E Fesili Mai ‵Tou Tino Fai‵tau . . .

E mata, e ‵tau o talitonu koe ki te Tolutasi ke fai ei koe mo fai se Kelisiano?

▪ E isi se tusi akoga i se akoga maluga, ko te World Religions in Denmark, telā ne ‵lomi i te 2007, e fakamatala mai i ei a Molimau a Ieova e pelā me se tamā lotu Kelisiano telā e tau‵tali fakapilipili atu ki te Tusi Tapu. A te ‵tonuga loa, a Molimau a Ieova ko te tolu o lotu Kelisiano lasi i Denmark.

Kae ne fakamasei malosi ne se faifeau i te Danish National Church a te fakaikuga a te tino tusitala ke aofia a Molimau i te tusi akoga tenei. Kaia? Ne fai mai a te faifeau, penei: “Ko oti ne fetaui au mo se faifeau telā e mafaufau me i [Molimau a Ieova] ne Kelisiano. E se talia ne latou te Tolutasi, telā ko te fatu eiloa o te lotu Kelisiano.”

Ne fai mai a te tino tusitala o te tusi, telā se tino sukesuke ki lotu ko Annika Hvithamar, me kafai ko fesili atu ki tino e uiga ki te pogai e mafau‵fau ei latou me i a latou ne Kelisiano, e faigata eiloa o tali mai latou ona ko te mea e tali‵tonu latou i te Atua se Tolutasi. E se gata i ei, e isi se vaega i te tusi akoga tenā, e fakaulutala penei “A Koe se Kelisiano?” e fai mai: “A te akoakoga e uiga ki te Tolutasi se fakalavelave faigata eiloa e tasi i akoakoga faka-Kelisiano.” E toe fai mai penei: “I taimi katoa konei, ko oko eiloa i te faigata ke fakamatala atu ki Kelisiano e seki a‵koga ‵lei a te pogai koi fai ei a te Atua Kelisiano mo fai se atua e tasi kae e se tokotolu.”

A mea kolā e akoako mai i te Tusi Tapu e uiga ki te Atua mo Iesu e manino kae faigofie. E se faigata ke malamalama i ei. E seai eiloa se pati “Tolutasi” io me ko te manatu tenā e maua i te Muna a te Atua. E fakaasi manino mai i te Tusi Tapu me i a Iesu Keliso ko te Uluaki a te Atua. (Kolose 1:15) E fakasino atu foki ki a Iesu e pelā me ko te “sokoga i te va o te Atua mo tino.” (1 Timoteo 2:5) E fai mai te Tusi Tapu e uiga ki te Tamana: “Ko te mea ke iloa ne latou me ko koe fua [ko Ieova] e tokotasi, ko te pule tafasili i te lalolagi kātoa.”​—Salamo 83:18.

E tali‵tonu a Molimau a Ieova me e tāua a te fakatuanaki ki a Iesu. (Ioane 3:16) Ona ko te pogai tenei, e fakatāua ne latou a te fakatonuga a Iesu: “Muna a te Tusi, ‘Tapuaki ki [a Ieova] tou Atua, me ko ia fua e tavini koe ki ei!’” (Mataio 4:10) E mautinoa eiloa me i te tino telā e taumafai o fakalogo ki fakatonuga a Iesu e mafai o taku e pelā me se Kelisiano.

[Ata i te itulau e 8]

“A te akoakoga e uiga ki te Tolutasi se fakalavelave faigata e tasi o akoakoga a Kelisiano”