Ke mo a Eiloa e ‵Fiu i te Taumafai!

Ka fesoasoani atu a nāi tala mai Peletania ke lavea ne koe a te pogai e ‵tau ei mo koe o sē ‵fiu i te taumafai. Ka lavea foki ne koe i ei a mea kolā e ‵tau o fai ke “lafo atu otou falaoa ki luga i te vai,” ko te mea ke fesoasoani atu ki a latou kolā e seki talia ne latou te munatonu.​—Fai. 11:1, Tusi Paia, Samoa.

LOTO MAU​—SE VAEGA TĀUA

A te mea tāua e ‵tau o fai ne koe ko te loto mau. E manakogina ke taofi ‵mau koe ki te munatonu kae ‵piki ‵mau ki a Ieova. (Teu. 10:20) Tenā te mea ne fai ne Georgina. I te taimi ne kamata ei o suke‵suke tou fafine mo Molimau a Ieova ki te Tusi Tapu i te 1970, a tena avaga ko Kyriacos, ne kaitaua ‵ki eiloa. Ne taumafai tou tagata o taofi te akoga a tou fafine, fakatapu a Molimau a Ieova i te fale, kae ‵pei keatea so se tusi a Molimau a Ieova telā e maua ne ia.

I te taimi ne kamata ei a Georgina o kau ki fakatasiga a te fakapotopotoga, ne gasolo aka eiloa o kaitaua malosi a Kyriacos. I te aso e tasi ne fano tou tagata ki te Kingdom Hall o fai se kinauga i ei. I te iloaga ne se tuagane me e ‵lei atu te ‵gana Eleni a Kyriacos i lō te ‵gana Palagi, telefoni ei tou fafine ki se taina Eleni i te suā fakapotopotoga ke vau o fesoasoani ki te fakalavelave. Ne talia ne Kyriacos a faiga atafai a te taina, kae i nāi masina mai tua ifo, ne kamata ei ne lāua se akoga faka-te-Tusi Tapu. Kae fakamuli ifo, ne fakagata ne Kyriacos tena akoga.

E tolu tausaga mai tua ifo, ne fepaki faeloa a Georgina mo ‵tekemaiga. Ne fai mai a Kyriacos me ka tiakina ne ia tou fafine māfai e papatiso. I te aso o tena papatisoga, ne ‵talo atu a Georgina mo te loto kātoa ki a Ieova ke sē tiakina a ia ne Kyriacos. I te o‵maiga a Molimau o ave tou fafine ki te fono, ne fai atu a Kyriacos ki a latou: “Mua koutou. A matou e tau‵tali atu i te motou motoka.” Ne kau tou tagata ki te vaega o te fono i te taeao kae kilokilo atu eiloa ki tena avaga ko papatiso!

Fakamuli ifo, ne feoloolo ‵ki eiloa te ‵teke mai o Kyriacos, kae ne faifai malielie ne tou tagata a ‵fuliga ‵lasi. Toeitiiti kae kātoa te 40 tausaga mai te taimi muamua ne fetaui ei mo Molimau, kae lavea ne Georgina a tena avaga ko papatiso! Se a te mea ne fesoasoani atu ki a Kyriacos? Muna a tou tagata: “Ko oko eiloa i toku fiafia me ne seki talia ne Georgina se mea ke taofi aka a tena tapuaki atu ki a Ieova.” E fai mai a Georgina: “Faitalia te ‵teke mai o taku avaga, ne seki mafaufau eiloa au ke fakagata taku tapuakiga ki te Atua. I taimi katoa, ne ‵talo faeloa au ki a Ieova, kae ne seki galo eiloa i a au a toku fakamoemoega.”

TE TĀUA O UIGA ‵FOU

A te suā mea telā e ‵tau o fai ke fesoasoani atu koe ki tau avaga ko te atiakaga o uiga faka-Kelisiano. Ne fakatonu atu te apositolo ko Petelu ki fāfine a‵vaga Kelisiano: “Ke faka‵logo koutou ki otou avaga, ko te mea kafai e isi ne tino i a latou e se faka‵logo ki te muna, e mafai o tosina mai latou e aunoa mo se pati ona ko amioga a olotou avaga.” (1 Pe. 3:1) Ne ola a Christine e ‵tusa mo te fakatonuga tenā, faitalia te uke o tausaga ne taumafai ei tou fafine o ‵fuli mai a tena avaga. I te taimi ne kamata ei o fai tou fafine mo fai se Molimau i tausaga e sili atu i te 20 ko ‵teka, a tena avaga ko John e se talitonu ki te Atua. Ne seki manako a John o aofia i mea fakalotu, kae ne lavea ne tou tagata a te aoga o te lotu fou a Christine ki tou fafine. “E lavea ne au me e fiafia eiloa tou fafine ki ei,” ko ana pati. “Ne fai tou fafine mo fai se tino malosi, kae ne fesoasoani mai a te mea tenei ki a au i tulaga faiga‵ta e uke.”

Ne seki faimālō ne Christine ke talia ne tena avaga a tena talitonuga. Ne fai mai tou tagata: “Ne iloa ne Christine mai te kamataga me e ‵lei atu ke se faipati mai a ia ki a au e uiga ki tena lotu, ne fa‵ki tou fafine kae tuku loa au ke tauloto ki te mea e mafai ne au mo te auala e manako au ki ei.” I te laveaga ne Christine a mataupu i loto i Te Faleleoleo Maluga io me ko te Awake! e uiga ki mea fakasaienisi mo te natula, ne iloa ne tou fafine me ka fiafia a John ki ei kae fai atu ki tou tagata, “I taku faka‵tau me ka fiafia eiloa koe o faitau ki te mea tenei.”

E seki leva, ko John eiloa ko li‵taea kae saga o fai ana fatoaga. Me ko maua ne tou tagata te taimi avanoa ke mafaufau ‵loto ki fesili e uiga ki te olaga, ne kamata a ia o mafaufau penei, ‘E mata, ne ola fakafuasei mai tatou, io me ne faite tatou mō se pogai?’ I te aso e tasi, ne fesili atu se taina telā e masani sāle o sau‵tala mo John ki tou tagata, “E a ma fai tau akoga?” “Ona ko au ko kamata nei o talitonu ki te Atua,” muna a John, “ne talia ei ne au tena manatu.”

Ko oko eiloa i te tāua me ne seki ‵fiu a Christine i te taumafai! Mai tua o te 20 tausaga ne ‵talo atu ei tou fafine ke talia ne John a te munatonu, ne papatiso ei tou tagata. Nei la, ko tavini fakatasi atu lāua mo te loto finafinau ki a Ieova. E fai mai a John: “E lua eiloa a mea ne ‵fuli ei au​—te mataa‵lofa mo te matafia‵fia o Molimau. Kae kafai e avaga koe ki se Molimau a Ieova, ko maua eiloa ne koe se avaga alofa fakamaoni, fakatuagagina, kae sē kaimanako.” Ao, ne fakagalue ne Christine a pati i te 1 Pe. 3:1, kae ne aoga eiloa!

E MAUA A FUATAGA O FUAGA NE ‵TOKI I TAUSAGA FAKAMULI IFO

E a māfai ko isi se pogai ko galo ei te fia‵fia o tino kolā e fai olotou akoga i te Tusi Tapu mo te taimi muamua? “Ke ‵toki ou lakau i te taeao pelā foki i te afiafi. E se mafai o iloa ne koe me e ola ‵lei katoa io me ka ola ‵lei nisi kae se ola ‵lei nisi.” (Fai. 11:6) I nisi taimi, e lau i tausaga kae fatoa ‵tupu aka a fuaga o te munatonu i te loto. Tela la, kāti fakamuli loa ka iloa ne se tino a te tāua ke fakapilipili atu ki te Atua. (Iako. 4:8) Ao, e mafai loa koe o poi i se aso.

Ke mafaufau ki a Alice, telā ne vau mai i Initia o nofo i Egelani. I te 1974 ne kamata tou fafine o sukesuke ki te Tusi Tapu. A ia e faipati i te ‵gana Initia kae manako ke tai ‵lei aka a tena ‵gana Palagi. Ne tumau eiloa te faiga o tena akoga i nāi tausaga, kae ne kamata o kau a Alice ki nāi fakatasiga i se fakapotopotoga i te ‵gana Palagi. Ne iloa ne tou fafine i te mea telā ne tauloto ne ia ko te munatonu kae ne seki iloa ne ia a tena tāua. I tafa i ei, ne tai saga eiloa tou fafine ki tupe kae fiafia o fano ki faigāmea. I te fakaotiga, ne taofi ne Alice a tena akoga.

Ko tai kātoa te 30 tausaga fakamuli ifo, kae maua ne Stella, telā ne fai sāle ne ia te akoga a Alice, se tusi. E faitau penei: “Au e talitonu me ka fiafia koe me i tau tino akoga i te Tusi Tapu mai 1974 ko oti ne papatiso i te fono o te atufenua fakamuli nei. Ko oti ne fai ne koe se tusaga tāua ‵ki eiloa ki toku olaga. Ne ‵toki ne koe a te fuaga o te munatonu i loto i a au, kae faitalia me ne seki toka au o tuku atu ki te Atua i te taimi tenā, ne tausi eiloa ne au te fuaga o te munatonu tenā i toku mafaufau mo toku loto.”

Se a te mea ne tupu? E fakamatala mai a Alice me ne māfatia malosi a ia mai tua o te matega o tena avaga i te 1997. Ne ‵talo atu tou fafine ki te Atua. E nofo ki se sefulu minute, ko te mea eiloa ko āsi atu te tokolua Molimau e fai‵pati ki te ‵gana Punjabi ki tena fale kae tuku atu ki tou fafine a te tama pepa ko te Se a te Fakamoemoega mō Tino Pele Kolā ne ‵Mate? Ne manatu aka a Alice me ko tali mai a tena ‵talo kae fakaiku aka ne tou fafine ke fesokotaki atu a ia ki Molimau a Ieova. Kae tefea te koga e maua i ei latou? Ne maua ne tou fafine se tusi mua e tusi i ei a te fakatuatusi telā ne tuku atu ne Stella ke fesokotaki a ia ki te fakapotopotoga Punjabi. Ne āsi atu a Alice ki te Kingdom Hall kae ne tali fiafia a ia ne taina mo tuagane kolā e fai‵pati i te ‵gana Punjabi. “Ne lagona ne au te alofa telā ne fakaasi mai ki a au kae ne fesoasoani mai ke maua ne au se fakatapūga mai te loto māfatia,” ko pati a Alice.

Ne kamata tou fafine o kau faeloa ki fakatasiga kae toe kamata a tena akoga faka-te-Tusi Tapu, kae tauloto ke iloa ne ia o faipati kae faitau faka‵lei i te ‵gana Punjabi. Ne papatiso tou fafine i te 2003. E fakaoti penei a tena tusi ki a Stella, “Fakafetai lasi mō te ‵tokiga o fuaga konā i te 29 tausaga ko ‵teka kae tuku mai i ei se fakaakoakoga ‵lei ke tautali au i ei.”

E faitau penei a te tusi telā ne maua ne Stella mai i a Alice: “Au e talitonu me ka fiafia koe me i tau tino akoga i te Tusi Tapu mai te 1974 ko oti ne papatiso i te fono o te atufenua fakamuli nei”

Ne a mea e mafai o tauloto ne koe mai tala konei? Kāti e leva atu a te taimi e manakogina i lō te mea e fakamoemoe koe ki ei, kae kafai se tino e fia kai tonu ki mea faka-te-agaga, fakamaoni, kae loto maulalo, ka talia eiloa ne Ieova ke tupu aka a te munatonu i tena loto. Masaua a fakamatalaga a Iesu i te tala fakatusa: “Ko ‵somo aka a fuaga kae ko maluga, kae e se iloa ne [te tino ‵toki fuaga] me ne ‵tupu aka pefea. Ne fakaola malielie aka ne te laukele i a ia eiloa a te fuaga. A te mea muamua ko ana lau, tafa atu ki ei ko kausaito, kae fakamuli loa ko fui saito kolā ko ma‵tua ‵lei.” (Male. 4:27, 28) E tuputupu malie aka a te fuaga “i a ia eiloa.” Tela la, tumau eiloa i te ‵toki o fuaga e uke. E mafai eiloa o tau ne koe a fuataga e uke.

Kae sa puli a te aoga o ‵talo. Ne ‵talo faeloa a Georgina mo Christine ki a Ieova. Kafai koe e “‵talo faeloa” kae sē ‵fiu i te taumafai, “fakamuli,” kāti ka toe maua ne koe a “falaoa” kolā ne lafo atu ne koe i luga i te vai.​—Lo. 12:12; Fai. 11:1.