E Fesili Mai ‵Tou Tino Fai‵tau . . .

E mata, ka ‵fua mai faeloa ne te lalolagi a mea e lava kae ‵toe mō te tausiga o te ola?

▪ E mafai ne te ‵tou lalolagi gali o tuku mai a mea e aoga mō te tausiga o te ola i se auala fakaofoofogia. Kae ona ko te fanakaga o te aofaki o tino mo te uke o kope kolā ne fakaaoga fakavave, e mafai eiloa o mafaufau koe penei: ‘E mata, e mafai o tupu se mea telā e seki mafaufau koe me ka tupu? E mata, ka lava faeloa a mea‵kai mo mea e aoga ki te tausiga o te ola?

Mai te mafau‵fau ki te fesili tenei, e mafai o tali‵tonu tatou ki se folafolaga ne fai ne te Atua ki te kāiga o tino i tausaga e silia atu mo te 4,000 ko ‵teka: “Ka tumau faeloa i te lalolagi a aso e ‵toki ei lakau mo aso e ‵kati ei. Ka tumau foki te ‵moko mo te ‵vela, te ‵tau ‵vela mo te ‵tau ‵moko e pelā foki te ao mo te po.” (Kenese 8:22) Tela la, e pelā mo te mautinoa i a tatou me ka ‵kasa mai a te la i aso takitasi, e mafai foki o tali‵tonu tatou me ka tumau eiloa i te ‵fua mai ne te lalolagi a mea kolā e manakogina ke fakatumau ei te ola.

I se lipoti i te 2004 telā e fakaulutala penei “E Mata, e Mafai ne te Paneta Tenei o Fagai Tatou?” ne fai mai a Alex Kirby, se tino tusitala o mea i ‵tou tafa, penei: “E aumai eiloa ne te lalolagi a mea‵kai e lava mō tino katoa. Kae e avatu faeloa a mea‵kai ki koga ‵se io me ko tō ‵togi ‵mafa, io me ko se mafai o tausi mō se taimi leva. Tela la a taumafaiga ke lava a mea‵kai mō tino katoa e aofia fua i ei a faifaiga fakapolitiki i lō mea fakasaienitisi.” Kafai e tausi kae fakaaoga faka‵lei ne tatou a mea kolā e ‵fua mai i te lalolagi, e se ‵tau o isi se pogai e ma‵taku ei tatou ona ko te sē lava o mea‵kai. E pelā me se fakaakoakoga, i aso o te kau Isalaelu, ne tuku atu ne te Atua se fakatonuga manino e uiga ki te fakaaogaga faka‵lei o te laukele. E pelā mo te mea ne tusi i te Levitiko 25:4, ne fai atu a te Atua ki tino Isalaelu: “Ka ko te fitu o tausaga e ‵tau o seai eiloa ne galuega e fai ki te laukele . . . Sa ‵toki otou fatoaga.” E tiga eiloa e se ‵tau o galue ne latou a te fatoaga i te fitu o tausaga, ne tauto atu te Atua me ka fia‵fia a tino i te uke o mea ‵lei kae ke se manava‵se latou ki te sē lava.​—Levitiko 26:3-5.

Faitalia a nisi taumafaiga e fai i aso nei ke faka‵lei aka a fakamaseiga ki te lalolagi mo mea i ei, ne manva‵se a tino e tokouke me ko ‵to foliki kae talimuli a taumafaiga e fai ne tino. A te faka‵leiga tumau fua e tasi e maua i te Fakaasiga 11:18. E fai mai a te Tusi Tapu me ka “fakamasei [ne Ieova] latou kolā e fakamasei ne latou te lalolagi.” Ka se fakaseai fua ne Ieova a te faivalevale o te lalolagi mo ana mea kae e fakamautinoa mai foki me ka aumai ne ia a mea‵kai e uke mō tino katoa kolā e ‵nofo i ei. Ka fakagata atu katoa a fakamaseiga ne fai ki te fuafuaga a te Atua mo te fakaaogaga valevale o te lalolagi ona ko manakoga kaima‵nako. I te suā feitu, a tino kolā e ‵lago katoatoa atu ki te pulega a Ieova ka lavea tonu ne latou a te fakataunuga o pati i te Salamo 72:16: “Ke fakamaumea te fenua i saito; ko mauga foki ke ‵fonu i fuagalakau e pelā mo te uke o fuagalakau i Lepanona.”

Ona ko tena alofa mo tena poto telā e se mafai o gata, ko oti eiloa ne fuafua ne Ieova ke ‵nofo kae tausi faka‵lei atu a tino ki te lotou fale​—se lalolagi Palataiso. (Kenese 1:28) Mai lalo i tena pulega, ka tauloto a tino faka‵logo ki te auala e fakaaoga faka‵lei ei a mea o te natula, e aunoa mo te fakaaogaga valevale o te lalolagi. Ko oko eiloa i te ‵tou loto fakafetai mō se vaegā Tino telā ne tuku mai ne ia a mea mo te alofa, telā ka fakamalie ne ia a manakoga o so se mea ola i te lalolagi nei!​—Salamo 145:⁠16.

[Ata i te itulau e 32]

“A taumafaiga ke lava a mea‵kai mō tino katoa e aofia fua i ei a faifaiga fakapolitiki i lō mea fakasaienitisi”