E Mafai Pefea O Tumau Tatou I Te “Fakatalitali . . . Mo Te Loto Talitonu”?

“Ka fakatalitali au mo te loto talitonu.”​—MIKA 7:7.

KA TALI MAI PEFEA NE KOE?

Ne a mea e mafai o tauloto ne tatou mai te fakaakoakoga a Mika?

Ne a mea ‵tupu e fakatalitali tatou o ‵kilo ki ei?

Ne a nisi auala e mafai ei o fakaasi atu ne tatou a te loto fakafetai ki te  kufaki o Ieova?

1. Kaia e mafai ei o sē lava ‵tou loto kufaki?

I TE taimi ne fakatu aka ei te Malo faka-Mesia i te 1914, ne kamata i ei a aso fakaoti o te lalolagi a Satani. Kae ko te ikuga o te taua ne fai i te lagi, ne ‵pei ifo ne Iesu a te Tiapolo mo ana temoni ki lalo i se kogā koga i tafatafa o te lalolagi. (Faitau te Fakaasiga 12:7-9.) E iloa ne Satani i “tena taimi ko toetoe.” (Faka. 12:12) Tela la, a te “taimi . . . toetoe” tenā ko leva ‵ki eiloa, kae ko nisi tino ko mafaufau me ko to leva a aso fakaoti. A koi fakatali‵tali tatou ke gasuesue a Ieova, e mata, e sē lava te loto kufaki o tatou taki tokotasi?

2. Se a te mea ka faipati ki ei a te mataupu tenei?

² A te sē lava o te loto kufaki e mafai o fakamataku, me e mafai o fai ei tatou ke pati ‵pole. E mafai pefea o fakatalitali tatou mo te loto talitonu? Ka fesoasoani mai a te mataupu tenei ke fai tatou penā mai te tali aka o fesili kolā e ‵soko mai. (1) Se a te mea e mafai o tauloto ne tatou e uiga ki te loto kufaki mai te fakaakoakoga a te pelofeta ko Mika? (2) Ne a mea e ‵tupu ka fakamailoga ki ei a te gataga o te taimi e fakatalitali ei tatou? (3) E mafai pefea o fakaasi atu ne tatou a ‵tou loto fakafetai ki te loto kufaki o Ieova?

NE A MEA E MAFAI O TAULOTO NE TATOU MAI TE FAKAAKOAKOGA A MIKA?

3. I aso o Mika, ne fai pefea a fakanofonofoga i Isalaelu?

³ Faitau te Mika 7:2-6. Ne lavea ne te pelofeta a Ieova ko Mika a te gasolo ifo ki lalo o te tulaga faka-te-agaga o Isalaelu ke oko ki te taimi ko masei ei mai lalo i te pulega a te tupu masei ko Aasa. Ne fakatusa ne Mika a tino Isalaelu sē fakamaoni ki se “mouku” talatala io me se lakau makaikai. E pelā mo te mouku talatala io me ko te lakau makaikai e pakia i ei se tino māfai e sasale i luga i ei, e fai fakamasei ne tino Isalaelu sē fakamaoni so se tino telā e fesokotaki mo latou. Ko oko eiloa te lasi o te sē fakamaoni telā a kāiga ko mavae‵vae. Ne ‵talo atu a Mika mo te loto kātoa ki a Ieova me e se mafai ne ia o ‵fuli a fakanofonofoga i a ia eiloa. Tenā ne fakatalitali ei a ia mo te kufaki ke gasuesue te Atua. Ne talitonu a Mika me ka fesoasoani mai a Ieova i Tena taimi tonu.

4. Ne a mea faiga‵ta e fe‵paki mo tatou?

⁴ E pelā mo Mika, e ola eiloa tatou i va o tino kaima‵nako. E tokouke a tino “ka se loto fakafetai, ka se a‵lofa fakamaoni, ka galo atu te alofa masani i a latou.” (2 Timo. 3:2, 3) E fakafanoanoa mai ki a tatou māfai e fakaasi mai ne tino ga‵lue, taugasoa i te akoga, io me ko tuakoi se uiga kaimanako. Kae ‵lasi atu a mea faiga‵ta e fe‵paki mo nisi tavini a te Atua. Ne fai mai a Iesu me ka fe‵paki ana soko mo ‵tekemaiga i kāiga, kae ne fakaaoga ne ia a pati e tai ‵pau mo mea kolā e tusi i te Mika 7:6 ke fakamatala mai i ei a te malosi o tena fekau. “Au ne vau o faka‵tupu a mavaevaega,” ko pati a Iesu, “ko te tagata mo tena tamana, ko te tama fafine mo tena mātua, mo te tamafine telā ko avaga mo te mātua o tena avaga. E tonu, a fili o te tino ko tino eiloa o tena kāiga ‵tonu.” (Mata. 10:35, 36) Mafāga o mea faigata ke fa‵ki i fakatauemuga mo ‵tekemaiga mai tino o te kāiga kolā e se tasi tatou i te fakatuanaki! Kafai e fe‵paki tatou mo tofotofoga penā, ke mo a e takavale tatou i fakamalosiga a ‵tou kāiga. Kae ke na tumau tatou i te a‵lofa fakamaoni kae fakatali‵tali mo te kufaki ke faka‵lei ne Ieova a fakalavelave. Kafai e fakamolemole atu faeloa tatou mō tena fesoasoani, ka tuku mai ne ia ki a tatou a te malosi mo te poto e manakogina ko te mea ke mafai ne tatou o fa‵ki.

5, 6. Ne fakamanuia pefea ne Ieova a Mika, kae se a te mea ne seki molimau ne Mika?

⁵ Ne fakamanuia ne Ieova a Mika ona ko tena kufaki. Ne molimau ne Mika a te gataga o te tupu ko Aasa mo tena pulega matagā. Ne lavea ne tou tagata a te tama tagata a Aasa, te tupu ‵lei ko Hesekia, ko nofo i te nofoga aliki kae toe fakatu aka te tapuakiga tonu. Kae ko te fekau a Ieova e fakamasino ei a Samalia e auala i a Mika ne fakataunu i te taimi ne puke ei ne te kau Asulia a te malo ki matū o Isalaelu.​—Mika 1:6.

⁶ Tela la, ne seki molimau ne Mika a te fakataunuga o mea katoa kolā ne fai atu a Ieova ke ‵valo ne ia. Pelā me se fakaakoakoga, ne tusi mai a Mika: “I aso mai mua nei, te mauga tela e tu ei te Faletapu ka maluga atu i mauga katoa. Ka uke a malo e o‵mai ki ei, ka ko olotou tino ka fai aka penei, ‘Tou olo ki luga i te mauga o te Aliki [Ieova].’” (Mika 4:1, 2) Ko leva ne mate a Mika a koi tuai o fakataunu a te valoaga tenā. Ne fakaiku aka foki ne tou tagata ke tumau a ia i te alofa fakamaoni ki a Ieova ke oko ki te mate, faitalia me ne a mea e fai ne tino i ana tafa. I te feitu tenei, ne tusi mai a Mika: “A malo katoa e tapuaki kae faka‵logo ki olotou atua, ka ko matou e tapuaki kae faka‵logo ki te Aliki [Ieova] te motou Atua ki te se-gata-mai.” (Mika 4:5) Ne mafai ne Mika o fakatalitali mo te kufaki i taimi o fakalavelave me ne talitonu katoatoa tou tagata me ka fakataunu ne Ieova Ana tautoga katoa. Ne talitonu fakamaoni a te pelofeta ki a Ieova.

7, 8. (a) Ne a pogai e ‵tau ei o tali‵tonu tatou ki a Ieova? (e) Se a te mea ka fai ei ke vave oti atu a te taimi koi ‵toe?

⁷ E mata, e penā foki ‵tou tali‵tonu fakamaoni ki a Ieova? E isi se pogai ‵lei ke tali‵tonu tatou penā. Ko oti ne molimau ne tatou a te fakataunuga o te valoaga a Mika. I te vaitaimi o “aso mai mua nei,” e lau i miliona a tino mai fenua katoa mo matakāiga mo ‵gana ne ua‵lolo mai ki “te mauga o te Aliki [Ieova].” Faitalia me ne o‵mai latou mai fenua fai fili, a tino tapuaki konei ne “tuki olotou pelu ke fai mo mea fakamalū laukele,” kae ita ma “toe fakatokatoka foki mō se taua.” (Mika 4:3) Mafāga o tauliaga e maua ne tatou ke aofia i tino filemu o Ieova!

⁸ E malamalama ‵lei me e ma‵nako tatou ke fakaseai fakavave ne Ieova a te lalolagi masei tenei. Kafai e fakatali‵tali tatou mo te kufaki, e ‵tau mo tatou o ‵kilo atu ki fakalavelave i te auala telā e kilo atu ki ei a Ieova. Ko oti ne fakatoka ne ia te aso ka fakamasino ei ne ia a tino e auala i “se tagata telā ko oti ne fakasopo aka ne ia,” ko Iesu Keliso. (Galu. 17:31) Kae mai mua o te taimi tenā, e tuku mai ne te Atua a te avanoaga ki vaegā tino katoa ke “iloa tonu ne latou a te munatonu,” ke gasue‵sue e ‵tusa mo te iloaga tenā, kae ka ‵sao i ei latou. Ko ‵tu a ola o tino i se tulaga fakamataku. (Faitau te 1 Timoteo 2:3, 4.) Kafai e fakalavelave faeloa tatou i te fesoasoani atu ki nisi tino ke maua a te iloaga tonu e uiga ki te Atua, se mea vave eiloa o oti atu a te taimi koi ‵toe koi tuai o oko mai te fakamasinoga a Ieova. Ko pili fua o oko mai te gataga. Kafai ko oko mai, e fia‵fia eiloa tatou me e fakalavelave faeloa tatou i te galuega talai o te Malo!

NE A MEA ‵TUPU E FAKAMAILOGA KI EI A TE FAKAOTIGA O ‵TOU FAKATALI‵TALI?

9-11. E mata, ko oti ne fakataunu a te 1 Tesalonia 5:3? Fakamatala mai.

⁹ Faitau te 1 Tesalonia 5:1-3. I se taimi pili mai mua nei, ka fai aka ei a atufenua, “Filemu kae tokagamalie!” Ko te mea ke sē ‵po aka tatou ne te faka‵pulaga tenei, e manakogina “ke ala faeloa tatou kae tausi ‵tou mafaufau ke ‵lei.” (1 Tesa. 5:6) Ko te mea ke ala faeloa tatou i te feitu faka-te-agaga, ke toe onoono malie aka tatou ki mea ‵tupu kolā ne ‵tala mai i ei te auala ki te kalaga tāua tenei.

¹⁰ Mai tua o taua takitasi e lua a te lalolagi, ne ka‵laga i ei a atufenua mō se filemu. Mai tua o te taua muamua a te lalolagi, ne fakatu aka a te Malo ‵Kaufakatasi mo te fakamoemoega ke maua a te filemu. Fakamuli ifo, mai tua o te taua i te lua a te lalolagi, ne fakamoemoe a tino me ka aumai ne te Malo ‵Soko a te filemu ki te lalolagi. Ne fakamoe‵moe a takitaki o malo mo lotu me ka aumai ne fakapotopotoga konā a te filemu ki tino. Pelā me se fakaakoakoga, ne talia ne te Malo ‵Soko ke fai a te tausaga e 1986 e pelā me ko te Tausaga o te Filemu i te Lalolagi. I te tausaga tenā, ne maopoopo fakatasi a takitaki o atufenua mo lotu e uke mo te ulu o te lotu Katolika i Asisi, Italia, o ‵talo mō te filemu.

¹¹ E ui i ei, ne seki fakataunu a te valoaga i te 1 Tesalonia 5:3 i te kalaga tenā ki te filemu kae tokagamalie io me ko nisi mea aka penā. Kaia? Me i te ‘fakaseaiga fakapoi o latou’ e seki tupu.

12. Se a te mea e iloa ne tatou e uiga ki te faka‵pulaga o te “Filemu kae tokagamalie”?

¹² Ko oi ka fai ne ia a te kalaga tāua tenei “Filemu kae tokagamalie” i te taimi mai mua? Se a te tusaga ka fai ne takitaki o Fenua Lotu Kelisiano mo nisi lotu? Ka aofia pefea a takitaki o malo kesekese i te kalaga tenei? E seai se mea e fai mai i Tusitusiga Tapu ki a tatou. A te mea telā e iloa ne tatou me faitalia me fai pefea a te faka‵pulaga tenei io me pefea te tagi gali mai ke tali‵tonu tatou ki ei, a te mea tenā se mea fakaloiloi fua. Ka tumau eiloa a te olaga mua tenei i te pulega a Satani. Ko oko eiloa i te masei kae ka tumau eiloa penā. Mafāga o mea fakafanoanoa māfai se tino i a tatou e talitonu ki faka‵pulaga penei kae soli i ei a ‵tou tulaga faka-Kelisiano ko te sē ‵kau ki se feitu!

13. Kaia e taofi ei ne agelu a matagi fakamasei mea?

¹³ Faitau te Fakaasiga 7:1-4. A koi faka‵tali tatou ki te fakataunuga o te 1 Tesalonia 5:3, e taofi ne agelu ma‵losi a matagi fakamasei mea o te fakalavelave lasi. Se a te mea e faka‵tali latou ki ei? Ne fakamatala mai ne te apositolo ko Ioane a te mea e tasi​—ko te fakamailogaga fakaoti o “tavini a te ‵tou Atua.”a I te taimi eiloa e oti ei te fakamailogaga fakaoti tenā, ko ‵tala mai ei ne agelu a matagi fakamasei mea. Se a la te mea ka tupu mai tua ifo?

14. Se a te mea e fakaasi mai i ei a te pili mai o te fakaseaiga o Papelonia te Sili?

¹⁴ A Papelonia te Sili, te emupaea o lotu ‵se i te lalolagi, ka maua a tena taui i te fakaotiga. Ka sē mafai ne “tino mo vaitino mo fenua mo ‵gana” o ‵lago malosi atu ki a ia. Ko leva ne lavea ne tatou a fakailoga o te pili mai o tena fakaseaiga. (Faka. 16:12; 17:15-18; 18:7, 8, 21) A te tonuga loa, ko lavea atu nei a te sē ‵lago o tino ki ei mai te fakasalalauga o tala kolā e fakamasei ei a lotu mo takitaki lotu. E ui i ei, e se mafau‵fau a takitaki o Papelonia te Sili me ko ‵tu latou i se tulaga fakamataku. Ko oko eiloa te ‵se o latou! Mai tua o te faka‵pulaga ki te “Filemu kae tokagamalie!” ka ‵saga fakavave atu a malo fakapolitiki o te lalolagi a Satani ki lotu ‵se kae fakaseai atu latou. Ka sē toe lavea lele a Papelonia te Sili! E mautinoa ‵lei me e aoga eiloa a te fakatalitali mo te kufaki ki mea ‵tupu penā.​—Faka. 18:8, 10.

E MAFAI PEFEA O FAKAASI ATU NE TATOU A TE LOTO FAKAFETAI KI TE KUFAKI O TE ATUA?

15. Kaia ne seki gasuesue fakavave ei a Ieova?

¹⁵ Faitalia te uke o fakatauemuga a tino ki tena igoa, ne fakatalitali eiloa a Ieova mo te kufaki ki te taimi tonu ka gasuesue ei a ia. E se manako a Ieova ke fakaseai so se tino loto fakamaoni. (2 Pe. 3:9, 10) E mata, e penā foki ‵tou lagonaga? A koi tuai o oko mai te aso o Ieova, e mafai ne tatou o fakaasi atu ‵tou loto fakafetai ki tena kufaki i auala kolā e ‵soko mai.

16, 17. (a) Kaia e ‵tau ei o fesoasoani atu tatou ki tino kolā ko sē gasue‵sue i te feitu faka-te-agaga? (e) Kaia e tāua ei ke toe ‵foki mai a tino kolā ko sē gasue‵sue ki a Ieova?

¹⁶ Fesoasoani atu ki a latou kolā ko ‵mate i te feitu faka-te-agaga. Muna a Iesu me ka isi se fiafia i te lagi māfai ko maua mai te mamoe fua e tasi telā ne galo. (Mata. 18:14; Luka 15:3-7) E manino ‵lei i a Ieova e alofa malosi ki a latou kolā ne a‵lofa ki tena igoa, māfai foki eiloa ko sē tavini atu nei latou ki a ia. Kafai e fesoasoani atu tatou ki tino penā ke toe ‵foki mai ki te fakapotopotoga, ko fai eiloa ne tatou a Ieova mo te kau agelu ke fia‵fia.

¹⁷ E mata, e aofia koe i tino kolā ko se tavini atu nei ki te Atua? E se taumate ne faka‵mae atu se tino i loto i te fakapotopotoga ki a koe ko ala ei o fakagata a tou kau atu ki te fakapotopotoga a Ieova. Ona ko te mea ko tai leva eiloa te taimi, fesili ifo ki a koe eiloa: ‘E mata, ko aoga malosi atu nei toku olaga, kae fiafia malosi atu au? E mata, ne faka‵mae au ne Ieova, io me se tino sē ‵lei katoatoa fua? Kai fai aka eiloa ne Ieova se mea o faka‵mae au?’ A te tonuga loa, ne fai faeloa ne ia a mea ‵lei ki a tatou. Kafai foki e se ola tatou e ‵tusa mo ‵tou tukuatuga ki a ia, e talia ne ia ke fia‵fia tatou ki mea ‵lei kolā e tuku mai ne ia. (Iako. 1:16, 17) Ko pili fua o oko mai te aso o Ieova. Tenei te taimi ke toe ‵foki mai tatou ki lima a‵lofa o ‵tou Tamana faka-te-lagi mo te fakapotopotoga​—te koga fua e tasi e ‵sao ei tatou i aso fakaoti konei.​—Teu. 33:27; Epe. 10:24, 25.

18. Kaia e ‵tau ei o ‵lago atu tatou ki a latou kolā e fai te takitakiga?

¹⁸ ‵Lago atu mo te fakamaoni ki a latou kolā e fai ne latou te takitakiga. E pelā me se Tausi Mamoe, e takitaki kae puipui tatou ne Ieova. Ko oti ne filifili ne ia tena Tama mo fai te Tausi Mamoe Pule o te lafu mamoe. (1 Pe. 5:4) E tausi atu a toeaina i fakapotopotoga e silia atu i te 100,000 ki mamoe a te Atua. (Galu. 20:28) Kafai e ‵lago atu tatou mo te fakamaoni ki a latou kolā ne filifili aka ke fai te takitakiga, e fakaasi atu i ei ne tatou a ‵tou loto fakafetai ki a Ieova mo Iesu mō mea katoa ne fai ne lāua mō tatou.

19. E mafai pefea o ‵lago atu tatou te suā tino ki te suā tino?

¹⁹ Ke fakapilipili atu te suā tino ki te suā tino. Se a te uiga o te mea tenā? Kafai e taua atu te fili ki se kautau telā ne akoako faka‵lei, a sotia takitasi e ‵tele ki loto, e faī eiloa te tino ki te suā tino. I te auala tenā e faite ei ne latou se ‵pui telā e se mafai o maofa. Ko fakamalosi ne Satani auala e taua atu ei a ia ki tino o te Atua. E se tenei te taimi ke taua atu tatou ki ‵tou taina mo tuagane. Tenei te taimi ke ‵pili malosi atu tatou te suā tino ki te suā tino, ke sē ‵kilo atu ki tulaga sē ‵lei katoatoa o ‵tou taina mo tuagane, kae ke fakaasi atu a te loto talitonu ki te takitakiga a Ieova.

20. Se a te mea e ‵tau o fai nei ne tatou?

²⁰ Ke na tumau a tatou katoa i te ala faeloa i te feitu faka-te-agaga kae fakatalitali mo te kufaki. Ke faka‵tali tatou mo te kufaki ki te faka‵pulaga o te “Filemu kae tokagamalie!” mo te fakamailogaga fakaoti o te kau filifilia. Mai tua i konā, ka ‵tala mai ei ne agelu e tokofa a matagi fakamasei mea, kae ka fakaseai i ei a Papelonia te Sili. A koi fakatalitali tatou ke ‵tupu a mea konei, ke talia ne tatou a fakatonuga mai i a latou kolā ne filifili aka ke fai ne latou te takitakiga i te fakapotopotoga a Ieova. Ke ‵kau tasi o ‵teke atu te Tiapolo mo te kau temoni! Tenei te taimi ke faka‵logo ki te fakamalosiga a te faisalamo: “Ke ma‵losi kae loto ‵lasi, koutou katoa kolā e fakamoe‵moe ki te Aliki [Ieova].”​—Sala. 31:24.

[Fakamatalaga fakaopoopo]

[Ata i te itulau e 10]

[Ata i te itulau e 12]

E fai ne tino o Ieova so se taumafaiga ke fesoasoani atu ki tino kolā ko ‵mate i te feitu faka-te-agaga ke toe ‵foki mai ki a Ieova (Onoono ki palakalafa e 16, 17)

[Ata i te itulau e 14]

Tenei te taimi ke ‵kau tasi tatou o ‵teke atu ki a Satani mo te kau temoni (Onoono ki te palakalafa e 19)