E Mata, e ‵Tau mo Tatou o ‵Talo ki te Kau Tapu?

KO OI te tino e seki manavase aka eiloa kae ‵sala atu ki te fesoasoani mai i te suā tino? E ‵tusa mo te māfuaga o ‵tou manava‵se, e se taumate e ‵sala ne tatou se taugasoa telā e loto malamalama kae atamai i tulaga faiga‵ta e fe‵paki mo tatou. E ‵tau o maua te alofa mo te atamai i te taugasoa tonu telā e manakogina.

E penā a lagonaga o nisi tino māfai e ‵talo latou. I lō te ‵talo atu ki te Atua—telā e foliga mai me ko tō maluga kae fakaofoofogia ki a latou—e ‵lei atu olotou lagonaga māfai e ‵talo ki se tokotasi o te kau tapu. E fakasako‵sako mai latou me e malama‵lama atu te kau tapu, me ko oti ne fe‵paki mo tofotofoga mo tulaga faiga‵ta kolā e masani ki ei a tino. Pelā me se fakaakoakoga, kāti e ‵talo atu a tino kolā ne ‵galo olotou mea tāua ki te “Tino tapu” ko Anthony mai Padua—ko te tino telā e fesoasoani ki mea ne ‵galo io me kaisoa. Kafai e ‵talo mō se manu masaki, kāti e filifili ne latou a te “Tino tapu” ko Francis mai Assisi io me ki te “Tino tapu” ko Jude Thaddeus māfai e fanoa‵noa malosi latou.

Kae e iloa tonu pefea ne tatou me ko te ‵talo atu ki te kau tapu, se mea ‵lei e ‵tusa mo pati i Tusitusiga Tapu? Ona ko ‵tou ‵talo e avatu ki te Atua, e mautinoa ‵lei me e fia iloa ne tatou a te mea tenei: E mata, ne lagona ne ia ‵tou ‵talo? E mata, e se ‵tau foki o fesili ifo tatou, penei: E pefea a lagonaga o te Atua e uiga ki te ‵talo ki te kau tapu?

PATI A TE TUSI TAPU E UIGA KI TE ‵TALO KI TE KAU TAPU

A te faiga o ‵talo ki te kau tapu ne fakavae mai te akoakoga a te kau tapu e uiga ki te faiga o fakamolemole, telā ne akoako ne te Lotu Katolika. A te manatu tāua ko te “fakamolemole telā e fai atu ke maua te alofa fakamagalo o te Atua, e ‵tau o fai e auala i se tino tapu,” ko pati a te New Catholic Encyclopedia. Tela la, a te tino telā e ‵talo atu ki te kau tapu, e ‵talo mo te fakamoemoega ke mafai o maua se taliaga fakapito e auala i a latou ona ko te lotou manuia i mua o te Atua.

E mata, e akoako mai ne te Tusi Tapu se akoakoga penā? E fai mai a nisi tino me ne tuku mai ne te apositolo ko Paulo se fakavae ke ‵talo atu ki te kau tapu i ana tusitusiga. Pelā me se fakaakoakoga, ne tusi atu tou tagata ki Kelisiano i Loma: “Nei la, ko fakamalosi atu au ki a koutou, e oku taina, e auala i te ‵tou Aliki ko Iesu Keliso mo te alofa o te agaga, ke ‵talo malosi fakatasi tatou ki te Atua.” (Loma 15:30) E mata, ne fai atu a Paulo ki ana taina Kelisiano ke fakamolemole atu ki te Atua mō ia? Ikai. Kafai e isi se mea e ma‵nako latou ki ei, e fakamolemole atu latou ki a Paulo, se apositolo a Keliso, ke ‵talo mō latou. Ne fakaasi mai ne Paulo me se mea ‵lei ke fakamolemole atu ki se taina Kelisiano ke ‵talo ki te Atua e sui ei tatou. Kae e ‵kese ‵ki eiloa a te ‵talo atu ki se tino telā e fai pelā me nofo i te lagi ke fai atu ne ia ‵tou fakamolemole ki te Atua. Kaia la?

I te tusi a te apositolo ko Ioane, e fai mai a Iesu: “Au ko te auala mo te munatonu mo te ola. E seai se tino e fano ki te Tamana manafai e se ui mai i a au.” (Ioane 14:6) E fai mai foki a ia: “Ko te mea ke tuku atu ne te Tamana so se mea telā e fakatagi atu ei koutou i toku igoa.” (Ioane 15:16) Ne seki fai mai a Iesu me e ‵tau o avatu ‵tou ‵talo ki a ia ko faipati ei a ia ki te Atua mō tatou. I lō te fai penā, e ‵tau o avatu ‵tou ‵talo ki te Atua e auala i a Iesu kae e sē se tino aka, ko te mea ke lagona a ‵tou ‵talo.

I te taimi ne fakamolemole atu ei a soko o Iesu ki a ia ke akoako latou ki te faiga o ‵talo, ne tali atu a Iesu: “I so se taimi e ‵talo ei koutou, fai atu penei: ‘Te Tamana, ke tapu tou igoa.’” (Luka 11:2) Ao, “i so se taimi” io me ko taimi takitasi e ‵talo ei tatou, e ‵tau mo tatou o fai‵pati atu eiloa ki te Atua, kae e se ko Iesu io me se tino fakaatea. I te ‵kilo atu ki akoakoga manino konei a Iesu, e mata, e se ‵tau o fakaiku aka ne tatou i ‵tou ‵talo e ‵tau o avatu ‵tonu ki te Atua e auala i a Iesu Keliso kae e se ko so se tino aka io me ko te “kau tapu”?

A te ‵talo se vaega tāua ‵ki o ‵tou tapuakiga, kae manino ‵lei i te tapuaki ki so se tino i tafa o te Atua e se fetaui mo akoakoga a te Tusi Tapu. (Ioane 4:23, 24; Fakaasiga 19:9, 10) Tenā te pogai e ‵tau ei o avatu fua ‵tou ‵talo ki te Atua.

E ‵TAU KOE O MATAKU MA ‵TALO ATU KI TE ATUA?

I tena Lāuga i luga i te Mauga, ne tuku mai ne Iesu te fakaakoakoga e uiga ki se tamaliki e fakamolemole atu ki tena tamana ki se mea mo ana kai. E mata, ka tuku atu ne te tamana ki tena tamaliki a te fatu i lō te falaoa? Io me se gata poisini i lō se ika? (Mataio 7:9, 10) E seai se mātua alofa e mafai o fai ne ia se vaegā mea penā!

Mafaufau ki se tala fakatusa tai ‵pau mai te kilokiloga a se mātua. Fakaataata i tou mafaufau me e isi ne fakamolemole a tau tamaliki e fia fai atu ki a koe. Ko oti ne ati aka ne koe a tou fesokotakiga mo tou tagata, kae ne uiga faigofie faeloa koe. Kae e tigā te feitu tenā, ona ko tena mataku me se a tau tali, ne fakamolemole atu ei tou tagata ki te suā tino ke fakaoko atu a tena fakamolemole ki a koe. E pefea ou lagonaga ki ei? E a māfai e faipati atu faeloa tou tagata ki a koe e auala i te tino tenei kae foliga mai me ka fai faeloa a ia penei? E mata, e fiafia koe ki te fakatokaga tenā? Ikai! E ma‵nako a mātua a‵lofa ke fai‵pati tonu atu olotou tama‵liki ki a latou kae ke sē ma‵taku o fakamolemole atu ki mea kolā e ma‵nako latou ki ei.

I te fakagaluegaga o tena tala fakatusa e uiga ki te tamaliki telā ne fakamolemole ki meakai, ne fai atu a Iesu ki te vaitino e tokouke: “Tela la, kafai a koutou ne tino ma‵sei, kae e iloa ne koutou o tuku atu a mea ‵lei ki otou tama‵liki, e sili atu la fakafia te fia tuku atu ne te otou Tamana telā i te lagi a mea ‵lei ki tino kolā e fakamolemole atu ki a ia?” (Mataio 7:11) E seai se fakalotolotolua, me e malosi ‵ki a te manakoga o se mātua ke tuku atu a mea ‵lei ki tena tama. Kae malosi atu la a te manakoga o ‵tou Tamana faka-te-lagi o fakalogo kae tali mai ki ‵tou ‵talo.

E manako te Atua ke ‵talo tonu atu tatou ki a ia māfai foki e ‵mafa tukituki tatou i ‵tou agasala totino. Ne seki ‵tofi ne ia a nisi tino ke fakalogo‵logo ki ‵tou ‵talo. E fakamalosi mai a te Tusi Tapu ki a tatou: “Tuku atu ki te Aliki [Ieova] a mea e manavase koe ki ei, me ka fesoasoani a ia ki a koe.” (Salamo 55:22) I lō te fakalagolago ki te fakamolemole a te kau tapu io me ko so se tino aka, e ‵tau mo tatou o ati aka se kilokiloga tonu e uiga ki a Ieova te Atua.

E atafai mai a ‵tou Tamana faka-te-lagi ki a tatou e pelā me ne tino taki tokotasi. E manako a ia o fesoasoani mai ki a tatou mo ‵tou fakalavelave kae ‵kami mai ne ia tatou ke fakapili‵pili atu ki a ia. (Iakopo 4:8) Ko oko eiloa i te fia‵fia o tatou me e maua ne tatou a te avanoaga ke ‵talo atu ki ‵tou Atua mo te ‵tou Tamana, te “Tino telā e fakalogologo ki ‵talo”!—Salamo 65:2.