Te Auala 1
Ke Alofa ki Tino, Kae e se ko Tupe mo Koloa
SE A TE MEA E AKOAKO MAI I TE TUSI TAPU? “Me i te manako ki tupe, ko te māfuaga tenā o mea ma‵sei katoa.”—1 Timoteo 6:10.
SE A TE MEA FAIGATA? E fakamalosi mai a tino fakasalalau ke mo a ma lotoma‵lie tatou ki mea ko maua ne tatou. E ma‵nako latou ke ga‵lue tatou i taimi katoa ke maua a tupe ko te mea ke mafai o fakamāumāu ki mea ‵fou, mea tai ‵lei, kae ‵lasi atu foki. A te tupe se mea faka‵se tino kae e mafai o fakavale‵vale tatou ki ei. Kae e fakailoa mai a te Tusi Tapu me i te tino telā e manako ke maumea a ia ka se mafai eiloa o lotomalie. Ne tusi mai a te Tupu ko Solomona: “Kafai koe se tino e manako ki tupe, e se mafai eiloa koe o malie; kafai koe e manako ke maukoloa koe, e se mafai o maua ne koe a mea katoa e manako koe ki ei.”—Failauga 5:10.
NE A AU MEA E MAFAI O FAI? Ke fakaakoako ki a Iesu kae fakamasani o alofa ki tino i lō mea faka-te-foitino. Ne loto fiafia a Iesu ke tuku atu ana mea katoa—ke oko ki tena ola—ona ko tena alofa ki tino. (Ioane 15:13) Ne fai mai a ia: “E sili atu te manuia [fiafia] o te tino telā e tuku atu fua ana mea i lō o te tino telā e talia ne ia.” (Galuega 20:35) Kafai e fakamasani tatou ke tuku atu ‵tou taimi mo kope ki nisi tino, ka penā foki olotou faiga ki a tatou. “Tuku atu fua otou mea,” ne fai mai a Iesu, “kae ka toe tuku atu foki ne tino a mea ki a koutou.” (Luka 6:38, Tusi Paia, Samoa) A latou kolā e kausaki atu ki tupe mo kope ka fai fua ne latou a latou ke logo‵mae. (1 Timoteo 6:9, 10) I te suā feitu la, e maua eiloa a te lotomalie mai i te alofa atu mo te alofagina.
Kaia e se iloilo aka ei ne koe me e mafai ne koe o fakafaigofie tou vaegā olaga? E mata, e mafai o fakamu‵tana ifo ne koe a te aofaki o ou kope io me ko mea e fia ‵togi ne koe? Kafai e fai ne koe, e mafai ei o iloa ne koe me ko fakaopoopo atu a nisi taimi mo te malosi mō mea kolā e sili atu i te tāua i te olaga—mai te fesoasoani atu ki tino kae tavini atu ki te Atua, telā ne tuku atu ne ia a mea katoa kolā ko maua ne koe.—Mataio 6:24; Galuega 17:28.
[Ata i te itulau e 4]
“Tuku atu fua a mea a koutou ki nisi tino, ka ko te Atua ka tuku atu ne ia a mea ki a koutou”