“Tumau Koutou i Aku Muna”
“Kafai e tumau koutou i aku muna, ko oku soko ‵tonu koutou, kae ka iloa ne koutou te munatonu, a ko te munatonu ka fakasaoloto ne ia koutou.”—IOANE 8:31, 32.
Te Mea e Fakauiga ki ei: A “muna” a Iesu e fakauiga loa ki ana akoakoga, kolā ne maua mai i se māfuaga e maluga atu. “Ko te Tamana eiloa telā ne uga mai ne ia au ne tuku mai ne ia te fakatonuga ki a au ki mea kolā e ‵tau o fakailoa atu kae faipati au ki ei,” ko pati a Iesu. (Ioane 12:49) I tena ‵talo ki tena Tamana faka-te-lagi, ko Ieova, muna a Iesu: “A tau muna ko te munatonu.” Ne siki mai faeloa ne ia te Muna a te Atua ke ‵lago atu ki ana akoakoga. (Ioane 17:17; Mataio 4:4, 7, 10) Tela la, a Kelisiano ‵tonu, e ‘tumau i ana muna’—me talia ne latou te Muna a te Atua, ko te Tusi Tapu, e pelā mo ko te “munatonu” kae ko te mea fua e tasi telā e fakavae ki ei olotou talitonuga mo faifaiga.
Te Auala ne Fakafetaui Aka ei a Uiga o Kelisiano Mua: Ne ‵lago atu a te apositolo ko Paulo ki te āva o Iesu ki te Muna a te Atua. Ne tusi mai tou tagata: “A Tusitusiga Tapu katoa ne māfua mai i te Atua, kae e aoga.” (2 Timoteo 3:16) A tāgata kolā e ‵tofi aka ke akoako atu ki taina Kelisiano e ‵tau eiloa o “taofi ‵mau ki te ‵tonu mo te fakatuagagina o te Muna a te Atua.” (Tito 1:7, 9, The Amplified Bible) Ne fakatonu atu ki Kelisiano mua ke ‵teke atu ki “poto mo takolekolega mo munatuku a tino e ‵tusa mo tuu mo aganuu, mo poto fakavae o te lalolagi kae e se fakavae ki a Keliso.”—Kolose 2:8.
Ko oi la e Fetaui ‵Lei mo Mea Konā i Aso Nei?: E fai mai a te Catechism of the Catholic Church: “E se maua mai fua i Tusitusiga ‵malu a te talitonu o te Lotu Katolika ki mea katoa kolā ko oti ne fakaasi mai. Tela la, e ‵tau eiloa o talia kae fakatāua a tuu mo Tusitusiga ‵malu fakatasi mo se lagonaga alofa fakamaoni.” Ne siki mai ne se mataupu i loto i te mekesini o te Macklean‵s a pati a se faifeau i Toronto, i Kanata, telā ne fesili mai penei: “Kaia e manakogina ei ne tatou se fakatakitakiga mai te lua afe tausaga ko ‵teka ke takitaki ei tatou? E isi ne ‵tou manatu ‵gali ‵ki kolā e olo faeloa o vāivāi māfai e tuku tasi mo akoakoga a Iesu mo te Tusi Tapu.”
E uiga ki Molimau a Ieova, e fai mai a te New Catholic Encyclopedia: “E fai ne latou a te Tusi Tapu e pelā me ko te mea fua e tasi telā e fakavae ki ei te lotou talitonuga mo tulafono i mea tau amioga.” Fakamuli nei, ne fakalavelave atu se tagata i Kanata ki se tokotasi o Molimau a Ieova i te taimi ne taumafai ei tou fafine o fakaasi atu me ko oi a ia. Muna a tou tagata, “E iloa ne au a koe e auala i tou sainaga,” kae ‵tusi atu tena lima ki te Tusi Tapu a tou fafine.