Se Tusi E Fetaui ‵Lei A Manatu I Ei

“Me ne seki tuku mai a valoaga i so se taimi i te loto eiloa o te tagata, kae ne fai‵pati mai a tāgata mai te Atua e auala i te takitakiga a te agaga tapu.”—2 PETELU 1:21.

E ‵KESE PEFEA TE TUSI TAPU? E masani sāle o fe‵paki a mea kolā ne tusi i taimi mua, faitalia me ne tusi eiloa i te taimi e tasi. E faigata eiloa o fetaui ‵lei a mea i loto i tusi kolā ne tusi ne tāgata kese‵kese, i koga kese‵kese, mo taimi kese‵kese. E ui i ei, e fai mai te Tusi Tapu me i tusi katoa e 66 i ei ne tusi eiloa ne te Tino Tusitala e tokotasi—e tuku mai i ei se fekau telā e ‵soko tasi kae fetaui ‵lei.—2 Timoteo 3:16.

SE FAKAAKOAKOGA: A Mose, se tausi mamoe i te 16  senitenali T.L.M., ne tusi ne ia te tusi muamua i te Tusi Tapu me ka vau se “fanau” o faka‵sao a tino. Ne folafola fakamuli mai i te tusi tenei me i te fanau ne tupu mai i a Apelaamo, Isaako, mo Iakopo. (Kenese 3:15; 22:17, 18; 26:24; 28:14) E nofo ki te 500 tausaga fakamuli ifo, ne fakaasi mai ne te pelofeta ko Natano me i te fanau ka vau i te laina tupu o Tavita. (2 Samuelu 7:12) I se afe tausaga mai tua ifo i ei, ne fakamatala mai ne te apositolo ko Paulo me i te fanau, ka aofia i ei a Iesu mo se potukau o ana soko filifilia. (Loma 1:1-4; Kalatia 3:16, 29) I te fakaotiga o te senitenali muamua T.A., ne ‵valo mai i te ‵toe tusi o te Tusi Tapu me ka molimau atu a sui o te fanau e uiga ki a Iesu i te lalolagi, toe faka‵tu aka ki te lagi, kae pule fakatasi mo tou tagata i te 1,000 tausaga. Ka tukipala ne te fanau tenei a te Tiapolo kae faka‵sao ne ia a tino.—Fakaasiga 12:17; 20:6-10.

KO PATI A TINO FAI MANATU KI TE TUSI TAPU: I te otiga ne fai se iloiloga māea ki tusi e 66 o te Tusi Tapu, ne tusi mai a Louis Gaussen me ne ofo masei a ia i “te fetaui ‵lei o te tusi tenei, ne tusi i se afe limaselau tausaga ne tino tusitala e tokouke, . . . kolā ne kausaki atu ki te fakamoemoega fua e tasi kae tumau i te ga‵lue ki ei, faitalia me e se malama‵lama kātoatoa latou i te tala fakasolopito o te fakamagaloga o te lalolagi e auala i te Tama a te Atua.”—Theopneusty—The Plenary Inspiration of the Holy Scriptures.

SE A TAU FAKA‵TAU? E mata, e fakamoemoe koe me e isi se tusi ne tusi i se leva e silia atu i te 1,500 tausaga ne tāgata kese‵kese e toko fasefulu e fetaui ‵lei a mea i ei? Io me tu ‵kese eiloa te Tusi Tapu?

[Ata i te itulau e 7]

“Kafai e tuku fakatasi a tusitusiga konei, ka maua mai i ei se tusi e tasi . . . E seai eiloa se tusi e faka‵pau ki ei i tusi katoa o te lalolagi.”—THE PROBLEM OF THE OLD TESTAMENT, BY JAMES ORR