E Tonu i Mea Fakasaienisi

“Ko oti ne tusi ne au mō koe . . . , ne manatu fakatonutonu [kolā] e tau o tauloto ne koe. Ka fakaasi atu foki ki a koe a te uiga tonu o te muna tonu . . . , kae ka foki mai eiloa koe mo te tali telā e tonu kātoatoa.”—FAATAOTO 22:20, 21.

E ‵KESE PEFEA TE TUSI TAPU? E masani o tuku mai i tusi mua a manatu fakama‵taku kae sē fakatuagagina kolā ko oti ne fakatalitonu kātoatoa ne mea fakasaienisi i aso nei me e se ‵tonu. E penā foki i aso nei, e ‵tau mo tino tusitala o fakatonutonu aka a tusi ko te mea ke fetaui mo mea ‵fou kolā e maua aka. Kae ko te Tusi Tapu ne tusi eiloa ne te Māfuaga, tela la, a tena Muna e “tumau ki te se-gata-mai.”—1 Petelu 1:25.

SE FAKAAKOAKOGA: Ne fakatonu atu te Tulafono a Mose ki te kau Isalaelu ke tanu a fekau i se lua ‘i tua o te koga e ‵nofo ei latou.’ (Teutelonome 23:12, 13) Kafai e pa‵tele latou ki te foitino mate o se manu io me se tino, e ‵tau o ‵fulu a foitino o te kau Isalaelu ki vai. (Levitiko 11:27, 28; Numela 19:14-16) Ne fakatapu a lepela i taimi konā ke mo a e fakapili‵pili ki tino ke oko loa ki te taimi e fakapa‵tonu mai ei me ko ‵ma latou.—Levitiko 13:1-8.

MEA KOLĀ E FAKAASI MAI NE VAILAKAU I ASO NEI: A te tanu faka‵leiga o fekau, ‵fulu a lima, mo te fakama‵vae o tino ma‵saki, ko auala tumau e aoga ke taua atu ki masaki. Kafai e seai ne fale fo‵liki io me ne isi mea aka e mafai o fakaaoga, e fai mai a te U.S. Centers for Disease Control and Prevention (CDC): “Ke olo a tino ki olotou tinae i se 30 mita [100 futu] te ‵mao mai so se vai kae tanu faka‵lei a fekau.” Kafai e tanu faka‵lei ne tino a fekau, e fakafoliki ne latou a te masaki ‵sana ki se 36 pasene, e ‵tusa mo fakaasiga a te World Health Organization. E se silia mo te 200 tausaga ko ‵teka, ne maua aka ne tokitā me ne pokotia a tino ma‵saki e tokouke i a latou māfai e se ‵fulu olotou lima ma oti ne ga‵lue latou ki se foitino mate. Koi taku eiloa ne te CDC a te ‵fuluga o lima ki “te ‵toe auala aoga eiloa e tasi ke puipui ei a te ‵pisi o te masaki.” Kae e a te fakatapūga o lepela io me ko latou kolā e isi aka foki ne olotou masaki? Fakamuli fua nei, ne fai mai te Saudi Medical Journal: “I te kamatamataga o se famai, kāti a te ‵vae kea‵tea mo te fakataputapuga ko te togafiti fua e tasi ke puipui faka‵lei ei a tino mai masaki ‵pisi.”

SE A TAU FAKA‵TAU? E mata, e fakamoemoe koe me isi aka foki se tusi tapu mua e fetaui ‵lei mo mea fakasaienisi i aso nei? Io me tu ‵kese eiloa te Tusi Tapu?

[Ata i te itulau e 6]

“E fakaofoofogia māfai e fai‵tau tatou e uiga ki te tausiga o te ‵tu ‵ma i te vaitaimi o Mose.”—MANUAL OF TROPICAL MEDICINE, BY DRS. ALDO CASTELLANI AND ALBERT J. CHALMERS