Se Valoaga Tafasili i te Tāua
“A te Tala ‵Lei tenei e uiga ki te Malo, e fakamatala atu ki te lalolagi kātoa, mo fai te molimau ki tino katoa; ko oko mai ei te gataga.”—MATAIO 24:14.
E FAI mai a tino ‵poto me i te fuaiupu tenā, e tafasili i te tāua. E tāua ‵ki me i te galuega telā e fakamatala i ei e ‵tau o fai i te lalolagi kātoa. Kae e aoga te mea tenei me e fakasino atu ki mea e ‵tau o fai ne Kelisiano— se galuega talai telā e fai muamua a koi tuai o oko mai te taimi telā ne taku ne Iesu ko “te gataga.”
A te fuaiupu fakavaloaga tenā ko oti ne fakataunu i aso nei. E aofia koe i ei me i te tala ‵lei tenei e aofia i ei se ‵kamiga mo se fakailoaga ke fakaeteete. E tuku atu i ei ki a koe se filifiliga. Ke talia te Malo o te Atua io me ‵teke atu ki ei. A te filifiliga telā e fai ne koe e pokotia i ei tou olaga.
Mafaufau ki te mataupu saukātoa. I nāi aso mai mua o ‵tuki a Iesu i te lakau, ne olo atu a soko ki a ia kae fesili atu ki a ia e uiga ki aso mai mua. Ne fia‵fia ke iloa ne latou a mea e uiga ki te fakatuakaga o te Malo o te Atua, telā ne faipati faeloa ki ei a Iesu. Ne fia iloa foki ne latou a mea e uiga ki te “gataga o te lalolagi,” io me e pelā mo nisi ‵fuliga, ko te “fakaotiotiga o te lalolagi.”—Mataio 24:3, American Standard Version; King James Version.
I tena tali, ne ‵valo mai ne Iesu me ka ‵tupu a taua, oge mea‵kai, masaki, mo mafuie ‵lasi. Ne ‵toe fai mai foki a ia me ka gasolo aka o uke a amioga ma‵sei a tino, ka takitaki ne faiakoga o lotu ‵se a tino e tokouke, kae ka takalia‵lia kae fakasauagina a Kelisiano ‵tonu. A mea katoa konei ne tala ma‵sei. —Mataio 24:4-13; Luka 21:11.
Kae ne isi se tala ‵lei. Ne faipati foki ne Iesu a pati kolā e siki mai luga, ko pati kolā ne ofo kae fakamalosi ne ia a tino i te fia o senitenali. E tiga eiloa e lotoma‵lie a tino e uiga ki te tāua o pati a Iesu, e se lotoma‵lie latou ki te uiga o pati konā. Se a la te tala ‵lei tenā? Se a te Malo? E fakataunu māfea te valoaga tenei kae ko oi ka fakataunu ne ia? Kae se a “te gataga”? Ke onoono aka tatou ki ei.
[Ata i te itulau e 2, 3]
Facsimile of the Washington Manuscript of Four Gospels. Matthew 24:14 is highlighted
[Credit line]
From the book Facsimile of the Washington Manuscript of the Four Gospels in the Freer Collection 1912