Ke Mo A Eiloa Koe E “Ita . . . Ki A Ieova”

1, 2. Kaia e se ‵tau ei o ‵losi atu ne tatou ki a Ieova a fakalavelave o tino? Fakamatala mai.

MAFAUFAU i a koe se tagata avaga telā ne fiafia i tausaga e uke. Kae i te aso e tasi ne foki mai ei koe ki te fale, e poi koe i mea katoa i tou fale ko oti katoa ne ‵fuli ‵se. Ko fati‵fati a nofoaga, ko meafale ko mafa‵fa, kae ko papa ko masae‵sae valevale. Ko fai a tou fale gali mo fai se koga o fakalavelave. E mata, ka pakalaga koe, “Kaia ne fai ei ne taku avaga a te mea tenei?” Io me ka fesili atu koe “Ko oi ne fai ne ia te mea tenei?” E seai se fakalotolotolua me ka sae fakavave aka a te suā fesili. Kaia? Me e iloa ne koe me e se ko tau avaga pele ne fai ne ia se faifaiga sauā kae fakamasei mea penā.

² I aso nei, e lavea ne tatou i fale o tino ko fakalai‵lai ne ea lai‵lai, amioga fakasauā, mo amioga sē ‵tau. E pelā me ne tino a‵koga ki te Tusi Tapu, e iloa ne tatou me e se ko Ieova te māfuaga o fakalavelave katoa konei. Ne faite ne ia te paneta tenei ke fai mo fai se palataiso gali. (Kene. 2:8, 15) A Ieova se Atua e alofa. (1 Ioa. 4:8) Ko oti ne fesoasoani mai a ‵tou sukesukega ne fai ki Tusitusiga Tapu ke iloa ne tatou a te māfuaga tonu o fakalavelave faiga‵ta e uke o te lalolagi. E seai aka foki se tino kae nā ko Satani te Tiapolo, “te pule o te lalolagi nei.”​—Ioa. 14:30; 2 Koli. 4:4.

3. E mafai pefea o ‵numi tou mafaufau?

³ I te suā feitu, e se ‵tau o ‵losi ne tatou ki a Satani a ‵tou fakalavelave katoa. Kaia? Me i nisi fakalavelave o tatou ko ikuga eiloa o ‵tou mea ‵se e fai. (Faitau te Teutelonome 32:4-6.) Faitalia me fai atu tatou me tonu tenā, e mafai o faka‵numi ne ‵tou tulaga se ‵lei katoatoa a ‵tou mafaufauga kae fai ei ke vāivāi tatou kae iku fakamuli atu ki fakalavelave. (Faata. 14:12) I te auala fea? I lō te ‵losi ifo ki a tatou eiloa io me ko Satani mō se fakalavelave, ko kamata o ‵losi atu tatou ki a Ieova. E mafai foki tatou o “ita . . . ki a Ieova.”​—Faata. 19:3, NW.

4, 5. E mafai pefea se Kelisiano o “ita . . . ki a Ieova”?

⁴ E mata, e mafai eiloa tatou o “ita . . . ki a Ieova”? E mautinoa me e seai eiloa se aoga ke ita tatou. (Isa. 41:11) Se a te mea e fakamoe‵moe tatou ke maua mai i ei? E fai mai se tino tusitala penei: “A tou lima ko tō toetoe ke fusu atu ki te Atua.” Kāti ka sē fameo faeloa tatou ki a Ieova. Kae fai mai te Faataoto 19:3, NW, me ko te valea o te tagata “e faka‵se ei a tena auala, tenā ko ita ei a ia ki a Ieova.” Ao, e mafai o ita te tino ki te Atua i tena loto. E mafai o matea faka‵lei a te uiga tenei i auala sē lavea. E mafai ne tino taki tokotasi o ita fakamoemoe ki a Ieova. Kae ko te ikuga, e mafai a te tino tenā o tele kea‵tea mai te fakapotopotoga io me e se ‵lago katoatoa ki fakatokaga o te tapuakiga a Ieova.

⁵ Se a te mea e mafai o fakaoso aka ne ia tatou ke “ita . . . ki a Ieova”? E mafai pefea o ‵kalo tatou kea‵tea mai te matasele tenā? E tāua ke iloa ne tatou a tali ki fesili konei. Me e aofia i ei a ‵tou fesokotakiga mo Ieova te Atua!

SE A TE MEA E MAFAI O FAKAOSO AKA EI TATOU KE “ITA . . . KI A IEOVA”?

6, 7. Kaia ne kamata ei o mui‵mui a tino Isalaelu e uiga ki a Ieova i taimi o Mose?

⁶ Se a te mea e mafai o fakaoso aka ei a te loto o te tavini fakamaoni a Ieova ke kamata o fameo e uiga ki te Atua? Ke mafaufau tatou ki mea e lima kae iloilo aka a fakaakoakoga i te Tusi Tapu kolā e faka‵mafa mai i ei a te auala ne ‵to atu ei a nisi tino ki te matasele tenei i taimi ko ‵teka.​—1 Koli. 10:11, 12.

⁷ E mafai ne pati sē ‵lei a nisi tino o fakama‵losi tatou. (Faitau te Teutelonome 1:26-28.) Fatoa oti eiloa ne faka‵sao a tino Isalaelu mai te ‵nofo pologa i Aikupito. Ko oti ne aumai fakavavega ne Ieova a mala e sefulu ki te fenua pule sauā tenā kae fakamuli ifo, fakatakavale ei a Falao mo tena kautau i te Tai ‵Kula. (Eso. 12:29-32, 51; 14:29-31; Sala. 136:15) Ko toka eiloa a tino o te Atua o ulu atu ki te Fenua o te Folafolaga. Kae i te taimi tāua eiloa tenā, ne kamata ei a tino Isalaelu o mui‵mui e uiga ki a Ieova. Ne māfua i te ā a te sē lava o te fakatuanaki? Ne ne ma‵fuli olotou loto ona ko li‵poti se ‵lei a nisi tino kolā ne uga ke olo o iloilo a te fenua. (Nume. 14:1-4) Se a te ikuga? Ne seki talia a te kautama kātoa ke ulu ki loto i te “fenua.” (Teu. 1:​34, 35) E mata, e talia ne tatou a pati sē ‵lei a nisi tino ke fakavāivāi ei ‵tou fakatuanaki i nisi taimi kae fai ei ke mui‵mui tatou ki faifaiga a Ieova ki a tatou?

8. Se a te mea ne fai ei ke kamata a tino o te Atua i aso o Isaia o ‵losi ki a Ieova olotou fakalavelave?

⁸ Kāti e fakavāivāi tatou ne fakalavelave mo tulaga faiga‵ta. (Faitau te Isaia 8:21, 22.) I aso o Isaia, ne oko a te fenua o Iuta ki tulaga faiga‵ta. Ne sikomia latou ne te fili. Ko faigata o maua a mea‵kai. A te tokoukega o tino ko fia‵kai. Kae tāua atu la, me ko poko te oge mea‵kai faka-te-agaga. (Amo. 8:11) I lō te ‵kilo atu ki a Ieova ke maua se fesoasoani i tulaga faiga‵ta konei, ne kamata latou o “muna ma‵sei” ki olotou tupu mo te lotou Atua. Ao, ko ‵losi ne latou ki a Ieova olotou fakalavelave. Kafai e pokotia tatou i fakalavelave faiga‵ta io me ko fakalavelave totino, e mata, ka fai aka foki tatou i ‵tou loto, ‘Ne nofo i fea a Ieova i te taimi ne manako ei au ki a ia?’

9. Kaia ne sae aka ei se kilokiloga sē tonu i tino Isalaelu i aso o Esekielu?

⁹ E se iloa ne tatou a te tonuga o mea katoa. Ona ko te sē iloa a te tonuga o mea katoa, ne mafau‵fau a te kau Isalaelu i aso o Esekielu i auala o Ieova “e se ‵tonu.” (Eseki. 18:29) E pelā me ko oti ne fakatulaga ne latou a latou eiloa pelā me ne famasino a te Atua, ko fakamaluga aka olotou fakamasinoga mai luga i a Ieova kae fakamasino a ia e ‵tusa mo olotou malamalama i mea e ‵tupu. Kafai e se malamalama katoatoa tatou i se tala i te Tusi Tapu io me ko te auala e ‵tupu ei a mea i ‵tou olaga totino, e mata, e isi se lagonaga i ‵tou loto i te auala o Ieova “e se tonu”?​—Iopu 35:2.

10. E mafai pefea o tautali se tino i te fakaakoakoga ‵se a Atamu?

¹⁰ Ko sē ‵losi ne tatou ki a tatou eiloa a ‵tou agasala totino mo mea ‵se ne fai. Talu mai te kamataga o te tala fakasolopito o tino, ne ‵losi atu ne Atamu ki te Atua a tena agasala totino ne fai. (Kene. 3:12) Faitalia me ne ofa ne Atamu mo te iloa tonu a te tulafono a te Atua kae e iloa ‵lei ne ia a ikuga ka maua i ei, ne ‵losi atu tou tagata ki a Ieova. Ana muna me ne tuku atu ne Ieova se avaga masei ki a ia. Talu mai te taimi tenā, ne tau‵tali atu eiloa a nisi tino i te fakaakoakoga a Atamu i te ‵losi atu ki te Atua a olotou mea ‵se totino e fai. E ‵lei ke fesili ifo tatou, ‘E mata, e fai au ne te ita mo te sē fiafia ki aku mea ‵se ne fai ke sē loto malie au ki tulaga o Ieova?’

11. Se a te akoakoga e mafai o tauloto ne tatou mai i a Iona?

¹¹ A tatou ko tō ‵saga ki a tatou eiloa. Ne isi se fakalavelave o te pelofeta ko Iona ki te fakaikuga alofa ne fai ne Ieova ki tino Nineva. (Iona 4:1-3) Kaia? Ko tō saga malosi tou tagata ki tena tulaga māfai ko sē taunu a tena folafolaga e uiga ki te fakamaseiga. E mata, e mafai foki tatou o ‵saga malosi ki a tatou eiloa tenā ko ita ei tatou ki a Ieova me fui aumai ne ia te gataga? Kafai ne talai atu ne tatou i te fia sefulu tausaga i te aso o Ieova ko pili mai, e mata, ko kamata o se lava ‵tou kufaki ki a Ieova māfai e fakatauemu mai a nisi tino ki a tatou i te folafolaga o mea i te Tusi Tapu?​—2 Pe. 3:3, 4, 9. 

TE AUALA KE ‵KALO KEA‵TEA MAI TE “ITA . . . KI A IEOVA”

12, 13. Kafai ko kamata o fakafesili ne tatou i ‵tou loto a nisi faifaiga a Ieova, se a te mea e se ‵tau o tiakina ne tatou?

¹² Ne a mea e mafai o fai ne tatou māfai e kamata o fakafesili ne tatou i ‵tou loto a nisi faifaiga a Ieova? Ke masaua me se mea valea ke fai penā. E fai mai a te suā ‵fuliga o te Faataoto 19:3: “A te sē iloa o te tagata e faka‵numi ei ana mea e fai kae taua atu ei a ia ki a Ieova.” (Byington) A koi masaua a te mea tenā, ke mafau‵fau tatou ki mea e lima kolā ka fesoasoani mai ke sē talia lele ne tatou a manavasega o te olaga ke fai ei tatou ke ‵losi atu ki a Ieova.

¹³ Ke mo a e tiakina ne koe tou fesokotakiga mo Ieova. E mafai tatou o ‵kalo kea‵tea mai te lagonaga sē ‵lei katoatoa ke ita ki te Atua māfai e fakatumau ne tatou se fesokotakiga ‵pili mo ia. (Faitau te Faataoto 3:5, 6.) E ‵tau o tali‵tonu fakamaoni tatou ki a Ieova. E se ‵tau foki tatou o fia ‵poto io me mafau‵fau ki a tatou eiloa. (Faata. 3:7; Fai. 7:16) I te faiga tenā, kāti ka sē ‵losi atu tatou ki a Ieova māfai e isi ne mea ma‵sei e ‵tupu.

14, 15. Se a te mea ka fesoasoani mai ke sē pokotia tatou i faipatiga sē ‵lei a nisi tino?

¹⁴ Ke mo a e talia a faipatiga sē ‵lei ke pokotia ei koe. E uke a pogai ne ‵tau ei o tali‵tonu a tino Isalaelu i aso o Mose me ka ‵taki atu eiloa latou mo te manuia ne Ieova ki loto i te Fenua o te Folafolaga. (Sala. 78:43-53) Kae i te taimi ne lagona ei ne latou a te li‵poti sē ‵lei a te tokosefulu sipai sē fakamaoni, “ko puli i a latou a tena mana malosi.” (Sala. 78:42) Kafai e mafau‵fau ‵loto tatou ki faifaiga a Ieova, kae masaua a mea ‵lei katoa ne fai ne ia mō tatou, ka fakamalosi aka eiloa ne tatou a ‵tou fesokotakiga mo ia. Kae ko te ikuga, ka sē talia ne tatou a mafaufauga sē ‵lei o nisi tino ke ‵vae ei tatou mai i a Ieova.​—Sala. 77:11, 12.

¹⁵ Kae e a māfai e isi se kilokiloga sē ‵lei a tatou ki ‵tou taina tapuaki? I tulaga penā, e mafai o pokotia a ‵tou fesokotakiga mo Ieova. (1 Ioa. 4:20) I te taimi ne fakafesili ei ne tino Isalaelu a te filifiliga mo te tulaga o Alona, ne kilo a Ieova ki ei e pelā me e mui‵mui atu ki a Ia. (Nume. 17:10) I se auala tai ‵pau, kafai ko kamata tatou o ita kae mui‵mui ki a latou kolā e fakaaoga ne Ieova ke takitaki a te vaega o tena fakapotopotoga i te lalolagi, e mafai o fakauiga i ei i a tatou ko fa‵meo ki a Ieova.​—Epe. 13:7, 17.

16, 17. Se a te mea e ‵tau o masaua ne tatou māfai e isi ne ‵tou fakalavelave?

¹⁶ Ke masaua me e se māfua mai i a Ieova a ‵tou fakalavelave. Faitalia me ne fulitua atu a tino Isalaelu ki a Ieova i aso o Isaia, koi manako eiloa a Ia o fesoasoani ki a latou. (Isa. 1:16-19) Faitalia me se a te fakalavelave e fe‵paki mo tatou, e fakamafanafana mai a te iloa ne tatou i a Ieova e atafai mai kae manako o fesoasoani mai ki a tatou. (1 Pe. 5:7) A te tonuga loa, ne tauto a ia me ka tuku mai ne ia te malosi e manakogina ke tumau tatou i te kufaki.​—1 Koli. 10:13.

¹⁷ Kafai e logo‵mae tatou i nisi vaega o fakamasinoga sē ‵tonu​—e pelā mo te tagata fakamaoni ko Iopu​—e ‵tau o masaua ne tatou me e se ko Ieova ne māfua i ei a te se ‵lei tenā. E takalialia a Ieova ki te sē fai mea tonu; e fiafia a ia ki te amiotonu. (Sala. 33:5) Ke fai tatou pelā mo te taugasoa o Iopu ko Eliu, telā ne fai mai: “Faka‵logo mai ki a au, koutou tagata malama‵lama! E mata e mafai ne te Atua Malosi o fai se mea ‵se?” (Iopu 34:10) I lō te māfua mai i ei a ‵tou fakalavelave, e tuku mai ne Ieova ki a tatou “a meaalofa ‵lei katoatoa.”​—Iako. 1:13, 17.

18, 19. Kaia e se ‵tau ei o fakalotolotolua tatou e uiga ki a Ieova? Fai se faka‵tusaga.

¹⁸ Ke mo a e fakalotolotolua e uiga ki a Ieova. A te Atua e ‵lei katoatoa, kae ko ana mafaufauga e ma‵luga atu i ‵tou mafaufauga. (Isa. 55:8, 9) Tela la, e ‵tau o fesoasoani mai a te loto maulalo mo te agamalu ke taku tonu atu ne tatou me e isi se tapulā ki ‵tou malamalama. (Lo. 9:20) Seāseā ko maua ne tatou a mea ‵tonu katoa e uiga ki se mea mautinoa. E se taumate ko oti ne oko ki a koe a te tonu o te faataoto tenei: “A te tino telā e muamua o faipati i te fono tulafono e mata tonu tena fakamatalaga, ke oko ki te taimi e vau ei te suā tino ki mua kae fesili atu ki a ia.”​—Faata. 18:17, New International Version.

¹⁹ Kafai e fai ne se taugasoa fakatuagagina o tatou se mea telā ne seki malamalama muamua tatou i ei io me mafaufau tatou me e sē se mea masani, e mata, ka ‵losi vave atu tatou ki a ia mō nisi mea ‵se? Io me ka fakamalosi aka tatou ke tali‵tonu ki ‵tou taugasoa, maise eiloa māfai ne iloa ne tatou a te tino tenā i tausaga e uke? Kafai e fai atu ne tatou ki ‵tou taugasoa sē ‵lei katoatoa a faifaiga a‵lofa penā, e sili atu la te lasi o te tali‵tonu o tatou ki ‵tou Tamana faka-te-lagi, telā e ma‵luga fakafia atu ana auala mo mafaufauga i lō tatou!

20, 21. Kaia e tāua ei ke ‵ti atu ne tatou te ‵se ki te tino e ‵tau o ‵ti ki ei?

²⁰ ‵Ti atu te ‵se ki te tino e ‵tau o ‵ti ki ei. Kaia e ‵tau ei o fai tatou penā? Ia, kāti a nisi fakalavelave o tatou ne fai eiloa ne tatou. Kafai ne fai ne tatou, e ‵tau o fakaasi ‵tonu ne tatou. (Kala. 6:7) Sa taumafai o ‵losi ki a Ieova mō ‵tou fakalavelave. Kaia e se ‵tau ei o fai penā? Mafaufau ki te fakaakoakoga tenei: Kāti e mafai o makini ‵ki eiloa a te tele o te motoka. Fakaataata i tou mafaufau i te okoga ki te pikoga kae fakatele ne te tino fakateletele te motoka ke siliga atu i te makini telā e manakogina, ko te mea eiloa ko fepaki tou tagata ki luga i se mea. E mata, e ‵tau o ‵losi a te fakalavelave ki te tino ne faite ne ia te motoka? Ikai, e se ‵tau! I se auala tai ‵pau, ne faite ne Ieova tatou mo te saolotoga ke fai a filifiliga. Kae ne tuku mai foki ne ia ki a tatou a fakatakitakiga ki te auala e fai ei ne tatou a fakaikuga ‵poto. Tela la, kaia e ‵losi ei ne tatou ki ‵tou Mafuaga a mea ‵se e fai ne tatou?

²¹ E tonu, e se ko fakalavelave katoa o tatou ne pogai mai i ‵tou mea ‵se totino mo faifaiga sē ‵tonu. A nisi mea e ‵tupu ona ko “te malaia e maua ne tino katoa.” (Fai. 9:11) I te fakaotiga loa, ke mo a eiloa e puli i a tatou i a Satani ko te māfuaga tonu o amioga ma‵sei. (1 Ioa. 5:19; Faka. 12:9) Ko ia ko te fili, kae e se ko Ieova!​—1 Pe. 5:8.

TAUSI FAKA‵LEI A TOU FESOKOTAKIGA TĀUA MO IEOVA

22, 23. Se a te mea e ‵tau o masaua ne tatou māfai ko loto vāivāi tatou ona ko ‵tou fakalavelave?

²² Kafai ko oko ki a koe a tulaga mo mea faiga‵ta, ke masaua a te fakaakoakoga a Iosua mo Kalepo. Ne aumai ne tāgata fakamaoni e tokolua konei se li‵poti ‵lei telā e ‵kese mai i nisi sipai e tokosefulu. (Nume. 14:6-9) Ne fakaasi mai ne lāua te fakatuanaki ki a Ieova. Ne oloolo sāle foki lāua fakatasi mo te kau Isalaelu i te koga lavaki i tausaga e 40. E mata, ne fa‵meo a Iosua mo Kalepo io me ita, o mafaufau pelā i te mea tenei e se ‵lei? Ikai. Ne tali‵tonu fakamaoni lāua ki a Ieova. E mata, ne fakamanuiagina lāua? Ao! E tigā ne ‵mate atu a te kautama kātoa i te koga lavaki, ne ulu atu eiloa a tāgata e tokolua konei ki loto i te Fenua o te Folafolaga. (Nume. 14:30) I se auala tai ‵pau, ka maua eiloa ne tatou a te fakamanuiaga a Ieova māfai “e se ‵fiu” tatou i te faiga o tena loto.​—Kala. 6:9; Epe. 6:10.

²³ Kafai e loto vāivāi koe ona ko fakalavelave, te tulaga sē ‵lei katoatoa o nisi tino, io me ko tou tulaga sē ‵lei katoatoa, se a te mea e ‵tau o fai ne koe? Saga tonu ki uiga fakaofoofogia o Ieova. Fakaataata i tou mafaufau a te fakamoemoega ne tuku atu ne Ieova ki a koe. Fesili ifo ki a koe eiloa, ‘Tefea te koga ka iku atu au ki ei māfai e se fesoasoani mai a Ieova?’ Ke ‵piki ‵mau faeloa ki a ia, kae ke mo a eiloa e talia ne koe tou loto ke ita ki a ia!