Te Manuia Tonu i te Lalolagi Fou a te Atua

NE FANO a Tavita,a se tagata avaga Kelisiano, ki te Iunaite Sitete o nofo i ei mo tena talitonu me ne fai eiloa ne ia te filifiliga tonu. E tiga eiloa tena se fiafia o tiakina tena avaga mo ana tama‵liki, ne talitonu a ia me ka ola ‵lei atu a latou katoa māfai e uke atu ana tupe. Telā ne talia ei ne ia te ‵kamiga mai ana kāiga i Niu Ioki kae ne maua fakavave i ei tena galuega ‵togi.

Ne ‵teka atu te fia o masina, kae ne kamata o matafitafi te loto talitonu o Tavita. Ne seki uke ana taimi e maua mō mea faka-te-agaga. I se taimi e tasi, toeitiiti kae galo katoatoa tena fakatuanaki ki te Atua. Ko te taimi fua ne tō atu ei a ia ki loto i se fakaosoosoga i mea tau amioga ne ‵pula aka ei ana mata ki te tulaga tonu ko tu a ia i ei. A te fakamuamua faeloa ne ia o kope faka-te-foitino ne takitaki malielie atu ei a ia keatea mai mea katoa kolā e tāua ‵tonu ki a ia. Ne ‵tau o fai ne ia ne ‵fuliga.

E pelā mo Tavita, e tokouke a tino i fenua ma‵tiva e olo atu o ‵nofo i nisi fenua i tausaga takitasi, mo te fakamoemoega ke faka‵lei aka olotou tulaga i mea tau tupe. Kae e tokouke e iku atu ki te mauaga o logo‵maega fakama‵taku i te feitu faka-te-agaga. E mafau‵fau a nisi tino penei, ‘E mata, e mafai o ‵sala atu se Kelisiano ki kope faka-te-foitino kae maukoloa foki i mua o te Atua?’ E fai mai a tino tusitala lauiloa mo faifeau me e mafai eiloa. Kae e pelā mo te mea ko oti ne iloa ne Tavita mo nisi tino aka, se mea faigata ke maua se mea e tasi e aunoa mo te galo atu o te isi mea.​—⁠Luka 18:⁠24.

A Tupe e se se Mea Masei

E tonu, a tupe ne mea ne faite ne tino. E pelā mo nisi mea kolā ne faite ne tino, a tupe e se ma‵sei. E tonu, a tupe e fakaaogā ke ‵togi ki ei a nisi mea. Telā la, kafai e fakaaogā i se auala ‵tau, ka maua mai i ei a mea aogā. E pelā mo te mea e fakaasi mai i te Tusi Tapu me i ‘te tupe e fai ne ia ke tokagamalie tou olaga,’ maise eiloa te puipuiga mai fakalavelave kolā e māfua mai i te mativa. (Failauga 7:12) E foliga mai ki nisi tino me i “tupe ko te auala fua e tasi tenā ke maua ei a mea katoa.”​—⁠Failauga 10:​19, New International Version.

E taku fakamasei ne te Tusi Tapu a te paie kae e fakamalosi ne ia te galue malosi. E ‵tau o tausi atu tatou ki ‵tou kāiga, kae kafai e isi ne tupe e toega, e mafai tatou o “fesoasoani ki tino ma‵tiva.” (Efeso 4:28; 1 Timoteo 5:⁠8) E se gata i ei, i lō te ‵teke atu ki ou manakoga totino, e fakamalosi mai te Tusi Tapu ke fakaaogā ne tatou mo te fiafia a ‵tou kope e maua. E fai mai ki a tatou ke “fakafiafia” kae fakaaogā a fua o ‵tou galuega. (Failauga 5:​18-20) E isi ne fakaakoakoga i te Tusi Tapu e uiga ki tāgata mo fāfine fakamaoni kolā ne mau‵mea.

Tāgata Fakamaoni Kolā ne Mau‵mea

Ne maua ne Apelaamo, se tavini fakamaoni a te Atua a lafu manu e uke, siliva mo aulo mo tavini kolā e lau i selau. (Kenese 12:5; 13:​2, 6, 7) Ne maumea malosi foki a te tagata fakamaoni ko Iopu​—⁠i ana manu, tavini, aulo mo siliva. (Iopu 1:3; 42:​11, 12) A tāgata konei ne tāgata mau‵mea māfai e faka‵pau ki tulaga i aso nei, kae ne mau‵mea foki latou i mua o te Atua.

Ne taku ne te apositolo ko Paulo a Apelaamo e pelā me ko te “tamana o tino fakatuanaki.” Ne seki kaiu io me ne fakatāua malosi ne Apelaamo ana kope. (Loma 4:11; Kenese 13:9; 18:​1-8) E penā foki a Iopu, ne taku ne te Atua a ia e pelā me se tino “‵lei mo te fakatuanaki.” (Iopu 1:⁠8) Ne toka faeloa a ia o fesoasoani ki tino ma‵tiva kae loto māfatia. (Iopu 29:​12-16) Ne tali‵tonu katoatoa a Apelaamo mo Iopu ki te Atua i lō lā koloa.​—⁠Kenese 14:​22-​24; Iopu 1:​21, 22; Loma 4:​9-​12.

A te suā fakaakoakoga ‵lei ko te tupu ko Solomona. E pelā me ko te sui ki te nofogaaliki o te Atua i Ielusalema, ne fakamanuiagina a Solomona e se gata fua ki te poto mai te Atua kae e penā foki loa mo koloa e uke mo te ‵malu lasi. (1 Tupu 3:​4-14) Ne fakamaoni a ia i te lasiga o tena olaga kātoa. Kae i tausaga fakamuli ifo ne ‘seki tumau a Solomona i te fakamaoni ki a Ieova.’ (1 Tupu 11:​1-8) E tonu, e fakaasi mai i tena tala fakafanoanoa a nisi matasele masani o te maukoloa. Ke mafau‵fau ki nāi mea konā.

Matasele o te Maumea

A te toe mea fakamataku ko te fakavalevale ki tupe mo mea kolā e mafai o ‵togi ki ei. E fakamalosi aka ne te maumea se manakoga telā e se mafai o gata i nisi tino. I te kamataga o tena pulega, ne lavea ne Solomona te uiga tenei i nisi tino. Ne tusi mai a ia: “Kafai koe se tino e manako ki tupe, e se mafai eiloa koe o malie; kafai koe e manako ke maukoloa koe, e se mafai o maua ne koe a mea katoa e manako koe ki ei. E seai eiloa se aogā.” (Failauga 5:10) Ne polopoloki mai a Iesu mo Paulo ki Kelisiano e uiga ki te fia maumea faka‵se tino tenei.​—⁠Maleko 4:​18, 19; 2 Timoteo 3:⁠2.

Kafai ko fakamuamua ne tatou te fiafai tupe i lō tena faiga fua mo fai se mea e fakataunu ei se galuega, ko faigofie ei o ‵to atu tatou ki fakaosoosoga katoa i mea tau amioga, e aofia i ei te ‵pelo, kaisoa mo te amio faitogafiti. Ne fakalata ne Iuta te Isikaliota, se apositolo e tokotasi a Keliso, a tena matai ki tupe siliva e 30. (Maleko 14:11; Ioane 12:⁠6) Kafai ko tō lasi te fiafai ki tupe, ko tapuaki atu ei a nisi tino ki tupe i lō te Atua. (1 Timoteo 6:10) Telā la, e ‵tau o fakamaoni faeloa a Kelisiano e uiga ki olotou lagonaga ‵tonu i te ‵sala atu ki tupe.​—⁠Epelu 13:⁠5.

A te fia maukoloa e māfua mai foki i ei a mea fakama‵taku kolā e faigata o lavea. Muamua la, a te mauaga o koloa e uke e fakamalosi aka ei te loto talitonu o te tino ki a ia eiloa. Ne aofia ne Iesu a te mea tenei i te taimi ne fakasino atu ei ki “te malosi faka‵se tino o koloa.” (Mataio 13:​22, NW) Ne polopoloki mai foki a Iakopo, se tino e tokotasi ne tusi ne ia te Tusi Tapu, ki Kelisiano ke se puli i a latou a te Atua māfai e fai olotou fakatokaga tau pisinisi. (Iakopo 4:​13-16) Ona ko te mea e tuku mai ne tupe ki a tatou se saolotoga foliki, e maua faeloa ne tino kolā e uke olotou tupe a te tulaga fakamataku ko te tali‵tonu katoatoa ki ei i lō te Atua.​—⁠Faataoto 30:​7-9; Galuega 8:​18-​24.

A te lua o mea, e pelā mo te mea ne iloa ne Tavita, e uke a taimi mo te malosi o te tino e fakamāumau ki te ‵salaga o tupe kae ko takitaki malielie atu ei keatea mai te faiga o mea faka-te-agaga. (Luka 12:​13-21) E fe‵paki foki a tino mau‵mea mo te fakaosoosoga ke fakaaogā olotou tupe mo fai olotou fakafiafiaga totino.

E mata, a te pakūga o Solomona i te feitu faka-te-agaga ne pogai mai i te taliaga ne ia o koloa ke faka‵numi atu ki tena mafaufau? (Luka 21:34) Ne iloa ne ia te tulafono a te Atua ke se avaga ki tino mai fenua fakaa‵tea. Kae ne fakamaopoopo mai ne ia a fāfine e nofo pelā ki se toko afe mo fai ana avaga. (Teutelonome 7:⁠3) Ona ko te fia fakafiafia atu ki ana avaga mai fenua fakaa‵tea, ne taumafai ei a ia o palutaki te tapuakiga mō latou. E pelā mo te mea ne fakaasi muamua atu, ne fano malielie ei o ‵mao a te loto o Solomona mai i a Ieova.

E fakaasi faka‵lei mai i fakaakoakoga konei a te ‵tonu o te fakatakitakiga a Iesu: “E se mafai ne koutou o tavini ki te Atua mo koloa.” (Mataio 6:24) E mafai la pefea o fakafesagai atu se Kelisiano ki fakalavelave i mea tau tupe kolā ko fe‵paki mo te tokoukega o tino i aso nei? Kae e sili atu i ei, e mata, e isi se fakamoemoega mō se olaga ‵lei atu i aso mai mua?

Te Manuia Tonu i Aso Mai Mua

E se pelā mo Apelaamo mo Iopu mo te fenua ko Isalaelu, e maua ne soko o Iesu te fakatonuga ke “olo atu ki fenua katoa ke fai a tino i ei mo . . . soko.” (Mataio 28:​19, 20) Ke fakataunu te fakatonuga tenā, e manakogina a taimi mo taumafaiga kolā e mafai o fakaaogā ki galuega ‵togi. Telā la, a te kī ki te mauaga o te manuia ko te fakalogo ki mea kolā ne fai mai a Iesu ke fai: ‘Ke mua koutou o ‵sala te Malo o te Atua mo tena amiotonu; kae ka fakaopoopogina atu a mea katoa konā ki a koutou.’​—⁠Mataio 6:⁠33.

I te taimi ko pili ei o tiaki ne Tavita tena kāiga mo tena tulaga faka-te-agaga, ne toe fai ei ne ia tena olaga ke ‵lei. E pelā mo te folafolaga a Iesu, i te taimi ne toe fakamuamua ei ne Tavita a sukesukega ki te Tusi Tapu, ‵talo mo te galuega talai, ne fakaopoopo mai ei a nisi mea ‵lei katoa ki tena olaga. Ne toe mafai ei o faka‵lei aka tena fesokotakiga mo tena avaga mo ana tama‵liki. Ne toe maua foki ne ia te fiafia mo te lotomalie. Koi galue malosi eiloa a ia. Ne seki ‵fuli tena olaga mai te mativa ki se olaga maumea. Kae mai i tena logo‵mae, ne tauloto ei ne ia a nisi akoakoga tāua.

Ne toe mafaufau a Tavita e uiga ki tena filifiliga ke fanatu ki te Iunaite Sitete, kae fakaiku aka ne ia ke se toe talia eiloa ne ia a tupe ke pule atu ki ana fakaikuga. Nei la, ko iloa ne ia a toe mea tāua eiloa i te olaga​—⁠ko te kāiga e fakatau a‵lofa, taugasoa ‵lei, mo se fesokotakiga ‵lei mo te Atua​—⁠kolā e se mafai o ‵togi ki tupe. (Faataoto 17:17; 24:27; Isaia 55:​1, 2) E tonu, e sili atu te tāua o te fakamaoni i te faiga o amioga ‵lei i lō koloa faka-te-foitino. (Faataoto 19:1; 22:⁠1) Fakatasi mo tena kāiga, ne fakaiku aka ne Tavita ke fakamuamua ne latou a mea kolā e ‵tau o fakamuamua.​—⁠Filipi 1:10.

Ne malaia faeloa a taumafaiga a tāgata ke ati aka se fenua telā e maumea kae ‵lei foki i mea tau amioga. Kae, ko oti ne folafola mai te Atua me ka tuku mai ne tena Malo a mea faka-te-foitino mo mea faka-te-agaga katoa kolā e ‵tau o maua ke ola ei tatou i se olaga fiafia. (Salamo 72:16; Isaia 65:​21-23) Ne akoako mai Iesu me e maua te manuia tonu mai te fakamuamua ne tatou a ‵tou manakoga faka-te-agaga. (Mataio 5:⁠3) Telā la, faitalia me mau‵mea tatou i te feitu faka-te-foitino io me ma‵tiva tatou, a te fakamuamua faeloa ne tatou o mea faka-te-agaga i te taimi nei ko te toe auala ‵lei ke fakatoka ei tatou mō te lalolagi fou a te Atua telā ko pili o oko mai. (1 Timoteo 6:​17-19) A te lalolagi tenā ka fai eiloa mo fai se lalolagi maumea tonu i te feitu faka-te-foitino mo te feitu faka-te-agaga.

[Fakamatalaga mai lalo]

[Ata i te itulau e 5]

Ne talitonu katoatoa a Iopu ki te Atua, kae e se ki ana koloa

[Ata i te itulau e 7]

E se mafai o ‵togi ne tatou a toe mea tāua i te olaga ki tupe