A te Taviniga ki te Atua se Vailakau ki a Ia!

I te taimi ne ‵kami ei a paenia e tokolua ki loto i se fale i Kenya, ne ‵poi lāua i te tamā foitino o se tagata e moe mai luga i te moega. Ko oko eiloa i te foliki o tena fatafata mo lima e toe‵toe. A koi fakamatala atu ne lāua ki tou tagata a te folafolaga a te Atua i “tino vae ma‵sei ka eva ki luga kae ‵saka,” ne fakamisikata ei a ia.​—Isa. 35:6.

Ne iloa aka ne paenia i a Onosemu, telā ko 30 tupu nei ana tausaga, ne fanau mai mo te osteogenesis imperfecta, se masaki ki ana ivi. Ana ivi e malu‵lu—ko to malu‵lu katoa, tela la, e mafai fua o ‵fati māfai e tai faka‵mafa malie atu ki ei. Ona ko te seai o se faka‵leiga io me se togafiti aoga ki te masaki, ne mafaufau a Onosemu ke nofo a ia mo te ‵mae i te nofoga fakatekateka i te ‵toega o tena olaga kātoa.

Ne talia ne Onosemu ke fai a tena akoga faka-te-Tusi Tapu. Kae ko te mātua o tou tagata e se fiafia ke kau a ia ki fakatasiga Kelisiano i a ia ma pakia kae fakaopoopo mai i ei a te ‵mae. Tela la, ne puke ne taina a mea e fai i fakatasiga, kae ne fakalogologo ki ei a Onosemu i te fale. Mai tua o te lima masina ne fai ei a tena akoga, ne fakaiku aka ne Onosemu ke fano a ia ki fakatasiga faitalia te fakamataku.

E mata, ne faopoopo aka te ‵mae o Onosemu i te fanoga ki fakatasiga Kelisiano? Ne ‵kese eiloa te mea ne iku mai i ei. E fai mai a Onosemu: “E foliga mai me ne galo a te ‵mae telā ne tumau i luga i a au i taimi o fakatasiga.” Ne manatu aka tou tagata me ko te fakamoemoega fou telā ne maua ne ia ko te pogai ne tai ‵lei ei a ia. Ne matea ne te mātua o Onosemu a te mafuli o tena tama kae ne fiafia ‵ki eiloa tou fafine telā ne talia ei ne ia ke fai tena akoga ki te Tusi Tapu. “A te taviniga ki te Atua se vailakau ki taku tama,” ko pati a tou fafine.

E seki leva, kae fai a Onosemu mo fai se tino talai seki papatiso. Fakamuli ifo, ne papatiso tou tagata kae ko galue nei pelā me se tavini fesoasoani. E tigā eiloa e se mafai ne tou tagata o fakaaoga ana vae mo tena lima e tasi, ne manako a Onosemu o fai a mea katoa e mafai ne ia o fai i te taviniga ki a Ieova. Ne manako tou tagata o paenia lagolago kae ne fakatalave a ia. Kaia? Me ne iloa ne ia me e ‵tau o fakalagolago a ia ki te suā tino ke usu a tena nofoga fakatekateka. I te taimi ne fakaasi ei ne ia ana lagonaga ki ana taina Kelisiano, ne tauto atu latou me ka ‵lago atu latou ki a ia. Ne fai ne latou te mea tenei, e fesoasoani atu ei ki a Onosemu ke paenia lagolago.

Ne ‵pau foki a te mea ne manavase ki ei a Onosemu i tena manakoga ke paenia tumau. I te taimi e tasi, ne maua ne ia te fakamalosiga telā ne manako a ia ki ei mai te tusi siki o te aso. A te tusi siki ko te Salamo 34:8: “Mafaufau ake la koe ki te aga‵lei o te Aliki [Ieova].” I te otiga ne mafaufau ‵loto ki te tusi siki tenā, ne fakaiku aka ne Onosemu ke fai a ia mo fai se paenia tumau. E fa aso e talai ei tou tagata i te vaiaso kae isi ne nāi akoga faka-te-Tusi Tapu ko ga‵solo ki mua i te feitu faka-te-agaga. I te 2010, ne kau tou tagata ki te Akoga a Paenia. Ko oko eiloa te fiafia o Onosemu i tena faiakoga se tino e tokotasi mai taina e tokolua kolā ne āsi muamua atu ki a ia!

Ko oti nei ne ‵mate a mātua o Onosemu, kae e tausi atu eiloa a taina mo tuagane i te fakapotopotoga ki mea e manako a ia ki ei i aso takitasi. Ko oko eiloa te fiafia o tou tagata ki fakamanuiaga katoa ko maua nei ne ia, kae kilo atu eiloa a ia ki mua ki te aso telā ka “seai eiloa se tino i luga i te ‵tou fenua e tagi i a ia e masaki.”​—Isa. 33:24.

[Ata i te itulau e 15]

[Ata i te itulau e 15]