Ke Loto Malosi I A Ieova E Fakatasi Atu Ki A Koe!

1, 2. (a) Ne a uiga ka fesoasoani mai ki a tatou ke fakafesagai atu ki tofotofoga? (e) E fakamatala manino mai pefea ne koe a te fakatuanaki? Fai se fakatusaga ki ei.

E AUMAI ne te taviniga ki Ieova a te fiafia ki a tatou. E ui i ei, e fe‵paki eiloa tatou mo mea faiga‵ta kolā e masani o oko ki tino, kae kāti e ‘logo‵mae tatou ona ko te amiotonu.’ (1 Petelu 3:14; 5:8, 9; 1 Kolinito 10:13) Ke fakafesagai atu mo te manuia ki vaegā tofotofoga penā, e manakogina te fakatuanaki mo te loto malosi.

² Se a te fakatuanaki? Ne tusi mai te apositolo ko Paulo: “A te fakatuanaki ko te talitonu mo te mautinoa ki mea kolā e fakamoe‵moe tatou ki ei, ko te fakaasiga manino o mea ‵tonu kolā e se lavea ki mata.” (Epelu 11:1) E faitau penei a te suā ‵fuliga: “A te fakatuanaki se fakamaoniga ki mea kolā e fakamoe‵moe tatou ki ei. Te fakatuanaki ko te talitonu pa‵tonu ki mea e se mafai o lavea ne tatou.” (The Simple English Bible) Kafai e tuku mai se kope ki a tatou, e tali‵tonu tatou me ko pule tatou i ei. Ona la ko tatou e fakatuanaki me e fakataunu faeloa ne te Atua ana pati, e pelā eiloa me ko maua ne tatou se fakamaoniga tāua ‵ki. E fakamautinoa mai ne ‵tou fakatuanaki me ka lavea eiloa ne tatou a te fakataunuga o tautoga faka-te-Tusi Tapu kolā ne fakamoe‵moe tatou ki ei, kae e mautinoa ‵lei i a tatou a te ‵tonu o mea faka-te-agaga, faitalia me e se mafai o lavea ne tatou.

3, 4. (a) Se a te loto malosi? (e) Se a te auala e tasi e fakamalosi aka ei ‵tou fakatuanaki mo te loto malosi?

³ Ne fakamatala manino mai a te loto malosi e pelā me ko te “malosi o faipati atu kae fai a mea e aunoa mo te mataku māfai ko fe‵paki tatou mo fakalavelave mo tulaga fakama‵taku i te feitu faka-te-agaga, lagonaga, mo amioga ‵lei.” (The New Interpreter’s Dictionary of the Bible) Kafai e maua ne tatou a te loto malosi, e ma‵losi kae loto ‵toa eiloa tatou i nisi taimi.​—Maleko 6:49, 50; 2 Timoteo 1:7.

⁴ A te fakatuanaki mo te loto malosi ko uiga kolā e manakogina. Kae kāti e manatu aka tatou me koi manakogina malosi ne tatou a te fakatuanaki mo te loto malosi. E faipati te Tusi Tapu ki te fia afe o tino kolā ne fai pelā me ne fakaakoakoga ‵lei o te fakatuanaki mo te loto malosi. Tela la, a te auala e tasi ke fakamalosi aka ei ‵tou fakatuanaki mo te loto malosi ko te mafaufau ki nisi fakaakoakoga konā.

NE FAKATASI ATU A IEOVA KI A IOSUA

5. Ko te mea ke manumalo a ia i tena tofiga, se a te mea e manakogina ne Iosua?

⁵ Ke toe mafau‵fau tatou ki te 35 senitenali ko ‵teka. Ko oti atu te 40 tausaga talu mai te taimi ne faka‵sao ei ne Ieova a tino Isalaelu mai te ‵nofo pologa i Aikupito. A te pelofeta ko Mose ko te takitaki o latou. Ko 120 nei ana tausaga i te taimi ne fanaka ei ki luga i te Mauga o Nepo ke lavea ne ia te Fenua o te Folafolaga, tenā ne mate ei a ia i konā. A tena sui ko Iosua, se tagata e ‘‵fonu i te poto.’ (Teutelonome 34:1-9) Ko pili fua o puke ne te kau Isalaelu a te fenua o Kanana. Ke fai pelā me se takitaki ‵lei, e manakogina ne Iosua a te poto mai i te Atua. E ‵tau foki o fakatuanaki a ia ki a Ieova kae ke loto malosi.​—Teutelonome 31:22, 23.

6. (a) E ‵tusa mo te Iosua 23:6, kaia e manakogina ei ne tatou a te loto malosi? (e) Ne a mea e tauloto ne tatou mai te Galuega 4:18-20 mo te Galuega 5:29?

⁶ Ne ‵tau o fakamalosi atu ki te kau Isalaelu a te poto, te loto malosi, mo te fakatuanaki o Iosua i te taimi leva ne taua atu ei latou ki te fenua o Kanana. E se manakogina fua a te loto malosi ke taua atu i te taua, kae ke fai foki a te mea telā ne fakamalosi atu a Iosua ki a latou ke fai. A koi tuai o mate tou tagata, ne fai atu a ia ki a latou: “Masaua o faka‵logo kae tausi ki mea katoa kolā e tusi i te tusi o Tulafono a Mose. E tapu eiloa e manatu fatauva koutou ki se vaega i ei.” (Iosua 23:6) E manakogina foki ne tatou a te loto malosi ke faka‵logo ki a Ieova i taimi katoa. E aofia i te mea tenei a mea kolā e fakatonu mai ne tino ke fai ne tatou kae sē fetaui mo te loto o te Atua. (Faitau te Galuega 4:18-20; 5:29.) Kafai e fakalagolago tatou ki a Ieova i te faiga o ‵talo, ka fesoasoani mai eiloa a ia ke maua ne tatou a te loto malosi.

TE AUALA E MAFAI EI O IKU MANUIA ‵TOU AUALA

7. Ke maua te loto malosi mo te manuia, se a te mea ne ‵tau o fai ne Iosua?

⁷ Ke maua te loto malosi o fai te loto o te Atua, e ‵tau o sukesuke kae fakagalue ne tatou a tena Muna. E tenā eiloa te mea ne fakatonu atu ki a Iosua ke fai i te taimi ne sui ei ne ia a Mose: “Ke loto malosi kae fakatuanaki; kae masaua o tautali i Tulafono katoa kolā ne tuku atu ne taku tavini ko Mose. . . . Masaua ke faitau faeloa te tusi o te Tulafono i taimi e fai otou tapuakiga. Masaua o tauloto faka‵lei i ao mo po, kae taumafai o tautali i mea katoa e tusi i ei. Kafai e fai ne koe te mea tenā, ko koe ka maumea kae manuia.” (Iosua 1:7, 8) Ne tautali eiloa a Iosua i te manatu fakatonutonu tenā, kae ne ‘iku manuia eiloa tena auala.’ Kafai foki e fai tatou penā, ka maua ne tatou a te loto malosi mo te manuia i te galuega a te Atua.

8. Se a te tusi ne maua mai i ei a pati o te tusi siki fakavae mō te 2013, kae ka fesoasoani atu pefea a pati konā ki a koe?

⁸ Ne ‵tau eiloa o lasi te malosi o Iosua i te taimi ne lagona ei ne ia a pati a Ieova: “Ke loto malosi kae fakatuanaki! Sa mataku io me e loto vāivāi, me i a au, te Aliki [Ieova] tou Atua e fakatasi atu faeloa ki a koe i so se koga e fano koe i ei.” (Iosua 1:9) E fakatasi mai foki a Ieova ki a tatou. Tela la, faitalia me ne a mea faiga‵ta e fe‵paki mo tatou, ke mo a e “ma‵taku io me e loto vāivāi.” E tāua foki a pati konei: “Ke loto malosi kae fakatuanaki! . . . te Aliki [Ieova] tou Atua e fakatasi atu faeloa ki a koe.” Ko oti ne filifili a pati konā o te Iosua 1:9 e pelā me ko te tusi siki fakavae mō te tausaga e 2013. I masina mai mua nei, ka fakama‵losi mai eiloa ki a tatou a pati konā mo nisi fakaakoakoga o te fakatuanaki mo te loto malosi.

NE LOTO MA‵LOSI EILOA LATOU O FAI TE LOTO O TE ATUA

9. I auala fea ne fakaasi mai ei ne Lahapa a te fakatuanaki mo te loto malosi?

⁹ I te taimi ne uga atu ei ne Iosua a tino lamalama e tokolua ki loto i Kanana, ne faka‵muni lāua ne te fafine talitāgata ko Lahapa kae faka‵se ne ia a lā fili. Ona ko tena fakatuanaki mo te loto malosi, ne ‵sao ei tou fafine mo tena kāiga i te taimi ne fakatakavale ei ne te kau Isalaelu a te fa‵kai o Ieliko. (Epelu 11:30, 31; Iakopo 2:25) E tonu, ne tiakina ne Lahapa a tena olaga masei ko te mea ke fakafiafia atu ki a Ieova. A nisi tino kolā ne fai mo fai ne Kelisiano, ne maua ne latou a te fakatuanaki, loto malosi, mo amioga ‵lei ke fai ne latou a ‵fuliga penā ko te mea ke fakafiafia atu ki te Atua.

10. Ne a fakanofonofoga ne filifili ei a Luta ke tumau a ia i te tapuakiga tonu, kae ne a fakamanuiaga ne maua ne ia?

¹⁰ Mai tua o te mate o Iosua, ne loto malosi eiloa a te fafine Moapi ko Luta ke tumau a ia i te tapuakiga tonu. E se taumate ne iloa ne ia se mea e uiga ki a Ieova me i a ia ne avaga ki te tino Isalaelu. A te mātua o tena avaga ko Naomi, telā ne nofo i Moapi ko mafaufau ke toe foki atu a ia ki te fa‵kai o Isalaelu ko Peteleema. A koi sa‵sale atu i te auala, ne fakamalosi atu a Naomi ki a Luta ke toe foki ki ana tino, kae ne tali mai te fafine Moapi: “Sa finau mai ke tiakina koe ne au! Au e loto ke olo tasi tāua . . . A tou fenua ka fai mo oku fenua, a tou Atua ka fai foki mo oku Atua.” (Luta 1:16) E tonu eiloa a Luta mo ana pati konā. I se taimi fakamuli ifo, ne avaga a Poasa te kāiga pili o Naomi ki a Luta. Ne maua ne lāua se tamaliki tagata kae ne fai a Luta mo fai te tupuga fafine o Tavita e penā foki mo Iesu. Ao, e fakamanuia eiloa ne Ieova a latou kolā e fakaasi mai te fakatuanaki mo te loto malosi.​—Luta 2:12; 4:17-22; Mataio 1:1-6.

E TOKOUKE NE TOKA KE ‵MATE LATOU!

11. Ne fakaasi mai pefea ne Ieoiata mo Ieosepa a te loto malosi, kae se a te ikuga ne maua mai i ei?

¹¹ E fakamalosi aka ‵tou loto malosi mo te fakatuanaki māfai e lavea ne tatou i te Atua e fakatasi atu ki a latou kolā ne fakamuamua ne latou te faiga o tena loto mo te puipuiga o olotou taina. Pelā me se fakaakoakoga, mafaufau ki te Faitaulaga Sili ko Ieoiata mo tena avaga ko Ieosepa. Mai tua o te matega o te tupu ko Aasaia, ne tamate ne tena mātua ko Atalia a te ‵toega o tamaliki a te tupu kae na ko Ioasa fua ne ‵toe kae ne fai ei tou fafine mo tupu. Ne toka eiloa a Ieoiata mo Ieosepa o ‵mate i te fakasaoga o te tamaliki tagata a Aasaia ko Ioasa me ne faka‵muni eiloa ne lāua a ia i tausaga e ono. I te fitu o tausaga, ne fakasopo ne Ieoiata a Ioasa mo fai te tupu kae fakatonu atu ke tamate a Atalia. (2 Tupu 11:1-16) Ne ‵lago fakamuli atu a Ieoiata ki te tupu ko Ioasa i te faka‵leiga o mea o te faletapu. Kae i te taimi ne mate ei a Ieoiata kae ko 130 ana tausaga, ne tanu fakatasi a ia mo tupu “e fakailoga ei te galuega ne fai ne ia mō tino Isalaelu, mō te Atua, e pelā foki mō te Faletapu.” (2 Nofoaiga Tupu 24:15, 16) E se gata i ei, ne fakasao ne te loto ma‵losi o Ieoiata mo tena avaga a te gafa o tupu mai i a Tavita ke oko ki te Mesia.

12. Ne fakaasi mai pefea ne Epetimeleka a te loto malosi?

¹² A Epetimeleka, se tavini i te fale o te tupu ko Setekaia, ne toka o mate mō Ielemia. Ne tuku atu ne te tupu a Ielemia ki te pelenise o Iuta telā ne fai ne ia a fakamatalaga se ‵tonu e uiga ki a ia kae ‵pei atu ki loto i te vaikeli pelapelā ke mate i ei. (Ielemia 38:4-6) Faitalia te fakamataku o te mea ka fai ne ia ona ko te takalialia o tino ki a Ielemia, ne fakamolemole atu eiloa a Epetimeleka ki a Setekaia ke fesoasoani atu ki te pelofeta. Ne talia ne Setekaia kae tuku atu a tāgata e toko 30 ke olo mo Epetimeleka o fakasao mai a Ielemia. E auala i te pelofeta, ne fakatalitonu atu te Atua ki a Epetimeleka me ka sao a ia māfai ko fakamasei a Ielusalema ne te kau Papelonia. (Ielemia 39:15-18) E maua eiloa te taui o tino kolā e loto ma‵losi o fai te loto o te Atua.

13. Ne fakaasi mai pefea ne te tokotolu tamataene Epelu a te loto malosi, kae e aoga pefea ki a tatou a te tala o latou?

¹³ I te fitu senitenali T.L.M., ne maua ne tavini Epelu e tokotolu a Ieova a te taui ona ko te fakatuanaki mo te loto malosi. Ne fakamaopoopo ne te tupu o Papelonia ko Nepukanesa a tino ma‵luga kae fakatonu atu ke tapuaki ki te tupua aulo. So se tino e se tapuaki atu ki ei ka mate eiloa i loto i te ogaumu ‵ka ulaula. Ne fai atu mo te āva a te tokotolu tamataene Epelu ki a Nepukanesa: “Kafai e mafai ne te Atua tenei e tavini matou ki ei o faka‵sao matou mai te afi, pelā foki mai tou malosi, e fakasao eiloa ne ia matou. Kae kafai foki la e se mafai ne ia, ka ko matou e se mafai eiloa o tapuaki atu ki tou atua, io me ifo ki te tupua aulo tenā ne fakatu aka ne koe.” (Tanielu 3:16-18) E fakamatala faka‵lei mai a te tala o te faka‵saoga o tamataene Epelu e tokotolu i te Tanielu 3:19-30. E tigā eiloa kāti e se fakamatakutaku mai me ka ‵mate tatou i se ogaumu ‵ka ulaula, e fakafesagai tatou mo tofotofoga faiga‵ta o te ‵tou fakamaoni. Kae e mautinoa eiloa me ka fakamanuia tatou ne te Atua māfai e fakaasi atu ne tatou a te fakatuanaki mo te loto malosi.

14. E ‵tusa mo te Tanielu mataupu e 6, ne fakaasi mai pefea ne Tanielu a te loto malosi, kae se a te ikuga?

¹⁴ Ne fakaasi mai ne Tanielu a te fakatuanaki mo te loto malosi i te taimi ne fakamalosi atu ei ana fili ki te tupu ko Taliu ke fai se tulafono “me i aso e tolusefulu e tapu eiloa se tino e fakamolemole ki se atua io me se isi tino i se mea e manako a ia ki ei, na ki a koe tokotasi eiloa. So se tino e ‵teke ki te fakatonuga tenā e ‵pei ki te lua leona.” I te logoga a Tanielu i te fakatonuga ko oti ne saina, “foki ei a ia ki tena fale. I te potu e tasi i te fogafale lua o tena fale, e isi ne fakamalama i ei e fakasaga ki te fa‵kai o Ielusalema. I konā, e pelā eiloa mo te masani, ne totuli ifo ei a ia i mua o te fakamalama kae ‵talo atu ki te Atua e fakatolu taimi i te aso.” (Tanielu 6:6-10) Ne ‵pei atu a Tanielu ki loto i te lua o leona ona ko tena loto malosi, kae ne fakasao a ia ne Ieova.​—Tanielu 6:16-23.

15. (a) Se a te fakaakoakoga o te fakatuanaki mo te loto malosi ne fakaasi mai ne Akuila mo Pisila? (e) Se a te mea e fakauiga ki ei a pati a Iesu i te Ioane 13:34, kae ne fakaasi mai pefea ne Kelisiano e tokouke a te vaegā alofa tenā?

¹⁵ E fai mai te Tusi Tapu me i a Akuila mo Pisila ‘ne toka o ‵mate mō Paulo.’ (Galuega 18:2; Loma 16:3, 4) Ne loto ma‵losi eiloa lāua o ga‵lue e ‵tusa mo pati a Iesu: “Ko tuku atu ne au ki a koutou se fakatonuga fou, ke fakatau a‵lofa koutou; e pelā eiloa mo au ne alofa atu ki a koutou, ke fakatau a‵lofa foki koutou.” (Ioane 13:34) E manakogina i te Tulafono a Mose ke alofa te tino ki tena tuakoi e pelā mo tena alofa ki a ia eiloa. (Levitiko 19:18) Kae ko te fakatonuga a Iesu e “fou,” me e manakogina i ei ke fakaasi atu ne tatou a te alofa mai te loto fia‵fia o tuku atu ‵tou ola mō nisi tino, e pelā mo te mea ne fai ne ia. Ko oti ne fakaasi mai ne Kelisiano e tokouke a te alofa mai te “toka o ‵mate” ke puipui ei olotou taina mai fakasauaga io me tamate ne olotou fili.​—Faitau te 1 Ioane 3:16.

16, 17. Ne tofotofo aka pefea a te fakatuanaki o nisi soko mua o Keliso, kae ne tofotofo aka pefea a te fakatuanaki o nisi Kelisiano i ‵tou aso nei?

¹⁶ E pelā mo Iesu, ne loto ma‵losi a Kelisiano mua o tapuaki atu fua ki a Ieova. (Mataio 4:8-10) Ne ita latou ma ‵sunu a mea fakama‵nogi e fakaaloalo ei ki te tupu o Loma. (Onoono ki te ata.) “E timomo fua a Kelisiano ne tiakina te tapuakiga,” ne tusi mai a Daniel P. Mannix, “faitalia me ne tu faeloa a te fatafaitaulaga mo te afi e kā i ei i te kogaloto o te malae. A te mea fua e ‵tau o fai ne te pagota ko te puke ki ne mea fakamanogi ko fakamatulutulu ei i luga i te afi, ko tuku atu ei se pepa fakamaoni i a ia ko saoloto. Ne fakamatala atu foki ki te pagota me i a ia e se tapuaki ki te tupu. Ne fai atu foki ki te pagota ke fai atu fua pelā i te tupu o Loma se atua. Ne nāi Kelisiano fua ne talia ne latou te avanoaga tenei ke ‵sao latou.”​—Those About to Die.

¹⁷ A Kelisiano kolā ne ‵pei ki falepuipui a te kau Nazi ne tuku atu faeloa ki ei a avanoaga ke saina a pepa i a latou e se tapuaki ki a Ieova ko te mea ke fakasaoloto latou. Kae ne nāi tino fua ne saina. I te taimi o te taua telā ne fai i Rwanda, ne fakatau puipui ne Molimau Hutu mo Tutsi a latou eiloa. I vaegā tulaga penā e manakogina i ei a te loto malosi mo te fakatuanaki.

MASAUA, I A IEOVA E FAKATASI MO TATOU!

18, 19. Ne a fakaakoakoga o te fakatuanaki mo te loto malosi i te Tusi Tapu e mafai o fesoasoani mai ki a tatou ke fakataunu ‵tou galuega talai?

¹⁸ Ko oko eiloa i te taulia o tatou ke aofia i te ‵toe galuega lasi ne tuku mai ki tavini a Ieova​—ko te talaiga o te fekau o te Malo mo te faiga o soko. (Mataio 24:14; 28:19, 20) E fakafetai eiloa tatou ki te fakaakoakoga ‵lei katoatoa ne tuku mai ne Iesu! “Ne faimalaga atu a Iesu mai fa‵kai ‵lasi ki nisi fa‵kai ‵lasi, e pelā foki mo fa‵kai fo‵liki ki nisi fa‵kai fo‵liki, o talai kae folafola atu te tala ‵lei e uiga ki te Malo o te Atua.” (Luka 8:1) E pelā mo ia, e manakogina ne tatou te fakatuanaki mo te loto malosi ke talai atu te fekau o te Malo. Fakatasi mo te fesoasoani o te Atua, e mafai o loto malosi tatou e pelā mo Noa, te “tino talai o te amiotonu” i se “lalolagi o tino amio ma‵sei” telā ko pili o galo atu i se lolo i te lalolagi kātoa.​—2 Petelu 2:4, 5.

¹⁹ E fesoasoani mai te ‵talo ke fakataunu ne tatou a te galuega talai. I te taimi ne ‵talo atu ei a nisi soko o Keliso kolā ne fakasauagina ke mafai ne latou o ‘faipati atu te muna a te Atua mo te loto toa,’ ne tali mai eiloa te ‵talo tenā. (Faitau te Galuega 4:29-31.) Kafai koe e mataku ma talai atu mai fale ki fale, ‵talo atu ki a Ieova ke maua ne koe te loto malosi mo te fakatuanaki kae ka tali mai a ia.​—Faitau te Salamo 66:19, 20.a

20. Se a te fesoasoani e maua ne tatou e pelā me ne Molimau a Ieova?

²⁰ E se faigofie ke tumau i te faiga o te loto o te Atua i tulaga faiga‵ta kolā e fe‵paki mo tatou i te lalolagi matagā tenei. Kae e se ‵nofo tatou i a tatou eiloa. E fakatasi mai te Atua ki a tatou. E fakatasi mai foki a tena Tama, te Ulu o te fakapotopotoga. E maua foki ne tatou a taina Molimau a Ieova e silia atu i te 7,000,000 i te lalolagi kātoa. Fakatasi mo latou, ke tumau tatou i te fakatuanaki kae folafola atu te tala ‵lei a koi masaua ne tatou a te tusi siki fakavae o te tausaga e 2013: “Ke loto malosi kae fakatuanaki. . . . te Aliki [Ieova] tou Atua e fakatasi atu faeloa ki a koe.”​—Iosua 1:9.