E MATA, E ‵TAU O Fakamaoni Koe i Taimi Katoa?

E FAKAMAONI eiloa a tino katoa i nisi taimi; kāti e fakamaoni foki a tino e tokouke i te ukega o taimi. Kae e pefea te tokouke o tino e iloa ne koe me e taumafai malosi ke fakamaoni i taimi katoa?

I aso nei, ko salalau atu eiloa a te sē lava o te fakamaoni i vaega kese‵kese o te olaga. Kae e lauiloa eiloa a te kilokiloga a te Atua ki te fakamaoni. E pelā me se fakaakoakoga, e iloa ne te tokoukega o tino a te tulafono i Tulafono e Sefulu: “Sa kaisoa.” (Esoto 20:15) Kae e tali‵tonu a tino e tokouke me e fai ne fakanofonofoga i nisi taimi ke kai‵soa tatou io me ke se fakamaoni. Ke mafau‵fau nei tatou ki fakaakoakoga e tolu e uiga ki te kaisoa kolā e masani o fai pelā me se fakamasakoga.

E Mata, e Talia ke Kaisoa Ona ko te Mativa?

Ne fai mai se tagata Loma, penei: “A te mativa ko te fakavae o amioga sē ‵lei. E mafai o kaisoa se tino mativa. E mafai o lotoma‵lie ki ei a tino kolā e lavea ne latou. Se a te tulaga o Iesu e uiga ki te mea tenei? Ne alofa malosi a ia i ana faifaiga ki tino ma‵tiva. “Ne tupu ake ei tona loto alofa mō latou.” (Mataio 9:36) Kae ne seki talia eiloa ne ia​—mai lalo i so se fakanofonofoga​⁠ke kai‵soa a tino. Tela la, se a te mea e ‵tau o fai ne se tino mativa?

A te Atua e alofa eiloa ki tino kolā e taumafai tonu o faka‵logo ki a ia, kae ka fakamanuia ne ia olotou taumafaiga ke ‵sala atu ki olotou manakoga. (Salamo 37:25) E folafola mai te Tusi Tapu: “E se mafai ne te Aliki [ko Ieova] o tuku tiaki a tino amio ‵lei ke ‵mate fia‵kai, kae e taofi ne ia a tino amio ma‵sei ke se maua a mea kolā e ma‵nako ki ei.” (Faataoto 10:⁠3) E mata, ka talitonu se tino mativa ki te folafolaga tenei? Ne talitonu katoatoa a Victorine ki te mea tenei.

E pelā me se fafine ko mate tena avaga fakatasi mo ana tama‵liki e tokolima kolā koi a‵koga, ne faigata ki a Victiorine a te mea tenā. E nofo atu a ia i te fenua telā e foliki fua te fesoasoani tupe e maua mai i te malo. E uke ‵ki a taimi e fakamāumāu ne ia i auala telā e uke a avanoaga i ei ke kaisoa. Kae ne seki tofotofo aka eiloa a Victorine ke kaisoa a ia. I lo te fai penā, e taumafai eiloa a ia ke maua a mea e manako malosi a ia ki ei i se auala fakamaoni e pelā me se tino telā e fakatau atu ana mea. Kaia e tumau ei a ia i te fakamaoni?

“Muamua la, e talitonu au me i te Atua e fakamaoni kae ka fakamaoni eiloa a ia i ana faifaiga ki a au māfai e fakaakoako atu au ki a ia. A ko te lua, e mafai o tauloto ne aku tama‵liki a te fakamaoni māfai fua e lavea ne latou me e fakamaoni foki au.”

Ne manumalo pefea a ia i ei? “E maua ne matou a meakai, gatu mo te fale. Kae e isi eiloa ne taimi e akai ei au ki te fesoasoani mai oku taugasoa​—ke ‵togi aka ei a vailakau kolā e seki fakamoemoegina. E maua faeloa ne au a mea a manako au ki ei. Kaia? Me e iloa ne oku taugasoa me ne fakamatala atu ne au a toku tulaga mo te fakamaoni, kae e se taumafai ke maua ne au a mea e uke atu i lō a mea e manako au ki ei.

“Ko ‵tupu aka aku tama‵liki ke fai pelā me ne tino fakamaoni. Ne lavea fakamuli ne se tuakoi a nisi sene i luga i te motou taipola kae ne sili mai me e se mataku au i te mea ma puke ne aku tama‵liki. Ne faigata ke talitonu a ia i te taimi ne fai atu ei au me ka se fai eiloa ne aku tama‵liki a te mea tenā. E aunoa mo te iloa ne au, ne kamata o tofotofo ne ia latou. Ne tuku ne ia a tupe falani i te motou fale i te koga telā e faigofie ke maua ne tama‵liki i ei. I tena fokimaiga i te suā aso, ne poi eiloa a ia ke lavea atu me koi tuku mai eiloa a sene konā. A te mauaga o tama‵liki fakamaoni se fakamanuiaga lasi ‵ki eiloa i lō te mauaga o koloa e uke.”

“E Fai ne Tino Katoa te Mea Tenei”

Ko salalau valevale a te kaisoa i galuega. Tela la, ko mafau‵fau a nisi tino penei, “E fai ne tino katoa a te mea tenei, tela la, kaia e se fai foki ei ne au?” E ‵kese mai i ei, e fai mai te Tusi Tapu: “Sa tau‵tali i te tokoukega kolā e fai mea ‵se.” (Esoto 23:⁠2) Ne fakalogo eiloa a Victoire ki te fakamalosiga tenei. E mata, ne maua ne ia a ikuga ‵lei?

I te taimi ko 19 ei ana tausaga, ne maua ne Victoire se galuega i se koga telā e fakaola ei a lakau kolā e faite ki ei a sinu. Ne fatoa iloa aka ne ia me i fafine e toko 40 kolā ne ga‵lue i konā e fakaaoga ne latou a kete ke kaisoa ei a fuaga o lakau konā. I fakaotiga o vaiaso takitasi, ne ‵togi atu ne latou kae faka‵pau ki te peofuga mō te tolu ki te fa o aso. E fai mai a Victoire: “E tonu, ne fai ne tino katoa a te mea tenei. Ne fakamoe‵moe latou ke aofia foki au i ei, kae ne seki talia ne au, kae fai atu au me i te fakamaoni se vaega eiloa o toku olaga. Ne fakatauemu ne latou au, kae e fai mai me ka se maua ne au te avanoaga gali tenā.

“I se aso e tasi ne fakatoka ei ne matou a lakau, ne sae fakavave mai te menetia. Ne onoono a ia i kete a tino taki tokotasi katoa kae ne maua ne ia a fuaga i kete katoa konā kae ‵kese mai ei ko tena kete. Ne ‵tau o faka‵tea fakavave atu a latou konā io me ke ga‵lue i vaiaso e lua e aunoa mo se peofuga. I vaiaso e lua konā, ne tali‵tonu eiloa a fafine konā me i a au e seki takavale.”

“Ke Tausi a Mea e Maua ne Koe”

E pefea ou lagonaga māfai ko maua ne koe se mea tāua a se tino ne galo? Ki tino e tokouke, e mafau‵fau latou me se fakamanuiaga, kae e se mafau‵fau lele eiloa latou o fakafoki atu te mea tenā. E maua ne latou se kilokiloga “ke tausi a mea e maua ne koe.” E mafai o mafau‵fau a nisi tino me e se fakamasei atu ki a latou. Ka oti aka, ko mafau‵fau ei latou me ko se fakamoemoe eiloa te tino i a ia te mea me e toe mafai o maua mai. Kae e fai mai a nisi tino me e se i o latou te tiute ke ‵sala atu ki te tino i a ia te mea​—se galuega telā e mafai o aofia i ei a taumafaiga e uke.

E pefea te kilokiloga a te Atua ki te mea tenā? E fakaasi mai i te Teutelonome 22:1-3 me i te tino e maua ne ia se mea a se tino, e se ‵tau o tausi fua ne ia te mea tenā kae e ‵tau o tausi ne ia te mea tenā “ke oko ki te taimi e ‵sala mai ei te [tino] i a ia te kope, ko tuku atu ei ki a ia.” (The New English Bible) Kafai e se fakailoa atu ne te tino ne maua ne ia a te mea tenā, e taku eiloa a ia e pelā me se tino kaisoa. (Esoto 22:⁠9) E mata, e aoga te mea tenei i aso nei? Ne talitonu eiloa a Christine me e aoga eiloa te mea tenei.

A Christine se pule o te akoga. I se Aso Tolu e tasi ne maua ne ia tena peofuga i te masina. E pelā me se faifaiga masani a fenua e uke i Afelika ki te togala, ne ‵pelu ne ia ki se pepa kae faulu atu ki tena ato. Ne fakatu ne ia se pasikaiti e pelā me se taxi kae tele fakavave atu ki se fono. I tena okoatuga, ne ‵sala atu a ia ki sene i tena ato ke ‵togi atu ki te tino fakatele. I te pouliga, ne to ki lalo tena kofuga sene tenā ki te laukele e aunoa mo te iloa ne ia.

I nai minute mai tua ifo i ei, ne vau se tamaliki tagata e igoa ki a Blaise telā ko 19 ana tausaga, kae se tino fou ki te koga tenā. Ne fai ne ia se fakatokaga ke fetaui mo se taugasoa i te fakatasiga eiloa tenā ne kau ki ei a Christine. Ne maua ne ia a sene konā kae faulu atu ki tena taga. I te fakaotiga o te fono, ne fakailoa atu ne ia ki ana taugasoa me ne maua ne ia se mea i tua kae kafai e isi se mea a se tino e galo, ke telefoni atu ki a ia.

I te taimi ne oko atu ei a Christine ki te fale i te afiafi, ne poi eiloa a ia ke iloa atu me e galo tena peofuga i te masina. I se vaiaso mai tua, i te taimi ne fakaasi atu ne ia ki tena taugasoa ana sene kolā ne ‵galo, ne fai atu ne ia me e isi se tino i te fono tenā ne maua ne ia se mea. Ne telefoni atu a Christine ki a Blaise kae fakailoa atu ne ia tena aofaki sene ne galo. Ne fiafia malosi a ia i te taimi ne faka‵foki atu ei ne Blaise a tupe. Kae e a Blaise? Ne tausi ne ia a tupe mō se vaiaso, kae ne fai atu a ia, “E lasi ‵ki eiloa toku fiafia i te fakafokiga ne au a tupe i lō te tausi atu ki ei.”

Te Pogai e Taumafai ei Latou ke Fakamaoni i Taimi Katoa

A Victorine, Victoire, mo Blaise e ‵nofo i koga kese‵kese kae e se iloa ne te suā tino a te suā tino. Kae e isi se mea e ‵pau i ei a latou. A latou ne Molimau a Ieova, kolā e taofi ‵mau ki pati a te Tusi Tapu e uiga ki te fakamaoni. E fakatali‵tali latou ki te fakataunuga o te folafolaga a te Atua e uiga ki te lalolagi fou. “Ka ko te Atua ko oti ne folafola mai ne ia te lagi fou mo te lalolagi fou, e ‵nofo i ei a te amiotonu.” A tino katoa kolā ka ‵nofo i ei ka amio‵tonu​—kae fakamaoni.​—2 Petelu 3:⁠13.

E isi eiloa se fakamoemoega foliki o Victorine me ka momea aka te ‵lei o tena tulaga i mea tau tupe ki so se aofaki ke oko ki te taimi e ‵fuli ei ne te Atua a mea. E tiga eiloa te feitu tenā, e maumea a ia i te feitu faka-te-agaga, se mea telā e se mafai o ‵togi ki sene. E fakamaoni kae āva ana tama‵liki. I Aso Sa katoa e “‵fonu latou i te fia‵fia” māfai e sau‵tala latou ki olotou tuakoi e uiga ki te aga‵lei o te Atua kae fakamatala atu a te auala ka fakamalie ei ne ia “a latou kolā e ka‵laga atu ki a ia” kae ka puipui ne ia “a latou katoa kolā e a‵lofa ki a ia.”​—Salamo 145:7, 18, 20.

E seki leva, ne tiakina ne Victoire a tena galuega. Ko oti ne kamata tena pisinisi i a ia eiloa kae ‵togi atu a garri (se mea telā e māfua mai i te tapioka) i te maketi. Ne fia‵fia eiloa a tino o ‵togi ana mea ona ko tena fakamaoni. E tonu, e seki leva kae ne mafai ne ia o fakamu‵tana ifo ana taimi i te maketi kae fakamāumāu a taimi e uke ke faipati atu ki nisi tino e uiga ki te fakamoemoega ke ola i se lalolagi telā e saoloto mai i te sē fakamaoni. Ne avaga fakamuli a ia, kae ko tavini atu nei a ia mo tena avaga e pelā me ne tino talai tumau.

Ne ‵galo atu a tupe a Christine i mua o se Kingdom Hall o Molimau a Ieova. E se tokouke a tino e iloa ne Blaise i te fakatasiga, kae e iloa ‵lei ne ia me i a latou ko ana taina mo tuagane Kelisiano, kolā e taumafai ke fakamaoni i taimi katoa.

E mata, e tokofia a tino e iloa ne koe e taumafai malosi ke fakamaoni i taimi katoa? Ke fakaataata ne koe me e ‵kau fakatasi koe mo te toko 50,100, io me e toko 200 a tino kolā e fai penā. A te mea tenā se mea fakafiafia ki Molimau a Ieova i olotou Kingdom Halls. Kaia e se taumafai ei koe o fanatu ki konā ke fakamasani mo latou?

[Ata i te itulau e 21]

“A te mauaga o tamaliki fakamaoni e sili atu i te gali i lō te mauaga o kope e uke.”​—VICTORINE

[Ata i te itulau e 23]

E Mata, e Talia ne te Faataoto 6:30 a te Kaisoa?

E fai mai a te Faataoto 6:30: “A tino e se ita ki te tino telā e fano o kaisoa meakai manafai ko fiakai.” E mata, e talia ne te fakamatalaga tenei a te kaisoa? Ikai. E fakaasi mai i te mataupu kātoa me koi ‵losi atu ne te Atua ki te tino kaisoa mō tena mea ‵se. E fai mai a te fuaiupu telā e ‵soko mai: “Kae kafai e maua te tagata tenā, e ‵tau o ‵togi ne ia a mea ne puke ne ia e fakafitu taimi te uke, e ‵tau o tuku atu ne ia ana mea katoa.” (Faataoto 6:31) E tiga eiloa e se masei malosi a te tino kaisoa ona ko te fiakai e pelā mo te tino kaisoa ona ko te kaimanako io me ko te fia fakalogo‵mae atu ki te tino i a ia a mea, koi ‵tau eiloa mo te tino kaisoa tenā “o tuku atu,” io me toe ‵togi atu ana mea ne kaisoa. A latou kolā e ma‵nako ki te taliaga a te Atua e se ‵tau o fakasala latou i te kaisoa mai lalo i so se fakanofonofoga.