apositolo ko Paulo se va fakataugasoa pili mo toeaina i te fakapotopotoga i Efeso. Kāti ne iloa ne ia a nisi tagata i te taimi ne kamata ei o fai latou mo tino tali‵tonu. I tena toe fakatasiga eiloa mo latou, ne tuku ‵tonu atu ne ia a nisi pati fakatonutonu. Ne ‵saga atu pefea latou ki ei? Ne seki kaitaua a taugasoa o Paulo. I lō te fai penā, ne fakatāua ne latou tena saga tonu atu ki a latou, kae ne ‵tagi foki latou i te manatu me ka se toe mafai o lavea ne latou a ia.​—⁠Galuega 20:​17, 29, 30, 36-​38.

20. Ne a mea ka fai ne se taugasoa alofa?

²⁰ E se talia fua ne taugasoa ‵lei a pati fakatonutonu ‵poto kae ne tuku atu foki ne latou. E tonu, e ‵tau o iloa ne tatou te taimi e ‵tau ei o “kilo ifo eiloa koe ki au galuega e ‵tau o fai.” (1 Tesalonia 4:​11) Kae e ‵tau foki o masaua ne tatou me e ‵tau mo tatou taki tokotasi o “avatu se tala o ia ki te Atua.” (Loma 14:12) Kae kafai e manakogina, ka fakamasaua atu eiloa se taugasoa alofa ki tena taugasoa e uiga ki tulaga o Ieova. (1 Kolinito 7:​39) E pelā mo te lavea ne koe se taugasoa taka ko kamata o fiafai ki se tino sē talitonu? Ona ko te mataku i te mea ma fakalogo‵mae atu ki tou taugasoa, e mata, ka taofi aka ne koe te faipati atu o te mea telā e manavase koe ki ei? Io me ne a au mea ka fai māfai e fakaseaoga ne tou taugasoa au pati fakatonutonu? Ka taumafai se taugasoa ‵lei o ‵sala atu ki se fesoasoani o tausi mamoe a‵lofa ke fesoasoani atu ki se taugasoa telā ko fanatu i se auala ‵se. E manakogina a te loto toa i te faiga o te mea tenā. Kae e seai ne fakamaseiga tumau e mafai o oko atu ki taugasoa kolā e fakavae ki te alofa ki a Ieova.

21. Ne a mea ka fai ne tatou i nisi taimi, kae kaia e tāua ei ke fakatumau ne tatou te malosi o ‵tou va fakataugasoa i te fakapotopotoga?

²¹ Faitau te Kolose 3:​13, 14. I nisi taimi, ka tuku atu ne tatou ki ‵tou taugasoa se pogai ke “se ma‵lie ei” latou ki a tatou, kae ka fai foki ne latou a mea io me e faipati atu a mea kolā e fai ei ke ita tatou. Ne tusi mai a Iakopo: “A tatou katoa e masani o fai mea ‵se.” (Iakopo 3:⁠2) Kae ko te mea telā e fakatumau aka ei te va fakataugasoa e se ko te uke o taimi e agasala ei se tino ki te suā tino kae ko te mafai o fakamagalo katoatoa atu a mea kolā e se ma‵lie tatou ki ei. Se mea tāua ke ati aka ne tatou a taugasoa ma‵losi mai i te fesokotaki atu faeloa i so se taimi mo te fakatau fakamagalo! Kafai e fakaasi atu ne tatou a te vaegā alofa penā, ka fai eiloa mo fai se mea “telā e fusi fakatasi ei ne ia a mea katoa ke ‵lei.”

Ka Tali Mai Pefea ne Koe?

• E mafai pefea o fai ne tatou a taugasoa ‵lei?

• Ko te taimi fea e ‵tau ei o fakagata aka se va fakataugasoa?

• Ne a mea e ‵tau o fai ke fakatumau ei a te malosi i te va fakataugasoa?

[Ata i te itulau e 27]

Se a te fakavae o te va fakataugasoa tumau o Luta mo Naomi?

[Ata i te itulau e 28]

E mata, e fakaasi atu faeloa ne koe te uiga talimalo?