Ke Ga‵lue Fakatasi mo Ieova i Aso Takitasi

1. I auala fea e mafai ei o ga‵lue fakatasi tatou mo Ieova?

KO LEVA ne lavea ‵mao ne te Mafuaga me e mafai ne tino sē ‵lei katoatoa o ga‵lue fakatasi mo ia ke fakataunu ei ana fuafuaga. Faitalia eiloa te tulaga sē ‵lei katoatoa o tino i te taimi nei, koi mafai eiloa ne tino fakamaoni o ga‵lue fakatasi mo Ieova i aso takitasi. E pelā me se fakaakoakoga, e fai tatou e pelā me ne “tino ga‵lue a te Atua” mai te talai atu tena Malo kae fai a soko. (1 Koli. 3:5-9) Mafaufau aka la ki te tauliaga sili e maua ne tatou ke ga‵lue fakatasi mo te Mafuaga malosi katoatoa o te iunivesi i se galuega telā e tāua ‵ki eiloa ki a ia! Kae e se ga‵lue fakatasi fua tatou mo Ieova i te galuega talai mo te faiga o soko. I te mataupu tenei, ka suke‵suke eiloa tatou ki nisi auala e mafai o fai tatou penā—mai te fesoasoani atu ki ‵tou kāiga mo taina tapuaki, mai te uiga talimalo, mai te volenitia i galuega faka-te-agaga, mo te fakalauefa atu o ‵tou taviniga tapu.—Kolose 3:23.

2. Kaia e fai ei pelā me se mea valea ke fakatusatusa ne koe au mea e fai ke fakasalalau atu a fuafuaga a Ieova mo mea e fai ne nisi tino?

² I te taimi e sau‵tala ei tatou ki te mataupu tenei, ke sa fakatusa‵tusa a mea e mafai o fai ne koe mō Ieova mo mea e mafai ne nisi tino o fai. Masaua me e kese‵kese a mea e mafai ne tino o fai e ‵tusa mo olotou tausaga, ola ‵lei, fakanofonofoga, mo olotou atamai. Ne fakaosofia eiloa te apositolo ko Paulo ke fai mai: “Kae ke iloilo ifo a tino taki tokotasi ki ana galuega eiloa, kae ka isi se pogai ke fiafia ei a ia e uiga ki a ia eiloa, kae ke mo a ma fakatautau ki se isi tino.”—Kala. 6:4.

FESOASOANI ATU KI TOU KĀIGA MO TAINA TAPUAKI

3. Kaia e mafai o fai atu me i tino katoa kolā e tausi atu ki olotou kāiga e ga‵lue fakatasi mo te Atua?

³ E fakamoemoe a Ieova ke tausi atu a ana tavini ki olotou kāiga. E pelā me se fakaakoakoga, kāti e ‵tau mo koe o galue ke tausi atu ki ou tino pele i mea tau tupe. E tokouke a mātua e ‵nofo i fale ke tausi atu ki olotou tamaliki fo‵liki. Kae e tausi atu a nisi tama‵liki kolā ko ma‵tua ki olotou mātua kolā e fakamasaki‵saki. A mea konei ne galuega tāua. E fai mai te Muna a te Atua: “So se tino e se tausi ki tena kāiga, kae maise eiloa a tino o tena kāiga tonu, ko tiaki ne ia te fakatuanaki kae ko masei atu i lō te tino telā e seai sena fakatuanaki.” (1 Timo. 5:8) Kafai e maua ne koe a tiute konei, kāti e se mafai ne koe o fakaavanoa ne taimi e uke mō galuega faka-te-agaga e pelā mo te mea e manako koe ki ei. Kae mafaufau ‵loto ki te mea tenei! E fiafia a Ieova māfai e tausi atu koe ki tou kāiga.—1 Koli. 10:31.

4. E mafai pefea o fakamuamua ne mātua a manakoga faka-te-agaga i lō olotou manakoga totino, kae ne a mea ne iku mai i ei?

⁴ E ga‵lue fakatasi eiloa a mātua Kelisiano mo Ieova māfai e fakatoka ne latou a fakamoemoega faka-te-agaga mō olotou tama‵liki. E tokouke a tino kolā ne fai penā ne lavea fakamuli ne latou olotou tama‵liki tāgata mo tama‵liki fāfine e ga‵lue i te taviniga tumau i koga kolā e ‵mao mo latou. Nisi ne fai mo misionale; nisi e paenia i koga kolā e manakogina malosi i ei a tino talai; kae ko nisi e tavini atu i te Peteli. Kāti ko se mafai o ‵kau fakatasi latou e pelā me ne kāiga ona ko te nofo ‵mao. Kae ui i ei, e fakamalosi eiloa ne mātua loto fia‵fia konei olotou tama‵liki ke tumau i olotou tofiga konā. Kaia? E maua ne latou i ei a te fiafia lasi mo te lotomalie ke iloa atu me e fakamuamua ne olotou tama‵liki a te Malo i olotou olaga. (3 Ioa. 4) Kāti e ‵pau eiloa a lagonaga o mātua e tokouke konei mo Hana, telā ne fai mai me ne “tuku” atu ne ia tena tama tagata ko Samuelu ki a Ieova. E ‵kilo atu a mātua konei ki te ga‵lue fakatasi o latou e pelā me se tauliaga tāua. E se ma‵nako latou o fai a mea i se isi auala.—1 Samu. 1:28.

5. E mafai pefea o tuku atu ne koe se fesoasoani ki tino i tau fakapotopotoga? (Ke onoono ki te ata i te kamataga.)

⁵ Kafai e seai ne ou tiute tāua i te kāiga, e mata, e mata, e mafai o fesoasoani atu koe ki taina tapuaki kolā e tausi atu ki tino ma‵saki, tino ma‵tua, io me ko latou kolā e ma‵nako ki se fesoasoani? Kaia e se onoono koe ki tino i te fakapotopotoga kolā e ma‵nako ki se fesoasoani? Kāti e mafai o fakaavanoa ou taimi ke tausi atu ki se mātua o se tuagane Kelisiano telā ko matua, i te taimi e fai ei ne te tuagane tenā a nisi mea. Io me e mafai o fesoasoani atu koe ki a latou kolā e ma‵nako ki se fesoasoani mai te ofo atu ke ave ne koe latou ki fakatasiga, ke ‵togi olotou mea i sitoa, io me fai a nisi fekau a latou, io me asi atu ki se tino i te fakaimasaki. I te faiga tenā, e mafai eiloa o ga‵lue fakatasi koulua mo Ieova ke tali atu ki se ‵talo a se tino telā e manako ki se fesoasoani.—Faitau te 1 Kolinito 10:24.

KE UIGA TALIMALO

6. Ne a mea e aofia i te fakaasi atu o te uiga talimalo?

⁶ E lavea atu eiloa a tino ga‵lue a te Atua me i a latou e uiga talimalo. I te Tusi Tapu i te ‵gana Eleni, a te pati telā ne ‵fuli ki te “uiga talimalo” e fakauiga loa ki te “atafai ki tino ‵fou.” (Epe. 13:2; fml.) E fakamatala mai i te Muna a te Atua a tala kolā e akoako ei tatou ke fakaasi atu te vaegā alofa tenā. (Kene. 18:1-5) E mafai kae e ‵tau foki o ‵sala atu tatou ki avanoaga ke fesoasoani atu faeloa ki nisi tino, faitalia me e “kāiga tatou i te tapuakiga tonu” io me ikai.—Kala. 6:10.

7. Kaia e mafaufau ei koe ke fakaasi atu te uiga talimalo ki tavini tumau faima‵laga?

⁷ E mata, e mafai ne koe o ga‵lue fakatasi mo te Atua mai te fakaasi atu o te uiga talimalo ki tavini tumau kolā e asi mai? (Faitau te 3 Ioane 5, 8.) E tuku mai faeloa i vaegā taimi penā se avanoaga ke “fakatau fakamalosi.” (Loma 1:11, 12) Mafaufau ki te tala o Olaf. E fai mai a ia me i se sefulu tausaga ko ‵teka, ne seki ai se tino i tena fakapotopotoga ne mafai o fakanofo ne ia te ovasia o te fenua, telā e nofo taka. Ne fakamolemole atu a Olaf ki ana mātua kolā e se ne Molimau māfai e ‵lei ke nofo te ovasia o te fenua i te lotou fale. Ne talia ne lāua kae ne fai atu lāua me e ‵tau mo Olaf o moe i lalo i te nofoga. Ne tāua ‵ki eiloa ki a ia a te fakamafuliga tenā. “Tasi o vaiaso gali!” ko pati a Olaf. “Ne masani o alausu māua mo te ovasia o te fenua i taeao katoa kae sau‵tala ki mataupu ‵gali e uke i taimi e ‵kai ei i te taeao. Ne fai ne fakamalosiga kolā ne maua ne au ke manako au o kau atu ki te taviniga tumau.” I se 40 tausaga ko ‵teka, ne tavini atu eiloa a Olaf i te galuega fakamisionale.

8. Ne a pogai e fakaasi atu ei ne tatou a te atafai faitalia me e se foliga fiafia mai te tino i te kamataga? Fakamatala mai.

⁸ E mafai o fakaasi atu ne koe te alofa ki tino ‵fou i auala e uke, faitalia foki loa me e se fia‵fia mai latou ki au taumafaiga ke fakaasi atu te alofa. Mafaufau ki te fakaakoakoga tenei. I te taimi ne fai ei se akoga faka-te-Tusi Tapu, ne lavea ne se tino talai i Sepania me i tena tamaliki akoga ko Yesica, mai Ecuador, ne seki mafai o taofi aka tena tagi. Ne ‵sili atu te tino talai me kaia e tagi ei a ia. Ne fai atu a Yesica me koi tuai o tiakina ne ia tena fenua tonu o fanatu ki te suā fenua, ne mativa ‵ki a ia kae seki ai ne ana mea‵kai i se aso e tasi. A te mea fua ne mafai o tuku atu ne ia ki tena tamaliki fafine ne vai. Ne taumafai a Yesica o fakamoe tena tamaliki kae ‵talo foki mō se fesoasoani. E seki leva, kae ne asi atu se tokolua Molimau ki tou fafine, kae ne seki atafai atu a Yesica ki a lāua kae ne ‵sae ne ia te mekesini telā ne ofo atu ne tuagane konei. “E mata, tenei te mea‵kai e ma‵nako koulua ke tuku atu ne au ki taku tama?” ne ‵sili atu tou fafine. Ne taumafai a tuagane o fakamafanafana a ia, kae ne seki aoga lā taumafaiga. Fakamuli ifo, ne avatu ne lāua se ato mea‵kai kae tuku mai tua i te mataloa o tena fale. Ne otia te loto o Yesica ona ko faifaiga atafai konā kae ne seki ‵lei ana lagonaga i te taimi ne mafaufau ei tou fafine me ne seki saga tonu atu a ia i te taimi ne tali mai ei ne te Atua tena ‵talo. Kae nei la, ne fakaiku aka ne tou fafine ke tavini atu a ia ki a Ieova. Mafaga o ikuga ‵lei o te uiga kaimalie!—Fai. 11:1, 6.

VOLENITIA MŌ GALUEGA FAKA-TE-AGAGA

9, 10. (a) Ne a nisi galuega i aso o te Tusi Tapu ne manakogina i ei a volenitia mai tino o te Atua? (e) Ne a nisi galuega e mafai ne taina o fesoasoani i te fakapotopotoga i aso nei?

⁹ I taimi kese‵kese e ‵tusa mo tala fakasolopito a te kau Isalaelu i aso mua, ne manakogina eiloa a volenitia ke fai a galuega. (Eso. 36:2; 1 Nofo. 29:5; Nee. 11:2) I aso nei, e maua foki ne koe a avanoaga e uke ke tuku atu mo te loto fiafia a ou taimi, kope, mo tou atamai ke fesoasoani atu ki taina mo tuagane. Kae ka maua eiloa ne koe a te fiafia lasi mo fakamanuiaga e uke mai te galue volenitia.

¹⁰ E fakamalosi ne te Muna a te Atua a tāgata i te fakapotopotoga ke ga‵lue fakatasi mo Ieova mai te kausaki atu ki tauliaga i te taviniga mo te tausiga o te fakapotopotoga. (1 Timo. 3:1, 8, 9; 1 Pe. 5:2, 3) A latou kolā e fai penā, e ma‵nako o fesoasoani atu ki nisi tino i te feitu faka-te-foitino mo te feitu faka-te-agaga. (Galu. 6:1-4) E mata, kai ‵sili atu a toeaina me e manako koe o tavini atu e pelā me se taina fesoasoani io me fesoasoani atu i te fakatokaga o tusi, koga talai, galuega fakatū‵tu io me ko nisi mea aka? A latou kolā e tausi atu ki vaegā tiute penā ka fai atu me se mea fakafiafia eiloa ke fesoasoani atu ki nisi tino.

11. Ne aoga pefea ki se tuagane a va fakataugasoa ne ati aka ne ia i galuega faka-te-agaga?

¹¹ A latou kolā e volenitia i galuega faka-te-agaga e maua faeloa ne latou a taugasoa ‵fou. Mafaufau ki te fakaakoakoga a Margie, se tuagane telā ne galue i galuega fakatū‵tu o Fale Tapuaki i tausaga e 18. I tausaga konā, ne akoako faeloa ne ia a nai tuagane talavou. Ne fai te mea tenā e pelā me se auala ‵lei ke fakatau fakamalosi ei latou i te feitu faka-te-agaga. (Loma 1:12) I taimi faiga‵ta o tena olaga, ne maua faeloa ne Margie a fakamalosiga mai i a latou kolā ne ati aka ne ia ne va fakataugasoa mo latou i te taimi ne ga‵lue fakatasi ei mo ia i galuega fakatū‵tu. E mata, kai volenitia aka eiloa koe ke galue i se galuega fakatūtū? Faitalia me atamai koe io me ikai, e mata, e mafai o avanoa koe ki ei?

12. E mafai pefea o fesoasoani atu koe ki te matagaluega mō fakalavelave ‵tupu o te natula?

¹² I taimi o fakalavelave ‵tupu o te natula, e maua eiloa ne tino o te Atua a avanoaga ke ga‵lue fakatasi mo te Atua mai te fesoasoani atu ki olotou taina i auala aoga. E pelā me se fakaakoakoga, e ‵lago atu latou i mea tau tupe ki luga i tino kolā ne pokotia. (Ioa. 13:34, 35; Galu. 11:27-30) A te suā auala aoga, ko te fesoasoani atu ki te ‵fuluga mo te faitega o mea. A Gabriela, se tuagane mai Polani telā ne fakamasei tena fale i se lofiaga, ne maua ne ia a fakamalosiga i te taimi ne olo atu ei a taina mai se fakapotopotoga pili atu ki a ia o fesoasoani. “E se manako au o faipati e uiga ki oku kope katoa kolā ne ‵galo atu—a mea konā ne kope fua faka-te-foitino,” e fai mai a ia. “Kae e manako au o fai atu me ko uke atu aku mea ne maua i te taimi nei. Ne fakatalitonu mai ne te mea ne tupu me i te fai mo vaega o te fakapotopotoga Kelisiano se tauliaga tu ‵kese kae se pogai e tasi e maua i ei te fiafia mo te lotomalie.” E tenā foki te lagonaga ne maua ne tino e tokouke kolā ne maua ne latou te fesoasoani mai tua o se fakalavelave o te natula. Kae ko latou kolā e ga‵lue fakatasi mo Ieova ke tuku atu a te fesoasoani, e maua eiloa ne latou a te lotomalie sili.—Faitau te Galuega 20:35; 2 Kolinito 9:6, 7.

13. E mafai pefea o fakamalosi aka ne galuega fakavolenitia a ‵tou fesokotakiga mo Ieova? Taku mai se fakaakoakoga.

¹³ Ne maua ne Stephanie mo nisi tino talai a te fiafia mai te ga‵lue fakatasi mo te Atua e auala i te fesoasoani atu ki Molimau kolā ne olo atu ki Amelika e pelā me ne tino fakaa‵lofa. Ne fesoasoani atu latou ki te ‵salaga o fale mo kope o te fale mō tino i koga kolā ne fakamasei ne te taua. “Ne otia eiloa motou loto ona ko te lotou fia‵fia mo te loto fakafetai i te taimi ne lavea ei ne latou a te a‵lofa o te kautaina i te lalolagi kātoa,” ko pati a Stephanie. “Ne mafau‵fau a kāiga me ko matou ne fesoasoani atu ki a latou, kae ko te ‵tonuga loa, ko latou ne fesoasoani malosi mai ki a matou.” Ne toe fai mai a ia, “A te alofa, te ‵kau fakatasi, te fakatuanaki mo te fakalago‵lago ki a Ieova telā ne molimau ne matou, ne fakamalosi aka i ei te motou a‵lofa ki a Ieova, kae fai ei ke momea aka te lasi o te motou loto fakafetai mō mea katoa e maua ne matou e auala i tena fakapotopotoga.”

FAKALAUEFA ATU A TAU TAVINIGA

14, 15. (a) Se a te agaga telā ne fakaasi mai ne te pelofeta ko Isaia? (e) E mafai pefea ne tino talai o te Malo i aso nei o fakaakoako ki a Isaia?

¹⁴ E mata, e manako koe o ga‵lue fakatasi mo Ieova? E mata, ka loto fiafia koe o tavini atu ki a ia mai te gasue atu ki se koga telā e lasi te manakoga i ei mō tino ga‵lue i tena fakapotopotoga? E tonu, e se ‵tau mo tavini a te Atua o faima‵laga ‵mao atu mai olotou fale ke fakaasi atu te uiga kaimalie. Kae ne fai ne fakanofonofoga o nisi taina mo tuagane ke avanoa latou mō mea konā. E tai ‵pau eiloa olotou kilokiloga e pelā mo te pelofeta ko Isaia. I tena tali ki te fesili a Ieova “Ko oi ka uga atu ne au, kae ko oi la i a tatou ka fano?” ne tali atu a ia: “Tenei au! Uga atu au!” (Isa. 6:8) E mata, e mafai ne ou fakanofonofoga io me ko tou manakoga ke saga atu koe ki manakoga faka-te-agaga penā? Ne a mea e manakogina ke fai ne koe?

¹⁵ E uiga ki te galuega talai mo te faiga o soko, ne fai mai a Iesu: “Ko oko eiloa i te uke o fuataga e ‵tau o ‵kati, kae e mu‵tana a tino ga‵lue. Tela la, fakatagi atu ki te Matai o te galuega ke uga mai ne tino ga‵lue o ‵kati a fuataga.” (Mata. 9:37, 38) E mata, e mafai o tavini atu koe i se koga talai telā e manakogina malosi a tino talai i ei, kāti mai te fai pelā me se paenia? Io me e mafai o fesoasoani atu koe ki se tino ke fai penā? Ne mafau‵fau a taina mo tuagane e tokouke me i te ‵toe auala ‵lei ke fakaasi atu te alofa ki te Atua mo tuakoi ko te paenia i koga talai kolā e manakogina malosi i ei a tino ‵kati saito. E a, e mafai o mafaufau koe ki nisi auala ke fakalauefa io me momea aka te ‵lei o tau galuega talai? E maua eiloa ne tatou a te fiafia lasi mai te fai penā.

16, 17. Ne a nisi avanoaga e maua māfai e ma‵nako tatou o fakalauefa atu te galuega telā e fai ne tatou mō Ieova?

¹⁶ E mata, e loto fiafia koe o tavini atu i te Peteli io me fesoasoani atu i te galuega fakatū‵tu, e pelā me se tino galue sē tumau io me se nofo i te koga tenā? E isi se manakoga tumau mō tino taki tokotasi kolā e mafai o tavini atu ki a Ieova faitalia te koga e ‵tofi ki ei latou mo te galuega e tuku atu ke fai ne latou. Kāti e manakogina ke ga‵lue latou i se galuega telā e lasi te manakoga i ei, e tiga loa e atamai latou io me iloa ne latou o fai a nisi galuega aka. Kae e talia ne Ieova a te agaga loto fiafia o tino taki tokotasi ke ofo atu a latou mo te loto fia‵fia i so se koga telā e lasi te manakoga i ei.—Sala. 110:3.

¹⁷ E mata, e manako koe ki ne akoakoga fakaopoopo ko te mea ke toka ‵lei koe o fai te taviniga tapu? Kafai e penā loa, e mafai o fetaui ‵lei koe ke kau atu ki te Akoga mō Tino Talai o te Malo. A te akoga tenei e fakamasani ei a tāgata mo fāfine kolā ko ma‵tua faka-te-agaga kae ‵kau atu ki te taviniga tumau, ko te mea ke mafai ne latou o fakalauefa atu te lotou galuega talai. A latou kolā e tusi atu ke ‵kau ki te akoga tenei, e ‵tau o toka o talia ne latou so se tōfiga māfai ko oti latou mai te akoga tenā. E mata, e loto fiafia koe o fakaaoga a te avanoaga tenei ke kausaki atu ki nisi tauliaga tai uke atu i te taviniga?—1 Koli. 9:23.

18. Se a te mea e maua ne koe mai te ga‵lue fakatasi mo Ieova i aso takitasi?

¹⁸ E pelā me ne tino o Ieova, e gasue‵sue eiloa tatou o fakaasi atu te uiga kaimalie—telā se fakaasiga o te aga‵lei, te atafai mo te alofa—kae ke tausi atu ki nisi tino i aso takitasi. Kafai e fai ne tatou te mea tenā, ka maua ne tatou a te fiafia mo te filemu. (Kala. 5:22, 23) Faitalia ‵tou fakanofonofoga i te olaga, e mafai o maua ne tatou a te fiafia mai te fakaakoako atu ki te uiga kaimalie o Ieova kae ke fai pela me se tino taulia telā e ga‵lue fakatasi mo ia!—Faata. 3:9, 10.