E Fesili Mai ‵Tou Kau Fai‵tau . . .

Kaia ne fakaaoga ei ne Satani se gata ke faipati atu ki a Eva?

▪ Kāti e mafai o lotomalie koe me e pelā mo te mea ne fakamatala mai i te itulau e 8, a Satani ko te malosi mai tua o te gata telā ne faipati atu ki a Eva. E akoako mai eiloa ne te Tusi Tapu a te mea tenei. Kae kāti ko mafaufau koe, penei, ‘Kaia la ne faipati atu ei se agelu malosi e auala i se gata?’

E faka‵kese ne te Tusi Tapu a auala o Satani e pelā me ne “auala ma‵sei,” io me ko “auala faitogafiti,” kae e fesoasoani mai a te fakalavelave tenei ke fakamaoni mai i ei a te manatu tenā. (Efeso 6:​11) A te mea telā e lavea ne tatou i Etena e sē se tala ‵kai fua e uiga ki se manu e faipati; kae se fakaakoakoga fakamataku o amioga faitogafiti ke ‵futi keatea a tino mai i te Atua. I se auala pefea?

Ne filifili faka‵lei eiloa ne Satani tena togafiti. A Eva ko te ‵toe mea faite foliki eiloa i te iunivesi. A te fakaaogaga faka‵lei o te sē lava o te atamai o Eva, ne fakatoka ei tou tagata ke fakatogafiti kae faka‵se ne ia tou fafine. Mai i te ‵muni mai tua o se gata, telā se manu fakamataku, ne ‵funa eiloa mo te poto ne Satani a tena loto toa mo ana fakamoemoega mautinoa. (Kenese 3:1) Mafaufau foki ki te mea ne fakataunu ne ia e auala i te fakafoliga atu o se gata e faipati, e pelā mo te fakafoliga atu o se pepe faite e faipati.

Muamua la, ne magoi ‵ki eiloa te taumafaiga a Satani ke fia saga atu ki ei a Eva kae ke tumau foki i ei. Ne iloa ne tou fafine me e se fai‵pati a gata; ne fakaigoa foki ne tena avaga a manu katoa, e aofia i ei a te manu tenei, kāti mai tua o te iloiloga faka‵lei ne ia. (Kenese 2:​19) E seai se fakalotolotolua me ko oti foki ne matea ne Eva a te manu fakamataku tenei. Tela la, ne fai ne te togafiti a Satani ke momea aka te fia logo o Eva; ne fai ei tou fafine ke saga tonu atu ki se mea fua e tasi mai i mea katoa i te fatoaga telā ne fakatapu a ia i ei. A te lua o mea, kafai ne faka‵tali a te gata i se vaega o te lakau telā ne fakatapu, se a te fakaikuga e mafai o fai ne Eva? E mata, ka mafaufau tou fafine me i te mea faite kae fatauva tenā e se iloa o faipati kae i te otiga ne kai ki te fuaga tenā ko te mea loa ko mafai o faipati? Kafai ne uke a mea ‵lei ne mafai o fai ne te fuaga ki se gata, kae e pefea la tou fafine? E se mafai o iloa tonu ne tatou a mafaufauga o Eva io me ko oti ne kai a te gata ki te fuaga io me ikai, kae e iloa ne tatou me i te taimi ne fai atu ei a te gata ki a Eva me ka fai ne te fuaga a ia ke “‵pau mo te Atua,” ne toka eiloa tou fafine ke talitonu ki ei.

E uke foki a mea e lavea atu i te filifiliga ne Satani o ana pati. Ne ‵toki ne ia a manatu fakalotolotolua i te mafaufau o Eva, mai i te fai atu me ne taofi aka ne te Atua se mea ‵lei mai i tou fafine kae e fakatapula eiloa ne ia tena saolotoga e aunoa mo se pogai ‵tau. A te manuia o te togafiti a Satani ne faka‵na eiloa ki te avanoaga me e sili atu a manakoga kaimanako o Eva i lō tena alofa ki te Atua telā ne tuku atu ne ia a mea katoa ne maua ne ia. (Kenese 3:​4, 5) Se mea fakafanoanoa me ne galue eiloa te togafiti a Satani; ne seki ati aka eiloa ne Eva mo Atamu i lā loto a te vaegā alofa mo te loto fakafetai telā ne ‵tau o maua ne lāua ki a Ieova. E mata, e seki fakamalosi aka foki ne Satani a te vaegā uiga kaimanako penā kae fai atu a fakamasakoga e uiga ki ei i aso nei?

Kae e a lagonaga o Satani? Se a te mea ne taumafai a ia ki ei? I Etena, ne taumafai a ia ke ‵funa aka ana foliga mo ana lagonaga. Kae fakamuli ifo, ne fakaasi atu ei ne ia a ia eiloa. I te taimi ne tofotofo ei ne ia a Iesu, ne iloa ‵lei ne tou tagata me e se aoga eiloa ke ‵funa aka ana foliga ‵tonu. Tela la, ne fakamalosi ‵tonu atu a ia ki a Iesu: “Totuli ifo o tapuaki mai ki a au.” (Mataio 4:9) E manino ‵lei i ei, me ko leva ne loto masei a Satani ki te tapuakiga telā e tuku atu ki a Ieova te Atua. Ka fai eiloa ne ia so se mea ke taofi aka ei a nisi tino mai i te tapuaki atu ki te Atua i te auala telā e talia ne ia. E fiafia a ia o fai a tatou ke se fakamaoni ki te Atua.

E manino ‵lei i ei me e fakaasi mai i te Tusi Tapu me i a Satani se tino faitogafiti i ana taumafaiga o fakamasei a tino kolā e manako a ia ki ei. Se mea fakafiafia, me e se ‵tau o fakavale‵vale tatou e pelā mo Eva, me “e maina ‵lei [tatou] i ana fuafuaga.”​—2 Kolinito 2:​11.