“Ne manako au o fai mo fai se faifeau”

TOKU OLAGA MUA:

Ne fanau au i te fa‵kai foliki o Texcoco. I te taimi tenā, a te ukega o auala e pelapelā kae ‵pefu. E masani o lavea atu a tino mai i fa‵kai ‵pili mai e au‵mai ki fa‵kai ‵lasi mo olotou mea ‵togi e fakauta i tua o asini. Ne ma‵tiva ‵ki te motou kāiga kae ko au ko te tokofitu o tamaliki mai i tamaliki e tokoiva. E faite ne toku tamana a taka ma‵sei mo tausi te kāiga. Kae ne mate tou tagata a ko fitu oku tausaga. Mai i te taimi eiloa tenā, ne ola fi‵ta toku mātua o ‵sala mea‵kai mo tausi te kāiga.

A toku tupuna tagata e tātā i te violin kae ko te takitaki o se potukau usu pese i pese lotu. Toeitiiti ko tino katoa o toku kāiga e iloa o ta‵ta. A toku mātua e kau i te kau fai pese, kae ko toku fakatamana e tātā i te piano kae usuusu. A matou ne tino e ma‵losi ki lotu​—au e fesoasoani ki te faifeau i te taimi e fai ei te fakamanatuga, kae ne manako au ke fai mo fai se misionale Katolika. I te taimi foki tenā, au e fiafia o onoono sāle ki ata kalate. Ko te lasi o toku onoono ki ata konā, ko te lasi foki o te atiakaga ne au o amioga fakasauā.

Ne ulu au ki se akoga a te lotu i Puebla e tai pelā me se akoga maluga. A toku fakamoemoega ke fai au mo fai se faifeau Katolika. Kae i te tausaga fakaoti o aku akoakoga, ne sē fiafia au ki te Lotu Katolika. Ne fakafāfine mai se sina talavou ki a au. Ne ‵teke ne au a te fakaosoosoga, kae ne fai ne te mea tenā ke isi se manakoga i loto i a au ke fia avaga. E se gata i ei, ne matea ne au a nāi faifeau e ola i se olaga fakaloiloi. I te fakaotiga, ne tiakina ne au a toku fakamoemoega ke fai mo fai se faifeau.

Ne fakaiku aka ne au ke tauloto ki te usuga o pese i te National Conservatory of Music i Mexico City. I te otiga o aku akoga, ne avaga au, e seki leva kae maua ne māua mo taku avaga a mā tamaliki e tokofa. Ne tausi atu au ki te kāiga mai te usuga o pese i te taimi e fai ei a fakamanatuga a te Lotu Katolika.

Mai te kamataga eiloa, ne pokotia a te mā avaga i te fakalavelave. A māua mo taku avaga ne sauā ‵ki eiloa te suā tino ki te suā tino, a te lasiga e pogai i lagonaga masalosalo kolā e ‵nofo eiloa mo māua. I te taimi muamua ne fakatau taua eiloa māua i mā pati, kae fakamuli ifo, ko fakaoko a mā lima. I te fakaotiga, mai tua o te 13 tausaga, ne fakaiku aka ne māua ke ‵nofo ma‵vae māua kae fakamuli ifo, ke ‵tala te mā avaga.

TE AUALA NE ‵FULI EI NE TE TUSI TAPU A TOKU OLAGA:

A te taimi muamua ne fetaui ei au mo Molimau a Ieova ko te taimi mai mua malie eiloa o māvae au mo taku avaga. Ne tukituki mai a Molimau e tokolua i te mā mataloa kae fai mai ke sau‵tala matou ki te Tusi Tapu. Ne mafaufau au me e uke atu aku mea ne iloa e uiga ki lotu, tenā ne fakatoka ei au o fakatalitonu atu i a lāua e ‵se. Ne ‵sili ne au a fesili ‵mafa kolā ne mafaufau au me e se maua ne lāua o tali. Kae poi au, me ne tuku mai faeloa ne lāua ki a au a tali ‵lei kolā ne fakavae ki te Tusi Tapu. Ne kamata ei o lavea ne au a te foliki o taku mea ne iloa. E ui i ei, ne sē āva ‵ki eiloa a toku avaga ki Molimau, kae ko oko eiloa i toku fakalavelave, tenā ne fakagata i ei a te āsiga.

E lima tausaga fakamuli ifo, au ko ‵nofo mo te suā fafine, ko Elvira, ko te suā taimi ne fetaui ei au mo Molimau a Ieova. Ne seki ‵teke a Elvira ki Molimau, tenā ne faigofie ei ke sukesuke faeloa au ki te Tusi Tapu. Tela la, ne tai leva eiloa te taimi ne manakogina ke ‵fuli ei toku olaga.

Ne iloa aka ne au me kafai e manako au o tapuaki atu ki a Ieova mo te loto kātoa, e manakogina ke fai ne ‵fuliga ‵lasi. E ‵tau o tiaki muamua ne au a taku galuega ko te usuusu i taimi o fakamanatuga a te Lotu Katolika, ko tena uiga, e ‵tau o ‵sala aka se isi auala e maua ei a mea mo ola. (Fakaasiga 18:4) E ‵tau foki ke fakaipoipo māua mo Elvira i te malo.

A te ‵toe ‵fuliga faigata eiloa, ko te tauloto ke pule atu ki toku kaitaua malosi. Ne fesoasoani mai ki a au a fuaiupu e lua i te Tusi Tapu: Ko te Salamo 11:5, telā e fakaasi mai i ei me i a Ieova e takalialia ki amioga fakasauā, mo te 1 Petelu 3:7, telā ne akoako mai ki a au me kafai e manako au ke lagona ne Ieova aku ‵talo, e ‵tau mo au o āva ki taku avaga i aku mea e fai ki ei. I te taimi ne mafaufau ‵loto ei au ki fuaiupu konā kae ‵talo atu mō te fesoasoani o Ieova, ne mafai ei ne au o pule malielie atu ki toku kaitaua.

TE AUALA NE AOGA EI KI A AU:

Ko maua nei ne au se olaga nofo kāiga fiafia. E taumafai au o faka‵lei aka a toku fesokotakiga mo aku tama ta‵gata i taku avaga muamua kae fakamalosi atu ki toku kāiga ke tumau i te ma‵losi i te fakatuanaki.

I te taimi koi foliki ei au, ne manako au ke fai mo fai se faifeau kae fesoasoani atu ki tino. Nei la, ko mafaufau au me ko aoga tonu a toku olaga. Ne tausi au ki toku kāiga mai te akoakoga o pese. Ko oko eiloa i toku fakafetai ki a Ieova me ne kufaki a ia i a au, o tuku mai a te avanoaga ke ‵fuli toku olaga kae fai mo fai se tino ‵lei!