Se a te Mea e Mafai o Tauloto ne Tatou Mai i se Pagota?

A te pagota telā e mafai o tauloto tatou mai i ei ko te tino telā e lavea ne koe e faipati ki ei a Iesu i te ata. Ko salamō te pagota tenā i ana agasala. E fakamolemole atu tou tagata ki a Iesu: “Masaua mai au māfai e oko koe ki tou Malo.” Nei la, e matea ne koe a Iesu e faipati ki te pagota i te ata tenei. E iloa ne koe me ne a pati a Iesu e fai atu ki a ia?—a A Iesu e tauto atu ki tou tagata: “Au e fai ‵tonu atu ki a koe i te aso nei, Ka ‵nofo fakatasi eiloa tāua i te Palataiso.”

Se a tau faka‵tau, ka fai pefea a te Palataiso tenā?— Ke maua ne tatou a te tali tonu, se mea ‵lei ke fai‵pati tatou e uiga ki te Palataiso telā ne fai ne te Atua mō te tagata mo te fafine muamua, ko Atamu mo Eva. Ne tu i fea a te Palataiso tenā? E mata, ne tu i te lagi, io me ko te lalolagi?—

E sao koe māfai e fai mai koe me ne tu i te lalolagi. Tela la, kafai e mafau‵fau tatou ki te pagota e “nofo . . . i te Palataiso,” e ‵tau o mafaufau tatou i tou tagata e ola eiloa i konei i te lalolagi māfai ko fai mo fai se palataiso. Kafai pefea a te Palataiso tenā?— Ke onoono aka tatou.

I te otiga ne faite ne Ieova a te tauavaga muamua, ko Atamu mo Eva, e fai mai te Tusi Tapu me ne tuku ne ia lāua ki se palataiso i konei i te lalolagi. Ne fakaigoa a te koga tenā ki te “fatoaga i Etena.” E mata, e mafai o fakaataata ne koe a te gali o te “fatoaga i Etena”?— E mautinoa, me se koga e gali kae taulekaleka atu ke ola i ei i lō so se koga i aso nei!

Se a tau faka‵tau? E mata, ka nofo mai a Iesu i te lalolagi nei fakatasi mo te pagota telā ne salamō ki ana agasala?— Ikai, ka nofo atu a Iesu i te lagi o pule mai pelā me se Tupu ki te lalolagi Palataiso. Tela la, ka ‵nofo fakatasi a Iesu mo te pagota me ka fakatu aka ne ia tou tagata mai te mate kae tausi atu ki ei i te Palataiso i te lalolagi nei. Kae kaia e talia ei ne Iesu se tagata telā ne fai mo fai se pagota ke ola i te Palataiso?— Ke fai‵pati tatou e uiga ki ei.

E tonu me ne fai ne te pagota tenei a mea ma‵sei ‵ki. Kae penā foki a te fia piliona o tino kolā ne ola i te lalolagi. Ne fai ne te tokoukega o latou a mea ma‵sei me ne seki akoako aka eiloa latou e uiga ki a Ieova mo mea kolā ne manako a ia ke fai ne latou.

Tela la, a tino penā, e aofia i ei a te pagota telā ne faipati a Iesu ki ei i te lakau, ka toe faka‵tu mai ke ola i te Palataiso i te lalolagi nei. Ka akoako latou ki te mea e loto ki ei te Atua. Ko mafai ei o fakatalitonu mai ne latou i a latou e a‵lofa ki a Ieova.

E iloa ne koe me e fakatalitonu mai pefea ne latou a te mea tenā?— Mai te faiga o te mea telā e manako te Atua ke fai ne latou. Ma‵faga o mea fakaofoofogia ke ola i te Palataiso kae ‵nofo fakatasi faeloa mo tino kolā e a‵lofa ki a Ieova mo te suā tino ki te suā tino!