Ne Ofo Atu a Latou Eiloa mo te Fia‵fia i Fenua o te Pasefika

A RENEÉ, se tuagane telā ko 30 tupu ana tausaga kae ne tupu aka i se kāiga Molimau loto finafinau i Ausetalia. “Ne olo atu matou i taimi e uke ki koga kolā ne manakogina i ei a tino talai o te Malo e tokouke,” ko muna a tou fafine. “Ne ma‵nako faeloa oku mātua ke maua ne matou a mea ‵gali kae fakafiafia! I te taimi ko tokolua ei aku tama‵liki, ne manako eiloa au ke maua ne laua te vaegā olaga telā ne tupu aka ei au.”

A te avaga a Renee ko Shane, se taina ko 30 tupu foki ana tausaga, e ‵pau foki ana fakamoemoega faka-te-agaga mo tena avaga. E fai mai a ia: “Mai tua o te fanauga o te mā tamaliki i te tokolua, ne fai‵tau ne matou se Faleleoleo Maluga e uiga ki te kāiga Molimau telā ne olo atu ki te feitu ki saute o te Pasefika i te lotou iōti o talai i te fenua ko Tonga.a Ne fakamalosi aka ne te mataupu tenā ke tusi atu matou ki te ofisa lagolago o Molimau a Ieova i Niusila mo Ausetalia o fesili atu ki koga kolā e lasi te manakoga i ei mō tino talai o te Malo.b Tela la, ne ‵kami eiloa matou ke olo atu ki Tonga—te koga telā ne fai‵tau ne matou i te mataupu tenā!”

I te taimi ne ‵nofo atu a Shane, Renee mo lā tama‵liki ko Jacob mo Skye i Tonga mō se tausaga e tasi, ne fai ne amioga takafia‵toa i konā ke ‵foki atu latou ki Ausetalia, kae ne masaua faeloa ne latou a te lotou fakamoemoega ke fakalauefa atu te lotou galuega talai. I te 2011, ne olo atu latou ki Norfolk Island, se fenua foliki o te Pasefika telā e nofo ki se 900 maila (1,500 km) ki te saegala o Ausetalia. Ne manuia pefea a taumafaiga a latou? Ne fai mai a Jacob telā ko 14 ana tausaga, penei, “E se tausi mai fua a Ieova ki a matou kae ne fai foki ne ia ke gali kae fakafiafia te motou galuega talai!”

KAUSAKI KE TAVINI ATU E PELĀ ME SE KĀIGA

E pelā mo Shane mo Reneé mo lā tama‵liki, ko oti foki ne ofo atu ne te tokoukega o kāiga Molimau a latou eiloa mo te loto fia‵fia ke tavini atu i koga kolā e “lasi te manakoga i ei.” Se a te mea ne fakamalosi atu ki a latou ke fai penā?

A Burnette mo Simone, se tauavaga ko taki 30 tupu lā tausaga, fakatasi mo lā tama‵liki tāgata ko Eston mo Caleb, kolā ko nofo ki te 12 mo te 9 tausaga, ne olo atu ki Burketown, se fa‵kai ‵mao i Queensland, i Ausetalia. “Ne masani o talai atu a Molimau i konā i taki tolu io me taki fa tausaga,” ko te fakamatalaga a Burnette. “E tokouke ‵ki a tino ne fia‵fia ki te tala ‵lei. Ne ma‵nako eiloa matou o tuku atu ki a latou te avanoaga ke fakatumau te faiga o olotou akoga faka-te-Tusi Tapu.”

A Mark mo Karen, kolā ko taki 50 tupu nei lā tausaga, ne tavini atu i nāi fakapotopotoga e pili atu ki Sydney i Ausetalia, a koi tuai o olo atu lāua mo lā tama‵liki e tokotolu, ko Jessica, Jim mo Jack, ki Nhulunbuy, se fa‵kai telā e keli ei te aulo i te Feitu ki Matū o Ausetalia. Ne fai mai a Mark: “E fiafia eiloa au ki tino, tela la, ne manako au o nofo atu i koga kolā e uke a mea e fai i te fakapotopotoga mo te galuega talai.” Kae ne fakalotolotolua eiloa a Karen ki te olo atu o latou ki konā. “Kae i te taimi ne fakamalosi mai ei a Mark mo nisi tino ki a au,” ko ana muna, “Ne loto fiafia ei au ke tofotofo aka ki ei. Nei la, ko oko eiloa i toku fiafia me ne fai eiloa ne au.”

I te 2011, ne toe olo atu a Benjamin mo Carolyn, fakatasi mo lā tama‵liki fafine e tokolua ko Jade mo Bria, kolā koi a‵koga i akoga kamata, mai Queensland i Ausetalia ki Timor-Leste, se fa‵kai foliki o Timor telā e aofia i motu fo‵liki o Indonesia. “Ne ga‵lue muamua eiloa māua mo Carolyn i Timor-Leste e pelā me ne paenia fakapito,” ne fai mai a Ben. “Ko oko eiloa i te gali o te galuega talai, kae ne fakatau fesoasoani eiloa a taina i konā. Se mea faka‵mae loto ke tiakina ne māua te fenua tenā. Kae ne fakaiku aka ne māua ke toe ‵foki atu ki konā. I te taimi ko isi ei ne mā tama‵liki, ne tai fakatalave mā palani, kae e seki ‵fuli eiloa te mā manakoga.” Ne toe fai mai a Carolyn: “E ma‵nako māua ke fai taugasoa mā tama‵liki ki misionale, tino ga‵lue i te Peteli, mo paenia fakapito kae ke lagona foki ne laua a tala ‵gali a latou i te feitu faka-te-agaga.”

FAKATOKA O OLO ATU

Ne fai atu a Iesu ki ana soko: “Ko oi te tino i a koutou telā e manako o fakatu se taoa kae e se nofo muamua ki lalo o galue tena ‵togi, ke iloa aka me e lava ana tupe ke fakaoti tena galuega?” (Luka 14:28) I se auala tai ‵pau, kafai e ma‵nako se kāiga o palani ke olo atu ki te suā koga, e tāua ‵ki eiloa te faiga faka‵lei o palani. Ne a mea tāua kolā e ‵tau o sau‵tala ki ei?

FEITU FAKA-TE-AGAGA: “E ma‵nako matou o tavini atu ki tino, kae ke sē fai pelā me ne amoga ‵mafa ki a latou,” ko pati a Ben. “Tela la, a koi tuai matou o ga‵sue, ne ma‵nako eiloa matou o fakamalosi aka te motou feitu faka-te-agaga. Ne momea aka foki te motou aofia i te galuega talai mo nisi galuega a te fakapotopotoga.”

Ne fai mai a Jacob telā ne taku atu muamua, penei: “A koi tuai o olo atu matou ki Norfolk Island, ne fai‵tau eiloa ne matou a tala ‵tonu e uke mai i Te Faleleoleo Maluga mo te Awake! e uiga ki kāiga kolā ne tavini atu i koga kolā e lasi te manakoga i ei. Ne sau‵tala fakatasi matou ki mea faiga‵ta kolā ne fe‵paki mo latou mo te auala ne tausi atu ei a Ieova ki a latou. Ne toe fai mai tena tuagane ko Skye telā ko 11 ana tausaga, penei: “E uke ‵ki aku ‵talo e fai sale i a au eiloa kae fakatasi foki mo Mami mo Teti!”

MEA TAU LAGONAGA: E fai mai a Reneé: “Ne faigofie ‵ki eiloa ke ‵nofo atu matou i Ausetalia, ona ko te ‵nofo pili atu o matou ki kāiga mo taugasoa ‵pili i se koga telā ne fiafia au ki ei. I lō te mafaufau faeloa ki mea ne tiakina ne au, ne mafaufau faeloa au ki te auala e mafai ei o aoga a te olo atu ki te suā koga ki toku kāiga.”

TUU MO AGANUU: E fai eiloa ne kāiga e tokouke a sukesukega ke fakatoka ei latou mō se koga fou. “Ne fai‵tau ne matou a fakamatalaga e uke e uiga ki Nhulunbuy,” ne fai mai a Mark. “Ne aumai eiloa ne taina atafai i konā a ‵kopi o nusipepa, kolā ne mafai o fesoasoani mai ke iloa ne matou a tuu mo faifaiga a tino kolā e ‵nofo atu i konā.”

Ne toe fai mai a Shane, telā ne fanatu ki Norfolk Island, penei: “A te ‵toe mea tāua i mea katoa, ne saga tonu au o fakaasi atu a uiga ‵gali faka-Kelisiano. Ne iloa ne au, me kafai au se tino fai mea tonu, loto maulalo, fakamaoni kae galue malosi, ka mafai eiloa o faigofie ke ola au i so se koga o te lalolagi.”

FAKAFESAGAI ATU KI FAKALAVELAVE

Ne fakaasi mai ne tino kolā ne olo atu ki “koga kolā e lasi te manakoga i ei” a te tāua ke uiga faigofie kae maua se kilokiloga ‵lei māfai e fakafesagai atu ki tulaga faiga‵ta kolā e seki fakamoemoegina. Mafaufau la ki nisi fakaakoakoga:

E fai mai a Renee: “Ne tauloto au ke talia a auala kese‵kese e fai ei ne au a mea. E pelā me se fakaakoakoga, kafai ko sou te tai i Norfolk, ko sē mafai ne vaka kako o ‵sai ki te uafu kae ko sē lava kae ‵togi ‵mafa a mea‵kai. Tela la kafai au ko kuka, ko iloa ne au o fakati‵titi.” Ne toe fai mai tena avaga ko Shane: “Ne mafai foki ne matou o fakati‵titi omotou tupe ke mafai loa o lava a mea mō te vaiaso.”

Ne fakaasi mai ne te lā tama ko Jacob se fakalavelave tai ‵kese. “I te motou fakapotopotoga fou, e tokofitu a tino i ei i tafa o matou, kae ne tino ma‵tua katoa. Tela la, e seai eiloa soku taugasoa e kautama mo au! Kae i te taimi ne ga‵lue fakatasi ei au mo tino ma‵tua i te galuega talai, ne fai fakamuli latou mo fai oku taugasoa.”

A Jim, telā ko 21 nei ana tausaga ne fakafesagai atu foki ki se tulaga tai ‵pau penā. “A te ‵toe fakapotopotoga tai pili mai ki Nhulunbuy e nofo ki se 450 maila (725 km) te ‵mao, tela la ne fai eiloa a te ukega o omotou fono o te fenua mo fono o te atufenua i konā. Ne olo fakavave atu eiloa matou ki konā ke mafai o fia‵fia fakatasi mo taina mo tuagane. E ‵kilo atu matou ki vaegā taimi penei e pelā me ko toe taimi tāua eiloa o te tausaga!”

“SE MEA FAKAFIAFIA EILOA ME NE AU‵MAI MATOU KI KONEI”

E fai mai te Tusi Tapu: “Ko te fakamanuiaga a te Aliki e fai ne ia koe ke maumea.” (Faata. 10:22) I te lalolagi kātoa, e tokouke eiloa a tino kolā ne olo atu ki koga kolā e “lasi te manakoga i ei” ko oti ne fakatalitonu ne latou a te ‵tonu o pati fakaosofia konā.

“Se fakamanuiaga eiloa ki mā tama‵liki ke olo atu matou o tavini i nisi koga,” ko pati a Mark. “Ne maua eiloa ne tino ma‵tua te loto talitonu me ka tausi mai eiloa a Ieova ki a latou kolā e fakamuamua ne latou a manakoga o te Malo. E se mafai o maua ne koe te loto talitonu tenā i so se koga.”

E fai mai a Shane: “Ko pili ‵ki toku fesokotakiga mo taku avaga mo aku tama‵liki. Kafai e fakalogologo au ki te auala e fakamatala mai ei ne latou a mea ne fai ne Ieova mō latou, e maua eiloa ne au te lotomalie tonu.” Ne ‵lago atu tena tama ko Jacob, i ana pati: “Ko oko eiloa i te uke o mea ‵gali ne maua ne au. Se mea fakafiafia eiloa me ne au‵mai matou ki konei!”